1, 2. a) Bua tshinyi bena Isalele 24 000 bakajimija masanka mimpe? b) Bualu buvua buenzeke kale budi ne mushinga kayi?

MATUKU makese kumpala kua tshisamba tshia Isalele kubuela mu Buloba bulaya, bantu balume binunu makumi a bungi ‘bakenda masandi ne bana bakaji ba bena Moaba.’ Bu tshipeta, bantu 24 000 bakafua ku tshianza tshia Yehowa. Mona ne: bena Isalele bakavua pa kupeta bumpianyi buvuabu bindile munkatshi mua bidimu bia bungi, kadi bakajimija mabenesha mimpe bualu bavua bakuluke mu buteyi.​—Nom. 25:1-5, 9.

² Bavua bafunde tshilejilu tshibi etshi “bua kutudimuija tuetu badi ku nshikidilu kua ndongoluelu ya malu.” (1 Kol. 10:6-11) Mpindieu mu tshitupa tshia ndekelu tshia “matuku a ku nshikidilu” etshi, batendeledi ba Nzambi bakadi ku tshibueledi tshia buloba bupiabupia budi ne buakane. (2 Tim. 3:1; 2 Pet. 3:13) Bia dibungama, bamue batendeledi ba Yehowa mbalekele kuikala batabale. Mbakuatshibue mu buteyi bua tshiendenda tshia masandi ne mbapete bipete bibi bia bienzedi biabu bia tshiendenda. Bantu aba badi mu njiwu ya kujimija masanka a kashidi.

3. Bua tshinyi bena mu mabaka badi dijinga ne bulombodi ne bukubi bia kudi Yehowa? (Tangila tshimfuanyi.)

³ Bu mudi tshiendenda tshia masandi tshibudike bikole lelu, balume  ne bakaji badi ne dijinga ne bulombodi ne bukubi bia kudi Yehowa bua diditatshisha diabu bua kulama dibaka diabu kadiyi mu mâyi to. (Bala Musambu wa 127:1.) Netumone mushindu udi bena mu dibaka mua kukolesha dibaka diabu pa kulama muoyo wabu, kusemena pabuipi ne Nzambi, kuvuala bumuntu bupiabupia, kuikala kuyukidilangana mu mushindu muimpe ne kupesha muena dibaka tshidi bu tshiende.

4. Ntshinyi tshivua tshifikishe bamue bena Kristo ku dikuluka mu tshiendenda?

⁴ Ntshinyi tshidi mua kufikisha muena Kristo ku dikuluka mu tshiendenda tshia masandi? Njila mubi udi ufikisha ku tshiendenda utu misangu ya bungi utuadija ne mêsu. Yezu wakamba ne: “Muntu yonso udi utungunuka ne kutangila mukaji mu mushindu wa kumvua dijinga dia kusangila nende, ukadi muende nende masandi mu muoyo wende.” (Mat. 5:27, 28; 2 Pet. 2:14) Bena Kristo ba bungi badi bakuluke mu tshiendenda tshia masandi mbatekeshe bintu bidi bikuba lungenyi luabu pavuabu batangila filme ya malu a busenji, babala mikanda idi ijula majinga mabi, peshi batangila bintu bibi ku Enternete. Bakuabu bavua badifila mu dijikija lutetuku ne filme, teyatre peshi programe ya ku televizion bidi ne malu a tshiendenda. Banga bavua baye mu bare idi itshisha, baye kumona manaya a bantu bakopola bilamba peshi baye miaba idibu bavinga mubidi bua kujula majinga mabi.

5. Bua tshinyi tudi ne bua kulama muoyo wetu?

⁵ Bamue badi bakuluka mu buteyi bualu badi batuma ntema yabu kudi muntu udi kayi muena dibaka nabu. Mu bulongolodi ebu mudi bantu kabayi badikanda ne mudi malu a tshiendenda a mishindu yonso enda avula anu kuvula, mbipepele bua muoyo udi udinga ne unyanguka kutuadijawu kujinga muntu udi kayi muena dibaka netu. (Bala Yelemiya 17:9, 10.) Yezu wakamba ne: “Meji mabi, kushipangana, masandi, buendenda bidi bifumina mu muoyo.”​—Mat. 15:19.

6, 7. a) Muoyo udi udinga udi mua kufikisha muntu ku njila kayi mubi? b) Ntshinyi tshidi mua kutuambuluisha bua kubenga kanyanga lungenyi bua malu a tshiendenda?

⁶ Padi majinga mabi ela miji mu mioyo idi idinga ya bantu babidi badi bakokibue kudi umue ne mukuabu, badi mua kutuadija kuyukila malu avuabu mua kuyukila anu ne bena dibaka nabu. Diakamue, badi bakeba mpunga ya bungi ya kuikalabu bapetangana ne mishindu mikuabu idi imueneka bu idi kayiyi milongolola ya dipetangana idi ilua kuvula. Padi majinga abu enda akola, lungenyi lua dibenga kuenza malu mabi ludi luenda luteketa. Padibu benda baya batangile ku dienza bubi, bidi bilua kubakolela bua kuimana, nansha bobu bamanye ne: tshidibu benza ntshibi.​—Nsu. 7:21, 22.

⁷ Bintu bia mu nyuma bidi bituambuluisha bua kuikala bakole bidi biteketa ku kakese ku kakese padi majinga ne mêyi mabi bitufikisha ku difila tshianza, dituangana mishiku, dibabatangana pambidi, kulengangana bua kujula majinga mabi, ne bienzedi bikuabu bia malu a mananga bidi muntu ne bua kuenzela anu muena dibaka nende. Ndekelu wa bionso ‘dijinga diabu didi dibakoka ne dibakuata mu buteyi.’ Padi dijinga dikola, didi “dilela bubi,” muaba eu, bubi abu ntshiendenda tshia masandi. (Yak. 1:14, 15) Ebu mbualu bubi be! Bualu bubi ebu kabuvua mua kuenzeka bu bobu balekela Yehowa ukolesha kanemu kadibu naku bua dibaka didi tshintu tshia tshijila. Kadi mmushindu kayi udibu mua kuenza nanku?

8. Mmunyi mudi kudia bulunda ne Yehowa kukuba bikadilu bietu bimpe?

⁸ Bala Musambu wa 97:10. Kudia bulunda ne Yehowa ke tshintu tshia mushinga bua kukuba bikadilu bietu bilenga. Patudi tulonga ngikadilu  milenga ya Nzambi ne tudienzeja bua ‘kulua bidikiji ba Nzambi bu bana bende bananga, tutungunuka ne kuenda mu dinanga,’ netupete bukole bua kubenga “masandi ne malu a bukoya a mishindu yonso.” (Ef. 5:1-4) Kumanya ne: “Nzambi nealumbuluishe bena masandi bajike ne bena masandi basele” nekuambuluishe bena mu mabaka bua kudienzeja bikole bua dibaka diabu dikale dinemekibue ne kadiyi dinyanguke.​—Eb. 13:4.

9. a) Mmunyi muvua Jozefe mutantamene diteta dia kuenda masandi? b) Mmalongesha kayi atudi mua kupetela ku tshilejilu tshia Jozefe?

⁹ Bamue batendeledi ba lulamatu ba Yehowa mbatekeshe lungenyi luabu lua dibenga kuenza malu mabi pa kulamakanangana ne bena mudimu nabu badi kabayi Bantemu panyima pa mêba a mudimu. Nansha mu mêba a mudimu, mateyi adi mua kumueneka. Ku mudimu ke kuvua Jozefe, nsonga muimpe kumona mujingulule ne: mukaji wa mfumuende uvua mutambe kukokibua kudiye. Ku dituku ku dituku uvua ujinga bua kumulenduisha. Ndekelu wa bionso, ‘wakamukuata ku tshivualu tshiende, wakamuambila ne: Ulale nanyi.’ Kadi Jozefe wakamunyema. Ntshinyi tshivua tshiambuluishe Jozefe bua kulama lungenyi luende luimpe pavuaye mu mateta aa? Dipangadika diende dia kubenga kunyanga malanda ende ne Nzambi ke divua dimuambuluishe bua kulama bunonoke buende ne muoyo wende mutoke. Bua bualu ebu, wakajimija mudimu wende ne bakamuela mu buloko kayi ne bualu, kadi Yehowa wakamubenesha. (Gen. 39:1-12; 41:38-43) Nansha ku mudimu anyi pa nkaya, bena Kristo badi ne bua kuepuka bua kudibueja mu nsombelu idi mua kubateka mu diteta ne muntu udi kayi muena dibaka nabu.

10. Bumuntu bupiabupia budi butupetesha bukubi kayi bua mu bikadilu?

¹⁰ Bu mudi bumuntu bupiabupia “bufukibue bilondeshile disua dia Nzambi mu buakane ne lulamatu bia bushuwa,” budi buambuluisha bikole bua kukolesha tshishimikidi tshia mu nyuma tshia dibaka. (Ef. 4:24) Bantu badi bavuala bumuntu bupiabupia badi ‘bafuisha’ bitupa bia mibidi yabu “pa bidi bitangila masandi, malu a bukoya, lukuka lua masandi, majinga mabi ne lukuka.” (Bala Kolosayi 3:5, 6.) Muaku ‘kufuisha’ udi uleja kuangata mapangadika makole bua kuluisha majinga mabi a mubidi. Netuepuke tshintu tshionso tshidi mua kutujula dijinga dia kusangila ne muntu mukuabu udi kayi muena dibaka netu. (Yobo 31:1) Patudi tuenza bua nsombelu wetu apetangane ne disua dia Nzambi, tudi tumanya mua ‘kukina malu mabi ne muoyo umue’ ne ‘tulamata malu mimpe.’​—Lomo 12:2, 9.

11. Mmunyi mudi bumuntu bupiabupia mua kukolesha dibaka?

¹¹ Bumuntu bupiabupia budi buleja “tshimfuanyi tshia Yeye wakabufuka,” mbuena kuamba ne: Yehowa. (Kolos. 3:10) Padi balume ne bakaji bakolesha lungenyi lua kuenza malu mimpe padibu bavuala “dinanga dikole didi ne luse, bulenga, didipuekesha, bupole ne lutulu,” badi bapeta masanka. (Kolos. 3:12) Badi kabidi basomba mu diumvuangana mu dibaka diabu padibu benza bua ‘ditalala dia Kristo dikokeshe mu mioyo yabu.’ (Kolos. 3:15) Padi bena mu dibaka ‘banangangane bikole,’ bidi bibapetesha masanka a bungi. Badi bapeta disanka dia ‘kuikala ba kumpala mu dipesha bakuabu bunême.’​—Lomo 12:10.

12. Nngikadilu kayi iudi umona ne: idi ne mushinga bua dibaka kuikaladi dia disanka?

¹² Pavuabu bebeje Sid ngikadilu ivua mibambuluishe bua kuikala ne disanka mu dibaka diabu wakamba ne: “Dinanga ke ngikadilu munene ututu misangu yonso tuditatshisha bua kuikala nende. Tudi kabidi bamone ne: bupole budi ne mushinga wa bungi.” Mukajende Sonja udi witaba ne usakidila ne: “Bulenga budi  bulelela ngikadilu wa mushinga. Tudi kabidi badienzeje bua kuikala ne budipuekeshi nansha mudibi kabiyi bitekete misangu yonso.”

13. Ndusapi kayi ludi luambuluisha dibaka bua kuikaladi dishindame? Bua tshinyi?

¹³ Kakuyi mpata, mêyi mimpe ke lumue lua ku nsapi idi yenza bua dibaka kuikaladi dishindame. Nebikale bibi padi mulume ne mukaji bayukidilangana mu mushindu udi kawuyi uleja kanemu kupita nansha mutubu bayukila ne muntu udibu kabayi bamanye anyi mene ne nyama idibu bamune. Padi bena mu dibaka ‘balaminangana munda, bikale ne tshiji, bumfika munda, dielelangana mbila, bipendu,’ badi banyanga bishimikidi bia mu nyuma bia dibaka. (Ef. 4:31) Pamutu pa bena dibaka kunyanga dibaka diabu pa kuikala ne tshibidilu tshia kupepejangana peshi kuambangana mêyi mabi, badi ne bua kukolesha malanda abu ne mêyi mimpe ne diditeka pa muaba wa mukuabu.​—Ef. 4:32.

14. Mmalu kayi atudi ne bua kuepuka ne meji onso?

¹⁴ Bible udi wamba ne: kudi ‘tshikondo tshia kupuwa.’ (Muam. 3:7) Abi kabiena bisua kumvuija ne: tudi ne bua kuikala anu bapuwe katuyi tuyukidilangana nansha padibi bikengala to. Mamu mukuabu wa mu Allemagne udi wamba ne: “Mu nsombelu ya nunku, dipuwa didi mua kutonda muena dibaka nebe.” Kadi udi usakidila ne: “Nansha mudibi kabiyi bitekete misangu yonso bua kupuwa padi malu matutonde, ki bimpe kupatula tshiji tshionso to. Udi mua kulua kuamba bualu kampanda kuyi muanji kuela meji peshi kuenza bualu budi mua kunyingalaja muena dibaka nebe, kuenza nunku kudi mua kunyangakaja malu bikole.” Mu kupita kua matuku, mulume ne mukajende kabakujikija bilumbu biabu bobu belelangana mbila peshi bajilangana to. Kadi, badi bakolesha dibaka diabu padibu benza bua dibenga kumona malu mu mushindu umue kadikadi tshibidilu peshi kadibafikishi ku matandu adi kaayi ajika.

15. Mmunyi mudi diyukidilangana ne muoyo mujima mua kukolesha dibaka?

¹⁵ Malanda a mu dibaka adi akola padi mulume ne mukaji bakeba dîba dia kulejangana ngenyi ne mudibu badiumvua. Mushindu utudi tuamba  bualu kampanda udi ne mushinga anu bu wa tshitudi tuamba. Nunku, nansha mu nsombelu mikole, dienzeja bua tshiwudi wamba tshikale tshishême ku dîyi diwudi wakula nadi ne ku miaku iudi usungula bua kupatula. Nunku, nebikale bipepele bua muena dibaka nebe kukuteleja. (Bala Kolosayi 4:6.) Mulume ne mukaji badi mua kukolesha dibaka diabu bobu bayukidilangana bimpe, bapatula “anu dîyi dimpe didi mua kukolesha bakuabu padibi bikengela, bua dikuatshishe” muena dibaka nende.​—Ef. 4:29.

16, 17. Bua tshinyi bidi ne mushinga bua muena dibaka atabalele mudi muena dibaka nende udiumvua ne amukumbajile majinga ende a disangila?

¹⁶ Bena mu mabaka badi mua kukolesha malanda abu padi yonso wa kudibu ukeba diakalenga dia muena dibaka nende, uteka majinga a mukuabu kumpala kua ende. (Filip. 2:3, 4) Mulume ne mukaji badi ne bua kutabalela mushindu udi muena dibaka nende udiumvua, ne kutabalela majinga a mukuabu a disangila.​—Bala 1 Kolinto 7:3, 4.

¹⁷ Bia dibungama, bamue bena mu mabaka batu babenga kuleja bena dibaka nabu mudibu babanange peshi babenga bua kusangila nabu, ne bamue balume batu bela meji ne: kuleja mukaji bulenga ki nkuikala muntu wa nsongo to. Nkudimuinu mukuabu wa Bible udi wamba ne: “Nuenu balume nudi ne bua kudienzeja bua kumvuila bakaji banudi nabu.” (1 Pet. 3:7, Phillips) Mulume udi ne bua kumanya ne: kupesha mukajende tshidi bu tshiende kakuena anu kumvuija kusangila patupu to. Mukaji utu udiumvua bimpe mu dibaka bayende yeye muikale mumunange mu bikondo bionso, kabiyi anu padibu basangila to. Mulume ne mukajende bobu batabalelangana ne dinanga, nebibambuluishe bua kukumbajilangana majinga a mu lungenyi ne a ku mubidi.

18. Ntshinyi tshidi mulume ne mukaji mua kuenza bua kukolesha malanda a mu dibaka diabu?

¹⁸ Nansha mudiku kakuyi kabingila ka kupanga lulamatu mu dibaka, kubenga kunanga muena dibaka nebe kudi mua kumusaka bua kuya kukeba dinanga ne bulunda bushême kudi muntu mukuabu. (Nsu. 5:18; Muam. 9:9) Nunku, Bible udi ubela bena dibaka wamba ne: “Kanubengianganyi mu nzubu, anu nuenu bumvuangane bua tshikondo kampanda tshisunguluke.” Bua tshinyi? “Bua Satana katungunuki ne kunuteta bua dipanga dienu dia kudikanda.” (1 Kol. 7:5) Nebikale bibi bena dibaka bobu balekela Satana wenza mudimu ne ‘dipanga kudikanda’ diabu ne usaka umue wa kudibu bua kukuluka mu buteyi ne kuenda masandi. Bishilangane, muena dibaka yonso yeye kayi ‘ukeba anu diakalenga diende nkayende, kadi utungunuka ne kukeba dia mukuabu,’ ne upesha muena dibaka nende tshidi bu tshiende bua kumuleja dinanga pamutu pa kuenza nanku anu bu muenzeja, ne bobu bakumbajilangana majinga abu a mu nzubu ne dinanga, badi bakolesha malanda abu.​—1 Kol. 10:24.

19. Tudi ne bua kuikala badisuike bua kuenza tshinyi? Bua tshinyi?

¹⁹ Tukadi ku mushiku wa mbelu wa buloba bupiabupia bua buakane. Ke bua tshinyi, kulonda majinga a mubidi kudi mua kutukebela bipeta bibi anu muvuabi bua bena Isalele 24 000 mu mpata ya Moaba. Panyima pa Dîyi dia Nzambi dimane kuleja bualu bubi ne bua bundu ebu, didi ditudimuija ne: “Muntu udi wela meji ne: mmuimane, adimuke bua kaponyi.” (1 Kol. 10:12) Nunku mbimpe bua tukoleshe dibaka dietu pa kushala ne lulamatu kudi Tatu wetu wa mu diulu ne kudi muena dibaka netu. (Mat. 19:5, 6) Kupita kumpala, mpindieu ke tshikondo tshia tuetu ‘kuenza muetu muonso bua ndekelu wa bionso atusangane katuyi katoba, katuyi kalema, ne mu ditalala.’​—2 Pet. 3:13, 14.