Kuenzela Nzambi mudimu kudi kutupetesha disanka

‘Angatayi mutshi wanyi wa tshikokedi pa nshingu yenu, nunku nenusangane dikisha mu mitshima yenu.’​—MAT. 11:29.

1. Ntshinyi tshivua Nzambi muenze ku mukuna wa Sinai? Bua tshinyi?

PAVUA Nzambi muenze tshipungidi tshia mikenji ku mukuna wa Sinai, muvua kabidi mukenji wa Nsabatu. Ku diambuluisha dia Mose muleji mpala wende, Yehowa wakambila bena Isalele ne: ‘Nuenze mudimu wenu matuku asambombo kadi nuikishe mu dituku dia muanda mutekete; bua ngombe webe ne mpunda webe bikishe, ne muana wa balume wa mupika webe mukaji ne muenyi basangale.’ (Ekes. 23:12) Bu muvua Yehowa munange bantu bavuaye muelele mikenji, wakabasunguila dituku divuabu ne bua kuikisha bua “basangale.”

2. Nsabatu uvua wambuluisha bena Isalele ku tshinyi?

² Nsabatu uvua anu dituku dia kuikisha patupu anyi? Tòo, kadi divua dituku dia mushinga mukole mu ntendelelu wa bena Isalele. Kunemeka Nsabatu kuvua kuambuluisha bamfumu ba mêku bua kupeta dîba dia kulongesha bena mu nzubu yabu ‘bua bobu baye mu njila wa Yehowa bua kuenza malu makane.’ (Gen. 18:19) Kuvua kabidi kuambuluisha bena mu dîku ne balunda bua kudisangisha ne kuela meji pa malu adi Yehowa muenze ne kukankamijangana. (Yesh. 58:13, 14) Kadi Nsabatu uvua nangananga udianjila kuleja tshikondo tshivua bantu ne bua kupeta dikisha dilelela mu bukokeshi bua bidimu tshinunu bua Kristo. (Lomo 8:21) Netuambe tshinyi bua matuku etu aa? Mmuaba kayi udi bena Kristo balelela badi banange mikenji ya Yehowa bapeta dikisha dia mushindu eu? Badi badipeta mushindu kayi?

Kubuela mu bisangilu bia bena Kristo kudi kutukolesha

3. Mmushindu kayi uvua bena Kristo ba kumpala bakoleshangana? Bakapeta tshinyi?

³ Mupostolo Paulo wakamba mudi tshisumbu tshia bena Kristo tshikale ‘dikunji ne tshishindamenu tshia malu malelela.’ (1 Tim. 3:15) Pavua bena Kristo ba kumpala bakankamijangana ne bakoleshangana bivua bibambuluisha bikole. (Ef. 4:11, 12, 16) Tshilejilu, pavua Paulo mu Efeso, bakalua kumutangila kudi bena mu tshisumbu tshia Kolinto. Tangila tshivua Paulo muambe bua dikumbula diabu adi: ‘Ngakasanka bua difika dia Stefana ne Fôtunato ne Akaiko; bualu bua bobu bakakankamija nyuma wanyi.’ (1 Kol. 16:17, 18) Bia muomumue, panyima pa Tito mumane kuya mu Kolinto bua kueleshangana diboko ne bena Kristo bavuamu, Paulo wakalua kubafundila wamba ne: ‘Nyuma wende wakakankamijibua kudi buonso buenu.’ (2 Kol. 7:13) Nansha lelu eu, Bantemu ba Yehowa badi bakoleshibua ku diambuluisha dia bena Kristo nabu.

4. Mmushindu kayi udi bisangilu bia tshisumbu bitukolesha?

⁴ Ukadi mudimuene wewe nkayebe ne: bisangilu bia tshisumbu bidi bitupetesha disanka dia bungi. Bidi bituambuluisha bua ‘kusambibua munkatshi muetu, muntu ne muntu ku ditabuja dia mukuabu.’ (Lomo 1:12) Bena Kristo netu balume ne bakaji ki mbantu batudi bamanyangana nabu bu bapitshi ba njila, anyi bantu batudi nabu mu malanda a pa mutu pa mutu to. Kadi mbalunda betu ba pa muoyo batudi banange ne batudi tunemeka. Tudi tupeta disanka dia bungi ne bukole patudi  tudisangisha nabu pa tshibidilu mu bisangilu bietu.​—Filem. 7.

5. Mmushindu kayi utudi mua kukoleshangana mu mpuilu ne mu mpungilu?

⁵ Mpuilu ne mpungilu itutu tuenza tshidimu tshionso itu kabidi itukolesha. Pa kumusha malongesha mimpe a mu Dîyi dia Nzambi atudi tupetamu, bisangilu binene ebi bidi bitupetesha mushindu wa ‘kudiundishibua mu mitshima yetu,’ tuambe ne: kupeta balunda bakuabu. (2 Kol. 6:12, 13) Kadi netuambe tshinyi bituikale bena bundu ne tumona bitukolela bua kuyukila ne bantu? Mushindu muimpe wa kudia bulunda ne bena Kristo netu nkudifila mu midimu itu yenzeka mu mpungilu. Tshilejilu, muanetu mukuabu wa bakaji uvua muambuluishe mu mpungilu wa bantu bafumine mu matunga a bungi wakamba ne: “Pa kumusha bena mu dîku dianyi ne balunda babala ku minu bamvua nabu, tshivua mumanye bantu ba bungi muaba au to. Kadi pamvua ngenza midimu ya kusukula muaba wa mpungilu, ngakamanyangana ne bana betu ba balume ne ba bakaji ba bungi. Tshivua tshikondo tshimpe be!”

6. Mmushindu kayi utudi mua kupeta disanka patudi mu dikisha?

⁶ Bena Isalele bavua benza luendu misangu isatu ku tshidimu tshionso bua kuya kutendelela Yehowa ku Yelushalema. (Ekes. 34:23) Misangu ya bungi bavua bashiya madimi abu ne bintu bivuabu bapanyisha bua kuenda lua makasa munkatshi mua matuku a bungi mu njila ivua ne mpuishi. Nansha nanku, bavua bumvua “disanka dinene” pavuabu bamona bantu bavua ku ntempelo ‘batumbisha Yehowa.’ (2 Kul. 30:21) Bia muomumue batendeledi ba Yehowa ba bungi lelu eu badi bamona ne: kuenza luendu ne dîku diabu bua kuya kutangila nzubu ya Betele wa Bantemu ba Yehowa udi pabuipi nabu kudi kubapetesha disanka dia bungi. Kanuenaku penu mua kuya kutangila Betele ne bena mu dîku dienu panuikala mu dikisha anyi?

7. (a) Ntshinyi tshitudi mua kuenza bua dijikija dietu dia lutetuku kutuambuluishadi? (b) Ntshinyi tshidi mua kuambuluisha bua bikondo bitudi tujikija lutetuku pamue kuikalabi bimpe?

⁷ Kusombeshangana ne bena mu dîku ne balunda bua kujikija lutetuku kudi paku mua kutukankamija.  Mukalenga wa meji Solomo wakamba ne: ‘Kakuena disanka kudi muntu bu kudia, kunua ne kusankisha mutshima wende mu midimu yende.’ (Muam. 2:24) Kujikija lutetuku pamue ne bena Kristo netu kakuena anu kusankisha mutshima wetu patupu to, kadi kudi kutuambuluisha kabidi bua kubamanya bimpe ne kubananga bikole. Bua bikondo bitudi tutuilangana ne bena Kristo netu kuikalabi bimpe, tudi ne bua kubikila bantu bakese bua kumona mua kubatangila bimpe nangananga patudi balongolole bua kubelela maluvu.

Kuyisha kudi kutupetesha disanka

8, 9. (a) Leja dishilangane didi pankatshi pa malongesha a Yezu ne a bafundi ne Bafalese. (b) Ntshinyi tshitudi tupeta patudi tuyisha bantu malu a mu Bible?

⁸ Yezu uvua uyisha ne tshisumi tshia bungi ne wakakankamija bayidi bende bua kumuidikija. Ke tshitudi tumuena mu mêyi ende a ne: ‘bintu bia kunowa bidi bia bungi, kadi bena mudimu badi banyabanya. Nunku, nulombe Mukalenge wa bintu bia kunowa, atume bena mudimu mu kunowa kuende.’ (Mat. 9:37, 38) Malu avua Yezu ulongesha avua bushuwa enza disanka bualu uvua uyisha “lumu luimpe.” (Mat. 4:23; 24:14) Malongesha ende avua mashilangane bikole ne mikenji ivua kayiyi kutua tshiadi ivua Bafalese belela bantu.​—Bala Matayo 23:4, 23, 24.

⁹ Patudi tuyisha bantu lumu luimpe lua Bukalenge bua Nzambi, tudi tubakolesha ne bidi bituambuluisha tuetu bine bua kumvua bimpe malu adi mu Bible ne kuananga. Davidi wakamba ne disanka dionso ne: ‘Tumbishayi Yehowa! Bua bidi bimpe bua kuimbila Nzambi wetu misambu ya kumutumbisha nayi. Bua kumutumbisha kudi kuakane.’ (Mus. 147:1) Kuenaku mua kutumbisha pebe Yehowa bikole mu buambi bua kuvudija disanka diebe anyi?

10. Tudi mua kuamba ne: tudi tuyisha bimpe anu padi bantu bitaba lumu luimpe anyi? Umvuija.

¹⁰ Bushuwa, mu imue miaba bantu batu bitaba lumu luimpe bikole kupita miaba mikuabu. (Bala Bienzedi 18:1, 5-8.) Wewe musombele muaba udi bantu kabayi batamba kuitaba lumu luimpe lua Bukalenge bua Nzambi, dienzeja bua kutamba kuimanyina pa malu mimpe audi wenze mu mudimu wa buambi. Vuluka ne: mudimu uudi wenza bua kumanyisha bantu dîna dia Yehowa kawena uya patupu. (1 Kol. 15:58) Nansha padi bantu babenga kututeleja, kabiena biumvuija ne: katuena tuenza mudimu wetu bimpe to. Tudi ne bua kuikala bashindike ne: Yehowa neambuluishe bua bantu badi banange malu makane kuitababu lumu luimpe lua Bukalenge buende.​—Yone 6:44.

Kuenza Ntendelelu wa mu Dîku kudi kutupetesha disanka

11. Mmudimu kayi udi Yehowa mupeshe baledi? Ntshinyi tshidibu mua kuenza bua kuukumbaja?

¹¹ Baledi badi benzela Nzambi mudimu badi ne mudimu wa kulongesha bana babu mikenji ya Yehowa. (Dut. 11:18, 19) Biwikale udi muledi, udiku mulongolole dîba dia kulongesha bana bebe malu adi atangila Tatu wetu wa dinanga udi mu diulu anyi? Bua wewe kukumbaja mudimu wa mushinga eu ne kutabalela majinga a bena mu dîku diebe, Yehowa mmukupeshe bintu bia bungi bidi mua kukupetesha disanka bidi mu mikanda, bibejibeji, bande ya video ne bande ya kuteleja.

12, 13. (a) Ntshinyi tshidi bena mu mêku mua kuenza bua Ntendelelu wa mu Dîku kubambuluishaye? (b) Ntshinyi tshidi baledi mua kuenza bua Ntendelelu wa mu Dîku kuambuluishaye bana babu?

¹² Mupika wa lulamatu ne wa budimu mmulongolole kabidi bua tuikale ne dituku ditudi tuenza Ntendelelu wa mu Dîku ku dilolo. Ndituku didi bena mu dîku ne bua kulonga Bible ku lumingu luonso. Bena mêku a bungi mbamone ne: kuenza Ntendelelu wa mu Dîku nkubambuluisha bua kunangangana bikole ne kukolesha malanda abu ne Yehowa. Kadi ntshinyi tshidi baledi mua kuenza bua ntendelelu wabu wa mu dîku kukoleshaye ditabuja dia bana babu?

¹³ Ntendelelu wa mu Dîku kena ne bua kuikala tshikondo tshidi tshitondesha bantu nsombelu to. Bualu tudi tutendelela ‘Nzambi wa butumbi’ anyi wa disanka udi musue bua tuikale ne disanka patudi tumutendelela. (1 Tim. 1:11; Filip. 4:4) Kuikala ne dituku dinudi mua kuyukila malu mimpe adi mu Bible dilolo mbualu bua disanka. Baledi badi mua kulengeja mishindu idibu balongesha pa kukeba  mishindu mikuabu ya kufuanyikija malu bua bana kuumvuabu bimpe. Tshilejilu, baledi bakuabu bakambila Brandon muanabu wa balume wa bidimu dikumi bua kulongolola tshiena-bualu tshia ne: “Bua tshinyi Bible udi ubikila Satana ne: nyoka?” Tshiena-bualu etshi katshiakasankisha Brandon to bualu uvua munange nyoka bikole, ne biakamunyingalaja bua kumona ne: badi bafuanyikija Satana ne nyoka. Bena mu mêku makuabu batu imue misangu benza drama ya malu a mu Bible bapesha muntu yonso wa mu dîku tshiende tshitupa tshia kunayaye utshibala mu Bible, anyi benza dinaya dia bualu kampanda. Mishindu ya kulongesha eyi idi isankisha bana benu ne ikoka ntema yabu bikole ne idi mua kuambuluisha bua mikenji ya mu Bible kulengayi mioyo yabu. *

Epuka malu adi mua kukupangisha bua kuenzela Nzambi mudimu

14, 15. (a) Mmunyi mudi tunyinganyinga ne njiwu bivulangane mu matuku a ku nshikidilu aa? (b) Ntshinyi tshitu tshisakidila tunyinganyinga pa tutudi tuluangana natu?

¹⁴ Tunyinganyinga ne njiwu mbivule bikole mu matuku a ku ndekelu kua bulongolodi bubi bua malu ebu. Dipanga midimu ya kuenza ne ntatu mikuabu ya malu a makuta bidi bitatshisha bantu bapite bungi. Nansha bantu badi benza mudimu badi bamona ne: makuta adibu bapeta adi anu bu adi aya mu mpaya mutubuke bualu kaena akumbaja majinga a bena mu dîku diabu onso to. (Tangila Hagai 1:4-6.) Bena malu a tshididi ne balombodi bakuabu ki mbakokeshe bua kujikija malu a tshinyangu ne makuabu adi akebesha tshikisu to. Bantu ba bungi mbatekete mu mikolo bua bilema bidibu benza.​—Mus. 38:4.

¹⁵ Bena Kristo balelela batu bapeta pabu ntatu eyi ne buluishi bua kudi bena mu bulongolodi bua Satana. (1 Yone 5:19) Mu imue nsombelu, bayidi ba Kristo badi mua kupeta tunyinganyinga tua bungi anu bualu badi badienzeja bua kushala balamate Yehowa. Yezu wakamba ne: ‘Biankengeshabu, nebanukengeshe kabidi.’ (Yone 15:20) Kadi nansha padibu ‘batukengesha, Nzambi kena utulekela nansha.’ (2 Kol. 4:9, Muanda Mulenga Lelu) Bua tshinyi bidi nanku?

16. Ntshinyi tshidi mua kutuambuluisha bua kuikala anu ne disanka?

¹⁶ Yezu wakamba ne: ‘Luayi kundi, bonso badi ne mudimu mukole, badi ne bujitu bunene, meme nennupe dikisha.’ (Mat. 11:28) Patudi tuitabuja mulambu wa Kristo ne muoyo mujima, tudi anu bu badi baditeka mu bianza bia Yehowa. Dîba adi tudi tupeta ‘bukole butambe’ buetu. (2 Kol. 4:7) Nyuma muimpe wa Nzambi udi muikale “musambi” udi ukolesha ditabuja dietu bua tumone mua kutantamena ntatu ne makenga ne kuikala ne disanka.​—Yone 14:26; Yak. 1:2-4.

17, 18. (a) Ndungenyi kayi lutudi ne bua kudimukila? (b) Kudikebela masanka kudi mua kutufikisha ku tshinyi?

¹⁷ Tuetu bena Kristo balelela tudi ne bua kudimukila lungenyi lua bena panu lua kukeba mua kupeta masanka nansha bia kumona lufu. (Bala Efeso 2:2-5.) Tshianana netukuluke mu buteyi bua ‘lukuka lua mubidi, ne lukuka lua mêsu ne kudisua kua muoyo.’ (1 Yone 2:16) Peshi tudi mua kudishima ne: kukumbaja majinga onso a mubidi kudi kutupetesha disanka. (Lomo 8:6) Tshilejilu, bantu bakuabu batu batuadija kunua diamba ne maluvu, kutangila malu a bantu butaka, manaya a tshikisu ne malu makuabu mabi bua kusankisha majinga abu. Satana udi wela bantu “mateyi” bua kubafikisha ku didisankisha mu mushindu mubi.​—Ef. 6:11.

 ¹⁸ Bushuwa, kudia pa ndilu, kunua pa nnuinu ne kujikija lutetuku mu mushindu muimpe ki nkubi to. Kadi katuena mua kulekela malu aa angata muaba wa kumpala mu nsombelu wetu to. Nunku tudi ne bua kudikanda nangananga bua matuku atudi aa. Kudikebela masanka kudi mua kututekesha, kutufikisha too ne ku dilua ‘batuke katuyi ne mamuma too ne ku dimanya dijalame dia Mukalenge wetu Yezu Kristo.’​—2 Pet. 1:8.

19, 20. Mmunyi mutudi mua kupeta disanka dilelela?

¹⁹ Patudi tuenza malu adi apetangana ne mikenji ya Yehowa, tudi tumona ne: masanka onso a pa buloba ebu nga tshitupa tshîpi. Ke tshiakamona Mose ne ke mutudi petu ne bua kumona malu. (Eb. 11:25) Mu kuamba kuimpe, disanka dilelela didi dishala matuku a bungi didi difuma anu ku dienza dia disua dia Tatu wetu wa mu diulu.​—Mat. 5:6.

²⁰ Nunku tutungunukayi ne kuenza midimu yetu ya bena Kristo bua tupete disanka. Tuetu benze nanku, tudi ‘tupidia malu adi kaayi a Nzambi ne nkuka ya pa buloba patudi tuindila ditekemena dietu dia disanka, ne dimueneka dia butumbi bua Nzambi munene ne Musungidi wetu Yezu Kristo.’ (Tito 2:12, 13) Ke bualu kayi tudisuikayi bua kutungunuka ne kuambula mutshi wa tshikokedi wa Yezu patudi tukokela bukokeshi buende ne tutumikila mikenji yende. Patudi tuenza nunku, netupete disanka dilelela.

[Mêyi adi kuinshi]

Newandamune munyi?

• Mmunshindu kayi udi batendeledi ba Yehowa bapeta disanka lelu eu?

• Mmunshindu kayi udi kuyisha kutuambuluisha tuetu ne badi batuteleja?

• Ntshinyi tshidi bamfumu ba mêku mua kuenza bua Ntendelelu wa mu Dîku kuambuluisha bena mu dîku?

• Mmalu kayi adi mua kutupangisha bua kuenzela Nzambi mudimu?

[Nkonko ya dilonga]

[Bimfuanyi mu dibeji 26]

Patudi tuambula mutshi wa tshikokedi wa Yezu, tudi tupeta masanka a bungi