Mushindu uudi mua kumvua Bible

3. Itaba diambuluisha dia bakuabu

Mukebuludi Edward John Eyre yeye wakitaba bua ba-Aborigène bamulongeshe mua kupeta mâyi mu mikuna ya lusenga ne ku mitshi ya tulafulu pavuaye usabuka mpata wa Nullarbor. Matuku pashishe, Edward wakashala ne muoyo bualu uvua muitaba bua bantu bavua bamanye ditunga bimpe bamuambuluishe.

ANU mudi tshilejilu etshi tshileja, bua kumanya bimpe bualu kampanda bukole, bitu bilomba misangu ya bungi diambuluisha dia muntu udi mubumanye bimpe. Bidi kabidi nanku patudi tutuadija kubala Bible.

Yezu uvua mumanye ne: bayidi bende bavua dijinga ne diambuluisha bua kumvuabu Bible. Musangu mukuabu Yezu ‘wakabulula mitshima yabu bua kujingululabu Mukanda wa Nzambi.’ (Luka 24:45) Yezu uvua mumanye ne: babadi ba Bible bavua dijinga ne diambuluisha bua kumvuabu malongesha adimu.

Nnganyi wakuambuluisha?

Yezu wakapesha bayidi bende balelela mudimu wa kuambuluisha bakuabu. Kumpala kua kubandaye mu diulu wakamba ne: ‘Ndayi bienu, nuvuije ba bisamba bionso bayidi, nubayishe mua kuenza malu onso angakanuambila.’ (Matayo 28:19, 20) Mudimu wa kumpala wa bena Kristo nkuyisha, mmumue ne: kumvuija bakuabu mushindu udibu mua kutumikila mikenji ya mu Bible dituku dionso mu nsombelu wabu. Bena Kristo balelela badi bambuluisha bantu bakuabu bua kumvuabu Bible.

Matuku makese panyima pa Yezu mumane kupesha bayidi bende mudimu eu, bualu kampanda bua dikema buakenzeka. Bible udi wakula bua munene kampanda wa mu Éthiopie uvua ubala tshitupa tshia mukanda wa Yeshaya. Uvua ubala mvese uvuaye kayi mumanye mua kumvuija. Bilondeshile Bible, mvese uvua mumukolela eu udi wamba ne: ‘Bakalua nende ku tshishipelu bu mukoko; bu muana wa mukoko udi upuwa kumpala kua mukoshi wa miosa, nunku yeye kena ubulula mukana muende; mu kudipuekesha kuende bakanyanga tshilumbu tshiende; nganyi neambe bua mulongo wende? Bakamunyenga muoyo wende pa buloba.’​—Bienzedi 8:32, 33; Yeshaya 53:7, 8.

Munene eu wakakonka Filipo muena Kristo uvua mumanye Bible bikole ne: ‘Muprofete udi wamba nganyi? Udi udiamba, anyi udi wamba muntu mukuabu?’ (Bienzedi 8:34) Muena Éthiopie eu uvua ne tshibidilu tshia kuya ku Yelushalema bua kutendelela, ne uvua mua kuikala musambile ukeba diambuluisha. Bidi bimueneka ne: uvua ubala ne disuminyina ne lungenyi luimpe. Kadi kavua umvua mvese uvuaye ubala au to. Wakalomba Filipo diambuluisha ne budipuekeshi.  Malu avua Filipo mumumvuije akamulenga ku muoyo, kumusakau bua kulua muena Kristo.​—Bienzedi 8:35-39.

Bantemu ba Yehowa badi batungunuka ne kuenza mudimu wa buena wa Filipo ne bena Kristo bakuabu ba kumpala. Badi bambuluisha bantu ku budisuila bua kumvuabu tshidi Bible wamba bimpe mu matunga mapite pa 235. Badi balongesha ku diambuluisha dia biena-bualu bia mu Bible bilongolola bimpe. Mu mushindu eu wa dilongesha Bible ku kakese ku kakese mudi kabidi dikonkonona dia tshidi Bible wamba bua tshiena-bualu kampanda. *​—Tangila kazubu “ Mandamuna makumbane bua nkonko ya mu Bible.”

“Bakangandamuna nkonko yanyi yonso”

Bantemu ba Yehowa bakatuadija kulongesha Steven, Valvanera ne Jo-Anne batuvua batele mu tshiena-bualu tshia kumpala Bible. Steven udi wamba ne: “Bivua binkemesha pavuabu bafuanyikija mvese kampanda bua kutokesha bualu bimpe, ne misangu ya bungi diandamuna divua anu mu mvese ayi. Kumpala kua meme kulonga Bible kakuvua muntu uvua mundeje bua kuenza nanku to. Biakangambuluisha bua kumanya ne: Bible kena ulomba miyuki ya munanunanu ne makokangana a patupu bua kumumvua to.”

Valvanera udi witaba pende bualu ebu. Udi wamba ne: “Malu onso avua Bantemu bandongeshe avua apetangana ne umvuika. Avua malelela ki nganu bualu bavua baalongesha nanku mu tshitendelelu, kadi bualu bavua baumvuija bimpe menemene.” Jo-Anne udi wamba pende ne: “Mushindu uvuabu bandamuna nkonko yanyi yonso ne Bible wakamfikisha bua kunemeka Bible, tuamba ne: kunemeka Nzambi muena mêyi adi mu Bible bualu uvua ne lungenyi lua kufundisha diandamuna dikumbane dia lukonko luonso luvua muntu mua kuela.”

Utuku mumanye Ntemu wa Yehowa kampanda anyi? Umulombe akuleje mushindu uudi pebe mua kulonga Bible. Wewe kuyi mumanye Ntemu wa Yehowa nansha umue, suaku ufunda mukanda uutume mu umue wa ku adrese idi mu dibeji 2 dia tshibejibeji tshiudi natshi ku bianza etshi. Nzambi yeye mukupesha nyuma wende, ne wewe muine ubala Bible ne meji mimpe ne muikale ne muntu udi mua kukuambuluisha, Dîyi dia Nzambi kadiakuikala kabidi bualu bukole kuudi to. Bushuwa, udi mua kumvua Bible!

[Mêyi adi kuinshi]

[Kazubu/​Tshimfuanyi mu dibeji 7]

 Mandamuna makumbane bua nkonko ya mu Bible

Bimue bia ku biena-bualu bitu Bantemu ba Yehowa bakuila padibu balongesha bantu bitu ne:

• Nzambi mmulongolola tshinyi bua buloba?

• Bafue batu penyi?

• Tudi mu ‘matuku a ku nshikidilu’ anyi?

• Bua tshinyi Nzambi mmulekele makenga?

• Mushindu wa kuikala ne disanka mu dîku?