Leja muudi muyidi mulelela wa Kristo

“Mitshi yonso idi mimpe itu yakuama mamuma mimpe; kadi mitshi mibi itu yakuama mamuma mabi.”​—MAT. 7:17.

1, 2. Bena Kristo balelela mbashilangane ne ba dishima ku tshinyi, nangananga mu matuku a ku nshikidilu aa?

YEZU wakamba ne: bantu badi bamba mudibu bamuenzela mudimu nebashilangane ne bayidi bende balelela ku mamuma abu anyi malongesha abu ne bienzedi biabu. (Mat. 7:15-17, 20) Bantu batu benza malu bilondeshile bidibu babueja mu lungenyi luabu ne mu muoyo wabu. (Mat. 15:18, 19) Aba badibu balongesha malu a dishima badi bakuama “mamuma mabi” kadi badibu balongesha bulelela badi bakuama “mamuma mimpe.”

² Mishindu ibidi ya mamuma eyi mmimueneke patoke mu matuku a ku nshikidilu aa. (Bala Danyele 12:3, 10.) Bena Kristo ba dishima badi bamona Nzambi mu mushindu mubi ne badi badingidija mudibu bamulamate. Kadi bantu badi ne dimanya dilelela dia Bible badi batendelela Nzambi “mu nyuma ne mu bulelela.” (Yone 4:24; 2 Tim. 3:1-5) Badi badienzeja bua kuikala ne ngikadilu ya buena ya Kristo. Kadi netuambe tshinyi bua muntu yonso pa nkayende? Patudi tukonkonona malu atanu adi aleja mudi bena Kristo balelela ne bua kuikala adi alonda aa, diebeja ne: ‘Bienzedi bianyi ne malu andi ndongesha bantu bidiku bipetangana ne Dîyi dia Nzambi anyi? Nsombelu wanyi udiku ukoka bantu badi bakeba bulelela kudiye anyi?’

Enza malu adi apetangana ne Dîyi dia Nzambi

3. Ntshinyi tshitu tshisankisha Yehowa? Bualu ebu budi bumvuija tshinyi bua bena Kristo balelela?

³ Yezu wakamba ne: ‘Bantu batu bambikila ne: Mukalenge, Mukalenge, kabena babuela bonso mu bukalenge bua mu diulu, anu yeye utu wenza bu mudi Tatu wanyi udi mu diulu musue.’ (Mat. 7:21) Nunku, ki nkuamba patupu ne: tudi bena Kristo kudi kusankisha Yehowa to, kadi nkuenza malu adi bena Kristo ne bua kuenza. Bua bayidi balelela ba Kristo, bualu ebu budi bumvuija kutumikila Nzambi mu nsombelu wabu mujima bu mudi mu mushindu udibu bamona makuta, mudimu wa bianza, dijikija lutetuku, bilele ne bibilu bia bena panu, dibaka ne disomba ne bantu bakuabu. Kadi bena Kristo ba dishima bobu badi balonda ngenyi ne bienzedi bia bena panu bidi binyanguke bikole matuku a ku nshikidilu aa.​—Mus. 92:7.

4, 5. Mmushindu kayi utudi mua kutumikila mêyi a Yehowa adi mu Malaki 3:18 mu nsombelu wetu?

⁴ Bua bualu ebu muprofete Malaki wakamba ne: ‘Nenujingulule ditapuluka didi pankatshi pa bantu bimpe ne bantu babi, pankatshi pa badi bakuatshila Nzambi mudimu ne badi kabayi bamukuatshila mudimu.’ (Mal. 3:18) Paudi wela meji pa mêyi aa, diebeja ne: ‘Ndiku mufuanangane ne bena panu anyi ndi mushilangane nabu? Ntuku ngenza muanyi muonso bua kusankisha bena mudimu nanyi anyi balongi nanyi peshi ntuku ndamata mikenji ya Nzambi ne nyisha padiku mushindu anyi?’ (Bala 1 Petelo 3:16.) Katuena basue kumueneka bu bakane kupita bakuabu to, kadi tudi ne bua kuikala bashilangane ne bantu badi kabayi benzela Yehowa mudimu ne bamunange.

⁵ Wewe mumone ne: udi ne bua kushintuluka mu bualu kampanda, mbimpe usambile bua bualu abu ne ukebe diambuluisha mu didilongela Bible pa tshibidilu, disambila ne dibuela mu bisangilu bionso. Patudi tutumikila Dîyi dia Nzambi bikole, tudi tukuama “mamuma mimpe” bu mudi ‘mamuma a mishiku idi ijukula ditabuja dia dîna’ dia Nzambi.​—Eb. 13:15.

 Yisha Bukalenge bua Nzambi

6, 7. Ndishilangana kayi didi pankatshi pa bena Kristo balelela ne ba dishima pa bidi bitangila diyisha dia Bukalenge?

⁶ Yezu wakamba ne: ‘Bundi nabu mbua kuambila misoko mikuabu lumu luimpe lua bukalenge bua Nzambi; buakantuminabu mbualu ebu.’ (Luka 4:43) Bua tshinyi Yezu uvua utamba kuyisha Bukalenge bua Nzambi? Uvua mumanye ne: yeye muine Mukalenge wabu ne bana babu bela manyi badi babishibue ku lufu nebumbushe tshidi tshikebele bantu ntatu, tuambe ne: bubi ne Diabolo. (Lomo 5:12; Buak. 20:10) Ke bualu kayi, wakambila bayidi bende bua kuyisha Bukalenge abu too ne ku nshikidilu kua tshikondo etshi. (Mat. 24:14) Bantu badi badiamba mudibu bayidi ba Kristo kabatu benza mudimu eu, ne kabena mua kuwenza to. Bua tshinyi? Bua malu matue ku asatu aa. Bua kumpala, kabena mua kuyisha malu adibu kabayi bamanye to. Buibidi, ba bungi ba kudibu kabena ne didipuekesha ne dikima bidi mua kubambuluisha bua kutantamena ntatu bu mudi tuseku ne buluishi budibu mua kupeta padibu bayisha bantu Bukalenge to. (Mat. 24:9; 1 Pet. 2:23) Buisatu, kabena ne nyuma wa Nzambi.​—Yone 14:16, 17.

⁷ Kadi bayidi balelela ba Kristo bobu mbamanye tshidi Bukalenge bua Nzambi ne tshikalabu ne bua kuenza. Badi kabidi bateka malu a Bukalenge pa muaba wa kumpala mu nsombelu wabu ne babumanyisha pa buloba bujima ku diambuluisha dia nyuma wa Yehowa. (Zek. 4:6) Wewe, utuku uyisha pa tshibidilu anyi? Udiku udienzeja bua kuyisha mêba a bungi anyi bua kulongesha bimpe bua ulue mumanyishi wa Bukalenge mupiluke anyi? Bamanyishi bakuabu mbadienzeje bua kumanya mua kuyisha ne Bible bimpe bua kulengeja mushindu wabu wa kuyisha. Mupostolo Paulo uvua ne tshibidilu tshia kuelesha bantu meji ne Dîyi dia Nzambi wakafunda ne: ‘Dîyi dia Nzambi didi ne muoyo ne bukole.’​—Eb. 4:12; Bien. 17:2, 3.

8, 9. (a) Londa bualu budi buleja mudibi bimpe kubadila bantu Bible patudi tuyisha. (b) Ntshinyi tshitudi mua kuenza bua kumanya mua kuyisha bikole ne Dîyi dia Nzambi?

⁸ Muanetu kampanda wakabadila muena Katolike mvese wa Danyele 2:44 pavuaye uyisha ku nzubu ne ku nzubu ne kumumvuija muikala Bukalenge bua Nzambi ne bua kufila ditalala dilelela ne bupole. Tatu au kumuambila ne: “Ndi musanke bikole bua muudi mubulule Bible webe ne mundeje tshidiye wamba, pamutu pa kungambila mukana tshianana.” Pavua muanetu mukuabu mubadile mamu mukuabu muena Ortodokse mvese, mamu au wakamuela nkonko mimpe ya bungi. Muanetu eu ne mukajende bakamuandamuna ne Bible. Mamu au wakalua kuamba ne: “Nudi bamanye bua tshinyi mvua muitabe bua kuyukila nenu anyi? Nuvua balue kuanyi ne Mukanda wa Nzambi ne baumbadile.”

⁹ Bushuwa, mikanda yetu idi ne mushinga ne tudi ne bua kuyipesha bantu patudi tuyisha. Kadi tudi ne bua kutamba kubabadila Bible. Nunku, wewe kuyi ne tshibidilu tshia kubadila bantu Bible bikole paudi uyisha, kuenaku mua kudifundila tshipatshila tshia kutuadija kubabadilaye bikole anyi? Udi mua kusungula mvese idi yumvuija tshidi Bukalenge bua Nzambi ne muikalabu ne bua kujikija ntatu idi itamba kutonda bantu ba muaba unudi. Pashishe udilongolole bua kuyibadila bantu paudi uyisha ku nzubu ne ku nzubu.

 Sanka bua muudi ne dîna dia Nzambi

10, 11. Pa bidi bitangila dîna dia Nzambi, ndishilangana kayi didi pankatshi pa Yezu ne bantu ba bungi badi badiamba mudibu bayidi bende?

¹⁰ ‘Nuenu nudi bamanyi banyi; edi ndîyi dia Yehowa. Meme ndi Nzambi.’ (Yesh. 43:12) Yezu Kristo udi Ntemu wa kumpala wa Yehowa uvua wangata kuikala ne dîna dia Nzambi ne kudimanyisha bantu bu diakalenga dinene. (Bala Ekesode 3:15; Yone 17:6; Ebelu 2:12.) Bu muvuaye umanyisha dîna dia Tatuende, badi bamubikila ne: “Mumanyishi wa kueyemena.”​—Buak. 1:5; Mat. 6:9.

¹¹ Kadi bantu ba bungi badi badiamba mudibu baleji mpala ba Nzambi ne ba Muanende kabatu basue bua bababikile mu dîna edi to, ne mbadiumbushe too ne mu Bible yabu. Bua kuleja lungenyi lua muomumue, matuku adi panshi aa mbambile banene ba bena Katolike ne: “Kabena ne bua kutela dîna dia Nzambi mu mfundilu wadi wa maleta anayi a YHWH” padibu bayisha mu bitanda biabu to. * Elu ndungenyi lubi lutambe.

12. Ntshinyi tshiakenzeka mu 1931 bua Bantemu ba Yehowa kumanyikabu bikole mu dîna dia Yehowa?

¹² Bena Kristo balelela badi bidikija Kristo ne “tshisumbu tshinene tshia bamanyi” bavua ne muoyo kumpala kuende bualu badi ne disanka dia kubikila Nzambi mu dîna diende. (Eb. 12:1) Mu 1931, batendeledi ba Nzambi bakalua kumanyika bikole mu dîna dia Yehowa bualu bakangata dîna dia Bantemu ba Yehowa. (Bala Yeshaya 43:10-12.) Nunku, mu ngumvuilu wa pa buende, bayidi balelela ba Kristo bakalua bantu ‘badi babikidibua ku dîna’ dia Nzambi.​—Bien. 15:14, 17.

13. Ntshinyi tshitudi ne bua kuenza bua kuikala ne nsombelu udi upetangana ne dîna didi Nzambi mutupeshe?

¹³ Mmushindu kayi udi yonso wa kutudi mua kuikala ne nsombelu udi upetangana ne dîna dia pa buadi edi? Bumue bua ku malu atudi ne bua kuenza nkuyisha bantu malu a Nzambi ne muoyo umue. Paulo wakafunda ne: ‘Muntu yonso watendakena dîna dia Mukalenge neasungidibue. Mmunyi muamutendakenabu kabayi banji kumuitabuja? Mmunyi muamuitabujabu kabayi banji kumvua lumu luende? Mmunyi mumvuabu lumu luende kabayi ne mubambidi. Mmunyi muabambilabu kabayi batumibue?’ (Lomo 10:13-15) Tudi kabidi ne bua kuela patoke ne budimu malongesha onso a dishima adi apendesha Mufuki wetu bu mudi dia iferno wa kapia, bualu didi dipesha Nzambi wa dinanga ngikadilu mibi ya Diabolo.​—Yel. 7:31; 1 Yone 4:8; tangila Mâko 9:17-27.

14. Ntshinyi tshitu bamue bantu benza padibu bamanya dîna dia Nzambi?

¹⁴ Utuku umvua disanka bua muudi ne dîna dia Tatuebe wa mu diulu anyi? Utuku wambuluisha bantu bua kumanya dîna dia tshijila edi anyi? Tshilejilu, mamu mukuabu wa mu tshimenga tshia Paris mu ditunga dia France wakumvua ne: Bantemu ba Yehowa mbamanye dîna dia Nzambi. Nunku wakalomba Ntemu wa Yehowa wakapetangana nende bua amuleje muaba udidi mu Bible. Pakabalaye Musambu wa 83:18, biakamulenga ku muoyo bikole. Kutuadijaye kulonga Bible ne lelu eu ukadi muanetu udi muye kuyisha mu ditunga dikuabu. Pavua mamu mukuabu muena Katolike wa mu ditunga dia Australie mumone dîna dia Nzambi mu Bible bua musangu wa kumpala, wakapuekesha binsonji bua bungi bua disanka. Kukadi bidimu bia bungi bidiye mpanda-njila wa pa tshibidilu. Matuku adi panshi aa, Bantemu ba mu ditunga dia Jamaïque mbaleje mamu mukuabu dîna dia Nzambi mu Bible wende, yeye pende wakapuekesha binsonji bua bungi bua disanka. Nunku, ikala uditumbisha bua mudibu bakubikila mu dîna dia Nzambi ne anu bu Yezu, ikala umanyisha bantu bonso dîna dimpe edi.

‘Kanusu malu a ba pa buloba’

15, 16. Bena Kristo balelela batu bamona malu a pa buloba bishi? Nkonko kayi itudi ne bua kudiela?

¹⁵ “Kanusu malu a ba pa buloba, anyi bintu bia pa buloba. Biasua muntu malu a ba pa buloba, dinanga dia Tatu kadiena munda muende.” (1 Yone 2:15) Bena panu ne lungenyi luabu kabiena bipetangana ne Yehowa ne nyuma wende to. Ke bualu kayi, bena Kristo balelela kabena anu babenga kuikala ba pa buloba to, kadi badi babenga kunanga malu a pa buloba bualu mbamanye ne: anu muvua muyidi Yakobo mufunde,  ‘bulunda bua malu a pa buloba budi ne Nzambi lukuna.’​—Yak. 4:4.

¹⁶ Bidi mua kuikala bikole bua kutumikila mubelu wa Yakobo eu bualu lelu kudi mateta a bungi pa buloba. (2 Tim. 4:10) Ke bualu kayi Yezu wakasambila Nzambi bua bayidi bende wamba ne: ‘Tshiena nkulomba ne: Ubumushe pa buloba; ndi nkulomba ne: Ubasungile kudi bubi. Bobu kabena ba pa buloba, bu mundi meme tshiyi wa pa buloba.’ (Yone 17:15, 16) Diebeja ne: ‘Ntuku ndienzeja bua kubenga kuikala wa pa buloba anyi? Bantu bakuabu mbamanyaku ne: tshitu ngenza bibilu ne bilele bidi kabiyi bipetangana ne Bible ne bikuabu bidi kabiyi bifumine mu ntendelelu wa dishima kadi bikale ne malu a dishima munda muabi anyi?’​—2 Kol. 6:17; 1 Pet. 4:3, 4.

17. Ntshinyi tshidi mua kusaka bantu badi banange buakane bua kuditeka ku luseke lua Yehowa?

¹⁷ Tudi bamanye ne: ditumikila dietu dia mikenji ya mu Bible didi difikisha bakuabu ku ditukina, kadi didi kabidi mua kukoka bantu badi banange malu makane. Padibu bamona ne: ditabuja dietu ndimanyine mu Dîyi dia Nzambi ne didi dilombola nsombelu wetu mujima, badi mua kuamba bienze anu bu badi bambila muela manyi ne: ‘Tudi basue kuya nebe, bualu bua tuakumvua ne: Nzambi udi nebe.’​—Zek. 8:23.

Ikala ne dinanga dilelela dia bena Kristo

18. Kunanga Yehowa ne muntu netu kudi kulomba tshinyi?

¹⁸ Yezu wakamba ne: ‘Sua Mukalenge Nzambi webe ne mutshima webe wonso ne muoyo webe wonso ne lungenyi luebe luonso’ ne ‘sua mukuenu bu muudi mudisue.’ (Mat. 22:37, 39) Dinanga edi didibu babikila mu tshiena Greke ne: agapê ndinanga didi dilonda mikenji, malu atudi ne bua kuenza ne bukalanga. Didi mua kuikala dikole ne disaka muntu bua kusomba bimpe ne bakuabu. (1 Pet. 1:22) Ndishilangane bikole ne didinanga bualu diodi ditu dimuenekela ku mêyi ne bienzedi bidi muntu wenza bua diakalenga dia bakuabu pamutu pa diende nkayende.​—Bala 1 Kolinto 13:4-7.

19, 20. Londa amue malu adi aleja mudi dinanga dia bena Kristo ne bukole.

¹⁹ Bu mudi dinanga dikale ngikadilu udi nyuma wa Nzambi upetesha bantu, didi diambuluisha bena Kristo balelela bua kuenza malu adi bena panu kabayi mua kuenza bu mudi kubenga kuikala ne kansungasunga ka makoba, bisamba ne kubuelakana mu malu a tshididi. (Bala Yone 13:34, 35; Gal. 5:22) Malu adibu benza  adi alenga bantu badi bafuane mikoko bikole. Tshilejilu, pavua nsongalume mukuabu wa mu tshitendelelu tshia bena Yuda wa mu ditunga dia Isalele mubuele mu bisangilu bia Bantemu bua musangu wa kumpala, wakakema bualu wakamona bana betu bena Yuda ne bena Arabe batendelela Yehowa kaba kamue. Kutuadijaye kubuela mu bisangilu bionso ne kuitabaye bua kulonga Bible. Utuku pebe munange bana betu ne muoyo umue anyi? Utuku udienzeja kabidi bua kuakidila benyi badi balua mu bisangilu ku Nzubu wa Bukalenge nansha bobu ba tshisamba kayi, dikoba kayi, bapele anyi babanji anyi?

²⁰ Tuetu bena Kristo balelela, tutu tudienzeja bua kuleja mutudi banange bantu bonso. Tshilejilu mu ditunga dia Salvador, muanetu wa bakaji utshivua nsongakaji uvua ulongesha mamu mukuabu muena Katolike wa kalanda musenga wa bidimu 87. Dituku dikuabu mamu au wakasama bikole, kubuelaye too ne mu lupitadi. Pakapatukaye, bana betu ba bakaji bakalua kumutangila ne kumushila biakudia. Bakenza nanku mu matuku matue ku ngondo mujima. Muena mu tshitendelelu tshia mamu au nansha umue kavua mulue kumutangila to. Ntshinyi tshiakenzeka? Wakumbusha mpingu yende yonso, kufunda mukanda bua kupatuka mu Katolike ne kutuadijilula kulonga Bible. Bushuwa, kuenzela muntu malu adi aleja mutudi bamunange kudi ne bukole bua bungi! Kudi mua kumulenga kupita malu atudi tumuambila.

21. Ntshinyi tshitudi ne bua kuenza bua kuikala ne ditekemena dishindame bua matuku atshilualua?

²¹ Mu matuku makese emu, Yezu neambile bantu bonso badi badiamba mudibu bamuenzela mudimu ne: ‘Tshiena munumanye; umukayi kundi, nudi benji ba malu mabi.’ (Mat. 7:23) Nunku, tukuamayi mamuma adi atumbisha Tatu wetu wa mu diulu ne Muanende. Yezu wakamba ne: ‘Muntu yonso udi mumvue mêyi anyi aa ne utu uatumikila neikale bu muena meji, wakibaka nzubu wende pa mutu pa dibue.’ (Mat. 7:24) Tuetu baleje mutudi bayidi balelela ba Kristo, Nzambi neatuanyishe ne netuikale ne ditekemena dishindame anu bu nzubu udibu base pa mutu pa dibue.

[Mêyi adi kuinshi]

Udi muvuluke anyi?

• Bena Kristo balelela mbashilangane ne ba dishima ku tshinyi?

• Tela amue “mamuma” adi aleja mudi bena Kristo balelela ne bua kuikala.

• Mbipatshila kayi biudi mua kudifundila mu dikuama dia mamuma a bena Kristo?

[Nkonko ya dilonga]

[Tshimfuanyi mu dibeji 13]

Utuku ne tshibidilu tshia kubadila bantu Bible paudi uyisha anyi?

[Tshimfuanyi mu dibeji 15]

Bantu bakuabu badiku bamanye ne: kutu wenza bibilu bidi Bible ukandika anyi?