Mmunyi mutu Yehowa umona didibingisha?

MULUME wakamba ne: ‘Mukaji uwakumpa bua kuikala nanyi wakumpa dimuma dia mutshi, ngakudia.’ Mukaji pende kuamba ne: ‘Nyoka wakundinga, ngakudia.’ Mêyi aa avua baledi betu ba kumpala Adama ne Eva bambile Nzambi adi aleja ntuadijilu wa mushindu utu bantu badibingisha.​—Gen. 3:12, 13.

Dinyoka divua Yehowa mupeshe Adama ne Eva bua muvuabu babenge kumutumikila ku bukole didi dileja ne: kavua muitabe malu avuabu bamuambile bua kudibingisha. (Gen. 3:16-19) Nunku tudiku mua kuamba ne: Yehowa katu witaba kudibingisha kuonso anyi? Peshi utu umona kudibingisha kukuabu bu kuimpe? Pikalabi nanku, mmunyi mutudi mua kumanya kudibingisha kuimpe ne kubi? Bua kuandamuna, tuanji kumona tshidi kudibingisha kumvuija.

Kudibingisha nkumvuija bua tshinyi tuvua benze bualu kampanda, bua tshinyi katuvua babuenze anyi bua tshinyi katuakubuenza. Kudi mua kuikala diumvuija dijalame didi dileja tshitudi benzele bualu kampanda ne didi mua kuleja mutudi banyingalale ne muoyo umue. Diumvuija edi didi mua kufikisha muntu ku ditufuila luse anyi ku ditubuikidila. Kadi anu bu muvuabi bua Adama ne Eva, kudibingisha kudi mua kuikala diumvuija dia dishima didi disokoka tshitudi benzele bualu kampanda. Bu mudi bantu ba bungi badibingisha mu mushindu eu, bitu bikole bua kuitaba padi bantu badibingisha.

Patudi tudibingisha, nangananga bua mudimu utudi tuenzela Nzambi, tudi ne bua kudimuka bua kubenga ‘kudidinga.’ (Yak. 1:22) Nunku tukonkononayi bimue bilejilu bia mu Bible ne mibelu bidi mua kutuambuluisha bua ‘kuteta budi Mukalenge muanyishe.’​—Ef. 5:10.

Malu adi Nzambi utulomba bua kuenza

Tudi tupeta mu Dîyi dia Nzambi imue mikenji ya Yehowa itudi tuetu Bantemu bende ne bua kutumikila. Tshilejilu, mudimu uvua Kristo mutupeshe wa ‘kuya ne kuvuija ba bisamba bionso bayidi’ mmukenji udi bayidi balelela ba Kristo ne bua kutumikila too ne lelu. (Mat. 28:19, 20) Kutumikila mukenji eu kudi ne mushinga wa bungi, ke bualu kayi Paulo wakamba ne: ‘Ndi ne mulawu bingikala tshiyi ngambila bantu lumu luimpe.’​—1 Kol. 9:16.

Nansha nanku, bamue bantu batudi balongeshe Bible munkatshi mua matuku a bungi batshidi belakana bua kuyisha lumu luimpe lua Bukalenge bua Nzambi. (Mat. 24:14) Bakuabu bakavua bayisha mbalekele. Ntshinyi tshitu bantu ba bungi bamba padibu babenga kuyisha? Ntshinyi tshivua Yehowa wenza bua bantu bavua belakana bua kuenza mudimu kampanda uvuaye mubapeshe?

Kudibingisha kudi Nzambi kayi witaba

“Mmudimu mukole be!” Bidi mua kuikala bikole menemene bua kuyisha, nangananga bua bantu batu ne bundu. Kadi tumone tshitudi mua kulongela ku tshilejilu tshia Yona. Yehowa wakamupesha mudimu uvuaye umona mukole wa dikema wa kumanyisha kabutu kakavua pa kukuata Ninewe. Mbipepele bua kumona bua tshinyi mudimu  au uvua mukolele Yona. Ninewe uvua tshimenga tshikulu tshia bena Ashû, ne bantu aba bavua bamanyike bua tshikisu tshiabu. Yona uvua mua kuikala mudiebeje ne: ‘Nengenze tshinyi munkatshi mua bantu abu? Bobu nebangenzele tshinyi?’ Ke kunyemayi. Kadi Yehowa kakitaba kudibingisha kua Yona to. Wakamutuma kabidi bua kuyisha bena mu Ninewe. Bua musangu eu, Yona wakenza mudimu wende ne dikima ne Yehowa wakabenesha mudimu au.​—Yona 1:1-3; 3:3, 4, 10.

Wewe wela meji ne: mudimu wa kuyisha lumu luimpe mmukole, vuluka ne: ‘Nzambi mmumanye mua kuenza malu onso.’ (Mâko 10:27) Ikala mushindike ne: Yehowa neakukoleshe wewe mutungunuke ne kumulomba diambuluisha ne neakubeneshe wewe udienzeja bua kuyisha ne dikima.​—Luka 11:9-13.

“Tshiena musue to.” Ntshinyi tshiudi mua kuenza pawikala kuyi ne dijinga dikole dia kuenza midimu ya bena Kristo? Ikala mumanye ne: Yehowa udi mua kusaka muoyo webe ne kushintulula majinga ebe. Paulo wakamba ne: ‘Nzambi udi wenzeja munda muenu bua kusua ne bua kuenza kabidi bualu bua disua diende dimpe.’ (Filip. 2:13) Nunku udi mua kulomba Yehowa bua akusake bua wewe kunanga bua kuenza disua diende. Ke tshiakenza mukalenge Davidi. Wakasengela Yehowa ne: “Undombole biebe mu bulelela buebe.” (Mus. 25:4, 5) Udi mua kuenza bia muomumue pa kulomba Yehowa ne muoyo mujima bua akusake bua unange kuenza malu adi amusankisha.

Patudi batshioke anyi batekete ku muoyo, bidi mua kutukolela bua kuya mu bisangilu ku Nzubu wa Bukalenge anyi bua kuyisha. Pikalabi nanku, tudiku mua kuamba ne: katuena banange Yehowa anyi? Nansha kakese. Batendeledi ba Nzambi ba kale bavua pabu badienzeja bikole bua kuenza disua dia Nzambi. Tshilejilu, Paulo wakamba muvuaye ‘udikuma’ bua kutumikalaye mikenji ya Nzambi. (1 Kol. 9:26, 27) Nunku nansha tuetu tudienzeja bua kuyisha, tumanye ne: Yehowa neatubeneshe. Bua tshinyi? Bualu tudi tudienzeja bua kuenza disua dia Nzambi bualu tudi bamunange. Patudi tuenza nunku, tudi tuandamuna ku tshivua Satana muambe tshia ne: batendeledi ba Nzambi nebamulekele padibu mu mateta.​—Yobo 2:4.

“Tshiena ne dîba to.” Wewe kuyi uyisha bualu kuena ne dîba, bidi ne mushinga wa bungi bua ukonkonone malu audi uteka kumpala. Yezu wakamba ne: ‘Kadi diambedi kebayi bukalenge buende.’ (Mat. 6:33) Bua kutumikila mubelu eu, udi ne bua kumbusha malu adi kaayi ne mushinga mu nsombelu webe anyi kuangata dîba diuvua ujikija lutetuku bua kuyisha. Kujikija lutetuku ne malu etu makuabu bidi ne wabi muaba, kadi katuena ne bua kudibingisha ne malu aa bua kubenga kuyisha. Mutendeledi wa Nzambi udi uteka malu a Bukalenge pa muaba wa kumpala mu nsombelu wende.

“Tshiena mukumbane to.” Udi mua kudimona kuyi mukumbane bua kuyisha lumu luimpe. Bamue batendeledi ba Yehowa ba kale bavua badimona ne:  kabavua bakumbane bua kuenza midimu ivua Yehowa mubapeshe. Tuangate tshilejilu tshia Mose. Pavua Yehowa mumupeshe mudimu kampanda, Mose wakamuambila ne: “Yehowa, meme tshiena mua kuakula bimpe, nansha diambedi, nansha katshia wabanga kuakula ne muntu webe; bualu bua meme ndi muena tshikukumina.” Nansha muvua Yehowa mumujadikile ne: neamuambuluishe, Mose wakamuambila ne: ‘Yehowa, ndi nkusengelela ne: Utume muntu uudi musue kutuma.’ (Ekes. 4:10-13) Yehowa wakenza tshinyi?

Yehowa kakapesha muntu mukuabu mudimu au to. Kadi wakasungula Alona bua kuambuluisha Mose bua kuukumbaja. (Ekes. 4:14-17) Pashishe, bidimu biakalonda, Yehowa wakatungunuka ne kukolesha Mose ne kumupesha bionso bivuaye nabi dijinga bua kuenza mudimu uvuaye mumupeshe bimpe. Lelu, udi mua kuikala mushindike ne: Yehowa neasake bena Kristo nebe badi bamanye mudimu eu bimpe bua bakuambuluishe pebe bua kuwenza. Kupita malu onso, Dîyi dia Nzambi didi ditushindikila ne: Yehowa neatuvuije bakumbane bua kuenza mudimu udiye mutupeshe.​—2 Kol. 3:5; tangila kazubu kadi kamba ne: “ Bidimu bia disanka dia bungi mu nsombelu wanyi.”

“Kudi muntu udi mungezele bibi.” Bamue bantu batu balekela kuyisha anyi kubuela mu bisangilu bia tshisumbu bualu bavua babenzele bibi, bela meji ne: Yehowa neitabe bidibu bamba bua mudibu balekele midimu yabu ya buena Kristo. Nansha mutudi mua kumvua bibi padi muntu utuenzela  bibi, bualu ebu budiku mua kutusaka bua kulekela midimu yetu ya buena Kristo anyi? Paulo ne muenzejanganyi nende wa mudimu Bânaba bavua mua kuikala bambangane bimpe ne bibi ‘pakatandanganabu.’ (Bien. 15:39, MMM) Kadi yonso wa kudibu wakalekelaku kuyisha bua bualu abu anyi? Tòo.

Bia muomumue, padi muena Kristo nebe mmukuenzele bibi, umanye ne: muluishi webe ki mmuena Kristo nebe udi mupange bupuangane au to, kadi n’Satana udi musue kukudia. Kadi Diabolo kakukutshimuna, wewe ‘mumutantamene mujalame mu ditabuja diebe.’ (1 Pet. 5:8, 9; Gal. 5:15) Wewe muikale ne ditabuja dia nunku, ‘kuakufuishibua bundu’ nansha kakese.​—Lomo 9:33.

Tshia kuenza bituikala ne makanda a mubidi makese

Bilondeshile bilejilu bikese bia malu atu bantu bamba bua kudibingisha, mbimueneke patoke ne: kakuena malu majalame atudi mua kudibingisha nawu bua kubenga kutumikila mukenji kampanda udi Yehowa mutupeshe, nansha wa kuyisha lumu luimpe. Kadi kudi malu majalame adi mua kutupangisha bua kuyisha bikole. Majitu makuabu adi mukanda wa Nzambi mutupeshe adi mua kukepesha dîba ditudi tupitshisha mu mudimu wa kuyisha. Kudi misangu mikuabu kabidi itudi mua kuikala batshioke bikole anyi tusama bikole bua kuenza mudimu wa Yehowa mutuvua basue. Kadi Dîyi dia Nzambi didi ditujadikila ne: Yehowa mmumanye mutudi tujinga ne muoyo umue bua kumuenzela mudimu ne mmumanye mateketa etu.​—Mus. 103:14; 2 Kol. 8:12.

Nunku, tudi ne bua kudimuka bua katuikadi tudilumbuluisha anyi tulumbuluisha bakuabu bua mudimu utudi tuenzela Yehowa. Mupostolo Paulo wakafunda ne: ‘Wewe udi nganyi udi ulumbuluisha muena mudimu wa mu nzubu wa mukuabu? Yeye udi wimana anyi udi upona bua mukalenge wende mene.’ (Lomo 14:4) Patudi tusambila Yehowa ne tumulomba luse, tuenze nunku ‘ne muoyo mukese’ muimpe.​—Eb. 13:18.

Bua tshinyi kuenzela Yehowa mudimu kudi kutupetesha masanka?

Tuetu bonso tudi mua kuenzela Yehowa mudimu ne disanka bualu tudi mua kukokesha mua kuenza malu adiye utulomba nansha tuetu bikale ne nsombelu wa mushindu kayi. Bua tshinyi tudi tuamba nunku?

Dîyi dia Nzambi didi diamba ne: ‘Kupadi bantu tshintu tshimpe, badi bakumbane bua kuikala natshi, pawikala ne bukole bua kubapatshi.’ (Nsu. 3:27.) Mbualu kayi buudi mumone mu lusumuinu elu pa bidi bitangila malu adi Nzambi utulomba? Yehowa kena ukulomba bua kudienzeja bua kupeta bukole bua buena budi nabu muanenu to, kadi bua kumuenzela mudimu ‘ne bukole buudi nabu.’ Nunku yonso wa kutudi, nansha udi ne bukole anyi udi kayi nabu, udi mua kuenzela Yehowa mudimu ne muoyo mujima.​—Luka 10:27; Kolos. 3:23.

[Kazubu/​Tshimfuanyi mu dibeji 14]

 “Bidimu bia disanka dia bungi mu nsombelu wanyi”

Nansha tuetu ne bubedi bua ku mubidi anyi bua mu lungenyi, katuena mua kuamba ne lukasa luonso ne: nebutupangishe bua kuyisha bimpe. Tuangate tshilejilu tshia Ernest, muena Kristo mukuabu wa mu ditunga dia Canada.

Ernest uvua wakula ne lutatu ne uvua ne bundu bua bungi. Pakapetaye njiwu yakamupetesha disama dia nyima, wakalekela mudimu uvuaye wenza wa kuibaka. Nansha muvuaye katshiyi mua kuenza mudimu mukole, nsombelu wende mupiamupia eu wakamupesha mushindu wa kuyisha mêba a bungi. Mibelu ivuabu bafila mu bisangilu bua kuenza mudimu wa bumpanda-njila buambuluishi yakamupesha dijinga dikole dia kuwenza. Kadi uvua udimona kayi mukumbane bua kuenza mudimu wa mushindu eu.

Bua kumanya ni uvua mua kukokesha bua kuikala mpanda-njila muambuluishi, wakangata bumpanda-njila bua ngondo umue. Wakakema bikole pakakumbajaye tshipatshila tshiende. Pashishe, yeye kudiambila ne: ‘Ndi mumanye ne: tshiena mua kukumbaja mudimu eu kabidi.’ Bua kumona ni uvua mua kuukumbaja kabidi, wakangata bumpanda-njila bua ngondo mukuabu, yeye kukumbajaye kabidi tshipatshila tshiende.

Ernest wakenza mudimu wa bumpanda-njila buambuluishi munkatshi mua tshidimu tshijima, kadi yeye kudiambila ne: “Bua kuamba bualu pa bualu, tshiena mua kulua mpanda-njila wa pa tshibidilu to.” Musangu eu kabidi bua kumona ni uvua mua kukumbaja, wakangata bumpanda-njila bua pa tshibidilu. Wakakema bikole pakakumbajaye tshipatshila tshiende tshia tshidimu tshijima. Wakangata dipangadika dia kutungunuka ne kupetaye disanka dia kuikala mpanda-njila wa pa tshibidilu munda mua bidimu bibidi too ne pakalua disama divua difumine ku njiwu ivuaye mupete dilue kumushipa. Kadi kumpala kua kufuaye, uvua wakula ne binsonji ku mêsu wambila bantu bavua balua kumusamba ne: “Bidimu bindi muenzele Yehowa mudimu muikale mpanda-njila mbidimu bia disanka dia bungi mu nsombelu wanyi.”

[Tshimfuanyi mu dibeji 13]

Tudi mua kutantamena lutatu luonso ludi mua kutupangisha mua kuyisha

[Tshimfuanyi mu dibeji 15]

Yehowa udi usanka patudi tumuenzela mudimu ne muoyo wetu mujima, bilondeshile nsombelu wetu