Diyisha dia pa buadi didi dipatula bipeta bimpe mu Bulgarie

‘Bulelela, bintu bia kunowa bidi bia bungi, kadi bena mudimu badi banya-banya. Nunku, nulombe Mukalenge wa bintu bia kunowa, atume biende bena mudimu mu kunowa kuende.’​—MAT. 9:37, 38.

MÊYI a Yezu aa mmakumbanyine tshidi tshienzeke mu Bulgarie, ditunga didi ku Sud-Est kua Mputu. Kudi dijinga dinene dia bambi ba lumu luimpe badi mua kuyisha bantu bapite pa miliyo muanda mutekete ba mu ditunga edi. Mu Bulgarie mudi bamanyishi batue ku 1 700, kadi kabena mua kuyisha mu ditunga dijima to. Bua bualu ebu, Kasumbu Kaludiki kakitaba bua kubikila Bantemu ba mu matunga a bungi a ku Mputu bavua bamanye muakulu wa tshiena Bulgarie bua kuluabu mu ditunga edi ne kuyisha mu mushindu wa pa buawu mu 2009. Bakalongolola bua diyisha dia pa buadi edi dienzeke mu mbingu muanda mutekete ya mu tshikondo tshia luya. Diyisha edi divua ne bua kuya too ne tshikondo tshia Mpungilu wa distrike wa “Nuikale batabale!” uvua ne bua kuenzeka mu tshimenga tshia Sofia mu dia 14 too ne mu dia 16/8/2009.

Bantu ba bungi badi bitaba bua kulua

Bana betu ba ku Betele wa mu Sofia bakadikonka bungi bua bantu bavua ne bua kulua bafumina mu ditunga dia Allemagne, dia Espagne, dia France, dia Grèce, dia Italie ne dia Pologne. Bivua bilomba bana betu aba bua kudifutshila njila ne kuyisha tshikondo tshiabu tshia dikisha. Bena ku Betele bavua ne disanka dia bungi bua kumona muvua bungi bua bantu bavua balomba bua kulua buenda buvula too ne pakakumbanabu 292. Bua bungi bua bantu bavua bitabe bua kulua, kuvua mushindu wa kubatuma mu bimenga bisatu ebi: tshia Kazanlak, tshia Sandanski, ne tshia Silistra. Batangidi ba bijengu ba mu Bulgarie bakalomba bampanda-njila ba mu ditunga bua kuditua pabu mu diyisha dia pa buadi edi. Ndekelu wa bionso, bantu 382 bakayisha ne tshisumi miaba ivuabu kabayi banji kuyisha lumu luimpe kumpala to.

Bakatuma bana betu ba mu bisumbu bia pabuipi bua kudianjila kulongolola miaba ya kulala. Bakafutshila nzubu ne kulamisha nzubu ya tshilala benyi ya mishinga mikumbanyine. Bana betu aba bakenza mudimu mukole bua kuakidila bena budisuilue bavua balua, kubaleja muaba uvuabu ne bua kusombela ne kukumbaja majinga abu. Mu bimenga bionso bisatu, bakafutshila miaba ya kuenzela bisangilu. Bakalongolola bua benyi bavua balue bikala balombola bisangilu. Bivua bienza disanka bua kumona miaba ivua kayiyi Ntemu nansha umuepele, bamanyishi ba Bukalenge 50 badisangishe bua kutumbisha Yehowa.

Tshisumi tshivua natshi bana betu ba mu matunga makuabu bavua balue tshivua tshilenga ku muoyo bikole. Mu tshikondo tshivuabu balue atshi, luya lutu lubanda lufika too ne ku 40°C. Kadi kakuvua tshintu tshivua mua kuimanyika bana betu bavua ne tshisumi aba to. Mu mbingu isatu ya kumpala bakayisha bikole menemene mu tshimenga tshia Silistra tshidi kumpenga kua musulu wa Danube tshidi ne bantu bapite pa 50 000. Ke bualu kayi bana betu bakatuadija kuyisha mu misoko ya kumpenga, kufikabu too ne ku Tutrakan udi mutantshi wa kilometre 55 ku Ouest kua Silistra. Bavua babangisha kuyisha pa dîba dia 9:30 mu dinda. Bavua bangata ka dikisha bua kudia mu midi, pashishe batungunuka too ne mu 19:00 dilolo anyi kupita apu. Bia muomumue, bua muvua bana betu aba bayisha ne tshisumi, bakayisha too ne mu bimenga  bikese ne misoko ya kumpenga kua Kazanlak ne Sandanski.

Tshinyi tshivuabu bakumbaje?

Bana betu abu bakayisha mu mushindu wa pa buawu munkatshi mua mbingu muanda mutekete. Anu muvua bena mu tshikondo tshia bapostolo bambe, bena mu bimenga ebi bavua mua kuamba pabu ne: ‘Nuenu nuakuuja bimenga bietu tente ne diyisha dienu.’ (Bien. 5:28) Bantemu aba bakabanya bibejibeji 50 000 ne kutuadija kulongesha bantu 482 Bible. Biakenza disanka bua kumona ne: mu dia 1/9/2009, bakenza tshisumbu mu Silistra ne tusumbu tukese mu Kazanlak ne Sandanski. Bidi bilenga ku muoyo bua kumona bantu bavua bumvue lumu luimpe bua musangu wa kumpala mu diyisha dia pa buadi edi baya kumpala.

Mu lumingu lua kumpala lua diyisha dia pa buadi edi, muanetu mukuabu wa bakaji udi mpanda-njila wa pa buende mu Espagne ne udi wakula tshiena Bulgarie wakayisha Karina mamu mukuabu wa mu Silistra uvua upana bikandakanda mu njila. Karina wakanyisha bivuabu bamuyishe ne kuluaye mu bisangilu. Wakitaba bua kulonga Bible. Kadi bu muvua bayende kayi witaba ne Nzambi utuku, wakalomba bua bikala balongela mu lupangu lunene lutu bantu baya kuikishila. Uvua ulonga pamue ne bana bende ba bakaji babidi. Daniela udi mukulumpe ku bana babidi aba wakanyisha bulelela bikole. Wakabala mukanda wa Bible ulongesha mu lumingi lumue ne wakatuadija kutumikila diakamue tshidi Bible wamba bua kubenga kutendelela ne bimfuanyi. Pashishe, wakatuadija kuambila balunda bende malu avuaye mulonge. Mbingu isatu patupu panyima pa yeye mumane kubuela mu bisangilu bua musangu wa kumpala, wakambila muanetu uvua umulongesha Bible ne: “Nkadi ndiumvua anu bu umue wa ku nuenu. Ndi mua kuenza tshinyi bua meme kutuadija kuyisha panyi?” Daniela udi utungunuka ne kuya kumpala bimpe pamue ne mamuende ne muankunyende.

Mu Kazanlak, Orlin muanetu mukuabu wa mu Bulgarie uvua mufume mu Italie bua diyisha dia pa buadi ukavua upingana muaba uvuaye musombele yeye mumane kujikija diyisha. Mu njila, wakayisha bansongalume babidi bavua basombe mu lupangu lutu bantu bikishila. Wakabashila mukanda wa Bible ulongesha ne kumvuangana nabu bua kumonangana dituku divua dilonda. Dituku diakalonda, Orlin wakatuadija kulongesha Svetomir Bible ne wakamulongesha kabidi dituku diakalonda. Mu matuku tshitema, Orlin wakalongesha Svetomir misangu muanda mukulu. Svetomir wakamuambila ne: “Matuku abidi kumpala kua tuetu kupetangana nebe, mvua mulombe Nzambi bua angambuluishe bua kumumanya. Ngakamulaya ne: yeye mungambuluishe, nendilambule kudiye.” Pakapingana Orlin mu Italie, bana betu ba mu Bulgarie bakatungunuka ne kulongesha Svetomir ne udi wenza muende muonso bua kutumikila malu adiye ulonga.

 Bantu badi badifila mu mudimu badi bapeta mabenesha a bungi

Bantu bavua bangate dikisha, badifutshile njila bua kuya kuyisha mu ditunga dikuabu bavua badiumvue bishi? Mukulu mukuabu wa mu Espagne wakafunda ne: “Diyisha dia pa buadi edi ndiambuluishe bana betu badi bayisha mu tshiena Bulgarie mu Espagne bua kukolesha malanda abu. Ndiambuluishe bana betu bavua badifilamu bikole.” Muanetu mukuabu ne mukajende bavua bafume mu Italie bakafunda ne: “Eu uvua ngondo wa pa buende mu nsombelu wetu.” Bakamba kabidi ne: “Kuyisha mu mushindu wa pa buawu eku nkunshintulule nsombelu wetu. Tudi mpindieu tudiumvua bashintuluke.” Muanetu eu ne mukajende bakadi bela meji bua kuya kusombela mu Bulgarie ne kuenzela mudimu muaba udibu dijinga ne bamanyishi ba bungi. Carina mpanda-njila utshidi mujike uvua mufumine mu Espagne wakayisha mu Silistra. Pashishe, wakalekela mudimu uvuaye wenza mu Espagne, kuyaye kusombela mu Bulgarie bua kuambuluisha tshisumbu tshipiatshipia tshia mu tshimenga atshi. Uvua mulame makuta avua mua kumuambuluisha bua kusomba mu Bulgarie tshidimu tshijima. Udi wamba bua dipangadika diende edi ne: “Ndi ne disanka dia bungi bua mudi Yehowa munganyishile bua kumuenzela mudimu mu Bulgarie ne ndi mutekemene bua kushala mu ditunga edi matuku a bungi. Nkadi ndongesha bantu batanu Bible, ne basatu ba kudibu bakadi babuela mu bisangilu.”

Muanetu mukuabu wa mu Italie uvua musue pende kuenza diyisha dia pa buadi adi, kadi bu mutshivuaye utuadilajilaku mudimu wende, kavua ne matuku a dikisha to. Nansha nanku, wakalomba dikisha dia ngondo umue kabayi bamufuta ne uvua pabuipi bua kulekela mudimu au bobu kabayi bamupadi. Kadi wakakema bikole pavua mfumuende wa mudimu mumuambile ne: “Udi mua kuya, kadi kupu muoyo bua kuntumina karte postale ka mu Bulgarie.” Muanetu wa bakaji eu wakamona ne: Yehowa uvua muandamune masambila ende.

Stanislava muanetu wa bakaji utshidi nsonga wa mu tshimenga tshia Varna mu Bulgarie uvua wenza mudimu wa makuta a bungi, wakangata dikisha bua kuyisha mu Silistra. Pakamonaye muvua bampanda-njila ba bungi ba mu matunga makuabu bavua balue kuyisha mu ditunga diabu bikale ne disanka, wakumvua mua kudila. Wakatuadija kuela meji pa nsombelu wende mushindu uvuaye mudifile mu midimu ya bianza. Pakapinganaye kuabu panyima pa mbingu ibidi, wakalekela mudimu wende wa bianza, kuluaye mpanda-njila wa pa tshibidilu. Mpindieu udi ne disanka dia bungi dia kuvuluka Mufuki wende mu bunsonga buende.​—Muam. 12:1.

Kuikala ne tshisumi mu mudimu wa Yehowa ndiakalenga dinene. Kakuena tshintu tshiudi mua kuenza tshidi tshipite kudifila ne dîba diebe dionso ne bukole buebe buonso mu mudimu wa kulongesha ne kuyisha lumu luimpe. Kudiku tshiudi mua kuenza bua kudifila kabidi bikole mu mudimu udi usungila mioyo ya bantu eu anyi? Kudi mua kuikala miaba mu ditunga dienu idibu dijinga ne bamanyishi ba bungi. Udiku mua kuya kusombela muaba wa nunku anyi? Udi kabidi mua kulonga muakulu mukuabu bua kuambuluisha benyi badi mu ditunga dienu badi bajinga kumanya bulelela. Umanye ne: Yehowa neakubeneshe bua tshionso tshiudi mua kuenza bua kuvudija mudimu wa diyisha.​—Nsu. 10:22.

[Kazubu/​Tshimfuanyi mu dibeji 32]

Dituku dia kuvuluka

Bantu ba bungi bavua bafume mu matunga makuabu a ku Mputu bua kudifila mu diyisha dia pa buadi mu Bulgarie bavua balongolole bua kubuela mu Mpungilu wa distrike wa “Nuikale batabale!” uvua ne bua kuenzekela mu tshimenga tshia Sofia. Kupetangana ne benyi bavua bafume mu matunga mashilashilangane kuakakolesha bana betu ba mu ditunga edi bikole. Bantu 2 039 bavua babuele mu mpungilu au bakumvua disanka dia bungi pavua muanetu Geoffrey Jackson wa mu Kasumbu Kaludiki mumanyishe dipatuka dia Bible mujima wa Les saintes Écritures​—Traduction du monde nouveau mu tshiena Bulgarie. Bantu bonso bavua babuele mu mpungilu mu ditanu bakaleja dianyisha diabu pa kututa bikashi mutantshi mule ne disanka dionso. Ba bungi bakapuekesha binsonji bia disanka. Bible udi mukudimuna bimpe ne mupepele bua kumvua eu neambuluishe bena Bulgarie badi basue buakane bua kumanya Yehowa.

[Karte mu mabeji 30, 31]

(Bua kumona malu bimpe, tangila mu mukanda)

BULGARIE

SOFIA

Sandanski

Silistra

Kazanlak

[Bimfuanyi mu dibeji 31]

Bana betu bakayisha mu mushindu wa pa buawu munkatshi mua mbingu muanda mutekete