MU DIA 6 ngondo wa 9 wa 1926, pelerin mukuabu (mutangidi muena ngendu) wa mu Japon uvua mu États-Unis wakapingana mu Japon bu misionere. Bavua bamuindile anu kudi muntu umue uvua mudifundishe bua kuikala upeta Tshibumba tshia Nsentedi ukavua mutuadije kasumbu ka dilonga dia Bible mu Kobe. Balongi ba Bible bakenza mpuilu wabu wa kumpala mu dia 2 ngondo wa 1 mu 1927 mu tshimenga atshi. Bantu 36 bavua babuelamu ne bantu 8 bakatambula. Malu avua matuadije bimpe, kadi mmunyi muvua kasumbu kakese aka mua kulenga bantu ba mu Japon miliyo 60 bavua bajinga bua kumona butoke bua bulelela bua mu Bible?

Mu ngondo 5 wa 1927, Balongi ba Bible bavua bateta mishindu mipiamipia ya kuyisha bakenza kampanye ka kumanyisha miyuki ya mu Bible. Bua muyuki wa kumpala uvua ne bua kuenzeka mu Osaka, bana betu bakalamika bimanyinu mu tshimenga tshijima ne kutuminabu bantu banene mabeji a dibikila 3 000. Bakabanya trakte 150 000 ne kumanyishabu muyuki eu mu bikandakanda binene bia mu Osaka ne mu tike ya kawulu 400 000. Dituku dia muyuki, ndeke ibidi yakamuangalaja trakte 100 000 mu tshimenga. Bantu batue ku 2 300 bakuwula mu nzubu wa Osaka Asahi bua kutelejabu muyuki wa ne: “Bukalenge bua Nzambi bukadi pa buipi.” Bakalomba bantu bakuabu batue ku 1 000 bua kupingana ku nzubu bu muvuaku kakuyi muaba. Panyima pa muyuki, bantu bapite pa 600 bakashala bua kulonda tshitupa tshia nkonko ne mandamuna. Mu ngondo yakalonda, bakenza miyuki mikuabu mu Kyoto ne mu bimenga bikuabu bia ku Ouest kua Japon.

Mu ngondo wa 10 mu 1927, Balongi ba Bible bakalongolola bua kuenza miyuki mu Tokyo. Bakatuma kabidi mabeji a dibikila kudi bantu banene kusangisha ne kavula-mbedi, bena mu tshimamuende wa bukalenge, kudi bamfumu ba bitendelelu ne ba basalayi. Bakalamika mabeji, kuabanyabu trakte 710 000 ne bantu 4 800 bakalua bua kuteleja miyuki isatu ivuabu benzele mu tshimenga tshikulu tshia Japon.

Bakolportere (bampanda-njila) bavua benze mudimu munene bua kupetesha bantu mukenji wa Bukalenge ku mabu. Matsue Ishii, umue wa ku bakolportere ba kumpala ba mu Japon ne mukajende Jizo, bakenza mudimu mu bitupa bisatu pa binayi bia ditunga dia Japon, kumbikila ku Sapporo ku Nord menemene batangile mu Sendai, mu Tokyo, mu Yokohama, mu Nagoya, mu Osaka, mu Kyoto, mu Okayama, ne mu Tokushima. Muanetu wa bakaji Ishii ne muanetu wa bakaji mukuabu mukulakaje Sakiko Tanaka bakavuala bilamba bia kimono bia bena Japon bua kuya kumonangana ne banene ba mbulamatadi. Umue wa kudibu wakalomba mikanda ya La Harpe de Dieu ne ya Délivrance (Bupikudi) 300 bua kuyiteka mu tshilaminu tshia mikanda tshia mu buloko.

Katsuo Miura ne mukajende Hagino bakitaba mikanda ivua muanetu wa bakaji Ishii mubapeshe ne  bakamanya bulelela ne lukasa. Bakatambula mu 1931 ne bakalua bakolportere. Haruichi Yamada ne mukajende Tane pamue ne balela babu ba bungi bakitaba mukenji wa Bukalenge matuku makese kumpala kua 1930. Bena mu dîku dia Yadama bakatuadija mudimu wa bukolportere ne muanabu wa bakaji Yukiko wakaya kuenza mudimu ku Betele wa mu Tokyo.

Tshikondo atshi, mashinyi avua mushinga mukole ne njila ivua mibi. Nunku, Kazumi Minoura ne bansonga bakuabu bakolportere bakenza mudimu ne makadika avua kaayi ne motere. Bakayinyika dîna dia Yehu dia muendeshi wa ditempu munene uvua mulue mukalenge wa mu Isalele. (2 Bak. 10:15, 16) Yehu isatu minene ivua ne bule bua metre mapite pa abidi, butshiama bua metre matue ku abidi ne butumbuke bua metre matue ku abidi ne dimue divua mua kuambula bampanda-njila batue ku 6. Kabidi, Betele wa mu Japon wakenza makalu 11 avuabu babikila ne Yehu miana, dimue divua diambula bantu babidi. Kiichi Iwasaki uvua muambuluishe bua kuenza Yehu, udi wamba ne: “Yehu yonso uvua ne tenta ne bateri wa mu mashinyi uvua wambuluisha bua kutemesha nzembu bua butoke.” Bakolportere bavua bafila butoke bulelela mu Japon ne bapusa Yehu pa mikuna ne bayikoka mu bibandabanda kumbukila ku Nord ku Hokkaido batangile ku Kyushu ku Sud.

Kolportere mukuabu Ikumatsu Ota wakamba ne: “Patuvua tufika mu tshimenga, tuvua tuteka Yehu wetu ku muelelu wa mâyi peshi mu madimi. Tuvua tuanji kuya kumonangana ne banene ba mu tshimenga bu mudi mutangidi wa tshimenga, ne pashishe tuvua tuya ku nzubu ya bantu bua kufila mikanda yetu. Patuvua tujikija teritware, tuvua tuya mu tshimenga tshikuabu.”

Pavua kasumbu ka balongi ba Bible 36 ba mu Kobe benze mpuilu wabu wa kumpala bivua ntuadijilu wa dituku dia “midimu mikese.” (Zek. 4:10, MMV) Bidimu anu 5 pashishe mmumue ne: mu 1932, bakolportere ne bamanyishi 103 ba mu Japon bakafila luapolo lua mudimu, bafile mikanda mipite pa 14 000. Lelu, mudimu wa kuyisha miaba idi bantu ba bungi mu bimenga binene mmulongolola bimpe mu Japon, ne bamanyishi batue ku 220 000 badi bakenkesha butoke mu Japon: ditunga didi dîba dipatukila.​—Mu bintu bietu bia kale mu Japon.