Udi muvuluke anyi?

Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:

Mmunyi mudi tshilejilu tshia Solomo tshituleja malu atudi ne bua kudimukila?

Nzambi wakabenesha Mukalenge Solomo ne wakenza nende mudimu. Kadi mu bukokeshi buende, Solomo wakalekela kulonda Nzambi. Wakasela muana wa Palô uvua kayi utendelela Yehowa, wakadivudijila bakaji ne wakalekela bakaji bavua kabayi batendelela Yehowa aba bamufikisha ku kakese ku kakese ku ditendelela nzambi ya dishima. Tudi ne bua kuenza bua ne: lungenyi lubi kalulu kukola munda muetu ku kakese ku kakese. (Dut. 7:1-4; 17:17; 1 Bak. 11:4-8)​—15/12, dibeji dia 10-12.

Tudi ne bua kutumikila mikenji ya mu Bible bua tshinyi?

Bantu badi batumikila mikenji a mu Bible badi ne kondo ka muoyo kimpe ne badi ne malanda makole ne bena mu mêku abu. (Mus. 19:8, 11) Bantu badi babenga kuyitumikila batu misangu ya bungi ne tunyinganyinga.​—1/1, dibeji dia 8-9.

Bena Kristo batu batambula bua tshinyi? Mmunyi mudi muntu mua kukumbana bua kutambula?

Batismo mbualu budibu balombe bena Kristo bonso badi basue kuikala mu malanda mimpe ne Nzambi. (1 Pet. 3:21) Tudi tudilambula kudi Yehowa mu disambila ditudi tuenza pa nkayetu tuleja mutudi tudifila bua kuenza disua dia Nzambi matuku etu onso a muoyo. Panyima pa tuetu bamane kudilambula pa nkayetu nunku, tudi tuleja bualu ebu patoke patudi tutambula.​—1/4, dibeji dia 16-17.

Ntshinyi tshidi tshileja ne: kubangila anu mu bidimu lukama bia kumpala too ne lelu, pa buloba apa patu anu bena Kristo bela manyi?

Mu tshilejilu tshia Yezu tshia “mponda” ne ‘lupela,’ ‘mamiinu mimpe’ avua aleja ‘bana ba bukalenge.’ (Mat. 13:24-30, 38) Lupela luvua ne bua kukolela pamue ne mponda too ne mu tshikondo tshia kunowa. Nunku nansha mutudi katuyi mua kuamba kujadika bantu bavua mu mulongo wa mponda, tumanye ne: mu bikondo bionso too ne lelu bamue bela manyi bavua anu pa buloba apa.​—15/1, dibeji dia 7.

Nnganyi uvua mutume “mutoto” bua kulombola bena mbuku bavua balue kutangila Yezu?

Mmuntu uvua musue ne muoyo umue bua Yezu afue. Muntu au n’Satana diabolo. Satana udi usaka bantu ku dishima, tshikisu ne dishipangana. Ke bualu kayi Yezu udi umubikila ne: ‘muena mashimi ne udi tatu wawu’ ne ‘ku tshibangidilu yeye wakadi mushipianganyi.’ (Yone 8:44)​—1/4, dibeji dia 29.

Tudi mua kuenza tshinyi bua kulekela lukuka?

Malu adi alonda aa ke adi mua kutuambuluisha: Dienzeja bua kunanga bena Kristo nebe, ikala udisangisha ne bantu badi benzela Nzambi mudimu, ditatshisha bua kuenza malu mimpe ne ikala ‘usanka ne badi basanka.’ (Lomo 12:15)​—15/2, dibeji dia 16-17.

Ana udibu batele mu muyuki wa dilumbuluisha dia Yezu uvua nganyi?

Mu tshikondo tshivuabu balumbuluisha Yezu, Ana uvua ‘muakuidi munene.’ (Luka 3:2) Uvua muakuidi munene kumbukila ku tshidimu 6 anyi 7 too ne bu mu tshidimu tshia 15 pavuabu bamumbushe mu mudimu eu. Kadi wakashala ne buenzeji bukole kudi bena Isalele.​—1/4, dibeji dia 9.

Mmalu kayi audi ne bua kuvuluka paudi upeshangana mibelu?

Udi ne bua kuanji kumanya bualu buudi ubelela muntu bimpe. Kuikadi wandamuna anu lukasa lukasa to. Ukuate mudimu ne Dîyi dia Nzambi ne budipuekeshi. Koku mushindu udi mua kukuata mudimu ne mikanda yetu. Kuangatshidi bakuabu mapangadika to.​—15/3, dibeji dia 7-9.

Yezu wakambila bantu bua kuenda ntanta wa kilometre ibidi. (Mat. 5:41) Uvua musue kuamba tshinyi?

Mu Isalele tshikondo atshi, bena Lomo bavua bakokesha bavua benzeja bantu mudimu ku bukole. Nunku pavua Yezu muambile bantu bua kuenda ntanta wa kilometre ibidi uvua ubambila bua kuenza mu buimpe midimu ivua bantu bavua ne bukokeshi babalomba bua kuenza.​—1/4, dibeji dia 9.