PAMUAPA ukadi mupitshile ku Nzubu wa Bukalenge wa Bantemu ba Yehowa ba tshitupa tshiudi musombele, wewe kudikonka bua kumanya tshitubu benza munda amu. Utu mumanye ne: muntu yonso udi musue udi mua kubuela mu bisangilu bitubu benza ku lumingu luonso anyi? Batu bakidila benyi ne disanka dia bungi.

Kadi udi mua kudiela imue nkonko. Bua tshinyi Bantemu ba Yehowa batu badisangisha? Tshitubu benza mu bisangilu biabu ntshinyi? Ne tshitu benyi badi kabayi Bantemu ba Yehowa bamba bua bisangilu ebi ntshinyi?

Katshia ku tshikondo tshia kale, bantu bavua badisangisha bua kutendelela ne kulonga bua kumanya Nzambi. Bakambila bena Isalele kukadi mpindieu bidimu bipite pa 3 500 ne: ‘Nusangishe bantu bonso, ne balume ne bakaji ne bana bakese ne benyi badi munkatshi muenu, bua buonso buabu bumvue, bayile lungenyi, batshine Yehowa, Nzambi wenu, batumikile mêyi onso a mikenji eyi.’ (Dutelonome 31:12) Nunku, bansonga ne bakulumpe bonso bavua balongeshibue bua kutendelela Yehowa Nzambi ne kumutumikila.

Panyima pa bidimu bitue bu ku 1500 pavua tshisumbu tshia bena Kristo tshiledibue, bisangilu bivua anu mushindu munene wa ntendelelu mulelela. Mupostolo Paulo wakafunda ne: ‘Tuvulukangane bua kukoleshangana mu dinanga ne ngenzelu mimpe. Kanupumbishi tshisangilu tshienu bu mudi bakuabu benza, kadi nukoleshangane ku muoyo.’ (Ebelu 10:24, 25, MMM) Anu bu mutu malanda a mu dîku akola padi benamu basomba pamue bikole, ke mudi dinanga dikola pankatshi pa bantu badi basue kuenzela Nzambi mudimu padibu badisangisha bua kutendelela.

Biumvuangane ne tshidi mvese idi kulu ayi yamba, Bantemu ba Yehowa batu badisangisha misangu ibidi ku lumingu mu Nzubu yabu ya Bukalenge. Bisangilu bidi biambuluisha badi babuelamu bua kumanya mushinga wa kumvua ne kutumikila mêyi a mu Bible. Patuku mushindu, batu ne programe umue pa buloba bujima ne tshisangilu tshionso tshidi ne tshiatshi tshipatshila mu bualu bua Nzambi. Bantu batu babuela mu bisangilu ebi batu ‘basambibua munkatshi muabu’ ku miyiki mimpe itubu bayikila kumpala ne kunyima kua bisangilu ebi. (Lomo 1:12) Tshitubu benza mu tshisangilu tshionso ntshinyi?

Tshisangilu tshia kumpala tshitu bantu ba bungi babuela ntshia muyuki muangatshila mu Bible utubu benza bua bantu bonso nangananga ku ndekelu kua lumingu. Yezu Kristo uvua ne tshibidilu tshia kuenza miyuki ya patoke, umue wa kudiyi mmuyuki wakenzelaye pa mukuna. (Matayo 5:1; 7:28, 29) Mupostolo Paulo wakenza muyuki kumpala kua bena Atena. (Bienzedi 17:22-34) Bua kuidikija tshilejilu tshia Yezu ne Paulo, Bantemu ba Yehowa batu balongolole bisangilu mutubu benza miyuki bua bantu bonso, nansha badi mua kuikala babuele mu tshisangilu etshi bua musangu wabu wa kumpala.

Tshisangilu etshi tshidi tshituadija ne musambu muangatshila mu mukanda wa misambu wa Tutumbishayi Yehowa ne misambu. * Bantu bonso badi basue, badi bimana kulu ne bimba pabu musambu pamue nabu. Panyima pa disambila dîpi, mulongeshi mukumbane udi wenza muyuki mu minite 30. (Bala malu adi mu kazubu kadi kamba ne: “ Miyuki mimpe itubu benzela bantu.”) Muyuki wende mmuimanyine anu mu Bible. Mulongeshi au utu ulomba bantu bua kukeba mvese idiye ufila mu yabu Bible ne kulondesha dibala diayi. Wewe musue udi mua kuambula webe Bible anyi udi mua kulomba Ntemu wa Yehowa kampanda Bible kumpala kua tshisangilu atshi kutuadija.

Mu bisumbu bia bungi bia Bantemu ba Yehowa, panyima pa muyuki wa patoke batu  balonga mu dîba dijima Tshibumba tshia Nsentedi. Tshiena-bualu tshia dilonga edi (ditu dienzeka mu nkonko ne mandamuna) ntshiangatshila mu Bible. Tshisangilu etshi tshidi tshikankamija badi babuelamu bua kuidikija tshilejilu tshia bena Beloya ba mu tshikondo tshia Paulo ‘bakitabuja dîyi ne mitshima mimana kulongolola; bakadi badikebela mu Mukanda wa Nzambi.’​—Bienzedi 17:11.

Dilonga dia Tshibumba tshia Nsentedi didi dituadija ne musambu. Malu adibu balonga ne nkonko idibu bela kudi mulombodi wa dilonga edi mbifunda mu Tshibumba tshia Nsentedi tshia dilonga atshi. Wewe musue kupeta tshiebe, udi mua kulomba Ntemu wa Yehowa kampanda. Mona bimue bia ku biena-bualu bivuabu balonge matuku mashale aa: “Baledi, longeshayi bana benu ne dinanga,” “Kualukijidi muntu bubi ku bubi buende,” ne “Bua tshinyi makenga onso akadi pa kujika.” Nansha mudi tshisangilu etshi tshienzeka mu nkonko ne mandamuna, muntu udi wandamuna padiye musue ne batu batamba kuandamuna kudi bantu bakavua babale tshiena-bualu ne mvese idimu ne babielele meji kumpala kua dîba. Ku ndekelu kua tshisangilu etshi, batu bimba musambu ne benza disambila.​—Matayo 26:30; Efeso 5:19.

Dituku dikuabu mu lumingu, Bantemu ba Yehowa batu kabidi badisangisha ku Nzubu wa Bukalenge bua bisangilu bikuabu bisatu, bionso bisanga bitu bienza dîba 1 ne minite 45. Tshisangilu tshia kumpala ntshia Dilonga dia Bible dia tshisumbu, tshitu tshienzeka mu minite 25. Tshidi tshiambuluisha badi babuelamu bua kumanyabu Bible bimpe, bua kuakaja ngelelu wabu wa meji ne bikadilu biabu ne bua kulua bayidi bimpe ba Kristo. (2 Timote 3:16, 17) Tshisangilu etshi tshidi tshienzeka mushindu umue ne dilonga dia Tshibumba tshia Nsentedi mu nkonko ne mandamuna pa tshiena-bualu kampanda tshia mu Bible. Badi basue, badi bandamuna pabu. Dilonga dia Bible edi ditu nangananga dienzekela  mu mukanda kampanda anyi broshire kansanga mupatula kudi Bantemu ba Yehowa.

Bua tshinyi badi benza mudimu ne mikanda idi ne malu mangatshila mu Bible mu bisangilu biabu? Mu tshikondo tshia kale, ki nganu kubala kua Dîyi dia Nzambi nkayaku kuvua ne mushinga wa bungi to. ‘Bakadijingulula biakane; bakadijinguluila bantu kabidi, nunku buonso buabu bakumvua biakane.’ (Nehemiya 8:8) Mu bidimu bidi panshi ebi, mikanda idi yumvuija mukanda wa Yeshaya, wa Danyele, ne wa Buakabuluibua mmiambuluishe bantu bavua babuele mu tshisangilu etshi bua kumvua bitupa bia Bible ebi.

Panyima pa Dilonga dia Bible dia tshisumbu kudi kulonda Kalasa ka Mudimu wa Nzambi. Tshisangilu etshi tshidi tshienzeka mu minite 30 ntshilongolola bua kuambuluisha bena Kristo bua bikale ‘bayishi’ bimpe. (2 Timote 4:2) Tshilejilu, muanebe anyi mulunda webe ukadiku mukuele lukonko pa bidi bitangila Nzambi anyi Bible, kukukolelabi bua wewe kumupesha diandamuna dimpe anyi? Kalasa ka Mudimu wa Nzambi nekakulongeshe mua kufila mandamuna mimpe adi afumina mu Bible ku nkonko mikole. Nunku, netuambe petu anu bu muprofete Yeshaya wakamba ne: ‘Mukalenge Yehowa wakampa ludimi lua badi bayile bua meme kumanya mua kukuatshisha muntu mupungile ne dîyi.’​—Yeshaya 50:4.

Kalasa ka Mudimu wa Nzambi kadi katuadija ne muyuki muangatshila mu tshitupa kampanda tshia mu Bible tshikavuabu bamane kuambila bateleji bua kubala katshia ku lumingu lushale. Panyima pa muyuki ngamba-malu udi ulomba bateleji bua kuamba malu a mushinga avuabu bapete mu tshitupa tshivuabu babalombe bua kubala lumingu alu. Panyima pa diyukidilangana edi, balongi bavua badifundishe mu kalasa badi batuadija kuenza midimu ivuabu babapeshe.

Batu bapesha balongi mudimu wa kubala tshitupa kampanda tshia Bible bimanyine ku tshiakuidi anyi baleja mua kulongesha muntu tshiena-bualu kampanda tshia mu Bible. Panyima pa muyuki wonso, mufidi wa mibelu mupiluke udi wela mulongi tuasakidila bua malu mimpe avuaye muenze, mibelu eyi mmiangatshila mu mukanda wa Kalasa ka Mudimu wa Nzambi kadi kakuambuluisha. Pashishe, udi mua kuambila kabidi mulongi pa nkayende malu kampanda a tshidiye mua kuenza bua kulubuluka.

 Tshisangilu etshi tshimpe ntshilongolola bua kuambuluisha balongi ne bantu bonso badi babuelamu badi basue bua kuakaja dibala diabu, ngakuilu wabu ne ndongeshilu wabu. Padi Kalasa ka Mudimu wa Nzambi kajika, batu bimba musambu muangatshila mu mvese kampanda wa mu Bible, pashishe kulonda Tshisangilu tshia Mudimu.

Tshisangilu tshisatu badi batshibikila ne: Tshisangilu tshia Mudimu. Bantu badi babuela mu tshisangilu etshi badi balonga mua kulongesha Bible bimpe menemene ne malu adi alonda aa atu enzekamu: miyuki, manaya, kukonka bantu malu ne mandamuna a bateleji a imue nkonko. Kumpala kua Yezu kutuma bayidi bende mu mudimu wa diyisha, wakabasangisha ne kubapeshaye mibelu ya malu avuabu ne bua kuenza. (Luka 10:1-16) Yeye mumane kubalongolola bua mudimu wa buambi, bakapeta malu malenga bungi tshianana. Pashishe bayidi ba Yezu bakalua kumulondela malu mimpe avuabu bapete. (Luka 10:17) Bayidi bavua ne tshibidilu tshia kulondelangana malu mimpe avuabu bapete.​—Bienzedi 4:23; 15:4.

Tshisangilu tshia Mudimu etshi tshitu tshienzeka mu minite 35. Programe watshi utu upatuka ku ngondo yonso mu dibeji difunda ne: Mudimu wetu wa Bukalenge. Bimue bia ku biena-bualu bidi bilonda ebi bivua bipatuke mu Mudimu wetu wa Bukalenge: “Tendelelayi Yehowa mu dîku,” “Tshitutu tupinganyina bantu misangu ne misangu,” ne “Idikija Yezu Kristo mu mudimu webe wa diyisha.” Ku ndekelu kua bionso, batu bimba musambu, ne kudi muanetu ukadibu basungule bua kuenzaye disambila dia ndekelu.

Bisumbu bitu biditatshisha bua kuakidila bimpe muntu yonso udi ulua. Tshilejilu, Andrew uvua mumvue malu mabi a bungi avuabu bakula bua Bantemu ba Yehowa. Kadi pakaluaye mu bisangilu bua musangu wa kumpala, wakakema bua mushindu uvuabu bamuakidile. Andrew udi wamba ne: “Uvua muaba muimpe wa kusombela, biakankemesha muvua bantu bonso bikale batua mimuemue ne muvuabu banzakela.” Nsongakaji mukuabu wa tshitende wa mu ditunga dia Canada diende Ashel udi wamba pende ne: “Bisangilu bivua bimpe be! Bivua bipepele bua kubiteleja.”

José wa mu ditunga dia Brésil uvua mumanyike bikole bua dibunda dia bantu. Nansha nanku bakamubikila bua kubuela mu bisangilu ku Nzubu wa Bukalenge wa pabuipi nabu. Udi wamba ne: “Bantu bonso bavua mu Nzubu wa Bukalenge bakangakidila ne disanka nansha muvuabu bamanye bikadilu bibi bimvua nabi.” Atsushi wa mu ditunga dia Japon udi uvuluka ne: “Ndi ngitaba ne: bua musangu wa kumpala ungakabuela mu bisangilu bia Bantemu ba Yehowa, ngakadimona kamuyi munkumbanyine to. Nansha nanku, ngakamona ne: bavua bantu bimpe. Bavua badienzeja bua meme kudiumvua mudilekelele.”

Anu mudibi bileja kulu eku, dibuela mu bisangilu ku Nzubu wa Bukalenge didi mua kukuambuluisha bikole. Neulonge mua kumanya Nzambi, ne kudiambuluisha dia mibelu ya mu Bible iwapetamu, Yehowa Nzambi neakulongeshe ‘bua wewe kuikala ne diakalengele.’​—Yeshaya 48:17.

Nzubu ya Bukalenge ya Bantemu ba Yehowa mmikangula bua bantu bonso, ne kabatu bendesha tubondo tua makuta mu bisangilu biabu to. Udi musue kubuela mu tshisangilu kampanda ku Nzubu wa Bukalenge udi mu kartshie kaudi musombele anyi? Tudi tukubikila ne disanka.