Lumu luimpe mu miakulu 500

MUNKATSHI mua mvita ivua mienzeke mu Rwanda, bena mu kasumbu kakese ka bakudimunyi kampanda bakanyema nzubu yabu, bashiya bintu biabu. Kadi bakambula ordinatere yabu ya ku bianza ne kuya nayi muaba uvua banyemi ba mvita batudile. Bua tshinyi? Bua bamone mua kutungunuka ne kukudimuna mikanda idi yumvuija Bible mu tshiena Kinyarwanda.

Nsongakaji mukuabu wa ku Sud-Est kua Asia udi ufunda ku ordinatere munkatshi mua butuku nansha mudiye mutshioke, mumvue luya ne nzembu mikale ikoseka misangu ya bungi imupangisha bua kuenza mudimu wa dikudimuna bimpe. Bua tshinyi? Bua kutuma bintu bidiye ukudimuna pa dîba didi dikengela.

Bakudimunyi aba mbamue ba ku bantu 2 300 badi badifile ku budisuile bua kuenza mudimu eu mu miaba 190 pa buloba bujima. Badi ne bidimu kutuadijila ku 20 too ne ku 90, ne badi badifila ne muoyo mujima bua bantu bapete mibelu ya mu Bible mu miakulu 500.​—Buakabuluibua 7:9.

Badi balenga bantu ba miakulu yonso

Bidimu bishala ebi, Bantemu ba Yehowa mbavudije bikole bungi bua miakulu itubu bakudimuna mikanda yabu. Tshilejilu, mu 1985, bavua bapatula Tshibumba tshia Nsentedi mu miakulu 23 musangu umue, ne uvua mudimu wa dikema tshikondo atshi. Lelu badi bapatula Tshibumba tshia Nsentedi mu miakulu 190 musangu umue bua babadi ba pa buloba bujima balonge biena-bualu bidimu tshiapamue.

Mu miakulu mitue ku 50, Tshibumba tshia Nsentedi ke tshibejibeji tshimuepele ku bionso bitu bantu bapatula pabu, tshitu tshipatuke kakuyi ditshimanyika. Bua tshinyi? Bualu biapu bia dipatula mikanda bia mu matunga adibu bakula miakulu ayi kabiena bidifila bua kupatula mikanda mu miakulu ayi to. Kadi Bantemu ba Yehowa ba pa buloba bujima buobu, batu bafila makuta abu ku budisuile bua kupatula Bible ne mikanda idi imumvuija miaba yonso idiku dijinga.​—2 Kolinto 8:14.

Bantu batu bangata lumu luimpe lua mu Bible ne mushinga padibu balumvua mu muakulu wabu. Tshilejilu, matuku mashala aa mbapatule mikanda yetu mu muakulu wa Miskito, udibu bakula kudi bantu batue ku 200 000 ba mu ditunga dia Nicaragua. Mamu mukuabu uvua mulombeshe mukanda wa Miyuki ya mu Mukanda wa Nzambi * mu muakulu wa Miskito, ne mpasata wa muaba au uvuapu pavuawu mufike. Pakamonaye muvua mukanda au muimpe, wakajinga bua kuwangata. Mamu eu kubenga nawu nansha muvua mpasata mumuambile bua kushintakajaye mukanda ne kilo ya kafe 20.

 Mu bidimu dikumi bishala ebi, mbakudimune mikanda idi yumvuija malu a mu Bible mu miakulu mipite pa 12 ya mu Mexique bu mudi: Maya, Nahuatl ne Tzotzil. Mu bidimu bishadile ku 10 patupu, bungi bua bisumbu bia Bantemu ba Yehowa mbivule mu miakulu ya mu ditunga edi ne bia miakulu ya tumama, biumbukila ku 72 too ne ku 1 200 ne pa mutu. Bantemu ba Yehowa badi bakuna Dîyi dia Nzambi mu mioyo ya bantu kadi badi balekela Nzambi bua adikoleshe.​—1 Kolinto 3:5-7.

Nkudimuinu mupiamupia wa Bible mu miakulu 80

Bidimu bidi panshi ebi, Bantemu ba Yehowa mbenze mudimu mukole bua kupatula Bible wa Les Saintes Écritures​—Traduction du monde nouveau mujima anyi tshitupa mu miakulu 80. Ntshinyi tshidi bualu ebu bukebesha? Ntemu mukuabu wa mu ditunga dia Afrique du Sud wakamba bua Bible wa mu muakulu wa Tswana ne: “Eu mBible udibu bakudimune bimpe bitambe! Neavudije dianyisha dianyi bua Dîyi dia Nzambi. Ngakuilu udimu mmutekete bua kumubala ne udi usankisha.” Mubadi mukuabu wa muakulu wa Tsonga wa mu ditunga dia Mozambique wakafunda wamba ne: “Kuikala anu ne mikanda idi yumvuija Bible patupu kadi katuyi ne Bible kudi anu bu kuikala ne makubakuba ne mikenyi kadi kakuyi mvula. Kadi mvula wakaloka bua dipatula Bible wa Traduction du monde nouveau mu muakulu wa Tsonga.”

Mu mushindu wa dikema, bantu badi bakudimuna Bible ne bambila bantu lumu luimpe ludimu, badi bakumbaja mulayi kampanda wa kale. Yezu nkayende ke wakamba ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’​—Matayo 24:14.

[Mêyi adi kuinshi]

[Tablo mu dibeji 31]

(Bua kumona malu bimpe, tangila mu mukanda)

TRADUCTION DU MONDE NOUVEAU

Mujima anyi tshitupa

1950 1*

1970 7*

1990 13*

2000 36*

2010 80*

MIKANDA MIKUABU

1950 88*

1960 125*

1970 165*

1980 190*

1990 200*

2010 500*

*BUNGI BUA MIAKULU

[Tshimfuanyi mu mabeji 30, 31]

Bantu batue ku 2 300 badi benza mudimu wa kukudimuna mikanda idi yumvuija Bible mu miakulu 500

BÉNIN

SLOVÉNIE

ÉTHIOPIE

GRANDE-BRETAGNE