Bua tshinyi mbimpe ‘kuikala batabale’?

BAYIDI ba Yezu bakamuebeja ne: ‘Utuambile tshimanyinu tshia pawalua tshiakabidi ne tshia ku nshikidilu kua tshikondo etshi.’ (Mat. 24:3) Mu diandamuna, Yezu wakabaleja tshimanyinu tshivua tshipepele, tshiumvuika bimpe tshivuabu mua kujingulula ne kabayi batupakana anu mudibi bileja mu Matayo nshapita wa 24, mu Mâko nshapita wa 13 ne mu Luka nshapita wa 21. Wakabambila kabidi ne: ‘Nuikale batabale.’​—Mat. 24:42, MMM.

Bikalabi ne: tshimanyinu tshivua mua kumueneka, bua tshinyi Yezu mmufile didimuija edi? Tukonkonone malu abidi aa. Bua kumpala, kalengu kadi mua kufikisha bamue bantu ku dilengulula tshimanyinu, kujimija ditabuja ne kubenga kushala batabale. Bualu buibidi budi ne: muena Kristo udi mua kujingulula malu adi enza tshimanyinu bimpe kadi bua muaba udiye musombele kayi umona mudiwu amulenga buludiludi to. Udi mua kufika ku diela meji ne: “dikenga dinene” didi dikale bualu bua ndekelu bua mu tshimanyinu tshivua Yezu mufile ditshidi kule nunku kabiena ne mushinga bua ‘kushala batabale.’​—Mat. 24:21.

“Kabakamanya bualu”

Yezu wakavuluija bayidi bende nsombelu wa bantu ba mu matuku a Noa. Mudimu wa kuyisha ne kuibaka buatu bunene uvua Noa wenza, ne tshikisu tshia bantu ba mu tshikondo atshi bivua bimueneke patoke. Kadi, bantu ba bungi “kabakamanya bualu.” (Mat. 24:37-39) Ke mudi bantu balengulula kabidi madimuija lelu. Tshilejilu, bakanyemesha ba bungi kabatu banemeka bungi bua lubilu ludibu babakosele muaba kampanda to. Nunku, mbulamatadi utu muenzejibue bua kuenza tubumba miaba mishilangane mu njila bua kufikisha ba kanyemesha ku ditekesha lubilu miaba ayi. Bia muomumue, muena Kristo udi mua kuikala mumanye tshimanyinu tshia matuku a ku nshikidilu kadi mutshikale wenza malu adi aleja ne: ki mmuanji kutshijingulula to. Ke tshivua tshienzekele Arielle, nsongakaji wa bidimu dikumi ne pa mutu udi musombele mu Afrike wa ku Ouest.

Arielle uvua munange kutangila ndundu wa bianza wa bantu bakaji ku televizion. Pavuabu benze tshisumbu tshia banayi ba ndundu mu tshilongelu tshiabu, dijinga diende dia kunaya diakamupangisha mua kumona njiwu ivuaye mua kupeta bua ditabuja diende. Wakadifundisha bua kuikala ukuata mu kazubu. Tshiakenzeka pashishe ntshinyi? Udi wamba ne: “Bamue bansongakaji batuvua tunaya nabu bavua ne balunda babu ba balume bavua banua diamba ne mfuanka. Bavua banseka bualu mvua mushilangane nabu, kadi mvua ngela meji ne: mvua mua kutantamena bualu abu. Dinaya diakatuadija kunyanga malanda anyi ne Yehowa mu mushindu umvua tshiyi muelele meji. Dinaya edi ke bualu bunene bumvua nabu mu mutu ne ku muoyo. Pamvua mu bisangilu, meji anyi avua anu ku dinaya. Ngikadilu yanyi ya buena Kristo yakatuadija kunyanguka. Pamutu pa kunanga dinaya patupu, ngakapeta dijinga dikole dia kutshimuna. Mvua ndibidija bikole anu bua kukumbaja dijinga dia kutshimuna dimvua nadi. Bualu ebu buakankebela tunyinganyinga. Tshivua kabidi ne balunda anu bua dinaya dia ndundu wa bianza.

 “Bualu kampanda bunene buakenzeka dîba divuabu bapeshe munayi wa mu tshisumbu tshikuabu tshituvua tunaya natshi ndundu bua kukupa mu kazubu. Ngakadilongolola bua kukuata ndundu au. Ngakalomba tshiyi nansha muele meji bua Yehowa angambuluishe bua kukuata ndundu au. Bualu ebu buankandeja muvua malanda anyi ne Yehowa matekete bikole. Kadi mmunyi mumvua mua kuakolesha tshiakabidi?

“Nkavua mutangile musangu kampanda filme wa Les jeunes s’interrogent​—Que vais-je faire de ma vie? * Ngakapangadika bua kumutangila kabidi njila muibidi ne muoyo mujima. Ku ndekelu, ngakadimona mu nsombelu umue ne André nsongalume udibu baleje mu filme au. Ngakatamba kuimanyina pa tshivua mukulu kampanda muambile André bua kuenza, kubala ne kuelangana meji pa Filipoi 3:8. Ke tshingakenza ne ngakangata dipangadika dia kumbuka mu tshisumbu tshia ndundu tshimvua.

“Bualu ebu buakangambuluisha bikole. Lungenyi lumvua nalu lua kutshimuna ne tunyinganyinga biakajimina. Ngakapetulula disanka ne kupingaja bulunda ne bena Kristo nanyi. Ngakatuadija kuangata midimu ya mu tshisumbu ne mushinga wa bungi. Ngakabanga kutuma meji anyi ku malu avuabu balongesha mu bisangilu ne ngakabinanga. Ngakalengeja kabidi mudimu wanyi wa buambi. Mpindieu ntu ngangata bumpanda-njila buambuluishi ku musangu ne ku musangu.”

Ditanaji diodi dikufikishe ku dilengulula tshimanyinu tshivua Yezu mufile, udi mua kuidikija tshilejilu tshia Arielle. Udi mua kuenza amue a ku malu adi alonda aa: enza mudimu ne Index des publications Watch Tower utubu bafuanyikija ne karte kadi kambuluisha muntu bua kumanya muaba udi biuma bisokoka. Mukanda eu udi ukuleja muaba uudi mua kupeta mibelu mimpe ne miyuki ya malu a mu nsombelu idi ipetangana ne nsombelu webe. Bisangilu nebikuambuluishe bikole wewe ubilongolola bimpe ne ufunda malu adibu bambamu. Bamue bantu batu bamona ne: mbimpe kusomba mu bibasa bia kumpala. Padibu benza muyuki udi ulomba bateleji bua bakule pabu, dienzeja bua kuandamuna ku nkonko ya ntuadijilu. Pa kumbusha malu aa, ushale mutabale paudi umona mudi malu adi enzeka lelu umvuangana ne malu adi enza tshimanyinu tshia ‘matuku a ku nshikidilu.’​—2 Tim. 3:1-5; 2 Pet. 3:3, 4; Buak. 6:1-8.

‘Nuikale badilongolole’

Tshimanyinu tshia matuku a ku nshikidilu tshidi tshimueneka pa buloba bujima mmumue ne: munkatshi mua ‘bantu bonso ba pa buloba.’ (Mat. 24:7, 14) Bantu ba bungi badi basanganyibua miaba idi bipupu bia masama, biyole bia nzala, bikumina ne malu makuabu akavuabu bambe bienzeka bikole. Kadi bakuabu badi ne ndambu wa ditalala. Bikala bualu nansha bumue bua mu tshimanyinu etshi kabuyi buanji kukukuata wewe, udiku ne bua kuela meji ne: dikenga dinene ditshidi kule anyi? Alu ki ndungenyi luimpe to.

Tshilejilu, anji elabi meji pa tshivua Yezu muambe bua ‘bipupu ne biyole.’ (Luka 21:11) Tshia kumpala, kavua muleje ne: malu aa avua ne bua kukuata bantu ba miaba yonso musangu umue ne mu mushindu wa muomumue to. Kadi uvua muleje ne: malu aa avua ne bua kuenzeka ‘ku luseke lumue pashishe ku lukuabu.’ Nunku, katuena mua kutekemena bua malu a muomumue enzeke miaba yonso mu tshikondo tshimue to. Tshibidi, katupa kakese yeye mumane kuakula bua biyole bia nzala, Yezu wakaleja muvua bamue ba ku bayidi bende mua kudimukila budiavi wamba ne: ‘Nudilame bimpe, bua mitshima yenu  kayinemi ne mudi.’ (Luka 21:34) Nunku, bena Kristo bonso kabena mua kutekemena bua kutuilangana ne malu onso a mu tshimanyinu to. Kadi Yezu wakamba ne: ‘Panuatangila malu aa alua, numanye bienu ne: Bukalenge bua Nzambi budi pabuipi.’ (Luka 21:31) Bintu bidi bantu bapatule bu mudi televizion ne Enternete bidi bituambuluisha bua kumona mudi malu onso a tshimanyinu akumbana nansha wowu kaayi atulenga.

Tuvuluke kabidi ne: Yehowa ukadi mukose ‘dituku ne dîba’ diatuadija dikenga dinene. (Mat. 24:36) Malu adi enzeka pa buloba lelu kaena mua kushintulula dituku adi to.

Yezu wakadimuija bena Kristo bonso ne: ‘Nuikale badilongolole.’ (Mat. 24:44, MMM) Tudi ne bua kuikala badilongolole misangu yonso. Abi kabiena bisua kumvuija ne: tudi ne bua kuditua mu mudimu wa Nzambi dituku dionso dinda too ne dilolo to. Kabidi, muntu nansha umue wa kutudi ki mmumanye tshikalaye wenza dîba diatuadija dikenga dinene to. Bamue nebikale mu midimu yabu ya bianza bakuabu benza midimu ya kumbelu. (Mat. 24:40, 41) Nunku, ntshinyi tshitudi mua kuenza bua kuikala batabale?

Tuangate tshilejilu tshia Emmanuel ne mukajende Victorine badi basombele ne bana babu ba bakaji basambombo mu tshimue tshitupa tshia mu Afrike mudibu kabayi batamba kumona mudi malu a mu tshimanyinu abalenga to. Nunku bakangata dipangadika dia kuyukidilangana pa malu a mu Bible dituku dionso bua bikale anu batabale. Emmanuel udi wamba ne: “Kabivua bipepele bua kupeta dîba divua dituakanyine bonso to. Nunku tuakasungula bua kuenza anu minute makumi asatu mu dinda. Tuetu bamane kukonkonona mvese wa ku dituku, tudi tulongolola bikoso ndambu mu mukanda utudi tulonga mu dilonga dia Bible dia tshisumbu lumingu alu.” Programe eu mmubambuluishaku bua kushala batabale anyi? Eyowa. Emmanuel udi mutangidi wa malu a kasumbu ka bakulu mu tshisumbu tshiabu. Victorine utu wangata pa tshibidilu bumpanda-njila buambuluishi ne ukadi muambuluishe bantu ba bungi bua kuitaba bulelela. Bana babu ba bakaji badi balubuluka bimpe mu mudimu wa Nzambi.

Yezu udi utudimuija ne: ‘Dimukayi, nutabale bimpe.’ (Mâko 13:33) Kulekedi ditanaji dikupangisha mua kushala mutabale mu mudimu wa Nzambi. Kadi, anu bu Arielle, ikala utumikila mibelu idi mu mikanda yetu ne itudi tupeta mu bisangilu. Anu bu Emmanuel ne dîku diende, ikala udienzeja dituku dionso bua kuikala mudilongolole ne ‘kuikala mutabale.’

[Mêyi adi kuinshi]

[Tshimfuanyi mu dibeji 4]

Dikonkonona malu a mu Bible dituku dionso ndiambuluishe Emmanuel ne dîku diende bua ‘kuikala badilongolole’