Tuikale ne lukunukunu bua ntendelelu mulelela

“Bintu bia kunowa bidi bia bungi, kadi bena mudimu badi banya-banya.”​—MAT. 9:37.

1. Ntshinyi tshitu tshienzeka padiku bualu bua lukasa lukasa?

FUANYIKIJA ne: udi ne mukanda uudi musue ne: muntu abale malu adimu kumpala kua dituku kujikadi. Newenze tshinyi? Neufunde pa mpala pawu ne: “wa kubala ne LUKASA!” Anyi udi mu njila uya mu tshisangilu tshia mushinga mukole, kadi dîba dikadi dipite. Newenze tshinyi? Neutuadije kuenda LUKASA LUKASA. Bushuwa, paudi ne mudimu wa kuenza ne dîba dikadi dipite, udi utuadija kulubakana. Muoyo udi utuadija kututa lukasa lukasa ne udi udienzeja bua kuenza mudimu au ne muebe muonso. Ke mutubi bienzeka padiku bualu bua lukasa lukasa.

2. Mmudimu kayi wa lukasa lukasa udi nawu bena Kristo balelela lelu?

² Bua bena Kristo balelela lelu kakuena bualu bua lukasa budi bupite kuyisha lumu luimpe lua Bukalenge bua Nzambi ne kuvuija bantu ba mu bisamba bionso bayidi. (Mat. 24:14; 28:19, 20) Muyidi Mâko wakatela mêyi a Yezu pakafundaye ne: mudimu eu udi ne bua kuenzeka “diambedi” mbuena kuamba ne: kumpala kua nshikidilu kulua. (Mâko 13:10) Ke mudibi ne bua kuikala bualu Yezu wakamba ne: “Bintu bia kunowa bidi bia bungi, kadi bena mudimu badi banya-banya.” Bantu kabatu baladikija bua kunowa bintu to, badi ne bua kubinowa kumpala kua tshikondo tshia kunowa kujikatshi.​—Mat. 9:37.

3. Bu mudi mudimu wa kuyisha muikale ne mushinga wa bungi, ntshinyi tshidi bana betu ba bungi benza?

³ Bu mudi mudimu wa kuyisha muikale ne mushinga wa bungi kutudi, tudi ne bua kudifila bua kuwenza ne bukole buetu buonso ne lungenyi luetu ne kuwenza bikole. Ke tshidi bana betu ba bungi benza ne tudi tubela kalumbandi. Kudi badi bashintulule nsombelu wabu bua kuikala bampanda-njila, bamisionere anyi bua kuya ku Betele. Badi benza mudimu wa bungi. Nansha mudibu mua kuikala badipangishe malu a bungi, badi bapeta ntatu ya bungi. Kadi Yehowa udi ubabenesha bikole. Tudi ne disanka bua bualu buabu. (Bala Luka 18:28-30.) Kudi bakuabu badi kabayi ne mushindu wa kuenza midimu eyi to. Kadi badi badifila ne muabu muonso bua kuenza mudimu udi usungila mioyo ya bantu, kabayi bapua muoyo bua kuambuluisha bana badibu balele bua bapete pabu muoyo.​—Dut. 6:6, 7.

4. Bua tshinyi bamue bena Kristo kabatshiena bamona mudimu wa kuyisha bu wa kuenza ne lukasa?

⁴ Anu bu mutudi bamone, bualu budi bulua bua lukasa bilondeshile dîba didibu bakose bua kubuenza anyi kubujikija. Tudi mu matuku a ku nshikidilu, ne kudi malu a bungi a mu Bible ne makuabu adi enzaka adi ajadika bualu ebu. (Mat. 24:3, 33; 2 Tim. 3:1-5) Kadi kakuena muntu nansha umue udi mumanye dîba disunguluke dialua nshikidilu to. Pavua Yezu muakule bua ‘tshimanyinu tshia ku nshikidilu kua tshikondo etshi,’ wakamba ne: ‘Kadi bua dituku adi ne pa dîba adi kakuena muntu udi mumanye, banjelu mene mene ba mu diulu kabena bamanye, Muana kena mumanye, anu Tatu udi mumanye.’ (Mat. 24:36) Bu mudibi nunku, bidi mua kukolela bamue bena Kristo bua kutungunuka ne kumona kuyisha bu mudimu wa kuenza ne lukasa, nangananga bikalabu batuadije kuyisha kukadi bidimu bia bungi. (Nsu. 13:12) Utu udiumvua pebe mushindu eu anyi? Ntshinyi tshidi mua kutuambuluisha bua kutungunuka ne kumona mudimu udi Yehowa Nzambi ne Yezu Kristo batupeshe lelu bu mudimu wa kuenza ne lukasa?

 Tukonkonone tshilejilu tshia Yezu

5. Ntshinyi tshivua Yezu muenze bua kuleja ne: uvua wangata mudimu wa kuyisha bu mudimu wa kuenza ne lukasa?

⁵ Ku bantu bonso batu bangate mudimu wa Nzambi ne mushinga, Yezu Kristo ke udi mufile tshilejilu tshimpe menemene. Wakenza mudimu eu ne lukasa bualu uvua ne bua kuwenza anu munkatshi mua bidimu bisatu ne tshitupa. Nansha nanku, kakuena muntu udi muenze malu a bungi bua ntendelelu mulelela kupita Yezu to. Wakamanyisha bantu dîna dia Tatuende ne disua diende, kuyisha lumu luimpe lua Bukalenge, kuleja patoke muvua bamfumu ba bena Yuda bena lubombo ne balongesha malu a dishima ne kulamata ku luseke lua bumfumu bua Yehowa too ne ku lufu. Wakadifila ne muende muonso bua kulongesha bantu, kubambuluisha ne kubondopa miaba yonso ivuaye uya. (Mat. 9:35) Kakuena muntu ukadi muenze malu bungi nunku mu dîba dikese to. Yezu wakenza mudimu mukole udi muntu mukuabu kayi mua kuenza to.​—Yone 18:37.

6. Nsombelu wa Yezu uvua mushindamene pa tshinyi?

⁶ Ntshinyi tshivua tshisaka Yezu bua kudifila mu mudimu wa kuyisha kayi utshioka? Ku diambuluisha dia mulayi wa Danyele uvua mumanye bule bua tshikondo tshivua Yehowa mumukosele bua kuenza mudimu eu. (Dan. 9:27) Nunku bu mudibi bileja, mudimu wende wa pa buloba uvua ne bua kujika ‘pankatshi pa lumingu’ anyi panyima pa bidimu bisatu ne tshitupa. Mutantshi mukese kunyima kua dibuela dia Yezu dia butumbi mu Yelushalema mu 33, wakamba ne: ‘Dîba diakufika bua Muana wa muntu kutumbishibua.’ (Yone 12:23) Nansha muvua Yezu mumanye ne: bakavua pa kumushipa, kakashindamena pa bualu ebu bua kubenga kuenza mudimu bikole to. Kadi dîba dionso divua mpunga umueka, uvua udifila bua kuenza disua dia Tatuende ne kuleja muvuaye munange bantu nende. Dinanga adi diakamusaka bua kusangisha bayidi bende bua kubalongesha mua kuyisha ne kubatumaye bua kuyisha. Wakenza nunku bua kubambuluisha bua kutungunuka ne kuenza mudimu uvuaye mutuadije ne bua benze malu mapite avuaye muenze.​—Bala Yone 14:12.

7, 8. Bayidi bakavuluka tshinyi pavuabu bamone Yezu ulengeja ntempelo? Bua tshinyi Yezu wakenza nanku?

⁷ Bualu bukuabu buakenza Yezu budi buleja lukunukunu luvuaye nalu. Buakenzeka ku ntuadijilu kua mudimu wende wa kuyisha, mu tshibilu tshia Kupita kua Yehowa tshia mu 30. Yezu ne bayidi bende bakaya ku Yelushalema ne kusangana ku ntempelo ‘bapanyi ba ngombe ne mikoko ne nyunyi ya nkutshi, ne bashintakaji ba mpalata bashikame.’ Yezu wakenza tshinyi? Bualu abu buakavuluija bayidi bende tshinyi?​—Bala Yone 2:13-17.

⁸ Tshivua Yezu muenze ne muambe dituku adi tshiakavuluija bayidi bende mulayi uvua Davidi muambe wa ne: ‘Lukunukunu lua ku nzubu webe luakundia.’ (Mus. 69:9) Bua tshinyi? Bualu tshivua Yezu muenze atshi tshivua tshilomba dikima dia bungi, bualu tshivua tshiteka muoyo wende mu njiwu. Bakuidi, bafundi ne bantu bakuabu bavua batangila malu a ku ntempelo bavua banyishe tshisalu tshivua tshienzeka  ku ntempelo bualu bavua bapeta pabu makasa. Yezu wakadikebela bilumbu ne bamfumu abu pavuaye muele patoke malu abu ne munyangakaje tshisalu tshiabu. Anu muvua bayidi bamone, Yezu uvua ne ‘lukunukunu bua nzubu wa Nzambi’ anyi tshisumi bua ntendelelu mulelela. Kadi lukunukunu ntshinyi? Ndushilangane ne bualu bua kuenza ne lukasa anyi?

Dipetangana dia lukunukunu ne bualu bua kuenza ne lukasa

9. Mmunyi mutudi mua kumvuija muaku lukunukunu?

⁹ Batu bumvuija “lukunukunu” bu dijinga dikole dia kuenza bualu kampanda, ne muaku eu udi mua kumvuija kabidi kuenza bualu ne muoyo umue, ne mitalu, ne tshisumi ne disanka ne dinanga. Kakuyi mpata, ke muvua Yezu wenza mudimu wende. Mukanda wa Mvidi Mukulu wa bena Mishonyi udi wamba mu mvese eu ne: “Dinanga dindi nadi bua nzubu webe, didi dingosha munda bu kapia.” Tshidi tshikemesha ntshia ne: mu imue miakulu ya ku Asie, muaku “lukunukunu” utu ne bitupa bibidi bidi biumvuija “muoyo udi ne mudilu” bienze anu bu ne: muoyo udi wosheka. Kabiena bikemesha bua muvua bayidi bavuluke mêyi a Davidi aa pavuabu bamone tshivua Yezu muenze ku ntempelo. Kadi ntshinyi tshivua tshitemeshe kapia munda mua Yezu ne tshimusake bua kuenza tshivuaye muenze atshi?

10. Bilondeshile Bible, muaku “lukunukunu” udi umvuija tshinyi?

¹⁰ Muaku “lukunukunu” udi mu musambu wa Davidi mmufumine ku muaku wa mu tshiena Ebelu udibu bakudimuna misangu ya bungi ne: ‘mukawu’ mu mvese mikuabu ya mu Bible. (Bala Ekesode 20:5; 34:14; Yoshua 24:19.) Nkonga miaku mukuabu wa malu a mu Bible udi wamba ne: “Batu batamba kuakula bua muaku eu mu diumvuangana ne malanda a bantu badi baselangane . . . Anu bu mutu mulume umvuila mukajende mukawu anyi mukaji umvuila bayende mukawu bua ashale anu mumulamate, ke mudi Nzambi musue bua bantu bende bashale bamulamate anu yeye.” Nunku bilondeshile Bible, lukunukunu kaluena lumvuija anu kunanga bikole anyi kusankidila tshintu kampanda bu mutu banangi ba dinaya kampanda badisankidila to. Lukunukunu lua Davidi luvua mukawu muimpe, bualu kavua witaba bua muntu aluishe Nzambi anyi amuangatshishe bibi ne luvua lumusaka bua kubenga kupendeshisha dîna dia Nzambi peshi lumusaka bua kuakaja bualu bubi.

11. Ntshinyi tshivua tshisaka Yezu bua kudifila mu mudimu wa Nzambi ne lukunukunu?

¹¹ Bayidi ba Yezu kabavua benze bibi pavuabu basuikakaje mêyi a Davidi ne tshivuabu bamone Yezu muenze ku ntempelo. Yezu kavua mudifile mu mudimu wende anu bualu uvua ne tshikondo tshîpi tshia kuwenza to, kadi bualu uvua ne lukunukunu anyi mukawu bua dîna dia Tatuende ne bua ntendelelu mulelela. Pavuaye mumone mushindu uvua bantu bapendeshesha dîna dia Nzambi, lukunukunu anyi mukawu wakamukuata ne kuenzaye muende muonso bua kulongolola malu. Pavuaye umona bamfumu ba bena Yuda bakengesha bantu bapuekele, lukunukunu luende luakamusaka bua kuambuluisha bantu abu ne kuleja patoke malu mabi avua bamfumu abu benza.​—Mat. 9:36; 23:2, 4, 27, 28, 33.

Tuikale ne lukunukunu bua ntendelelu mulelela

12, 13. Ntshinyi tshidi bamfumu ba mu bukua buena Kristo benza lelu bua (a) dîna dia Nzambi? (b) Bukalenge bua Nzambi?

¹² Malu adi enzeka mu bitendelelu lelu mmafuanangane ne avua enzeka mu matuku a Yezu ne pamuapa mmapite bubi. Tshilejilu, tudi bamanye ne: bualu bua kumpala buvua Yezu mulongeshe bayidi bende bua kulomba mu disambila buvua butangila dîna dia Nzambi. Wakamba ne: ‘Banemeke dîna diebe.’ (Mat. 6:9) Tudiku tumona bamfumu ba bitendelelu, nangananga ba mu bukua buena Kristo balongesha bantu bua kumanya dîna dia Nzambi ne bua kudinemeka peshi kudiangata ne mushinga anyi? Tòo, kadi badi bangatshisha Nzambi bibi ne malongesha abu a dishima bu mudi dia busatu bunsantu, dia anyima udi kayi ufua ne dia iferno. Malongesha aa adi avuija Nzambi bu muntu udi wenza malu adi kaayi umvuika, muena tshikisu udi usanka padi bantu bakenga.  Badi bapendeshisha kabidi Nzambi ne malu mabi adibu benza ne bua lubombo luabu. (Bala Lomo 2:21-24.) Mbenze kabidi muabu muonso bua bantu kabamanyi dîna dia Nzambi ne mbadiumushe too ne mu Bible idibu bakudimune. Nunku badi bapangisha bantu bua kusemena kudi Nzambi ne kudia nende malanda mimpe.​—Yak. 4:7, 8.

¹³ Yezu uvua kabidi mulongeshe bayidi bende bua kusambila bua Bukalenge bua Nzambi ne: ‘Bukalenge buebe bulue. Benze pa buloba muudi musue bu mudibu benza mu diulu.’ (Mat. 6:10) Nansha mutu bamfumu ba mu bukua buena Kristo bambulula disambila edi misangu yonso, badi basaka bantu bua kubuela mu malu a tshididi ne kukuatshisha malongolodi a bantu. Badi kabidi bapepeja bantu badi baditatshisha bua kuyisha ne kumanyisha bakuabu Bukalenge ebu. Ke bualu kayi bantu ba bungi badi bamba mudibu bena Kristo kabatu bakula bua Bukalenge bua Nzambi ne kabatu babuitabuja to.

14. Mmunyi mudi bamfumu ba mu bukua buena Kristo banyanga Dîyi dia Nzambi?

¹⁴ Yezu wakasambila Nzambi wamba patoke ne: ‘Dîyi diebe mbulelela.’ (Yone 17:17) Kumpala kua kupinganaye mu diulu wakaleja ne: uvua ne bua kuteka ‘mupika wa lulamatu ne wa budimu’ bua kulongesha bayidi bende malu a Nzambi. (Mat. 24:45, NW) Nansha mudi bamfumu ba mu bukua buena Kristo bamba mudibu balongesha bantu Dîyi dia Nzambi, badiku benza bimpe mudimu uvua Mfumu mubapeshe anyi? Tòo. Batu ne tshibidilu tshia kuamba ne: malu adi Bible wamba mmianu ya patupu. Pamutu pa kulongesha bantu babu Dîyi dia Nzambi bua kubasamba ne kubakolesha, badi babafunya matshi ne nkindi ya bantu. Badi kabidi banyanga mikenji ya Nzambi bua kulonda bikadilu bia lelu bidi bantu bela meji ne: mbimpe.​—2 Tim. 4:3, 4.

15. Nudi nudiumvua munyi bua malu onso adi bamfumu ba bitendelelu benza mu dîna dia Nzambi?

¹⁵ Bua malu onso adibu benze bamba mudibu baenza mu dîna dia Nzambi wa mu Bible, bantu ba bungi badi banange bulelela kabatshiena bitabuja Nzambi ne Dîyi diende to. Mbakuatshike mu buteyi bua Satana ne bulongolodi buende bubi. Panudi numona ne numvua mudi malu a mushindu eu enzeka matuku onso, nudi nudiumvua bishi? Wewe bu Ntemu wa Yehowa, pautu umona mudi bantu bapendeshisha dîna dia Nzambi, kutuku umvua muoyo ukusaka bua kuakaja bualu ebu anyi? Panudi numona badinga ne bakengesha bantu bimpe badi banange bulelela, kabienaku binusaka bua kubasamba anyi? Pavua Yezu mumone bantu ba mu tshikondo tshiende ‘batata ne bamuangalake bu mikoko idi kayiyi ne mulami,’ kavua mubumvuile anu luse to. Kadi “wakabanga kubayisha malu a bungi.” (Mat. 9:36; Mâko 6:34)  Tudi ne bua kuikala ne tshisumi bua ntendelelu mulelela anu bu Yezu.

16, 17. (a) Ntshinyi tshidi ne bua kutusaka bua kudifila mu mudimu wa kuyisha? (b) Netuakule bua tshinyi mu tshiena-bualu tshidi tshilonda?

¹⁶ Tuetu bikale ne lukunukunu mu mudimu wa kuyisha, mêyi a mupostolo Paulo adi mu 1 Timote 2:3, 4 adi apeta diumvuija dia pa buadi kutudi. (Bala.) Katuena tuyisha bikole anu bualu tudi bamanye ne: tudi mu matuku a ku nshikidilu to kadi bualu tudi bajadika ne: ke disua dia Nzambi. Nzambi mmusue bua bantu bamanye bulelela ne balonge mua kumutendelela ne kumuenzela mudimu bua ababeneshe. Katuena ne bua kudifila mu mudimu wa kuyisha nangananga bualu matuku mmashale makese, kadi bualu tudi basue kutumbisha dîna dia Nzambi ne kuambuluisha bantu bua bamanye disua diende. Tudi ne lukunukunu bua ntendelelu mulelela.​—1 Tim. 4:16.

¹⁷ Tuetu Bantemu ba Yehowa tudi ne disanka bualu tudi bamanye bulelela bua tshidi Nzambi mulongoluele bantu ne buloba. Tudi ne mushindu wa kuambuluisha bantu bua bikale ne disanka ne batekemene malu mimpe mu matuku atshilualua. Tudi mua kubaleja tshidibu mua kuenza bua kupanduka pabutulabu bulongolodi bua Satana. (2 Tes. 1:7-9) Pamutu pa kumvua bibi anyi kuteketa ku muoyo bua mudi dituku dia Yehowa dimueneka bu didi dinenga, tudi ne bua kusanka bua mututshidi ne tshikondo tshia kuleja mutudi ne lukunukunu bua ntendelelu mulelela. (Mika 7:7; Hab. 2:3) Tuenze tshinyi bua kuikala ne lukunukunu lua nunku? Tshiena-bualu tshidi tshilonda netshiandamune lukonko elu.

Newandamune munyi?

• Ntshinyi tshivua tshisaka Yezu bua kuenza mudimu wa kuyisha kayi utshioka?

• Bilondeshile Bible, muaku “lukunukunu” udi umvuija tshinyi?

• Mmalu kayi atudi tumona lelu adi ne bua kutusaka bua kuikala ne lukunukunu bua ntendelelu mulelela?

[Nkonko ya dilonga]

[Tshimfuanyi mu dibeji 8]

Yezu uvua mudifile bua kuenza disua dia Tatuende ne kuleja muvuaye munange bantu

[Tshimfuanyi mu dibeji 10]

Tudi ne bua kuikala ne lukunukunu bua ntendelelu mulelela