1. Bua tshinyi kuidikija Yezu nekutusemeje pabuipi ne Yehowa?

TUTU basue kuidikija bantu batu ne ngikadilu ne benza malu adi atusankisha. Mu bantu bonso badi ba buloba, kakuena muntu nansha umue udi mukumbane bua tuetu kuidikija kupita Yezu nansha. Bua tshinyi? Yezu nkayende wakamba musangu mukuabu ne: “Udi mummone mmumone kabidi Tatu.” (Yone 14:9) Yezu uvua ne ngikadilu ya Tatuende menemene, ke bua tshinyi kumumona kuvua kuenze anu bu kumona Tatu. Nunku patudi tuidikija Yezu tudi tusemena pabuipi ne Yehowa, Muntu mutambe bunene wa mu diulu ne pa buloba. Tuetu bidikije ngikadilu ne mushindu uvua Muanende wenza malu, netupete masanka a bungi.

2, 3. a) Bua tshinyi Yehowa mmutufundishile malu a Muanende? Yehowa mmusue bua tuetu kuenza tshinyi? b) Ntshinyi tshituamona mu tshiena-bualu etshi ne mu tshialonda?

² Kadi mmunyi mutudi mua kumanya Yezu? Diakalenga tudi ne malu a Yezu mafundisha ku nyuma muimpe. Yehowa uvua mufundishe malu atudi tupeta mu Mifundu ya bena Kristo ivua mu tshiena Greke aa bualu mmusue bua tumanye muanende bimpe bua tufike  ku dimuidikija. (Bala 1 Petelo 2:21.) Mu Bible badi bafuanyikija tshilejilu tshivua Yezu mushiye ne “makasa.” Mu bulelela Yehowa udi utuambila bua tulonde Yezu ne tuendele mu makasa ende. Bushuwa, Yezu mmutushile tshilejilu tshipuangane, kadi tuetu katuena bapuangane to. Nansha nanku, Yehowa kena utulomba bua kulonda mu makasa a Yezu ne mu katoba to. Kadi Tatu mmusue bua tuidikije Muanende mu mushindu utudi mua kukumbaja, bualu tudi bantu bapange bupuangane.

³ Nunku tukonkonone imue ngikadilu ya Yezu idi isankisha. Mu tshiena-bualu etshi netuakule bua budipuekeshi ne luse bivuaye nabi; mu tshialonda netukonkonone dikima ne dijingulula diende dia malu. Netuandamune nkonko isatu eyi bua ngikadilu yonso: Ngikadilu eu udi umvuija tshinyi? Mmushindu kayi uvua Yezu muleje ngikadilu eu? Mmunyi mutudi mua kumuidikija?

4. Mmunyi muudi mua kumvuija budipuekeshi?

⁴ Budipuekeshi ntshinyi? Mu bulongolodi ebu mudi bantu ne lutambishi, bamue badi mua kumona ne: kuikala ne budipuekeshi kudi kuleja kuikala mutatakane anyi kuikala muntu udi kayi mukumbane bua kuenza bualu kampanda. Kadi misangu ya bungi kabitu nanku to. Bua kuikala ne budipuekeshi bidi bikengela kuikala ne bukole ne dikima. Batu bumvuija budipuekeshi ne: “nngikadilu udi mushilangane ne lutambishi ne didibandisha.” Budipuekeshi budi butuadija ne mushindu utudi tudimona tuetu nkayetu. Diksionere kampanda dia malu a mu Bible didi diamba ne: “Budipuekeshi nkudimanya mutudi bapuekele kumpala kua Nzambi.” Tuetu bikale mu bulelela ne budipuekeshi kumpala kua Nzambi, netubenge kudimona ne mushinga wa bungi kupita bantu bakuabu. (Lomo 12:3) Ki mbipepele bua bantu bapange bupuangane kuikala ne budipuekeshi to. Kadi tudi mua kuikala ne budipuekeshi tuetu belangane meji bua mushindu udi Nzambi utumona ne balonde mu makasa a Muanende.

5, 6. a) Mikaele mfumu wa banjelu nnganyi? b) Mmunyi muvua Mikaele muleje lungenyi lua budipuekeshi?

⁵ Mmunyi muvua Yezu muleje budipuekeshi? Bible udi uleja muvua Muana wa Nzambi muleje budipuekeshi pavuaye mu diulu bu tshifukibua tshia mu nyuma tshia bukole ne pavuaye muntu mupuangane pa buloba. Tukonkononayi bimue bilejilu.

⁶ Lungenyi luende. Yuda uvua mufunde mu Bible bumue bualu buvua Yezu muenze patshivuaye mu diulu. (Bala Yuda 9.) Yezu, Mikaele mfumu wa banjelu, uvua “tshilumbu ne Diabolo” ne uvua ‘ukokangana’ ne mubi eu. Tshilumbu tshivua tshitangila “mubidi wa Mose.” Vuluka ne: Pavua Mose mufue, Yehowa wakajika mubidi wende muaba uvua kawuyi mumanyike. (Dut. 34:5, 6) Pamuapa Diabolo uvua musue kuenza mudimu ne mubidi wa Mose bua kutua ntendelelu wa dishima nyama ku mikolo. Nansha biobi bikale ne: Diabolo uvua ne tshipatshila kayi mu lungenyi, Mikaele wakenza malu ne dikima. Mukanda kampanda udi wamba ne: miaku ya mu tshiena Greke idibu bakudimune ne: uvua ne “tshilumbu” ne “bakokangana” badi “kabidi benza nayi mudimu mu bilumbu bia ku tubadi” ne idi mua kumvuija ne: “Mikaele ‘wakabenga ne: Diabolo kavua ne bukenji’ bua kuangata mubidi wa Mose.” Kabidi Mfumu wa banjelu eu wakitaba ne: ki nyeye uvua ne bua kumulumbuluisha to. Kadi wakatuma tshilumbu kudi Mulumbuluishi munene Yehowa. Nunku Mikaele wakabenga bua kusambuka mikalu ya bukokeshi buende nansha pavuabu bamuyobole. Ndungenyi kayipu lua budipuekeshi!

7. Mmunyi muvua Yezu muleje budipuekeshi mu mêyi ne mu bienzedi biende?

⁷ Pavua Yezu uyisha pa buloba, wakakula ne kuenza malu avua aleja muvuaye ne budipuekeshi  bulelela. Mêyi ende. Kavua mukoke ntema ya bantu kudiye to. Kadi uvua ufila butumbi buonso kudi Tatuende. (Mâko 10:17, 18; Yone 7:16) Kavua upepeja bayidi bende anyi wenza bua badimone bashadile kudiye to. Kadi uvua ubapesha lumu, ubatumbisha bua malu mimpe avuaye umona kudibu ne uleja muvuaye mubeyemene. (Luka 22:31, 32; Yone 1:47) Bienzedi biende. Yezu uvua musungule nsombelu mupuekele, uvua kayi mukutakaja ne bintu bia bungi bia ku mubidi. (Mat. 8:20) Wakitaba bua kuenza mudimu uvua mushadile ku midimu mikuabu yonso. (Yone 13:3-15) Wakaleja budipuekeshi pavuaye utumikila. (Bala Filipoyi 2:5-8.) Bishilangane ne bantu bena lutambishi badi babenga kutumikila, Yezu wakatumikila malu avua Nzambi umulomba, kuluaye “mutumikidi too ne ku lufu.” Bidi bushuwa bimueneka ne: Yezu, Muana wa muntu, uvua “mupuekele mu mutshima.”​—Mat. 11:29.

8, 9. Mmunyi mutudi mua kuleja budipuekeshi?

⁸ Mmunyi mutudi mua kuleja budipuekeshi bua kuidikija Yezu? Lungenyi luetu. Budipuekeshi budi butupangisha bua kusambuka mikalu ya bukokeshi butudi nabu. Tuetu bamanye ne: katuena ne bukokeshi bua kulumbuluisha bakuabu, katuakuakula bibi ne lukasa bua bilema biabu peshi katuakumona mu mushindu mubi malu adibu benza to. (Luka 6:37; Yak. 4:12) Budipuekeshi budi butuambuluisha bua kubenga ‘kupitshisha kuikala muakane,’ kubenga kupepeja aba badi kabayi bakumbane peshi kabayi ne majitu bu tuetu. (Muam. 7:16) Bakulu badi ne budipuekeshi kabatu badimona bapite bena Kristo nabu to. Kadi balami aba ‘badi bangata bakuabu bu babapite buobu’ ne benza malu bu bakese.​—Filip. 2:3; Luka 9:48.

⁹ Tuakule bua Walter Thorn uvua peleren anyi mutangidi muena ngendu kutuadijila mu 1894. Panyima pa yeye mumane kuenza mudimu eu bidimu bia bungi, bakamutuma ku miaba ya madimi ne ya dilamina bimuna ya Bukalenge ku Nord kua New York ne uvua wenza mudimu mu nzubu wa dilamina nzolo. Wakamba ne: “Misangu yonso imvua ntuadija kuela meji ne: mvua mupite bakuabu, mvua mpingaja lungenyi ne ndiambila ne: ‘Wewe lupuishi lua tshianana, ntshinyi tshiudi mupete bua kudibandisha?’” (Bala Yeshaya 40:12-15.) Bushuwa, ndungenyi lua budipuekeshi!

10. Mmunyi mutudi mua kuleja budipuekeshi mu mêyi ne mu bienzedi bietu?

¹⁰ Mêyi etu. Tuetu bikale bapuekele mu mutshima, mêyi etu neikale a budipuekeshi. (Luka 6:45) Mu miyuki yetu ne bantu bakuabu netubenge kuimanyina pa malu atudi benze ne majitu atudi nawu. (Nsu. 27:2) Kadi netukebe malu mimpe adi kudi bena Kristo netu balume ne bakaji ne netubele kalumbandi bua ngikadilu yabu mimpe, bipedi biabu ne malu adibu benze. (Nsu. 15:23) Bienzedi bietu. Bena Kristo badi badipuekesha kabatu bakeba butumbi mu bulongolodi ebu to. Kadi mbasue kuikala ne nsombelu mupepele, benza mene midimu idi bena panu bamona bu ya patupu bua bapete mushindu wa kuenzela Yehowa mudimu ne muabu muonso. (1 Tim. 6:6, 8) Kupita bionso, tudi mua kuleja mutudi ne budipuekeshi patudi tutumikila. Bidi bikengela kuikala mupuekele mu mutshima bua ‘kutumikila bantu badi batulombola’ mu tshisumbu, ne kuitaba ne kulonda bulombodi budi bulongolodi bua Yehowa butupesha.​—Eb. 13:17.

11. Luse ntshinyi?

¹¹ Luse ntshinyi? Batu bumvuija muaku “luse” bu “kuikala mulengibue ku muoyo, kuenza bualu kampanda, peshi kuleja muoyo muimpe.” Luse ntshitupa tshia dinanga ne ludi lumvuija kabidi kumvuilangana ne kufuilangana luse. Mifundu minsantu idi yakula bua “luse,”  “luse lua bungi” ne “dinanga dikole.” (Luka 1:78; 2 Kol. 1:3; Filip. 1:8) Mukanda kampanda udi wakula bua mudi Bible utulomba bua kuikala ne luse, wamba ne: “Kabena batulomba anu bua kumvuila aba badi bakenga to. Kadi badi batulomba bua kutabalela ne kuambuluisha bantu pa kuenza bualu kampanda budi mua kubapesha disulakana ne kushintulula nsombelu wabu.” Luse ke ngikadilu udi upesha bantu bukole. Muntu udi ne luse utu musakibue bua kushintulula nsombelu wa bantu bakuabu.

12. Ntshinyi tshidi tshileja ne: Yezu uvua mumvuile bantu luse? Luse luakamusaka bua kuenza tshinyi?

¹² Mmunyi muvua Yezu muleje luse? Diumvuilangana luse ne bienzedi biende bia luse. Yezu uvua umvuila bantu bakuabu luse. Pavuaye mumone mulunda wende Mariya ne bavuaye nabu badila bua lufu lua muanabu Lazalo, Yezu “wakapuekesha binsonji” kumpala kua bantu. (Bala Yone 11:32-35.) Pashishe, luse luakamusaka bua kujula Lazalo anu muvualu lumusake bua kujula muana wa mukaji mukamba. (Luka 7:11-15; Yone 11:38-44) Ku diambuluisha dia tshienzedi tshia luse atshi, Yezu uvua mua kuikala mubueje Lazalo mu mulongo wa bantu bikale mua kupeta muoyo mu diulu. Umue musangu kumpala, tshisumbu tshinene tshia bantu tshiakalua kudi Yezu ne “wakabumvuila luse,” ‘kutuadijaye kubalongesha malu a bungi.’ (Mâko 6:34) Bushuwa uvua mushintulule nsombelu wa muntu yonso uvua muitabe malongesha ende. Mona ne: luse lua Yezu kaluvua anu mushindu uvuaye udiumvua to; kadi luvua lumusake bua kuenza bualu kampanda bua kuambuluisha bakuabu.​—Mat. 15:32-38; 20:29-34; Mâko 1:40-42.

13. Mmu mushindu kayi muvua Yezu muakule ne mêyi a luse? (Tangila tshimfuanyi tshia ntuadijilu.)

¹³ Mêyi ende a luse. Muoyo wa luse wa Yezu wakamusaka bua kuambila bantu bakuabu mêyi a luse, nangananga aba bavua bakenga. Mupostolo Matayi wakaleja muvua mêyi a Yeshayi aa akumbanyina Yezu: ‘Kena utshibula disele didi diamba kukoseka, kena ujima [mukaba] wa muendu udi ufuima muishi.’ (Yesh. 42:3; Mat. 12:20) Yezu wakakula mu mushindu uvua mukoleshe bantu bavua benze bu disele dia mu tshimfuanyi divua ditshibuke peshi mukaba wa muendu ukadi pa kujima. Wakayisha mukenji uvua ufila ditekemena bua ‘kusangaja mitshima ya badi batamba kunyingalala.’ (Yesh. 61:1) Wakalomba bantu bavua “batata ne midimu mikole ne bambule majitu manene” bua balue kudiye, ubajadikila ne: bavua mua ‘kupeta bukole mu mioyo yabu.’ (Mat. 11:28-30) Wakajadikila bayidi bende ne: Nzambi uvua utabalela bikole muyidi wende yonso kusangisha ne “bana bakese,” mmumue ne: bantu bavua bamueneka kabayi ne mushinga ku mêsu kua bena mu bulongolodi ebu.​—Mat. 18:12-14; Luka 12:6, 7.

14. Ntshinyi tshitudi mua kuenza bua kumvuila bakuabu luse?

¹⁴ Mmunyi mutudi mua kuidikija luse lua Yezu? Diumvuilangana luse. Diumvuilangana luse kaditu didiluila nkayadi to, kadi Bible udi utulomba bua kudienzeja bua kupeta ngikadilu eu. “Dinanga dikole didi ne luse” ntshitupa tshia bumuntu bupiabupia budi bena Kristo bonso ne bua kuvuala. (Bala Kolosayi 3:9, 10, 12.) Mmunyi muudi mua kupeta lungenyi lua diumvuila bakuabu luse? Kangula muoyo webe bikole. (2 Kol. 6:11-13) Teleja ne ntema padi muntu ukuambila mudiye udiumvua ne ukuambila malu adi mamutonde. (Yak. 1:19) Ela meji ne diebeja ne: ‘Bu meme muikale mu nsombelu eu mvua mua kudiumvua mushindu kayi? Mvua mua kuikala dijinga ne tshinyi?’​—1 Pet. 3:8.

15. Ntshinyi tshitudi mua kuenza bua kuambuluisha bantu badi bu disele didi ditshibuke peshi bu mukaba wa muendu udi ufuima?

¹⁵ Bienzedi bietu bia luse. Luse ludi lutusaka bua kushintulula nsombelu wa bakuabu, nangananga  wa aba badi mua kuikala batshibuke bu disele peshi bu mukaba wa muendu udi ufuima. Mmunyi mutudi mua kubambuluisha? Lomo 12:15 udi wamba ne: “Nudile ne badi badila.” Bantu badi ne tunyinganyinga tukole badi mua kujinga bua bantu bakuabu baditeke pa muaba wabu pamutu pa kubambila anu mêyi kampanda patupu. Muanetu wa bakaji mukuabu uvua mukoleshibue kudi bena Kristo nende panyima pa yeye mumane kufuisha muanende wa bakaji udi wamba ne: “Mvua musanke pavua balunda banyi balue ne badile nanyi.” Tudi kabidi mua kuleja mutudi tumvuila bantu luse pa kubenzela amue malu mimpe. Udiku mumanye mukaji mukamba kampanda udi dijinga ne kumulongoluelabu nzubu wende anyi? Udiku mumanye muena Kristo mukulakaje udi dijinga ne mushindu wa kumufikisha mu bisangilu, mu mudimu wa buambi, peshi kumufikisha kua munganga anyi? Nansha tshienzedi tshimpe tshikese tshidi mua kushintulula bikole nsombelu wa muena Kristo udi dijinga ne diambuluisha. (1 Yone 3:17, 18) Kupita bionso, tudi mua kuleja mutudi tutabalela bantu bakuabu tuetu tudifila bikole mu mudimu wa buambi. Kakuena mushindu mukuabu kupita eu udi mua kushintulula nsombelu wa bantu badi badiakaje bua kuitaba bulelela.

16. Ntshinyi tshitudi mua kuamba bua kukolesha aba badi ne tunyinganyinga?

¹⁶ Mêyi etu a luse. Diumvuila bantu luse didi ditusaka bua “kuakula ne mêyi a busambi kudi badi babungame.” (1 Tes. 5:14) Ntshinyi tshitudi mua kuamba bua kukankamija bantu ba nunku? Tudi mua kubakolesha pa kubatabalela bikole ne kuditatshisha bua bualu buabu. Tudi mua kubela kalumbandi ne muoyo mujima bua kubambuluisha bua bamone ngikadilu yabu mimpe ne bipedi biabu. Tudi mua kubavuluija ne: Yehowa mmubakoke kudi Muanende, nunku badi ne mushinga wa bungi ku mêsu kuende. (Yone 6:44) Tudi ne bua kubajadikila ne: Yehowa udi utabalela bikole batendeledi bende badi ne “mitshima itamba kunyingalala” peshi badi ne ‘mitshima ya majiya.’ (Mus. 34:18) Mêyi etu a luse adi mua kuondopa aba badi dijinga ne busambi.​—Nsu. 16:24.

17, 18. a) Mmu mushindu kayi mudi Yehowa musue bua bakulu kuenzelabu mikoko malu? b) Ntshinyi tshituamona mu tshiena-bualu tshidi tshilonda?

¹⁷ Bakulu wetu, Yehowa mmusue bua nuenzele mikoko malu ne luse. (Bien. 20:28, 29) Nuvuluke ne: nudi ne mudimu wa kudisha, kukankamija ne kukolesha mikoko yende. (Yesh. 32:1, 2; 1 Pet. 5:2-4) Nunku mukulu udi umvuilangana luse kena ukeba bua kukokesha mikoko, kuyelela mikenji peshi kuyipisha bua kuyisaka bua kuenza malu adiyi kayiyi mikumbane bua kuenza bilondeshile nsombelu wayi to. Kadi udi udienzeja bua kuyipetesha disanka mu muoyo wayi, mutekemene ne: dinanga diayi kudi Yehowa nediyisake bua kumuenzela mudimu bilondeshile mudiye mikumbaje.​—Mat. 22:37.

¹⁸ Tuetu tuela meji a didipuekesha ne luse bia buena bia Yezu, nebitusake bua kutungunuka ne kuenda mu makasa ende. Mu tshiena-bualu tshidi tshilonda netuakule bua ngikadilu mikuabu ibidi ya Yezu mimpe eyi: dikima ne dijingulula dia malu.