Nudiku ne dituku dinutu nulonga Bible anyi?

TSHIDIMU tshishale, Kasumbu Kaludiki kavua kamanyishe dishintuluka mu ndongamu wa bisangilu bia tshisumbu didi dituambuluisha bua kupeta dîba dia kudilongela Bible anyi kumulonga mu dîku. Biwikala mfumu wa dîku, enza muebe muonso bua kuikala ulombola dilonga dia Bible didi diambuluisha mukajebe ne bana bebe. Bena Kristo badi mu dibaka badi kabayi ne bana badi ne bua kuikala ne programe wa kulonga Bible pamue. Bana betu ba balume ne ba bakaji badi bajike kabayi ne majitu a dîku badi pabu ne bua kuikala ne dituku didibu badilongela Bible.

Bana betu ba bungi mbaleje dianyisha diabu bua ndongamu eu wa dienza Ntendelelu wa mu Dîku mu dilolo kampanda. Tshilejilu, Kevin udi mukulu mmufunde wamba ne: “Tuetu ne bena mu tshisumbu tshietu bonso tudi tunuela tuasakidila wa manza tente. Mu kasumbu ketu ka bakulu tuvua bayukile bua mushindu utudi mua kulonga ne bena mu mêku etu matuku atudi katuyi ne bisangilu anu bu muvua Kasumbu Kaludiki katulombe.”

Jodi udi ne bayende mukulu mmufunde ne: “Tudi ne bana ba bakaji basatu. Wa kumpala udi ne bidimu 15, muibidi ne 11 ne muisatu ne 2. Matuku mashale aa tudi baye mu tshisumbu tshia muakulu wa tumama. Bidi bitulomba mêba a bungi bua kulongolola bisangilu bionso. Kadi katshia anu ndongamu wa bisangilu washintuluka, tudi bapete dituku dikuabu ditudi tuenza Ntendelelu wa mu Dîku.”

John ne mukajende JoAnn badi bampanda-njila badi bamba ne: “Dilonga dietu dia Bible mu dîku kadivua dienzeka misangu yonso to, bualu tuvua ne midimu ya bungi ya kuenza mu tshisumbu. Ndongamu mupiamupia wa bisangilu eu ndipa dia kudi Yehowa didi dikolesha malanda etu nende patudi tuenza tshidibu batulombe bua kuenza matuku atudi katuyi ne bisangilu.”

Muanetu Tony udi ne bidimu bitue ku 25 ne utshidi mujike mmusungule dituku dia Dibidi bua kudilongela Bible ku dilolo. Udi ulongolola bisangilu bia tshisumbu matuku makuabu munkatshi mua lumingu. Tony udi wamba ne: “Ntu ngindila dituku dia Dibidi ne muoyo kulu kulu.” Bua tshinyi? “Bualu dilolo dia dituku adi ditu dia pa buadi buanyi meme ne Yehowa.” Udi wamba kabidi ne: “Munkatshi mua mêba abidi majima, ndi ndonga malu adi akolesha malanda anyi ne Yehowa. Kuikala ne dîba dia bungi dia kulonga kudi kumpetesha mushindu wa kuela meji bikole pa mvese indi mbala mu Bible.” Ntshinyi tshidiye mupete? Udi wamba ne: “Mibelu ya Yehowa kayitu mianji kulenga muoyo wanyi bu mpindieu to.” Tshilejilu, “mvua mubale muyuki wa bulunda bua Davidi ne Yonatana mu mukanda wa Étude perspicace. Ndi mulongele malu a bungi ku didifila dia Yonatana. Tshilejilu tshiende ntshingambuluishe bua kumanya bimpe tshidi kuikala mulunda mulelela kumvuija. Ndi muindile ne muoyo mujima bua kumanya malu mimpe makuabu mu matuku a Dibidi adi kumpala eku.”

Kakuyi mpata, basadidi ba Yehowa bonso badi bangata dituku divuabu ne bisangilu kale bua kudilongela Bible anyi kuenza ntendelelu wa mu dîku nebapete masanka a bungi be!