UDI ne muana wa tshitende kuebe anyi? Biwikale nende, udi udimuene tshimue tshia ku bikondo bitambe buimpe bia dikola dia muanebe. Tshidi mua kuikala kabidi tshikondo tshia tunyinganyinga tua bungi. Ukadiku mumvue anyi mumone malu adi alonda aa anyi?

• Patshivua muanebe wa balume muana mutekete, uvua mukulamate bikole. Kadi lelu ukadiye tshitende, udi wenze muende muonso bua kuikala ne budikadidi bua bungi.

• Patshivua muanebe wa bakaji muana mutekete, uvua ukuambila malu ende onso. Mpindieu ukadiye nsongakaji, ukadi muenze diende ‘dingumba’ ne bende balunda, ne udiumvua bu udi kuyi muanyishila bua kubuela mu dingumba diabu.

Biwikale ne nsombelu wa nunku mu dîku diebe, kuambi ne lukasa luonso ne: muanebe watomboku kashidi to. Ntshinyi tshienzeka pashishe? Bua kuandamuna lukonko alu, tukonkononayi mushinga udi nawu tshikondo tshia bu tshitende mu dikola dia muanebe.

Kumbukila ku tshikondo tshitu muana uledibua too kubanda, malu ende onso atuye wenza atu a kumpala, tuamba ne: udi utuadija kuela bidia bia kumpala, kupatula muaku wa kumpala, udi uya mu kalasa bua musangu wa kumpala ne bikuabu. Baledi batu ne disanka padi bana babu bakola. Malu adi muana wenza adi aleja ne: muana udi wenda ukola.

Tshikondo tshia bu tshitende tshidi patshi tshikondo tshia dikola dia muana, nansha mutu bamue baledi batshimona tshia ntatu. Kanyinganyinga kabu kadi kumvuika. Amba tung, tshivua tatu ne mamu bindile pabu ne disanka, mbua kumona muanabu uvua muena butumike wangata bikadilu bibi anyi? Nansha nanku, tshikondo tshia bu tshitende ntshikondo tshia mushinga mu dikola dia muana. Mmushindu kayi?

Bible udi wamba ne: kudi tshikondo tshidi ‘mulume ushiya tatuende ne mamuende.’ (Genese 2:24) Mudimu munene wa tshikondo tshia bu tshitende ngua kulongolola muanebe bua dituku adi dia disanka ne ntatu. Tshikondo atshi, muanebe neambe anu bu mupostolo Paulo ne:  ‘Pangakadi muana, ngakadi ngakula bu muana, ngakadi ngela meji bu muana, ngakadi njingulula malu bu muana; katataka pangakulua muntu mukole, ngakulekela malu a buana.’​—1 Kolinto 13:11.

Ke tshidi muanebe wenza pende mu bidimu bia bunsonga; udi umbusha malu a buana ne ulonga bua kulua nsonga mukulumpe udi mudikadile ne mukumbane bua kushiya baledi bende. Mukanda mukuabu udi wamba ne: tshikondo tshia bu tshitende ntshikondo tshidi bana badilongolola bua kushiyangana ne baledi babu.

Nansha nanku, paudi uvuluka ne: muanebe “mutekete” wa balume anyi wa bakaji nealue mudikadile, bidi mua kukutatshisha mu lungenyi. Udi mua kudikonka:

• “Bikala muananyi wa balume utshidi ne lutatu lua kulama mu nzubu muende ne mankenda, munyi mualamaye nzubu mujima bimpe?”

• “Bikala muananyi wa bakaji kena ufika kumbelu kumpala kua dîba dimukosela, munyi muanemekaye programe wa ku mudimu bu yeye mua kukola?”

Wewe muikale udisunsula ne meji a nunku, vuluka bualu ebu: Budikadidi ka buena anu tshiibi tshidi muanebe ne bua kupitshila, kadi budi kabidi njila udiye wenzela luendu lua bidimu bia bungi bua kulujikija. Mpindieu, paudi mutangile bana wamanyi ne: ‘Bupote budi busuikibue mu mutshima wa muana.’​—Nsumuinu 22:15.

Kadi ku diambuluisha dia buludiki buimpe, muanebe udi pende mua kumueneka nsonga mukulumpe udi mumanye majitu ende muikale ne ‘meji ende mibidila a kujingulula nawu tshidi tshimpe ne tshidi tshibi, bualu bua wakalonda malu makane.’​—Ebelu 5:14.

Bua wewe kulongolola muanebe wa tshitende bua kuluaye muntu mukulumpe, udi ne bua kumuambuluisha bua ikale ne ‘meji’ bua wamona mua kudipangadijila malu mimpe. (Lomo 12:1, 2) Mêyi a mu Bible adi alonda aa neakuambuluishe bua kukumbaja bualu ebu.

Filipoi 4:5: ‘Bupole buenu bumanyishibue kudi bantu bonso.’ Muanebe wa tshitende udi mua kukulomba ne: neapingane kumbelu panyima pa dîba diutu mumukosela. Udi umubengela anu musangu umue. Muanebe udi mua kudidilakena ne: “Udi ungangata anu bu muana mutekete!” Kumpala kua kumuandamuna ne: “Mmomu, udi wenza malu anu bu muana,” konkonona malu adi alonda aa: Ba bitende badi bakeba budikadidi budi kabuyi bua tshipimu tshiabu, kadi baledi badi mua kuikala babashila kaba kakese ka kudienzela malu. Nuvua mua kuikala dîba dionso nupunge nabu anyi? Bua tshinyi kubenga kuelela malu adi muanebe wamba meji?

Kolosai 3:21: “Nuenu baledi, kanufikishi bana benu munda, bua kabateketshi mu maboko.”​—MMM. Bamue baledi badi balondolola bana mu tu malu tonso. Bua kupangisha bana babu bua kabenji bibi, badi mua kufika ne ku dibakandika bua kupatuka lupangu. Badi babasunguila balunda ne balondesha bionso bidibu bayikila. Kadi kuenza nanku, kakutu kupatula bipeta bimpe to. Kubafimpakaja mushindu eu, kudi mua kubasaka bua kukeba mua kusulakana; kuikala ne tshibidilu tshia kubakandika balunda kudi mua kubasaka bua kukebabu balunda bikole; kutentekela bidibu bayikila ne balunda babu kudi mua kubafikisha ku dikeba mishindu ya kuyikila nabu mu musokoko. Wewe udienzeja bua kuikala kulondolola tu malu tonso, neulue kuenza tshia tshianana ndekelu wa bionso. Bushuwa, bikala muanebe wa tshitende kayi ulonga mua kudipangadijila malu a meji patshidiye kuebe, mmunyi muamanyaye kuenza nanku panushiyaye?

Efeso 6:4: ‘Kanufuishi bana benu balela tshiji; nubadiundishe bimpe ne dibela ne didimuija bia Mukalenge.’ Tshiambilu etshi: “dibela ne didimuija” katshiena tshiumvuija anu kumuambila malu to. Tshidi tshiumvuija kulenga meji masokome a muana bua ikale ne bienzedi bimpe. Bualu ebu budi nangananga ne mushinga padi muanebe ulue tshitende. Tatu Andre wakamba ne: “Padi muanebe wenda ukola, udi ne bua kushintulula mushindu wa kumuambila malu, ne kutamba kueleshangana nende meji.”​—2 Timote 3:14.

Galatia 6:7: ‘Tshintu tshionso tshidi muntu ukuna, ntshiotshi tshiapoleye.’ Badi mua kulongesha muana ne dinyoka, pamuapa kumutuma mu nzubu anyi kumupangisha amue malu atuye musue kuenza. Bua kunyoka tshitende, udi ne bua kuanji kuela meji bikole bua bipeta bidi mua kupatuka.​—Nsumuinu 6:27.

Wewe muledi, udi mua kujinga bua tshikondo tshia bu tshitende tshikale bu tshibeba tshimpe tshidi muanebe mua kupitshila bimpe ne lukasa luonso ne kufikaye ku ndekelu. Kadi tshikondo atshi katshitu anu tshipepele to. Padi muanebe ulue tshitende udi ukupesha mpunga wa wewe ‘kuyisha muana mu njila udiye ne bua kuendela.’ (Nsumuinu 22:6) Wewe musue kuikala ne disanka mu dîku, londa mêyi a mu Bible.