1, 2. a) Nnganyi udi “Mukalenge wa tshiendelele”? Bua tshinyi muanzu eu mmumukumbanyine? (Tangila tshimfuanyi.) b) Bua tshinyi tudi basue bua Yehowa atukokeshe?

MUKALENGE SOBHUZA II wa mu Swaziland wakakokesha bidimu bitue ku 61. Nansha mudibi bikemesha bua mudi muntu mukokeshe bidimu bungi nunku, kudi mukalenge udi ne bukokeshi budibu kabayi mua kuimanyika kudi tshikondo tshîpi tshia muoyo wa buntu nansha. Bible udi wamba mudiye “Mukalenge wa tshiendelele.” (1 Tim. 1:17) Mufundi wa Misambu wakaleja dîna dia Mukalenge eu pakambaye ne: ‘Yehowa udi Mukalenge too ne tshiendelele.’​—Mus. 10:16.

² Bule bua bukokeshi bua Nzambi budi buenza bua buikale bushilangane ne bua bantu. Kadi, mushindu udi Yehowa ukokesha ke udi utukoka kudiye. Mukalenge kampanda uvua mukokeshe mu Isalele wa kale munkatshi mua bidimu 40 wakatumbisha Nzambi ne mêyi aa: ‘Yehowa udi ne luse ne dinanga, kena ukuata tshiji lubilu, udi muule tente ne dinanga dijalame. Yehowa wakajadika nkuasa wende wa butumbi mu diulu, bukalenge buende budi bukokesha ku mutu kua bantu bonso.’ (Mus. 103:8, 19) Yehowa kena anu Mukalenge wetu patupu to, udi kabidi Tatu wetu wa dinanga udi mu diulu. Bualu ebu budi bujula nkonko ibidi eyi: Mmu mushindu kayi mudi Yehowa wenza malu bu Tatu? Mmushindu kayi udi Yehowa uleja bukokeshi buende katshia  ku buntomboji bua mu Edene? Mandamuna a nkonko eyi neatusake bua kusemena pabuipi ne Yehowa ne kumutendelela ne muoyo wetu mujima.

3. Nnganyi uvua muntu wa kumpala wa mu dîku dia Yehowa dia mu diulu ne pa buloba? Mbanganyi bakuabu bavuabu bafuke bu “bana” ba Nzambi?

³ Yehowa uvua ne bua kuikala musanke bikole pavuaye mufuke Muanende mulela umuepele. Nzambi kavua muangate muanabute wende eu bu muntu mushadile to. Kadi, uvua mumunange bu Muanende ne kuenzaye nende mudimu wa difuka bifukibua bikuabu bipuangane. (Kolos. 1:15-17) Mu bifukibua ebi mudi banjelu binunu ne binunu. Banjelu aba badibu babikila ne: ‘bakuatshi bende ba mudimu badi benza mudiye musue’ badi benzela Nzambi mudimu ne disanka ne udi ubatua mushinga padiye ubabikila ne: “bana” bende. Badi benza tshitupa tshia dîku dia Yehowa dia mu diulu ne pa buloba.​—Mus. 103:20-22; Yobo 38:7.

4. Mmunyi muakabuela bantu mu dîku dia Nzambi dia mu diulu ne pa buloba?

⁴ Diakamue pavua Yehowa mufuke diulu ne buloba, wakadiundisha dîku diende dia mu diulu ne pa buloba. Yeye mumane kulongolola buloba bua buikale muaba muimpe wa kusombela, wakafuka muntu wa kumpala Adama mu tshimfuanyi tshiende. (Gen. 1:26-28) Bu mudi Yehowa Mufuki, uvua mutekemene bua Adama kumutumikilaye. Bu mudiye Tatu, udi ufila mikenji yende yonso ne dinanga ne buimpe. Mikenji eyi kayivua mua kupangisha bantu budikadidi buabu nansha kakese.​—Bala Genese 2:15-17.

5. Mmushindu kayi uvua Nzambi mulongolole malu bua buloba kuwulabu ne bantu?

⁵ Bishilangane ne batshikokesha nkaya ba bungi, Yehowa utu musue kupesha bifukibua biende midimu, ubienzela malu bu bantu ba mu dîku diende badiye mueyemene. Tshilejilu, wakapesha Adama bukokeshi ku mutu kua bifukibua bionso bidi ne muoyo, kumupeshaye mudimu muimpe ne mukole wa kuinyika nyama mêna. (Gen. 1:26; 2:19, 20) Nzambi kavua mufuke bantu bapuangane miliyo ya bungi bua kuwujabu buloba to, kadi wakasungula bua kufukila Adama mumuambuluishi mukumbane Eva. (Gen. 2:21, 22) Pashishe, wakapesha mulume ne mukaji diakalenga dia kuwuja buloba tente ne bana babu. Bantu bavua mu nsombelu muimpe aba bavua ne bua kudiundisha ku kakese ku kakese mikalu ya Mparadizu too ne pavuabu ne bua kuwula pa buloba bujima. Bu muvuabu tshitupa tshia dîku dia Yehowa dia mu diulu ne pa buloba, bavua ne bua kumutendelela bua kashidi pamue ne banjelu ba mu diulu. Ndiakalengapu kayi edi! Bushuwa eu mmushindu munene udi Yehowa uleja mudiye Tatu wa dinanga.

6. a) Mmu mushindu kayi muvua buntomboji butuadije mu dîku dia Nzambi? b) Bua tshinyi buntomboji kabuvua buleja ne: Nzambi uvua mujimije bukokeshi buende?

⁶ Bia dibungama, Adama ne Eva kabavua basue bua Yehowa ikale Mukalenge wabu to. Bakasungula bua kulonda Satana, muana wa Nzambi wa mu diulu uvua mutomboke. (Gen. 3:1-6) Kubenga bukokeshi bua Nzambi kuakabakebela bobu ne ndelanganyi yabu ntatu, makenga ne lufu. (Gen. 3:16-19; Lomo 5:12) Nzambi kavua kabidi ne muntu uvua umutumikila pa buloba to. Bualu ebu budiku buleja ne: wakajimija bukokeshi buvuaye nabu ne mmulekele bukokeshi buende ku mutu kua buloba ne bintu bidipu bionso anyi? Nansha kakese. Wakaleja bukokeshi buende pakipataye mulume ne mukaji mu budimi ne kubapangisha bua kupinganamu, wakateka bakeluba bua kulamabu tshibueledi tshia budimi bua Edene. (Gen. 3:23, 24) Nzambi wakaleja kabidi muvuaye Tatu wa dinanga pakenzaye bua disua diende dia kuikala ne dîku dia mu diulu ne pa buloba dienza ne banjelu ne bantu bavua bamutumikila dikumbane. Wakalaya “muana” peshi kankanunuina kavua ne bua kubutula Satana ne kusungila bantu ku bipeta bibi bia bubi bua Adama.​—Bala Genese 3:15.

7, 8. a) Mmushindu kayi uvua malu manyanguke mu tshikondo tshia Noa? b) Ntshinyi tshivua Yehowa mulongolole bua kumbusha malu mabi pa buloba ne kulama dîku dia bantu?

 ⁷ Mu nkama ya bidimu yakalonda, bamue bantu bakasungula bua kulamata Yehowa. Munkatshi muabu muvua Abele ne Henoka. Kadi bantu ba bungi bakabenga bua Yehowa kuikala Tatu wabu ne Mukalenge wabu. Mu tshikondo tshia Noa, buloba ‘buakuwula tente ne malu mabi.’ (Gen. 6:11) Bidiku bileja ne: Yehowa kavua kabidi utangila malu a pa buloba anyi? Malu avua menzeke adi aleja tshinyi?

⁸ Tuakule bua Noa. Yehowa wakamuambila malu masunguluke ne mikenji ya mua kuenza buatu bunene buvua mua kuambuluisha bua kusungila Noa ne dîku diende. Nzambi wakaleja kabidi muvuaye ne dinanga dia bungi kudi dîku diende dia pa buloba pavuaye mupeshe Noa mudimu bua kuikalaye “muyishi wa buakane.” (2 Pet. 2:5) Kakuyi mpata, mu mukenji uvua Noa umanyisha, uvua wambila bantu bua kunyingalala ne ubadimuija bua kabutu kakavua pabuipi, kadi bantu kabakateleja to. Noa ne dîku diende bavua basombe bidimu bia bungi munkatshi mua bantu bavua ne tshikisu ne benza malu mabi menemene. Bu muvua Yehowa muikale Tatu udi ukuba bana bende, wakalama bantu muanda mukulu ba lulamatu abu ne kubabeneshaye. Pavua Yehowa mutume Mvula wa kabutu, wakaleja bukokeshi buende kudi bantu ne banjelu babi bavua bamutombokele. Eyowa, Yehowa uvua anu ne bukokeshi.​—Gen. 7:17-24.

9. Mpunga kayi uvua Yehowa mupeshe bantu panyima pa Mvula wa kabutu?

⁹ Pavua Noa ne bena mu dîku diende benza malu kampanda bua kusukula buloba ne kueyela kapepe kimpe, mioyo yabu ivua bushuwa miuwule tente ne dianyisha kudi Yehowa bua muvuaye mubalame ne mubakube. Noa wakibaka diakamue tshioshelu ne kulambulaye Yehowa milambu bua kumutendelela. Nzambi wakabenesha Noa ne dîku diende ne wakabambila bua ‘balelangane, bakumbane ba bungi, bikale pa buloba buonso.’ (Gen. 8:20–9:1) Musangu eu kabidi, bantu bavua ne mpunga wa kudisangisha bua kutendelela ne kuwuja buloba tente.

10. a) Mmuaba kayi uvua ditombokela Yehowa ditangalake pa buloba panyima pa Mvula wa kabutu? Mmushindu kayi? b) Yehowa wakenza tshinyi bua kujadika ne: disua diende divua dikumbane?

¹⁰ Kadi, Mvula wa kabutu kavua mumbushe dipanga bupuangane to, bantu bavua anu batungunuka ne kuluangana ne buenzeji bua Satana budi kabuyi bumueneka ne bua banjelu batomboke. Katupa kîpi pashishe, ditombokela bumfumu buimpe bua Yehowa diakavula kabidi bikole. Tshilejilu, Nimeloda munkana wa Noa wakajuka bua kutombokela bukokeshi bua Yehowa mu mushindu kampanda mubi. Bible udi wamba mudi Nimeloda muikale ‘tshilembi tshikole ku mêsu kua Yehowa.’ Wakibaka bimenga binene bu mudi Babela ne kudijadika mukalenge “mu buloba bua Shinâ.” (Gen. 10:8-12) Mbualu kayi buvua Mukalenge wa tshiendelele mua kuenzela mukalenge mutomboke ne malu avuaye wenza bua kupangisha disua dia Nzambi dia ‘kuwuja buloba tente’? Nzambi wakatompakaja miakulu ya bantu, kuenzaye bua bantu ba Nimeloda bavua kabayi bapetangana kabidi kutangalakabu ‘pa buloba bujima.’ Bakaya ne ntendelelu yabu ya dishima ne mishindu yabu ya dikokesha ya bantu.​—Gen. 11:1-9.

11. Mmunyi muvua Yehowa muleje ne: uvua mulamate mulunda wende Abalahama?

¹¹ Nansha muvua bantu ba bungi batendelela nzambi ya mafi panyima pa Mvula wa kabutu, bamue bantu ba lulamatu bakatungunuka ne kutendelela Yehowa. Umue wa kudibu uvua Abalahama. Wakitaba bua kushiya nzubu wende muimpe mu tshimenga tshia Ula ne kuya kusombela mu ntenta munkatshi mua bidimu bia bungi. (Gen. 11:31; Eb. 11:8, 9) Mu tshikondo tshivua Abalahama utambakana, uvua misangu ya bungi munyunguluka kudi bamfumu, ne ba bungi ba kudibu bavua basombele mu bimenga bivua ne ngumbu. Kadi Yehowa wakalama Abalahama ne dîku diende. Mufundi wa Misambu wakaleja mudi Yehowa muikale Tatu udi ukuba  pakambaye ne: ‘Nzambi kakitabuja bua muntu umue kubenzela bibi. Ee, wakabela bakalenge bualu buabu.’ (Mus. 105:13, 14) Bu muvua Yehowa mulamate mulunda wende Abalahama, wakamulaya ne: ‘Bakalenge nebaledibue munda muebe.’​—Gen. 17:6; Yak. 2:23.

12. Mmunyi muvua Yehowa muleje bumfumu buende ku mutu kua Ejipitu? Bualu ebu buvua buenzele tshisamba tshiende tshisungula tshinyi?

¹² Nzambi wakambuluila Isaka muana wa Abalahama ne Yakoba munkanende mulayi wende wa kubabenesha, uvua wakula kabidi bua kupatuila bakalenge mu tunkanunuina tuabu. (Gen. 26:3-5; 35:11) Kadi, kumpala kua kupatula bakalenge aba, ndelanganyi ya Yakoba yakalua bapika mu Ejipitu. Bualu ebu buvuaku buleja ne: Yehowa kavua ne bua kukumbaja mulayi wende peshi ne: uvua mulekele bukokeshi buende ku mutu kua buloba anyi? Nansha kakese. Pakakumbana tshikondo tshivuaye mulongolole, wakaleja bukole buende ne bukokeshi buvuaye nabu kudi Palô muena mutu mukole. Bena Isalele bavua mu bupika bakeyemena Yehowa, wakalua kubapikula mu mushindu wa pa buawu ku Mbuu mukunze. Bidi bimueneka patoke ne: Yehowa utshivua anu Mfumu ku mutu kua bionso, ne bu muvuaye Tatu udi ulama bantu bende, wakenza mudimu ne bukole buende bua kubakuba.​—Bala Ekesode 14:13, 14.

13, 14. a) Mu musambu uvua bena Isalele bimbe, bavua bambe tshinyi bua bukokeshi bua Yehowa? b) Mmulayi kayi udi utangila bukokeshi uvua Nzambi mulaye Davidi?

¹³ Diakamue panyima pa bena Isalele bamane kupatuka mu Ejipitu mu tshishima, bakimba musambu wa ditshimuna wa kutumbisha nawu Yehowa. Mu musambu au udi mu Ekesode nshapita wa 15, badi bamba mu mvese wa 18 ne: “Yehowa neakokeshe bantu tshiendelele.” Bushuwa, Yehowa wakalua Mukalenge ku mutu kua tshisamba tshipiatshipia. (Dut. 33:5) Kadi, bantu kabakasanka bua kuikala ne Yehowa bu Mukokeshi wabu udi kayi umueneka to. Bidimu bitue ku 400 panyima pa bobu bamane kupatuka mu Ejipitu, bakalomba Nzambi bua abatekele mukalenge muikale muntu anu muvuabi bienzeka mu bisamba biena mutumba bivua bitendelela nzambi ya dishima. (1 Sam. 8:5) Nansha nanku, Yehowa uvua anu Mukalenge, biakamueneka mu tshikondo tshivua Davidi ukokesha bu mukalenge muibidi wa Isalele.

¹⁴ Davidi wakaya ne mushete wa tshijila wa tshipungidi mu Yelushalema. Mu tshikondo tshia disanka etshi, bena Lewi bakimba musambu wa butumbi ne mêyi a mushinga adi mu 1 Kulondolola 16:31 adi amba ne: ‘Bambe munkatshi mua bisamba  ne: Yehowa udi ukokesha.’ Muntu udi mua kudiebeja ne: ‘Bu mudi Yehowa muikale Mukalenge wa tshiendelele, mmunyi mudibi ne: wakalua Mukalenge mu tshikondo atshi?’ Yehowa udi ulua Mukalenge padiye ukuata mudimu ne bumfumu buende anyi uteka muntu bua ikale muleji-mpala wende. Mushindu wa bukokeshi bua Yehowa eu udi ne diumvuija dia pa buadi. Kumpala kua Davidi kufua, Yehowa wakamulaya ne: bukalenge buende buvua ne bua kutungunuka tshiendelele wamba ne: ‘Pakumbana matuku ebe, pawalala tulu ne bankambua bebe, nensungule muanebe udi ulupuka munda muebe, nenjadike bukalenge buende.’ (2 Sam. 7:12, 13) Ku ndekelu kua dikumbana dia malu onso avuabu balaye, “muana” peshi kankanunuina ka Davidi kakalua kumueneka bidimu bipite pa 1 000 pashishe. Nnganyi uvua ne bua kuikala kankanunuina aka? Ndîba kayi divuaku ne bua kulua Mukalenge?

15, 16. Ndîba kayi divuabu basungule Yezu bua kuluaye Mukalenge mu matuku atshivua alua? Pavua Yezu pa buloba, wakalongolola malu kayi bua bukokeshi buende?

¹⁵ Mu tshidimu tshia 29, Yone mubatiji wakatuadija kuyisha ne: “Bukalenge bua mu diulu [bukavua] pabuipi.” (Mat. 3:2) Pavuabu batambuishe Yezu kudi Yone, Yehowa wakamusungula bu Masiya mulaya ne Mukalenge uvua ne bua kukokesha mu Bukalenge bua Nzambi. Yehowa wakaleja muvuaye Tatu wa dinanga kudi Yezu pakambaye ne: “Eu udi Muananyi munanga undi muanyishe.”​—Mat. 3:17.

¹⁶ Yezu uvua utumbisha Tatuende mu mudimu wende wa diyisha. (Yone 17:4) Wakenza nunku pavuaye uyisha bua Bukalenge bua Nzambi. (Luka 4:43) Wakalongesha too ne bayidi bende bua kusambilabu bua Bukalenge abu bulue. (Mat. 6:10) Bu muvua Yezu muikale Mukalenge musungula, wakambila baluishi bende ne: “Bukalenge bua Nzambi budi munkatshi muenu.” (Luka 17:21) Pashishe, dilolo kumpala kua lufu luende, wakadia “tshipungidi tshia Bukalenge” ne bayidi bende. Wakapesha bamue ba ku bayidi bende ba lulamatu ditekemena dia kupetanganabu nende bu bakalenge mu Bukalenge bua Nzambi.​—Bala Luka 22:28-30.

17. Mmu mushindu kayi mukese uvua Yezu mutuadije bukokeshi buende mu bidimu lukama bia kumpala? Bua tshinyi uvua ne bua kuanji kuindila?

¹⁷ Ndîba kayi divua Yezu ne bua kukokesha bu Mukalenge wa Bukalenge bua Nzambi? Kavua mua kutuadija kukokesha diakamue to. Dituku diakalonda mu mapingaja, bakamushipa ne bayidi bende kutangalakabu. (Yone 16:32) Kadi, anu bu mu bikondo bia kale, Yehowa utshivua anu ne bukokeshi. Wakabisha Muanende mu dituku disatu ne mu dituku dia Pentekoste wa mu 33 Yezu wakajadika bukalenge bua mu nyuma ku mutu kua tshisumbu tshia bana babu bena Kristo bela manyi. (Kolos. 1:13) Kadi Yezu uvua ne bua kuanji kuindila bua kushisha kutuadija kukokesha pa buloba bu ‘kankanunuina’ kalaya. Yehowa wakambila Muanende ne: ‘Ushikame biebe ku tshianza tshianyi tshia balume too ne panavuija badi nebe lukuna ditanda dia muinshi mua makasa ebe.’​—Mus. 110:1.

18, 19. Tudi basakibue bua kuenza tshinyi? Nnkonko kayi ituandamuna mu tshiena-bualu tshialonda?

¹⁸ Bavua baluishe bukokeshi bua Yehowa mu diulu ne pa buloba munkatshi bua bidimu bia bungi. Yehowa katu mulekele kuikala mukokeshi ku mutu kua bionso to; utshitu anu ukokesha. Bu mudiye Tatu wa dinanga, wakakuba ne kulamaye bantu bende bavua bamulamate bu mudi Noa, Abalahama ne Davidi. Bualu ebu kabuenaku butusaka bua kukokela Mukalenge wetu ne kusemena pabuipi nende anyi?

¹⁹ Kadi mpindieu tudi mua kudiebeja ne: Mmunyi mudi Yehowa mulue Mukalenge mu matuku etu aa? Mmunyi mutudi mua kuleja ne: tudi bena dia Bukalenge bua Nzambi ne kulua bana balelela ba mu dîku diende dia mu diulu ne pa buloba? Patudi tusambila ne: Bukalenge bua Nzambi bulue, bidi biumvuija tshinyi? Netuandamune nkonko eyi mu tshiena-bualu tshialonda.