1. Ntshinyi tshivua tshisake Yezu bua ‘kusanka bikole mu nyuma muimpe’? (Tangila tshimfuanyi.)

UDIKU mua kufuanyikija muvua Yezu Kristo ‘usanka bikole mu nyuma muimpe’ anyi? Pamuapa udi umona mudiye utua mimuemue, mêsu ende aleja mudiye ne disanka. Tshivua tshimusake bua kudiumvua nanku ntshinyi? Uvua ufuma ku dituma bayidi bende 70 bua kuyisha lumu luimpe lua Bukalenge bua Nzambi. Uvua muindile ne muoyo mujima bua kumona muvuabu mua kukumbaja mudimu wabu. Kuvua bantu ba bungi ba bukole bavua baluisha lumu luimpe bu mudi bafundi ne Bafalese bavua ne meji ne balonge tulasa tua bungi. Bavua basaka bantu ba bungi bua kupetula Yezu, bamumona bu muena mabaya wa tshianana ne bamona bayidi bende bu bantu bavua ‘kabayi balonge tulasa tua bungi ne bantu tshianana.’ (Bien. 4:13; Mâko 6:3) Nansha nanku, bayidi bakapingana ne disanka dipite bungi. Bavua bayishe nansha muvuabu babaluisha too ne kudi bademon! Ntshinyi tshivua tshibapeshe disanka ne dikima?​—Bala Luka 10:1, 17-21.

2. a) Mmu ngumvuilu kayi muvua bayidi ba Yezu bikale bu bana? b) Ntshinyi tshivua tshiambuluishe bayidi ba Kristo bua kumvua malongesha malelela a mushinga?

² Tangila tshivua Yezu muambile Yehowa: “Tatu wanyi,  Mukalenge wa diulu ne buloba, ndi nkutumbisha kumpala kua bantu, bualu udi musokoke bena meji ne bamanyi ba mukanda malu aa, kadi udi mualeje bana batekete. Eyowa Tatu wanyi, mbienzeke nunku bualu wewe udi muanyishe.” (Mat. 11:25, 26) Bushuwa, Yezu kavua musue kuamba ne: bayidi bende bavua bana bena dîna aba to. Kadi uvua mumanye ne: bavua bamueneka bu bana pavuabu babafuanyikija ne bantu ba tshikondo tshiabu atshi bavua balonge tulasa tua bungi ne bavua badimona bu bena meji. Bualu bua mushinga budi ne: Yezu uvua mulongeshe bayidi bende mua kuikala bu bana, bikale ne budipuekeshi ne bitaba bua babalongeshe. (Mat. 18:1-4) Mmunyi muvua kuikala ne budipuekeshi kubambuluishe? Yehowa wakabambuluisha bua kumvua malongesha malelela a mushinga ku diambuluisha dia nyuma muimpe. Kadi bena meji ne bamanyi ba mukanda bavua bapepeja malongesha aa bakashala bafofomija mêsu kudi Satana ne lutambishi luabu.

3. Nnkonko kayi ituandamuna mu tshiena-bualu etshi?

³ Kabiena bitukemesha bua muvua Yezu musanke nunku! Uvua ne disanka bua muvua Yehowa musokoluele bantu bena budipuekeshi ba mishindu yonso malongesha male a mu Bible kayi utangila tulasa tuvuabu balonge anyi mamanya abu. Uvua musanke bualu Tatuende uvua muanyishe ndongeshilu wa mushindu eu. Yehowa mmushintuluke anyi? Mmunyi mudiye uleja ne: utshidi anu wanyisha ndongeshilu wa mushindu eu? Patudi tuenda tukeba mandamuna, tudi mua kumona kabidi ne: bidi bitusankisha bikole anu muvuabi bisankishe Yezu.

4. Leja mudi Tshibumba tshia Nsentedi tshia mu Anglais mipepeja tshikale dipa dimpe kudi bantu.

⁴ Mu bidimu bidi panshi ebi, bulongolodi bua Yehowa budi butamba kulongesha malu a Nzambi mu mushindu mupepele ne udi umvuika bimpe. Tukonkonone bilejilu bisatu. Tshia kumpala, mbapatule Tshibumba tshia Nsentedi mu Anglais mipepeja. * Tshibejibeji etshi ntshimueneke bushuwa muditshi dipa dimpe kudi bantu badi ne lutatu lua kumvua muakulu eu ne kuwubala. Bamfumu ba mêku mbamone ne: bana babu badi mpindieu badifila bikole bua kulonga tshibejibeji etshi. Mmushindu munene utudi tupetela biakudia bia mu nyuma. Bana betu ba bungi mbafundile bulongolodi buetu bua kuleja dianyisha dia bungi didibu nadi. Muanetu wa bakaji kampanda wakafunda ne: ukavua mulekele kuandamuna mu Dilonga dia Tshibumba tshia Nsentedi. Wakamba ne: “Mvua ngumvua bundu bua kuandamuna.” Malu mmashintuluke. Pakapetaye tshibejibeji etshi, wakafunda ne: “Mpindieu ndi ngandamuna misangu ya bungi, tshiena kabidi ne buôwa to! Ndi ngela Yehowa tuasakidila ne nuenu penu.”

5. Ngamue malu kayi mimpe adi mu Bible wa Nkudimuinu wa bulongolodi bupiabupia udibu bakajilule?

⁵ Tshibidi, bavua bapatule Bible wa Nkudimuinu wa bulongolodi bupiabupia muakajilula mu Anglais mu tshisangilu tshia ku tshidimu tshia mu dia 5 ngondo wa 10 mu 2013. * Mvese ya bungi idi mpindieu ne miaku mikese, kadi tshidiyi yamba ki ntshishintuluke to, anyi mbayitokeshe mene bimpe. Tshilejilu, Yobo 10:1 uvua ne miaku 27, mmishale 19; Nsumuinu 8:6 uvua ne miaku 20, mmishale 13. Mvese ibidi eyi idi yumvuika bipepele mu nkudimuinu mupiamupia eu. Muanetu wa balume kampanda muela manyi ukadi muenzele Nzambi mudimu ne lulamatu kukadi bidimu bia bungi wakamba ne: “Ndi mubale mukanda wa Yobo mu Bible mupiamupia, ndi ngumvua anu bu ne: mmusangu wa kumpala undi muwumvue bimpe!” Bana betu ba bungi mbambe mêyi a muomumue.

6. Mmunyi muudi udiumvua bua mudibu bakaje ngumvuilu wetu wa Matayi 24:45-47?

⁶ Tshisatu, tuakule bua mudibu bakaje ngumvuilu wetu wa bulelela mu bidimu bishale ebi.  Tshilejilu, tuvua basanke pavuabu batokeshe ngumvuilu wetu bua ‘mupika wa lulamatu udi mudimuke’ mu Tshibumba tshia Nsentedi tshia dia 15 ngondo wa 7 mu 2013. (Mat. 24:45-47) Bavua bumvuijamu ne: mupika wa lulamatu Nkasumbu Kaludiki, “bena mudimu” mbantu bonso badi badia biakudia bia mu nyuma nansha bobu bela manyi anyi “mikoko mikuabu.” (Yone 10:16) Bidi bienza disanka bua kulonga malu malelela aa ne kualongesha bantu bapiabapia. Mmu mishindu kayi mikuabu mudi Yehowa muleje ne: udi wanyisha dilongesha didi dipepele ne didi diumvuika bimpe?

7, 8. Mbimue bilejilu kayi bia bimfuanyi bia buprofete bifundisha ku nyuma muimpe bidi mu Bible?

⁷ Biwikala ukadi muenzele Yehowa mudimu kukadi bidimu bia bungi, udi mua kuikala mumone mudibu bashintulule ku kakese ku kakese diumvuija dia miyuki ya bungi ya mu Bible mu mikanda yetu. Mushindu kayi? Kumpala, mikanda yetu ivua itamba kuakula bua muvua miyuki ya mu Bible mikale mundidimbi wa bualu kampanda ne ileja kabidi bualu buena dîna. Bavua bangata muyuki wa mu Bible bu mundidimbi ne dikumbana dia mêyi onso a buprofete a muyuki au bu bualu buena dîna. Kudiku mvese ya mu Bible idi yakula bua bimfuanyi bia buprofete anyi? Eyowa. Tshilejilu, Yezu wakakula bua ‘tshimanyinu tshia muprofete Yona.’ (Bala Matayi 12:39, 40.) Yezu wakumvuija ne: matuku avua Yona muenze munda mua mushipa uvua mua kuikala lukita luende bu Yehowa kayi mumulame ne muoyo, avua mêyi a buprofete avua aleja bungi bua matuku avua Yezu wenza mu lukita.

⁸ Mu Bible mudi bimfuanyi bikuabu bia buprofete bifundisha ku nyuma muimpe. Mupostolo Paulo mmumvuije bimue bia kudibi. Tshilejilu, malanda avua pankatshi pa Abalahama ne Hagâ ne Sala avua tshimfuanyi tshia buprofete tshivua tshileja malanda avua pankatshi pa Yehowa ne tshisamba tshia Isalele wa ku mubidi ne tshitupa tshia mu diulu tshia bulongolodi bua Nzambi. (Gal. 4:22-26) Bia muomumue, ntenta wa tshitendelelu ne ntempelo, Dituku dia dibuikidila dia mibi, muakuidi munene ne Mikenji mikuabu ya Mose bivua “mundidimbi wa malu mimpe atshilualua.” (Eb. 9:23-25; 10:1) Bidi bienza disanka ne bikolesha ditabuja dietu bua kulonga bimfuanyi bia buprofete ebi. Kadi tudiku mua kuamba ne: muntu yonso anyi bualu buonso peshi tshintu tshionso tshidibu bakuile mu Bible tshidi mundidimbi wa muntu kampanda anyi wa tshintu kansanga anyi?

9. Mmushindu kayi uvuabu bumvuija muyuki wa Nabota kumpala?

⁹ Ku kale, bavua batamba kumvuija malu mu mushindu eu. Tshilejilu, tuakule bua muyuki wa Nabota. Mukalenge mukaji mubi Izebele uvua mulongolole bua bashiminyine Nabota bualu ne bamushipe bua bayende Ahaba angate budimi buende bua tumuma tua mvinyo. (1 Bak. 21:1-16) Mu 1932, bavua bumvuije muyuki eu bu dinaya kampanda dia buprofete. Bavua baleje ne: Ahaba ne Izebele bavua tshimfuanyi tshia Satana ne bulongolodi buende; Nabota uvua tshimfuanyi tshia Yezu; pashishe lufu lua Nabota luvua luleja lufu lua Yezu. Kadi bidimu bia bungi pashishe, bakumvuija mu mukanda wa ‘Dîna diebe ditumbishibue’ (mu Mfualansa) uvuabu bapatule mu 1964 ne: Nabota uvua tshimfuanyi tshia bela manyi ne Izebele tshimfuanyi tshia bukua buena Kristo. Nunku, dikengeshibua dia Nabota kudi Izebele divua tshimfuanyi tshia dikengeshibua dia bela manyi mu matuku a ku nshikidilu. Munkatshi mua bidimu bia bungi, bantu ba Nzambi bakamona ne: diumvuija dia miyuki ya mu Bible edi divua dikolesha ditabuja diabu. Kadi bua tshinyi malu mmashintuluke?

10. a) Mmushindu kayi udi budimu buambuluishe mupika bua kuikala ne ntema ya bungi padiye umvuija miyuki kampanda ya mu Bible? b) Mikanda yetu mmimanyine pa malu kayi lelu?

¹⁰ Mu kupita kua bidimu, Yehowa mmuambuluishe ‘mupika wa lulamatu udi mudimuke’ bua kuikalaye ne budimu bua bungi. Budimu ebu  mbuambuluishe mupika bua kuikala ne ntema ya bungi padibi bikengela kumvuija muyuki kampanda wa mu Bible bu dinaya dia buprofete. Udi wenza nanku anu padiku mvese kampanda udi utokesha bualu abu bimpe. Bualu bukuabu, bavua balue kumona ne: amue mumvuija a kale avua atangila mundidimbi ne dikumbana dia bualu mmakolele bantu ba bungi bua kuumvua. Malu onso adibu bumvuije mu malongesha aa bua kuleja mudi muntu muikale tshimfuanyi tshia muntu kampanda ne bua tshinyi bidi nanku, adi mua kuikala makole bua kuumvua bimpe, kuavuluka ne kuatumikila. Kadi lutatu lunene ludi ne: malongesha a bikadilu bimpe atudi mua kutumikila adi mu miyuki ya mu Bible itudi tukonkonona adi mua kupanga kupatuka patoke anyi kujimina patudi tudifila bua kukonkonona bualu buena dîna budi muyuki ukumbaja. Nunku tudi bamone ne: lelu mikanda yetu mmimanyine nangananga pa malongesha mapepele ne mimpe adi atangila ditabuja, dinanukila, ditshina dia Nzambi, ne ngikadilu mikuabu ya mushinga itudi mua kupetela mu miyuki ya mu Bible. *

11. a) Mmunyi mutudi tumvua mpindieu muyuki wa Nabota? Bua tshinyi tshilejilu tshiende tshidi ne mushinga kutudi? b) Bua tshinyi mikanda yetu ya bidimu bidi panshi ebi kayena itamba kuakula bua mundidimbi ne dikumbana dia bualu? (Tangila tshiena-bualu tshia “Nkonko ya babadi” tshidi mu nimero eu.)

¹¹ Kadi mmunyi mutudi tumvua mpindieu muyuki wa Nabota? Tudi tuwumvua mu mêyi mapepele adi umvuika bimpe. Muntu muakane eu uvua mufue bualu uvua mushale ne lulamatu, kadi ki mbualu uvua mundidimbi wa Yezu anyi wa bela manyi to. Uvua mutumikile mukenji wa Yehowa kumpala kua mfumu uvua muenze mudimu bibi ne bukokeshi buende. (Nom. 36:7; 1 Bak. 21:3) Tshilejilu tshiende tshidi ne mushinga kutudi bualu yonso wa kutudi udi mua kutuilangana ne buluishi bua malu a muomumue. (Bala 2 Timote 3:12.) Bena Kristo bonso badi mua kumvua bimpe dilongesha didi dikolesha ditabuja edi, kudivuluka ne kuditumikila.

12. a) Ntshinyi tshitudi katuyi mua kuamba bua miyuki ya mu Bible? b) Ntshinyi tshidi tshituambuluisha bua kupeta diumvuija ditoke, too ne dia malu male a mu Bible? (Tangila note.)

¹² Tudiku mua kuamba ne: miyuki ya mu Bible idi amu ne malongesha atudi mua kutumikila, kadi kayiyi ne diumvuija dikuabu anyi? Tòo. Lelu mu mikanda yetu badi batamba kulongesha ne: bualu  kampanda budi butuvuluija bualu kansanga anyi budi butuambuluisha bua kumvuija bualu kankenga peshi budi bumueneka bupetangana ne bukuabu. Kayena itamba kumvuija miyuki ya bungi ya mu Bible mu mushindu mukole udi utupangisha bua kumvua mêyi a buprofete adi mundidimbi ne dikumbana dia bualu to. Tshilejilu, tudi mpindieu mua kuamba ne: lulamatu lua Nabota pavuabu bamukengesha ne lufu luende bidi bituvuluija lulamatu lua Kristo ne lua bela manyi bende. Ludi lutuvuluija kabidi lulamatu lua “mikoko mikuabu” ya bungi ya Mukalenge. Difuanyikija edi didi diumvuika bipepele ntshimanyinu tshinene tshia dilongesha dia Nzambi. *

13. Mbilejilu kayi bidi bileja ne: tudi mpindieu tumvuija bimue bilejilu bia Yezu mu mushindu mupepele udi umvuika bimpe?

¹³ Yezu Kristo uvua Mulongeshi mutambe bunene kupita balongeshi bonso ba pa buloba. Dienza mudimu ne bilejilu divua umue wa ku mishindu yende minene ya kulongesha. (Mat. 13:34) Bilejilu bitu biambuluisha bua kumona bualu kampanda mu lungenyi budi buelesha meji ne bulenga muoyo. Bidimu bishale ebi, mikanda yetu mmiumvuijaku kabidi bilejilu bia Yezu mu mushindu mupepele udi umvuika bimpe anyi? Tudi tuandamuna katuyi tudia tshibanga ne: eyowa. Katuvuaku basanke bikole patuvua bapete ngumvuilu mutoke wa tshilejilu tshia luevene, tshia lutete lua mutâda ne tshia kapamba mu Tshibumba tshia Nsentedi tshia dia 15 ngondo wa 7 mu 2008 anyi? Mpindieu tudi tumona patoke ne: bilejilu ebi bidi biakula bua Bukalenge bua Nzambi ne malu adibu buenza bua kusangisha bayidi balelela ba Kristo badi mu bulongolodi bubi ebu.

14. a) Mmunyi mutuvua tumvuija tshilejilu tshia muena Samaleya wa luse? b) Mmunyi mutudi tumvua tshilejilu tshia Yezu etshi lelu?

¹⁴ Kadi netuambe tshinyi bua miyuki anyi bilejilu bivua Yezu mulonde malu abi too ne mu katoba? Bushuwa, bimue bidi ne ngumvuilu wa mu tshimfuanyi ne mêyi a buprofete; bikuabu mbimanyine pa malongesha atudi mua kutumikila. Kadi mmunyi mutudi mua kubimanya? Tudi bapete diandamuna ditoke ku kakese ku kakese mu kupita kua bidimu. Tshilejilu, tukonkonone mushindu utuvua tumvuija tshilejilu tshia Yezu tshia muena Samaleya wa luse. (Luka 10:30-37) Mu 1924, Tshibumba tshia Nsentedi tshiakamba ne: muena Samaleya uvua tshimfuanyi tshia Yezu; njila uvua umbuka mu Yelushalema upueka ku Yeliko upitshila mu mikuna, uvua tshimfuanyi tshia dinyanguka dia nsombelu wa bantu katshia ku buntomboji bua mu Edene; bivi bavua mu njila bavua tshimfuanyi tshia biapu binene ne bantu bavua bapetela bubanji pambidi pa bakuabu; muakuidi ne muena Lewi bavua tshimfuanyi tshia bamfumu ba bitendelelu ba mu bulongolodi ebu. Lelu, mikanda yetu idi yakula bua tshilejilu etshi bua kutuvuluija tuetu bena Kristo bonso ne: katuena ne bua kuikala ne kansungansunga patudi tuambuluisha bantu badi dijinga ne diambuluisha to, nangananga mu malu a mu nyuma. Kabienaku bituenza disanka bua kumona ne: Yehowa udi wenza bua malongesha ende ikale matoke kutudi anyi?

15. Ntshinyi tshituakonkonona mu tshiena-bualu tshidi tshilonda?

¹⁵ Mu tshiena-bualu tshidi tshilonda, netukonkonone tshilejilu tshikuabu tshia Yezu tshia nsongakaji dikumi itshivua tumama. (Mat. 25:1-13) Mmunyi muvua Yezu musue bua bayidi bende ba mu matuku a ku nshikidilu bumvue tshivua tshilejilu etshi tshileja? Uvuaku musue bua batshiumvue bu mêyi a buprofete avua ne diumvuija dia mu tshimfuanyi divua ditangila muntu yonso, tshintu tshionso ne bualu buonso anyi? Peshi uvua musue bua bayidi bende benze mudimu ne tshilejilu etshi bu dilongesha kampanda dia kutumikila divua mua kubalombola mu matuku a ku nshikidilu? Netumone malu aa.