1. Mmunyi mudi bukole butudi nabu bua kumona mu lungenyi bintu bitudi katuyi banji kumona butuambuluisha? (Tangila tshimfuanyi.)

BUKOLE butudi nabu bua kudianjila kumona mu lungenyi luetu bintu kampanda bitudi katuyi banji kumona ndipa dia kudi Nzambi. Budi butuambuluisha bua kulongolola malu bimpe ne kutangija mêsu etu ku bintu bimpe. Yehowa udi mua kudianjila kumona malu atshilualua ne udi utuambila mu Bible tshikondo tshikalawu mua kuenzeka. Tudi ne bukole bua kumona mu lungenyi luetu tshikala mua kuenzeka. Bushuwa, bukole butudi nabu bua kumona mu lungenyi bintu bitudi katuyi banji kumona budi butuambuluisha bua kuikala ne ditabuja.​—2 Kol. 4:18.

2, 3. a) Bua tshinyi mbimpe bua malu atudi tudianjila kumona mu lungenyi ikale ne nshindamenu kampanda? b) Nnkonko kayi ituandamuna mu tshiena-bualu etshi?

² Kudianjila kumona mu lungenyi tshintu kampanda tshitudi katuyi banji kumona kakutu anu kushindamena pa bualu bulelela to. Tshilejilu, muana mukese wa bakaji udi mua kudifuanyikijila mu lungenyi mubande pa tshibeyibeyi, bualu budi kabuyi mua kuenzeka. Kadi, pavua Hana mupitshishe dîba dia kuelangana meji bua tshivua mua kuenzeka pavuaye uya ne muanende Samuele bua enze mudimu ku ntenta wa kusambakena, tshivuaye mudianjile kumona mu lungenyi tshivua ne nshindamenu kampanda. Tshivua tshishindamene pa bualu buvuaye  mudisuike bua kuenza, ne biakamuambuluisha bua kutuishila mêsu ku tshipatshila tshiende. (1 Sam. 1:22) Tuetu tudianjila kumona mu lungenyi malu adi Nzambi mulaye bua kuenza, tudi tuelangana meji bua bualu buikala ndekelu wa bionso ne bua kuenzeka.​—2 Pet. 1:19-21.

³ Kakuyi mpata, bantu ba bungi bavua ne lulamatu mu bikondo bivuabu bafunda Bible bavua badianjile kumona mu lungenyi malu avua Nzambi mulaye. Mmunyi muvua kumona mu lungenyi mabenesha avua ne bua kulua kuambuluishe bantu aba? Mmunyi mudi kuela meji bua malu malenga adi Nzambi mulaye bantu badi bamutumikila mua kutuambuluisha?

4. Malu avua Abele mudianjile kumona mu lungenyi luende avua mashindamene pa tshinyi?

⁴ Muntu wa kumpala Abele uvua ne lulamatu uvuaku ‘mumone’ bualu kampanda buvua Yehowa mulaye anyi? Nzambi uvua muambile nyoka ne: ‘Nenteke lukuna pankatshi pebe ne mukaji, ne pankatshi pa bana bebe ne bana bende, muana wa mukaji neakukume ku mutu kuebe, ne wewe neumusume ku tshikankanyi tshiende.’ (Gen. 3:14, 15) Katuena mua kuamba ne: Abele uvua mudianjile kumanya dikumbana dia mulayi udi mu mêyi aa to. Kadi, uvua pamuapa mua kuikala muele meji bikole bua mulayi eu ne mujingulule ne: bavua ne bua ‘kusuma muntu kampanda ku tshikankanyi tshiende’ bua kufikisha bantu ku dikala bapuangane anu bu muvua Adama ne Eva kumpala kua kuenzabu mpekatu. Nansha bikalabi ne: Abele uvua mumone bualu kayi mu lungenyi buvua mua kuenzeka, uvua ne ditabuja dishindamene pa mulayi wa Nzambi, ke bualu kayi Yehowa wakitaba mulambu wende.​—Bala Genese 4:3-5; Ebelu 11:4.

5. Bua tshinyi kudianjila kumona bualu kampanda mu lungenyi kuvua kukoleshe Henoka?

⁵ Henoka, muntu wa lulamatu wakaleja ditabuja nansha muvuaye munkatshi mua bantu bavua kabayi batshina Nzambi ne bavua bamba Nzambi malu a bundu. Henoka uvua muenzeja kudi nyuma wa Nzambi pavuaye mufunde mêyi a buprofete a ne: Yehowa uvua ne bua kulua ne “binunu ne binunu bia bansantu bende bua kulumbuluisha bantu bonso, ne bua kupisha bantu bonso badi kabayi banemeka Nzambi bua bienzedi biabu bibi bivuabu benze mu mushindu udi kawuyi unemeka Nzambi, ne bua malu a bundu onso avua benji ba malu mabi badi kabayi banemeka Nzambi bamuambe.” (Yuda 14, 15) Bu muvua Henoka ne ditabuja, uvua ne bua kuikala mudianjile kumona mu lungenyi bulongolodi kampanda buvua anu ne bantu bavua batshina Nzambi.​—Bala Ebelu 11:5, 6.

6. Ntshinyi tshivua Noa mua kuikala muelele meji panyima pa Mvula wa kabutu?

⁶ Noa wakapanduka ku Mvula wa kabutu bualu uvua ne ditabuja. (Eb. 11:7) Panyima pa Mvula wa kabutu, ditabuja diakamusaka bua kulambula Nzambi milambu ya nyama. (Gen. 8:20) Anu bu Abele, Noa uvua mujadike ne: bavua ne bua kupikula bantu ku bupika bua mpekatu ne lufu. Mu tshikondo tshibi tshia panyima pa Mvula wa kabutu tshivua Nimeloda wenza malu bu muluishi wa Yehowa, Noa uvua yeye anu ne ditabuja ne ditekemena. (Gen. 10:8-12) Uvua mua kuikala mukoleshibue ku muoyo pavuaye muele meji bua muvuabu mua kupikula bantu ku bupika bua bukokeshi bubi, ku mpekatu udibu bapiane ne ku lufu. Tuetu petu tudi mua ‘kumona’ tshikondo tshilenga etshi. Bushuwa, tshikadi pabuipi.​—Lomo 6:23.

7. Mmalu kayi avua ne bua kuenzeka avua Abalahama, Izaka ne Yakoba mua kuikala ‘bamone’?

⁷ Abalahama, Izaka ne Yakoba bavua mua kuikala badianjile kumona mu lungenyi bualu kampanda bunene buvua mua kuenzeka, bualu Nzambi uvua mubalaye ne: ku diambuluisha dia tunkanunuina tuabu, bisamba bionso bia pa buloba bivua ne bua kusankishibua. (Gen. 22:18; 26:4; 28:14) Ndelanganyi ya bantu aba ivua ne bua kuvulangana ne kusomba mu Buloba bulaya buvua Nzambi  mubapeshe. (Gen. 15:5-7) Ku diambuluisha dia ditabuja, bantu bavua batshina Nzambi aba bavua mua ‘kumona’ ndelanganyi yabu isomba mu buloba abu. Bua bualu abu, Yehowa uvua mujadikile batendeledi bende ba lulamatu katshia bantu bajimija bupuangane buabu ne: masanka avua Adama mujimije kaavua ne bua kujimina kashidi to.

8. Ntshinyi tshivua tshiambuluishe Abalahama bua kuikala ne ditabuja dikole?

⁸ Bidi bimueneka ne: bukole buvua nabu Abalahama bua kudianjila kumona mu lungenyi malu avua Nzambi mulaye buvua bumuambuluishe bua kuenza malu ne ditabuja. Bible udi uleja ne: nansha muvua Abalahama ne batendeledi ba Nzambi bakuabu ba lulamatu “kabayi bapete dikumbana dia milayi,” patshivuabu ne muoyo, “bakayimuena ku bule, kuyisankidilabu.” (Bala Ebelu 11:8-13.) Abalahama uvua ne bijadiki bia bungi bivua bimuambuluisha bua kuleja muvua malu avuaye mutekemene malelela, bienza anu bu ne: uvua mumone tshivuaye katshia kayi muanji kumona.

9. Mmunyi muvua kuikala ne ditabuja mu milayi ya Nzambi kuambuluishe Abalahama?

⁹ Ditabuja divua nadi Abalahama mu milayi ya Nzambi diakakolesha dipangadika diende dia kuenza disua dia Nzambi. Bua ditabuja, wakashiya tshimenga tshia Ula ne kubengaye bua kusomba mu tshimenga kayi tshionso tshia mu Kanâna. Anu bu tshimenga tshia Ula, bimenga ebi bivua ne bishimikidi bitekete bualu bakokeshi babi kabavua batshina Nzambi to. (Yosh. 24:2) Kutuadijila anu tshikondo atshi, Abalahama “uvua muindile tshimenga tshidi ne bishimikidi bilelela, tshidi Nzambi muikale muenji ne muibaki.” (Eb. 11:10) Abalahama ‘wakadimona’ muikale ne muoyo wa kashidi mu buloba buvua Yehowa ulombola. Abele, Henoka, Noa, Abalahama ne bantu bakuabu bavua pabu ne ditabuja bavua bitabuja dibika dia bantu ku lufu ne bavua bindile ne muoyo kuulu kuulu bua kupeta muoyo pa buloba mu bukokeshi bua Bukalenge bua Nzambi, “tshimenga tshidi ne bishimikidi bilelela.” Kuelangana meji bua masanka onso aa kuvua kukoleshe ditabuja diabu kudi Yehowa.​—Bala Ebelu 11:15, 16.

10. Mmunyi muvua mmuenenu uvua nende Sala bua matuku atshivua alua mumuambuluishe?

¹⁰ Tuakulayi bua Sala, mukaji wa Abalahama. Pavuaye ne bidimu 90 ne kayi mulele, mmuenenu muimpe uvuaye nende bua matuku atshivua alua wakamuambuluisha bua kuenza malu ne ditabuja. Bushuwa, uvua mudianjile kumona muvua ndelanganyi yende mipete masanka avua Yehowa mulaye. (Eb. 11:11, 12) Ntshinyi tshivua tshimupeteshe ditekemena dia nunku? Yehowa uvua muambile bayende ne: ‘Nemmuvudijile disanka, yeye neakulelele muana mulume; nemmusankishe bulelela, yeye neikale nkambua wa bisamba bia bungi, ne bakalenge ba bantu nebalupuke munda muende.’ (Gen. 17:16) Pakalela Sala Izaka, biakamuambuluisha bua kumona mu lungenyi dikumbana dia malu makuabu a mu mulayi uvua Nzambi mulaye Abalahama. Tudi petu ne dipa dia kuikala bakumbane bua kudianjila kumona mu lungenyi malu adi Nzambi mulaye ne kuikala batuishibue ne: adi ne bua kukumbana.

11, 12. Ntshinyi tshivua tshiambuluishe Mose bua kunanga Yehowa?

¹¹ Mose uvua pende muleje ditabuja kudi Yehowa ne mumunange bikole. Pavua Mose muana mu nzubu wa bukalenge mu Ejipitu, bivua mua kuikala bipepele bua yeye kunanga bumfumu ne bubanji. Kadi, ku diambuluisha dia baledi bende, uvua mua kuikala mulonge malu a Yehowa, ne malu avuaye mulongolole bua kupikula bena Ebelu ku bupika ne kubapesha Buloba bulaya. (Gen. 13:14, 15; Ekes. 2:5-10) Bikala Mose uvua wela meji bua masanka avua bantu ba Nzambi mua kupeta, tshivua mua kuikala tshikole mu muoyo wende ndinanga dia lumu anyi ndinanga dia Yehowa?

¹² Bible udi utuambila ne: “Bua ditabuja, pakakola Mose, wakabenga bua kumubikilabu muana wa muana wa bakaji wa Palô, kusungulaye bua kukengeshibua ne bantu ba Nzambi pamutu pa  kuikala ne disanka dia tshitupa tshîpi dia bubi, bualu wakamona bundu bua Kristo buikale bubanji bunene kupita biuma bia mu Ejipitu; bualu uvua mutuishile mêsu ende ku dipeta dia difutu.”​—Eb. 11:24-26.

13. Kuela meji bikole bua malu avua Nzambi mulaye kuvua kuambuluishe Mose mushindu kayi?

¹³ Bu muvua Mose muele meji bikole bua malu avua Yehowa mulaye bua kuenzela bena Isalele, ditabuja diende ne dinanga diende dia Nzambi biakakola. Anu bu bantu bakuabu bavua batshina Nzambi, uvua pamuapa mudianjile kumona mu lungenyi tshikondo tshikala Yehowa mua kujimijila bantu lufu. (Yobo 14:14, 15; Eb. 11:17-19) Kabiena bitukemesha bua muvua Mose munange Nzambi uvua muleje bena Ebelu ne bantu bonso luse to. Ditabuja ne dinanga bivua biambuluishe Mose mu nsombelu wende mujima. (Dut. 6:4, 5) Nansha pavua Pâlo ujinga kushipa Mose, ditabuja diende, dinanga divuaye nadi kudi Nzambi ne pamuapa didianjila kumona mu lungenyi malu mimpe atshivua alua, biakamukolesha bua kutantamena nsombelu mukole ne dikima dionso.​—Ekes. 10:28, 29.

14. Nngelelu kayi wa meji udi kayi mulelela?

¹⁴ Bantu ba bungi lelu batu badifuanyikijila mu lungenyi malu a matuku atshilualua adi kaayi malelela. Tshilejilu, nansha mudibu ne bintu bia ku mubidi bikese, badi badifuanyikijila mu lungenyi bakadi babanji ne bikishe nansha mudi nsombelu wa bantu lelu muwule tente ne “ntatu ne makenga.” (Mus. 90:10, MMM) Badi badifuanyikijila bikale mu nsombelu wa kayi tunyinganyinga mu bukokeshi bua bana ba bantu, padi eku Bible uleja ne: anu Bukalenge bua Nzambi ke ditekemena dimuepele dilelela bua bantu. (Dan. 2:44) Bantu ba bungi badi bela meji ne: Nzambi kakubutula ndongoluelu mubi wa malu eu to, kadi Bible udi uleja malu mu mukuabu mushindu. (Sef. 1:18; 1 Yone 2:15-17) Ditekemena didi nadi bantu badi kabayi bamanye tshidi Nzambi mulongolole bua matuku atshilualua ki ndilelela to.

15. a) Kudianjila kumona mu lungenyi ditekemena dietu kudi kuambuluisha bena Kristo mushindu kayi? b) Tela bualu buudi muindile ne muoyo kuulu kuulu pakumbaja Nzambi milayi yende.

¹⁵ Ku lukuabu luseke bu mutudi bena Kristo, badi batulomba bua kudianjila kumona ditekemena dietu nansha dikale dia kuya mu diulu anyi dia kusomba pa buloba. Udiku mua kudimona ukadi mupete malu adi Nzambi mulaye anyi? Kumona mu lungenyi malu audi mua kuenza padi Nzambi ukumbaja milayi yende kudi kukupetesha disanka mu muoyo webe. Pamuapa udi ‘udimona’ ne muoyo kashidi pa buloba. Difuanyikijila wenza mudimu pamue ne bantu bakuabu bua kuvuija buloba ebu mparadizu. Bantu baudi nabu banange Yehowa anu bu wewe. Kuyi usama, muikale ne bukole ne mutekemene malu malenga. Bantu badi balombola mudimu wa diakajilula malu benza bua nsombelu ikale usankisha, bualu badi baditatshisha bikole bua bualu buebe. Udi ne disanka bua muudi wenza mudimu ne mamanya ebe bualu tshintu tshionso tshiudi wenza tshidi tshiambuluisha bakuabu ne tshitumbisha Nzambi. Tshilejilu, udi wambuluisha bantu badibu babishe ku lufu bua bafike ku dimanya Yehowa. (Yone 17:3; Bien. 24:15) Bushuwa, malu aa neenzeke. Malu mimpe atudi tudianjila kumona mu lungenyi aa mmashindamene pa mvese ya mu Bible idi yakula bua matuku atshilualua.​—Yesh. 11:9; 25:8; 33:24; 35:5-7; 65:22.

16, 17. Mmunyi mudi kuakula bua ditekemena dietu kutuambuluisha?

¹⁶ Patudi tuambila bena Kristo netu bakuabu malu atuikala basue kuenza padi Yehowa utungunuka ne kukumbaja milayi yende, malu a matuku atshilualua atudi tudianjila kumona mu lungenyi adi alua malelela. Muntu nansha umue wa kutudi kena mua kumanya bimpe menemene muikala nsombelu wende mu bulongolodi bupiabupia to. Kadi, patudi tuakula bua malu atuikala pamuapa  mua kuenza, tudi tukankamijangana ne tuleja mutudi tuitabuja ne: malu adi Nzambi mulaye neakumbane. Pavua mupostolo Paulo mukumbule bena Kristo nende ba mu Lomo, bakanyisha bikole “dikankamijangana” diabu, ne ke tshitudi tuenza petu mu bikondo bia ntatu ebi.​—Lomo 1:11, 12.

¹⁷ Kudianjila kumona mu lungenyi malu atshilualua kudi mua kutuambuluisha kabidi bua kubenga kupeta meji mabi bua ntatu itudi tupeta lelu. Mupostolo Petelo uvua mua kuikala mupete meji a nunku pavuaye muambile Yezu ne: “Tangila! Tuetu tudi bashiye bintu bionso, bakulonde; netupete tshinyi?” Bua kuambuluisha Petelo ne bantu bakuabu bavua muaba au bua kumona muikala malu mu matuku atshilualua, Yezu wakamba ne: “Ndi nnuambila bulelela ne: mu tshikondo tshiavuijibua bintu bionso bipiabipia, pasomba Muana wa muntu mu nkuasa wende wa butumbi, nuenu badi bandonde, nenusombe penu pa nkuasa ya butumbi dikumi ne ibidi, nulumbuluisha bisamba dikumi ne bibidi bia Isalele. Muntu yonso udi mushiye nzubu anyi bana babu ba balume anyi ba bakaji anyi tatu wende anyi mamu wende anyi bana bende anyi madimi ende bua dîna dianyi, neapete bintu misangu ya bungi menemene, neapete kabidi ne muoyo wa tshiendelele.” (Mat. 19:27-29) Petelo ne bayidi bakuabu bavua mpindieu mua kudianjila kumona mu lungenyi mudimu wikalabu nawu mu mbulamatadi wikala mua kukokesha buloba ne kutuadila bantu badi batumikila masanka a bungi.

18. Mmunyi mudi kuela meji bua dikumbana dia milayi ya Nzambi kutuambuluisha lelu?

¹⁸ Kuela meji bua dikumbana dia milayi ya Nzambi nkuambuluishe batendeledi ba Yehowa ba pa buloba. Abele uvua mumanye malu a bungi avua Nzambi mulongolole avua mamuambuluishe bua kumona malu mimpe a matuku atshivua alua, bua kuikala ne ditabuja ne bua kuikala ne ditekemena dilelela. Abalahama uvua muenze malu mimpe ne ditabuja bualu uvua ‘mumone’ dikumbana dia mêyi a Nzambi a buprofete avua atangila kankanunuina anyi “muana” mulaya. (Gen. 3:15) Mose “uvua mutuishile mêsu ende ku dipeta dia difutu,” kuenzaye malu ne ditabuja ne kukoleshabi dinanga diende bua Yehowa. (Eb. 11:26) Dinanga ne ditabuja dietu kudi Nzambi bidi pabi mua kukola patudi tuenza mudimu ne bukole butudi nabu bua kudianjila kumona mu lungenyi dikumbana dia malu adi Yehowa mulaye. Mu tshiena-bualu tshidi tshilonda netumone mushindu utudi mua kuenza mudimu bimpe ne dipa dia kudi Nzambi edi.