Muntu kena ne muoyo anu bua bidia nkayabi: Mumvua mupanduke mu buloko bua bena Nazi

Muyuki mulonda kudi Joseph Hisiger

Ngakakonka muena buloko nanyi mukuabu ne: “Udi ubala tshinyi?” Yeye kungandamuna ne: “Ndi mbala Bible,” e kusakidilaye kabidi ne: “Wewe musue kumuangata, mpesha biakudia biebe bia lumingu elu lujima.”

NDI mulela mu dituku 1 dia ngondo 3 tshidimu tshia 1914 mu tshimenga tshia Moselle mu ditunga dia Allemagne. Panyima pa mvita ya kumpala ya buloba bujima, bakapingajila ditunga dia France tshimenga tshia Moselle. Mu tshidimu tshia 1940 bakatshipesha kabidi bena Allemagne. Pashishe, pakajika mvita mibidi ya buloba bujima mu tshidimu tshia 1945, bakatshipesha kabidi bena France. Misangu yonso eyi, ditunga dianyi divua anu dishintuluka, ngakalonga mua kuakula Mfualansa ne tshiena Allemagne.

Baledi banyi bavua bena Katolike ba dilambu. Dilolo dionso kumpala kua kulala tuvua tutua binu panshi dîku dijima bua kusambila. Mu Dia lumingu ne mu matuku a dikisha a ditunga tuvua tuya mu misa. Mvua munange kutendelela bikole ne mvua mu tshisumbu tshia balongi ba malu ba mu Katolike.

Ngakalua muenji wa mudimu wa dilambu wa Bantemu ba Yehowa

Mu 1935 Bantemu ba Yehowa babidi bakalua kukumbula baledi banyi. Muyuki wabu uvua muimanyine pa dibuelakana dia bitendelelu mu mvita ya kumpala ya buloba bujima. Panyima pa muyuki au, meme kujinga bua kumanya malu a bungi a mu Bible, mu tshidimu tshia 1936 meme kulomba mumpere bua ampeshaku Bible. Wakangambila ne: mvua ne bua kulonga tulasa tua teoloji bua meme kumumvua bimpe. Nunku, biakampa kabidi dijinga dia kupeta Bible ne kumubala.

Mu ngondo wa 1 wa tshidimu tshia 1937 muena mudimu nanyi mukuabu Ntemu wa Yehowa, diende Albin Relewicz, wakatuadija kungambila malu atu Bible ulongesha. Meme kumukonka ne: “Udiku mua kuikala ne Bible anyi?” Yeye kuitaba, pashishe kundejaye dîna dia Nzambi ne: Yehowa, difunda mu Bible wa Elberfelder wa mu tshiena Allemagne wakampeshaye. Meme kubanga kumubala ne disanka dionso ne kutuadija kubuela mu bisangilu bia Bantemu bivua bienzekela mu tshimenga tshia Thionville tshivua netu mutumba.

Mu ngondo wa 8 mu 1937 meme kuya kufila Albin ku mpuilu anyi bisangilu binene bia Bantemu bafumine mu matunga a bungi uvua wenzekela mu tshimenga tshia Paris. Ke kungakatuadijila kuyisha ku nzubu ne ku nzubu. Ki nkunenge mutantshi mule to, meme kutambula, ne kumbangilu kua 1939 meme kudifila bikole mu mudimu wa kuyisha. Bobu kuntuma mu tshimenga tshia Metz. Pashishe mu ngondo wa 7 bobu kumbikila bua kuenza mudimu ku biro bia Bantemu ba Yehowa bia mu tshimenga tshia Paris.

Makenga a mu tshikondo tshia mvita

Ngakenza mudimu ku biro matuku makese, bualu mu ngondo wa 8 mu 1939 bakambikila bua kushala musalayi wa bena France. Bu muvua kondo kanyi ka muoyo kabenga bua kuluangana, bakangela mu buloko. Mu ngondo muitanu wa tshidimu tshiakalonda pamvua mu buloko, bena Allemagne  bakela bena France mvita. Mu ngondo muisambombo bobu kutshimuna bena France, meme kulua tshiakabidi muena Allemagne. Pakandekelabu mu ngondo wa 7 wa 1940, ngakapingana kudi baledi banyi.

Bu muvua bena Nazi batukokesha, tuvua tudisangisha mu musokoko bua kuenza dilonga dia Bible. Muanetu wa bakaji wa dikima Maryse Anasiak ke uvua ututuadila Tshibumba tshia Nsentedi, mvua nya kutuilangana nende mu nzubu wa kupanyina mampa wa Ntemu mukuabu. Too ne mu 1941 mvua ngepuka ntatu ivua Bantemu bakuabu bapetangana nayi mu Allemagne.

Pashishe, dimue edi bampulushi ba Gestapo kuluabu kuetu. Pakangambila mfumuabu muvuabu bakandike midimu ya Bantemu, wakankonka ni mvua musue kushala anu Ntemu. Pamvua mumuandamune ne: “Eyowa,” kungambilaye bua meme kumulonda. Mamuanyi kukulukaye kujimija lungenyi bua buôwa. Pakamona mfumu wa bampulushi ba Gestapo nanku, wakangambila bua nshale ntangile mamu.

Mu ditanda dimvua ngenza mudimu, tshivua ngela mfumuanyi wa mudimu muoyo wabu wa ditunga uvuabu belangana wa “Heil Hitler!” to. Ngakabenga bua kushala muena mu tshisumbu tshia politike tshia bena Nazi. Dituku diakalonda, bakankuata kudi bampulushi ba Gestapo. Pavuabu bandumbuluisha, meme kubenga bua kutela mêna a Bantemu bakuabu. Mukalenge uvua undumbuluisha au kuntutaye tshitaku tshia tshingoma ku mutu bikole, lungenyi kunjimina. Mu dia 11 ngondo wa 9 mu 1942, kabadi kanene ka Sondergerich ka ku Metz kumfundilaku tshibawu tshia bidimu bisatu bia buloko kangamba mumvua “ngenda ngenzela sosiete wa Bantemu ba Yehowa ne Balongi ba Bible kampanya.”

Panyima pa mbingu ibidi, bobu kungumbusha mu buloko bua ku Metz kuyabu nanyi mu kamponyi ka midimu mikole ka Zweibrücken. Meme kutuadija kuenza mudimu mu tshisumbu tshia balongolodi ba njanja. Tuvua tushintulula njanja ivua ne bujitu, tuyikanga ne malu, tutangalaja ne nsoka mu njanja. Bavua batuabanyina pa muntu dikopo dia kafe ne grame 75 ya diampa mu dinda ne tshibakudi tshia nsupu mu munya ne dilolo. Pashishe kuntumabu mu buloko mu tshimenga tshivua pabuipi ne tshituvua, kumpeshabu mudimu mu nzubu wa ditela dia bilatu. Panyima pa ngondo ya bungi, kumpingajabu mu buloko bua Zweibrücken bua kuya kudima.

Mvua ne muoyo kabiyi anu bua biakudia nkayabi

Mvua mu kazubu ka buloko ne nsongalume mukuabu mufume mu Pays-Bas. Bu mumvua  mulonge bua kuakula muakulu wabu ndambu, nkavua mmuyisha. Wakalonga Bible ne kutuadijaye kutumikila mikenji ya Nzambi, yeye kundomba bua kumutambuisha mu musulu. Pakapatukaye mu mâyi, kungupukilaye ungambila ne: “Joseph, ndi mpindieu muanenu mu ditabuja!” Pakampingajabu ku mudimu wa njanja, bakatutapulula nende.

Meme kutuadija kusomba pamue ne muena Allemagne mukuabu mu kazubu ka buloko. Dimue dituku dilolo yeye kutuadija kubala Bible wa mu bukese! Kungambilaye bua tuetu kushintakaja nende Bible au ku biakudia bianyi bia lumingu lujima. Meme kuitaba ne: “Mbimpe!” Nansha muvuabi bindomba bua kudipangisha biakudia bia lumingu lujima, tshiakanyingalala to. Meme kutuadija kumvua tshidi mêyi a Yezu a ne: ‘Muntu kikadi biende ne muoyo bualu bua bidia nkayabi, ikale biende nawu bualu bua mêyi onso adi apatuka mukana mua Nzambi.’​—Matayo 4:4.

Bu munkavua ne Bible, lutatu luvua anu lua mua kumulama. Pa kumbusha bena buloko bakuabu, bavua bakandike Bantemu bua kabikadi ne Bible to. Nunku mvua mmubala mu musokoko butuku ne mmusokoka muinshi mua mbulankete. Mu munya, mvua ngendakana nende musokoka muinshi mua mutelu. Tshivua mua kumushiya mu nzubu to, bualu bavua mua kumuangata kudi bavua bashala bakalakasamu.

Dimue dituku patuvua baya kuela mpelu, ngakavuluka ne: mvua mushiye Bible wanyi mu nzubu. Pangakapingana dilolo adi lukasa mu kazubu kanyi, ngakasangana Bible mumana kuambula. Ke meme kuenza disambila, e kuya kumonangana ne mulami wa buloko buetu kumuambila ne: kudi muntu udi muangate umue wa ku mikanda yanyi, ndi musue awumpingajile. Kavua mutambe kuteleja bimpe to, ke meme kuangata Bible wanyi. Meme kusakidila Yehowa ne muoyo mujima!

Musangu mukuabu, bobu kuntuma bua kuowa mâyi. Pankavua mvula bilamba bia manyanu, ngakamatshisha Bible panshi ne budimu buonso. Muvua uvua utulama kayi mutangile, meme kusakila Bible mu tshiowedi ne dikasa. Meme kumusokokamu kumpenga pamvua ngowa mâyi. Pangakapatuka mu tshiowedi, ngakamusaka kabidi anu ne dikasa, e kumubueja mu bilamba bivua bitoke.

Buimpe ne bubi bua mu maloko au

Dituku dikuabu mu dinda mu 1943 pavua bena buloko bele mulongo mu lupangu lua buloko, ngakamona Albin. Bakavua bamukuate pende. Yeye kuntangila anu bu muntu mumanya, e kuditekaye tshianza pa muoyo bua kundejaye muvuaye muanetu. Pashishe kunkupaye tshianza undeja muvuaye ne bua kumfundila mukanda. Dituku diakalonda, kumatshishaye dibeji pavuaye upita muaba umvua. Kadi muvua uvua utulama mudimone, bakatuela bubidi buetu mu tumaloko tua muntu nkaya munda mua mbingu ibidi. Tuvua tudiamu anu diampa ditalalangane mukana ne mâyi, tulala pa mabaya katuyi mbulankete wa kudibuikila to.

Pashishe, bakalua kuntuma ku buloko bua ku Siegburg kungakabanga kuenza mudimu mu ditanda dia biamu. Mudimu au uvua unzengeja bikole, kadi bavua bampa anu biakudia bikese. Butuku meme kutuadija kulota ndia biakudia bimpe (bu mudi mikata misheme ne bimuma), kadi ntabuluka anu nunku, munda kunkungula kumvunguluka ne nzala eku pa muminu pangûme. Meme kunyana, kilo kupueka muinshi mua 45! Kadi dituku dionso pamvua mbala Bible wanyi mukese au, mvua ngumvua disanka dia kuikala anu ne muoyo.

 Ndekelu wa bionso bakandekela!

Dimue edi mu dinda dikuabu mu ngondo muinayi 1945, balami ba ku buloko bonso bakanyema e kushiya biibi buashi. Meme kudipatukila. Kadi tshia kumpala mvua muanji kubuela mu lupitadi bua kupetululaku bukole. Ku ndekelu kua ngondo muitanu, meme kufika kuetu kuvua baledi banyi. Bavua bela meji ne: nkavua mufue. Pakammonabu, mamu kutudika ne muadi wa disanka. Diakabi, baledi banyi bakafua matuku makese panyima pa dipatuka dianyi.

Meme kutuadijilula kabidi kubuela mu bisangilu mu tshisumbu tshia mu Thionville. Disanka kayi dia kumonangana kabidi ne bana betu ba balume ne ba bakaji! Bivua binsankisha bua kumona muvuabu bashale ne lulamatu nansha muvuabu mu ntatu ya bungi. Mulunda wanyi Albin au wakafuila mu tshimenga tshia Ratisbonne mu ditunga dia Allemagne. Pashishe, bobu kungambila ne: Jean Hisiger (muana wa tatuanyi muakunyi) uvua pende Ntemu bavua bamushipe pavuaye mubenge kubuela mu busalayi. Muanetu Jean Queyroi utuvua benze nende mudimu ku biro bietu bia ku Paris wakenza bidimu 5 bia mudimu mu maloko manene mu Allemagne. *

Meme kupingana ne lukasa luonso bua kuyisha mu tshimenga tshia Metz. Tshikondo atshi, mvua mmonangana bikole ne dîku dia Minzani. Muanabu wa bakaji Tina uvua mutambule mu dia 2 ngondo wa 11 mu 1946. Tina uvua ne tshisumi mu mudimu wa diyisha ne uvua munsankishe bikole. Tuetu kuselangana nende mu dia 13 ngondo wa 12 mu 1947. Mu ngondo wa 9 mu 1967, Tina kuditua pende mu mudimu wa diyisha mêba a bungi, yeye kushala uwenza too ne ku lufu luende mu ngondo muisambombo 2003, muikale ne bidimu 98. Ntshidi mmujinga bikole be.

Lelu unkadi ne bidimu bipite pa 90 ndi ngumvua ne: Dîyi dia Nzambi ditu anu misangu yonso dimpesha bukole bua kutantamena mateta ne kuatshimuna. Mvua matuku makuabu ndala ne nzala, kadi matuku onso mvua anu ndisha lungenyi ne muoyo wanyi ne Dîyi dia Nzambi, Yehowa kunkoleshaye. ‘Dilaya diende didi dimpa muoyo.’​—Musambu 119:50, MMM.

[Mêyi adi kuinshi]

[Tshimfuanyi mu dibeji 17]

Mulunda wanyi wa pa muoyo Albin Relewicz

[Tshimfuanyi mu dibeji 17]

Maryse Anasiak

[Tshimfuanyi mu dibeji 18]

Bible ungakashintakaja ku biakudia bianyi bia lumingu lujima

[Tshimfuanyi mu dibeji 19]

Meme ne mubangila wanyi Tina mu 1946

[Tshimfuanyi mu dibeji 19]

Jean Queyroi ne mukajende Titica