BIBLE udi wamba ne: ‘Monayi, bana badi bumpianyi bufume kudi Yehowa, bana badi bapatuka munda mua mamu wabu badi difutu diende.’ (Mus. 127:3) Nunku kabiena bikemesha padi bena Kristo basanka bikole bua diledibua dia muana.

Diledibua dia muana ditu dipesha baledi disanka ne majitu manene. Bua muana kukola bimpe ne kulua muntu wa makanda udi dijinga ne biakudia bidi bidisha mubidi ku musangu ne ku musangu. Bua muana kushala mu ntendelelu mulelela, bidi bikengela kumupesha biakudia bia mu nyuma ne bulombodi bua kudi baledi badi badifila ne muoyo mujima bua kukuna mêyi a Nzambi munda muende. (Nsu. 1:8) Ndîba kayi didibu ne bua kutuadija kumulongesha? Mmalu kayi adibu ne bua kumulongesha?

Tuangate tshilejilu tshia Manoa muena Dana uvua musombele mu tshimenga tshia Solea mu Isalele wa kale. Muanjelu wa Yehowa wakambila mukaji wa Manoa uvua nkumba ne: uvua ne bua kulela muana wa balume. (Bal. 13:2, 3) Kakuyi mpata, Manoa muena lulamatu ne mukajende bakasanka bikole bua lumu lua disanka elu. Kadi bavua kabidi ne malu a bungi avuabu bajinga kumanya. Nunku Manoa wakalomba Yehowa ne: ‘Mukalenge, ndi nkusengelela ne: Witabuje bua muntu wa Nzambi uwakutuma alue kutudi kabidi bua kutuyisha tshitudi mua kuenzela muana utualela.’ (Bal. 13:8) Manoa ne mukajende bavua bajinga bikole bua kumanya mushindu wa kukolesha muanabu. Kakuyi mpata bakalongesha muanabu Shimishona mikenji ya Nzambi ne diditatshisha diabu diakapatula bipeta bimpe. Bible udi wamba ne: ‘Nyuma wa Nzambi wakabanga kuenzeja Shimishona.’ Nunku, Shimishona wakenza malu a bukole a bungi bu umue wa mu balumbuluishi ba Isalele.​—Bal. 13:25; 14:5, 6; 15:14, 15.

Ndîba kayi didibu ne bua kutuadija kulongesha muana? Bakatuadija kulongesha Timote “mifundu ya tshijila kutshia ku buana” kudi mamuende Eunike ne kakuende Loyi. (2 Tim. 1:5; 3:15) Bushuwa, bakatuadija kulongesha Timote Mifundu patshivuaye mupuekele bikole.

Mbimpe baledi bena Kristo balombe Nzambi bulombodi ne badianjile kulongolola malu bua batuadije kulongesha bana babu “katshia ku buana.” Nsumuinu 21:5 udi wamba ne: ‘Meji adi muena mutshima wa mudimu upangadija adi amuvudijila lupetu luvule.’ Bushuwa, baledi batu badilongolola bimpe menemene kumpala kua kulelabu muana. Badi mene mua kufunda bimue bintu bikala muana nabi dijinga. Badi kabidi ne bua kumulongoluela amue malu a mu nyuma. Tshipatshila tshiabu tshikale tshia kutuadija kulongesha muana anu patshidiye mu maboko.

Mukanda kampanda udi wamba ne: “Ngondo ya ntuadijilu ya panyima pa diledibua dia muana itu tshikondo tshia mushinga bua bidi bitangila dikola dia buongo. Mu tshikondo etshi bungi bua majita adi akuatakaja tujilu tudi tuambuluisha bua kukuata malu, budi buvula misangu makumi abidi.” (Early Childhood Counts​—A Programming Guide on Early Childhood Care for Development) Nunku, mbimpe baledi benze mudimu bimpe ne tshikondo tshîpi tshia dikola dia lungenyi lua muana etshi bua kutuadija kukuna malu a mu nyuma ne a mushinga mu lungenyi lua muana.

Mamu kampanda udi mpanda-njila wa pa tshibidilu udi wamba bua muanende wa bakaji ne: “Ndi mutuadije kuya nende mu mudimu wa buambi anu patshivuaye ne ngondo umue. Nansha muvuaye kayi mua kumvua bivua bipitakana, mvua mumanye ne: tshimvua ngenza etshi tshivua mua kumuambuluisha. Pakakumbajaye bidimu bibidi, ukavua upesha bantu batuvua tupetangana nabu mu mudimu wa buambi trakte ne dikima.”

Kutuadija kulongesha muana patshidiye mupuekele kudi kupatula bipeta bimpe. Kadi baledi batu bamona ne: kulongesha malu a mu nyuma kutu paku ne imue ntatu.

Mushindu utu bana ne ditanaji ne batuma lungenyi kua tshianana bidi mua kuikala lutatu lunene bua baledi. Muana udi mua kumbusha lungenyi ku bualu ne lukasa kulutuma ku bukuabu. Batu bushuwa basue kumanya malu a bungi ne kumanya bintu bidi bibanyunguluke. Baledi badi mua kuenza tshinyi bua kuambuluisha bana babu bua kutuma ntema ku malu adibu bajinga kubalongesha?

Tukonkonone tshivua Mose muambe. Dutelonome 6:6, 7 udi wamba ne: ‘Mêyi au angakukuambila lelu eu ikale mu mutshima webe; wewe newayishe bana bebe, wewe neusombelele nabu bua mêyi au, pawashikama mu nzubu webe, ne pawenda mu njila, ne pawalala, ne pawabika.’ Muaku ‘kuyisha’ udi umvuija kulongesha ku musangu ne ku mukuabu. Muana mutekete udi anu bu mutshi utshidi muana udi dijinga ne kuwela mâyi ku musangu ne ku musangu. Bu mudi kuamba kuambulula kuambuluisha bantu bakole bua kuvuluka malu a mushinga, bushuwa nekuambuluishe kabidi bana batshidi batekete.

Kulongesha bana bulelela bua Nzambi kudi kulomba bua baledi bikale bapitshisha dîba pamue nabu. Bushuwa, bidi mua kuikala bikole bua kupeta dîba dia kuenza nunku mu bulongolodi ebu mudi malu a bungi a kuenza. Kadi mupostolo Paulo wakamba bua ‘kukuata mudimu bimpe menemene ne dîba’ bua kuenza midimu ya buena Kristo idi ne mushinga. (Ef. 5:15, 16) Mmunyi mudibi mua kuenzeka nanku? Bivua bikolela muena Kristo kampanda uvua mukulu ne mukajende uvua mudifile bikole mu mudimu wa bumpanda-njila bua kuikala ne nkatshinkatshi mu dilongesha muana, dikumbaja majitu a  mu tshisumbu ne dienza mudimu wa bianza. Mmunyi muvuabu mua kupeta dîba dia kulongesha muanabu wa bakaji? Tatu udi wamba ne: “Mu dinda dionso kumpala kua kuya ku mudimu, meme ne mukajanyi tutu tumubadila mukanda wa Miyuki ya mu Mukanda wa Nzambi anyi kakanda ka Tukonkononayi Mifundu dituku dionso. Ku dilolo kumpala kua kulalaye, tutu tudienzeja bua kumanya bituikala tuvua bamubadile, ne patutu tuya mu buambi, tutu tuya nende. Katuena basue kujimija bidimu bia ntuadijilu bia muoyo wende ebi to.”

Tudi bushuwa basue bua bana betu balue bantu bakulumpe badi bakumbane bua kudiambuila majitu. Kadi tudi tubalongesha nangananga bua banange Nzambi mu mioyo yabu.​—Mâko 12:28-30.

Musambu wa 127:4 udi wamba ne: ‘Bu mudi mikete ya mu tshianza tshia muena bukitu, nunku mmudi bana baledibue mu bunsongalume bua tatu wabu.’ Nunku badi bafuanyikija bana ne mikete idibu ne bua kuludika bimpe bua kufika ku tshipatshila. Muashi wa mikete kena mua kukuata mukete pakadiye mumane kuwasa to. Baledi badi ne “mikete,” mmumue ne: bana babu, anu bua tshikondo kampanda tshîpi. Badi ne bua kuenza mudimu bimpe ne tshikondo etshi bua kubueja mikenji ya Nzambi mu lungenyi ne mu mioyo ya bana babu.

Mupostolo Yone wakafunda bua bana bende ba mu nyuma ne: “Tshiena ne bualu bua kulejila dianyisha kupita ebu: bua meme kumvua ne: bana banyi badi batungunuka ne kuenda mu bulelela.” (3 Yone 4) Baledi bena Kristo badi pabu mua kuleja dianyisha dia buena edi padibu bamona bana babu “batungunuka ne kuenda mu bulelela.”