Yehowa udi wangata bantu bapuekele ne mushinga
Semena pabuipi ne Nzambi
Yehowa udi wangata bantu bapuekele ne mushinga
LUTAMBISHI, mutshiawudi, ne lukuka. Malu aa ke atu amueneka mu bantu batu bapeta mianzu minene panu apa. Ngikadilu ya buena eyi idiku mua kutusemeja pabuipi ne Yehowa Nzambi anyi? Nansha kakese, bualu Yehowa udi wangata ne mushinga bantu bapuekele badi bamutendelela. Ke tshidi tshimuenekela mu muyuki udi mu Nomba nshapita wa 12. Malu aa adi enzekela mu tshipela tshia Sinai, panyima pa bena Isalele bamane kupatuka mu Ejipitu.
Yayende wa Mose Mîyama ne tutuende Alona “bavua bajana” muakunyabu Mose. (Mvese wa 1) Pamutu pa buobu kuambila anu Mose malu abu, bidi bimueneka ne: bavua bamujana ne bantu bakuabu mu tshitudilu. Bu mudibu batela Mîyama kumpala, pamuapa yeye ke uvua mutuadije ne bijanu. Bualu bua kumpala buvuabu bajanyina Mose buvua bua mukaji wa bena Kushi uvuaye musele. Mîyama uvuaku mua kuikala wela meji ne: mukaji eu wa bisamba bikuabu uvua mua kulua kuangata muaba wende mu Isalele anyi?
Kadi kuvua malu makuabu kabidi avua majudije bijanu ebi. Mîyama ne Alona bavua bamba ne: ‘Bulelela, Yehowa wakasomba [wakayukila] anu ne Mose anyi? Yeye kena usomba [uyukila] netu kabidi anyi?’ (Mvese 2) Tshivua tshibenza ndijinga dia kuikala ne bukokeshi ne dia kuanyishibua kudi bantu anyi?
Mu bualu ebu, Mose kavua muandamune dîyi to. Bidi bimueneka ne: Mose wakashala mupuwe, utantamena ngakuilu wabu mubi au. Dishale diende mupuwe didi dishindika tshidi Bible wamba buende yeye ne: ‘wakatamba bantu bonso ba pa buloba ne kalolo.’ * (Mvese 3) Mose kavua ne bua kudibingisha to. Yehowa uvua umuteleja ne wakamuambuluisha.
Yehowa wakamona dijana Mose bu bavua bamujana yeye. Bualu yeye ke uvua musungule Mose bua kuikalaye ku mutu. Pavua Nzambi ukanyina bena bijanu aba, wakabambila muvuaye ne malanda mimpe ne Mose ne kubaleja muvuaye ‘uyukila nende mpala ne mpala.’ Pashishe Yehowa kukonka Mîyama ne Alona ne: ‘Nudi bapete dikima dia kujana Mose bua tshinyi?’ (Mvese wa 8, MMM) Pavuabu bajana Mose, bavua bushuwa bajana Nzambi ne bakumbanyine dinyoka. Bua dipanga diabu dia kanemu edi, tshiji tshia Nzambi tshivua ne bua kuikala kudibu.
Bu mudibi bimueneka ne: Mîyama ke uvua mua kuikala mutuadija bijanu ebi, wakapeta disama dia nsudi. Diakamue, Alona wakalomba Mose bua alombele Mîyama kudi Nzambi. Anji elabi meji: mpindieu bua Mîyama kumvua bimpe bidi bikengela bamulombele kudi muntu uvuabu benzele bibi! Mose wakenza tshivuabu bamulombe ne budipuekeshi. Pavua Mose mulombe Yehowa bua musangu wa kumpala, wakamusengelela bua ondope yayende. Mîyama wakumvua bimpe, kadi uvua ne bundu matuku 7 avuabu bamupatule mu tshitudilu.
Muyuki eu udi utulongesha ngikadilu idi Yehowa wangata ne mushinga ne idiye ubenga. Tuetu basue kusemena pabuipi ne Nzambi, tudi ne bua kuepuka lutambishi, mukawu ne dijinga dia kudileja. Yehowa mmunange bantu badi badipuekesha. Mmulaye ne: ‘Badi ne mitshima mipuekele nebapiane buloba, mioyo yabu neyisanke mu ditalala dikumbane.’—Musambu 37:11; Yakobo 4:6.
[Mêyi adi kuinshi]
^ tshik. 4 Kalolo anyi budipuekeshi nngikadilu mutambe bunene udi wambuluisha muntu bua kutantamena malu adi kaayi makane ne lutulu kayi ukeba kudisombuela.