Tutantamenayi ntatu itudi tupeta patudi tuyisha ku nzubu ne ku nzubu

“Tuakakolesha mitshima mu Nzambi wetu bua kunuambila lumu luimpe lua Nzambi mu kuluangana kua bungi.”​—1 TES. 2:2.

1. Ntatu kayi ivua Yelemiya mupete, ne mmunyi muakayitantamenaye?

YELEMIYA uvua muntu anu bu tuetu. Pakamuambila Yehowa bua kuluaye “muprofete wa bisamba,” wakamba ne: ‘Aka, Mukalenge Yehowa! Mona, tshiena mua kuakula bimpe, bualu bua ntshidi anu muana.’ Kadi bu muvuaye weyemena Yehowa, wakitaba mudimu au. (Yel. 1:4-10) Munkatshi mua bidimu 40, Yelemiya wakapeta ntatu bu mudi: bantu babenga kumuteleja, bamuipata, bamuseka ne bamututa. (Yel. 20:1, 2) Misangu mikuabu uvua umvua anu bua kubilekela. Kadi wakatungunuka anu ne kumanyisha bantu mukenji wa Nzambi uvua kauyi usankisha bantu ba bungi. Bukole bua Nzambi buakamuambuluisha bua kuenza malu avuaye kayi mua kuenza nkayende.​—Bala Yelemiya 20:7-9.

2, 3. Mmunyi mudi basadidi ba Yehowa lelu bapeta ntatu ya buena ya Yelemiya?

² Basadidi ba Nzambi ba bungi lelu badi mua kudiumvua anu bu Yelemiya. Ba bungi ba  kutudi bavua bela meji kumpala bua mudimu wa kuyisha ku nzubu ne ku nzubu ne: ‘Tshiena mua kukokesha bua kuwenza to.’ Kadi patuakamanya ne: kuyisha lumu luimpe ndisua dia Yehowa, tuakatantamena buôwa ne kutuadija kuyisha. Nansha nanku, ba bungi ba kutudi bavua bapete nsombelu ivua mibapangishe bua kutungunuka ne kuyisha bimpe bua tshikondo kampanda. Bitu bikole bua kutuadija kuyisha ku nzubu ne ku nzubu ne kutungunuka too ne ku nshikidilu.​—Mat. 24:13.

³ Tshia kuenza ntshinyi biwikala ukadi ulonga ne Bantemu ba Yehowa ne ubuela mu bisangilu kadi muikala welakana bua kuyisha ku nzubu ne ku nzubu? Peshi newenze tshinyi biwikale ukadi mutambule kadi bikukolele bua kuyisha ku nzubu ne ku nzubu nansha muudi ne bukole bua kuyisha nunku? Ikala mujadike ne: bantu ba mishindu yonso badi ne ntatu bua kuyisha ku nzubu ne ku nzubu. Kadi Yehowa udi mua kukuambuluisha bua kuyisha.

Tukoleshayi mitshima

4. Ntshinyi tshiakambuluisha mupostolo Paulo bua kuyisha lumu luimpe ne dikima?

⁴ Kakuyi mpata, udi mumanye ne: mudimu wa kuyisha pa buloba bujima udi wenzeka ku bukole bua nyuma muimpe, ki nku bukole bua bantu to. (Zek. 4:6) Ke mudibi kabidi bua mudimu wa muena Kristo yonso. (2 Kol. 4:7) Tuangate tshilejilu tshia mupostolo Paulo. Pakavulukaye tshikondo tshivuabu babakengeshe yeye ne balunda bende, wakafunda ne: ‘Patuakadianjila kukenga, ne pakatuenzelabu bibi ku Filipoi, tuakakolesha mitshima mu Nzambi wetu bua kunuambila lumu luimpe lua Nzambi mu kuluangana kua bungi.’ (1 Tes. 2:2; Bien. 16:22-24) Bidi mua kutukolela bua kuela meji ne: muyishi wa dilambu bu Paulo uvua pende imue misangu uluangana bua kuyisha. Kadi anu bu tuetu bonso, Paulo uvua ne bua kueyemena Yehowa bua kuyisha lumu luimpe ne dikima. (Bala Efeso 6:18-20.) Mmunyi mutudi mua kumuidikija?

5. Mmunyi mutudi mua kupeta dikima dia kuyisha?

⁵ Bua tuetu kupeta dikima dia kuyisha, tudi ne bua kusambila. Mpanda-njila kampanda wakamba ne: “Ntu nsambila bua kuikala ne dikima, bua kulenga mioyo ya bantu ne bua kupeta disanka mu mudimu wa kuyisha. Si mmudimu wa Yehowa, ki nguetu to, nunku yeye kayi mutuambuluishe, katuena ne tshitudi mua kuenza to.” (1 Tes. 5:17) Tuetu bonso tudi ne bua kulomba Nzambi nyuma wende bua kuyisha ne dikima.​—Luka 11:9-13.

6, 7. (a) Ntshikena-kumona kayi tshivua Yehezekele mumone, ne tshivua ne diumvuija kayi? (b) Basadidi ba Nzambi badi bapeta dilongesha kayi ku tshikena-kumona etshi?

⁶ Mukanda wa Yehezekele udi uleja bualu bukuabu budi mua kutuambuluisha bua kuakula ne dikima. Mu tshikena-kumona kampanda, Yehowa uvua mupeshe Yehezekele mukanda muvunga uvuabu bafunde ‘mêyi a muadi, a madilu ne a mulawu’ nseke yonso ibidi ne kumuambilaye bua kuudia wamba ne: ‘Muana wa muntu, diaku mukanda eu undi nkupa, uupatshishe munda muebe tente.’ Tshikena-kumona etshi tshivua tshiumvuija tshinyi? Yehezekele uvua ne bua kumanya mukenji uvuaye ne bua kuyisha bimpe menemene. Uvua ne bua kuikala munda muende ne mu lungenyi luende dituku dionso. Yeye muine udi utungunuka wamba ne: ‘Nunku ngakaudia; ne wakadi mutue nsense bu buitshi mukana muanyi.’ Kumanyisha mukenji wa Nzambi kudi bantu kuvua kusankisha Yehezekele anu bu buitshi. Wakamona ne: uvua ne diakalenga dinene dia kuleja mpala wa Yehowa ne kukumbaja mudimu uvuaye mumupeshe nansha muvua bantu bavuaye uumanyisha kabayi baunange.​—Bala Yehezekele 2:8–3:4, 7-9.

⁷ Tshikena-kumona etshi tshidi ne dilongesha dia mushinga bua basadidi ba Nzambi lelu. Tuetu petu tudi ne mudimu munene wa kuyisha bantu badi kabayi banyisha tshitudi tuenza. Bua tuetu kutungunuka ne kumona mudimu wa kuyisha udi Nzambi mutupeshe bu diakalenga dinene, tudi ne bua kuikala tubala ne tulonga Dîyi diende. Kubala ku mpukapuka ne pamutu pamutu kakuakutuambuluisha bua kumanya Dîyi dia Nzambi bimpe to. Udiku mua kulengeja mushindu uudi ubala Bible ne umulonga ne kuikala wenza nanku pa tshibidilu  anyi? Udiku mua kuikala welangana meji pa biudi ubala anyi?​—Mus. 1:2, 3.

Mua kutuadija kuyukila ne bantu malu a mu Bible

8. Mmushindu kayi udi muambuluishe bamue bamanyishi ba Bukalenge bua kutuadija kuyukila ne bantu malu a mu Bible padibu bayisha ku nzubu ne ku nzubu?

⁸ Tshitu tshitamba kukolela bamanyishi ba bungi padibu bayisha ku nzubu ne ku nzubu nkutuadija kuyukila ne muntu. Bushuwa bitu bikole bua kutuadija kuyukila ne bantu imue miaba. Bamue bamanyishi batu bamone bipepele padibu bayukila ne bantu ku mbelu yabu padibu batuadija ne mêyi makese adibu balongolole ne pashishe bapesha muntu trakte anu mudibi bileja mu kazubu kadi kuinshi aka. Tshiena-bualu tshia trakte anyi tshimfuanyi tshidipu bidi mua kukoka ntema ya muntu unudi nuyukila nende ne kukuambuluisha bua kuleja mu tshikoso kendela kebe ne kumuela lukonko. Tudi mua kuleja muntu trakte isatu anyi inayi ne kumulomba bua kusungula udi umusankisha. Tshipatshila tshietu katshiena anu tshia kufila trakte ku tshibi ne ku tshibi, kadi ntshia kutuadija kuyukila ne bantu bua kutuadija kubalongesha Bible.

9. Bua tshinyi didilongolola dimpe didi ne mushinga?

⁹ Nansha wewe mutuadije kuyukila ne bantu  bishi, didilongolola dimpe nedikuambuluishe bua kuikala mutukije ne kuakula ne musangelu paudi uyisha. Mpanda-njila mukuabu wakamba ne: “Ntu ne disanka dia bungi pantu mudilongolole bimpe. Bitu binsaka bua kuambila bantu malu amvua mulongolole.” Mukuabu pende wakamba ne: “Pandi mmanya malu adi mu mikanda indi njinga kufila mu buambi, ndi nyifila ne disanka.” Nansha mudibi bimpe bua kuambulula munda munda malu atuikala ne bua kuamba, bamanyishi ba bungi batu basue kuambulula ne dîyi dikole. Padibu benza nunku, badi bapesha Yehowa bionso bidibu nabi bia mushinga.​—Kolos. 3:23; 2 Tim. 2:15.

10. Ntshinyi tshidi bantu badi balombola bisangilu bia mudimu wa buambi mua kuenza bua kuambuluishabi bantu?

¹⁰ Bisangilu bia mudimu wa kuyisha bienza bimpe bitu bituambuluisha bua kuikala ne disanka ne kuyisha bimpe. Padi mvese wa dituku adi wakula bua mudimu wa buambi, mbimpe kumubala ne kumumvuija mu tshikoso. Kadi muanetu udi ulombola tshisangilu tshia mudimu wa buambi udi ne bua kuakula bua mushindu kampanda wa kuyisha anyi kuenzeja dinaya dia tshilejilu didi dikumbanyine muaba unudi anyi kuakula bua bualu kampanda buimpe bunudi mua kuambila bantu dituku adi. Bualu ebu nebuambuluishe bantu badi mu tshisangilu bua kuyisha bimpe. Padi bakulu ne bantu bakuabu badi balombola bisangilu ebi badianjila kudilongolola, badi mua kuenzeja manaya aa bimpe ne kujikija tshisangilu pa dîba.​—Lomo 12:8.

Kuteleja kudi ne mushinga

11, 12. Mmunyi mudi kuteleja bantu ne dinanga kubakoka ku lumu luimpe? Fila tshilejilu.

¹¹ Kuditatshisha bua bantu kudi kuambuluisha paku bua kutuadija kuyukila nabu malu a mu Bible ne kulenga mitshima yabu. Tudi mua kuleja ne: tudi tuditatshisha bua bantu patudi tubateleja. Mutangidi muena ngendu mukuabu wakamba ne: “Kuikala ne lutulu ne kuteleja bantu bimpe kudi kubafikisha ku diteleja lumu luimpe ne kubaleja ne: tudi babanange.” Kuteleja bantu ne dinanga kudi mua kubambuluisha bua kututeleja anu bu mudi tshilejilu tshidi tshilonda etshi tshileja.

¹² Mamu mukuabu wakafunda mukanda kampanda wakaluabu kupatula mu tshibejibeji tshia Le Progrès tshia mu tshimenga tshia Saint-Étienne mu France. Wakalejamu muvua bantu babidi bakokole ku tshiibi tshiende matuku makese panyima pa yeye mumane kufuisha muanende wa bakaji wa ngondo isatu. Wakafunda ne: “Ngakamona diakamue ne: bavua Bantemu ba Yehowa. Nkavua mudilongolole bua kubipata mu bukalanga, kadi meme kumona broshire uvuabu bampeshe. Uvua uleja tshidi Nzambi mulekele makenga. Ke meme kubabueja mu nzubu ne lungenyi lua kubaleja ne: bidibu bamba mbia dishima. Tuakayukila nabu munkatshi mua dîba dijima ne ndambu. Bakanteleja ne dinanga dia bungi ne patukavua tulayangana nabu, ngakadiumvua bimpe, ke meme kuitaba bua balue kuntangila kabidi.” (Lomo 12:15) Mamu eu wakalua kuitaba bua kulonga Bible. Tshidi mamu eu utamba kuvuluka pavua bana betu balue kumutangila, ki mbivuabu bamuambile, kadi mmushindu uvuabu bamuteleje. Bualu ebu ndilongesha dinene kutudi.

13. Mmunyi mutudi mua kuyisha bantu batudi tupetangana nabu bilondeshile nsombelu wabu?

¹³ Patudi tuteleja bantu ne dinanga, tudi tubashila mpunga wa kutuambilabu bua tshinyi badi dijinga ne Bukalenge bua Nzambi. Bidi bituambuluisha bua kubayisha bimpe. Pamuapa nukadi bamone ne: bamanyishi bimpe mbatu bamanye kuteleja bantu. (Nsu. 20:5) Batu baleja mudibu baditatshisha bua bantu badibu bapetangana nabu mu buambi. Kabatu anu bafunda mêna ne adrese ya bantu, kadi batu kabidi bafunda malu adi asankisha bantu abu ne majinga abu. Padi muntu wakula bua bualu kampanda budi bumutonde, batu benza makebulula ne bapingana ne lukasa bua kumuleja tshidibu bapete. Anu bu mupostolo Paulo, batu bayisha muntu yonso bilondeshile nsombelu wende. (Bala 1 Kolinto 9:19-23.) Kuditatshisha bua bantu nunku kudi kubakoka ku lumu luimpe ne kudi kuleja “mutshima wa luse wa Nzambi wetu.”​—Luka 1:78.

 Katuteketshi mu mikolo

14. Patudi tuyisha, mmunyi mutudi mua kuleja ngikadilu ya Yehowa?

¹⁴ Yehowa mmutuangate ne mushinga bualu mmutupeshe bukokeshi bua kudisunguila malu. Nansha mudiye Nzambi wa Bukole-Buonso, katu wenzeja muntu nansha umue bua kumuenzela mudimu, kadi udi ukoka bantu kudiye bua dinanga diende, ubenesha badi bitaba malu adiye mulongolole. (Lomo 2:4) Nunku dîba dionso ditudi tuyisha lumu luimpe, tudi ne bua kuluyisha mu mushindu udi mukumbanyine Nzambi wetu wa luse. (2 Kol. 5:20, 21; 6:3-6) Bua bualu ebu, katuena ne bua kuteketa mu mikolo patudi tuyisha bantu to. Ntshinyi tshidi mua kutuambuluisha?

15. (a) Yezu wakambila bayidi bende bua kuenza tshinyi padi bantu babenga kubateleja? (b) Ntshinyi tshidi mua kutuambuluisha bua kukeba anu bantu bimpe?

¹⁵ Yezu wakambila bayidi bende bua kubenga kuditatshisha bikole padi bamue bantu babenga lumu luimpe, kadi bua kukeba bantu badi bakumbane. (Bala Matayo 10:11-15.) Tuetu badifundile bipatshile bikese bikese, tudi mua kukumbaja bualu ebu. Muanetu mukuabu wakadifuanyikija ne muimbi wa or. Uvua ne tshibidilu tshia kuamba ne: “Ndi mutekemene bua kupeta mulungu wa or lelu eu.” Mukuabu pende uvua ne tshipatshila tshia “kupetangana ne muntu muimpe ne kumupinganyina panyima pa matuku makese.” Bamue bamanyishi batu badienzeja bua kubadila muntu yonso udibu bapetangana nende mvese nansha umue padiku mushindu. Ntshipatshila kayi tshiudi mua kudifundila wewe?

16. Bua tshinyi tudi ne bua kutungunuka ne kuyisha?

¹⁶ Katuena mua kuamba ne: tudi bayishe bimpe ku nzubu ne ku nzubu anu padi bantu batuteleja to. Mudimu wa kuyisha udi ne mushinga wa bungi bua bantu badi banange bulelela kusungidibua, kadi udi kabidi ne kipatshila kakuabu ka mushinga. Mudimu eu udi utupesha mushindu wa kuleja mutudi banange Yehowa. (1 Yone 5:3) Udi utuambuluisha bua kuepuka dibanza dia mashi. (Bien. 20:26, 27) Udi udimuija bantu babi ne: ‘Dîba dia dilumbuluisha dia Nzambi diakulua.’ (Buak. 14:6, 7) Kadi udi nangananga wambuluisha bua kutumbisha dîna dia Yehowa pa buloba bujima. (Mus. 113:3) Nunku, nansha bantu batuteleja anyi babenga kututeleja, tudi ne bua kutungunuka ne kuyisha Bukalenge bua Nzambi. Bionso bitudi tuenza bua kumanyisha lumu luimpe, mbimpe ku mêsu kua Yehowa.​—Lomo 10:13-15.

17. Bantu nebafike ku ditaba tshinyi?

¹⁷ Nansha mudi ba bungi kabayi bitaba patudi tubayisha lelu, nebamone mudimu wetu mushindu mukuabu mu matuku makese emu. (Mat. 24:37-39) Yehowa wakajadikila Yehezekele ne: pavuaye ne bua kunyoka bena Isalele bavua bamutombokele, bavua ne bua kumanya ne: ‘Muprofete uvua munkatshi muabu.’ (Yeh. 2:5) Bia muomumue, pabutula Nzambi bulongolodi bubi ebu, bantu nebafike ku ditaba ne: malu avua Bantemu ba Yehowa bayisha miaba ivua bantu ba bungi ne ku nzubu ne ku nzubu avua afumina kudi Yehowa Nzambi mulelela ne kuitaba kabidi ne: Bantemu bavua baleji mpala wa Yehowa. Tudi ne diakalenga dinene dia kuikala ne dîna diende ne kumanyisha malu ende mu tshikondo etshi tshikole. Tutungunukayi ne kutantamena ntatu itudi tupeta patudi tuyisha ku nzubu ne ku nzubu ne diambuluisha dia Nzambi.

Newandamune munyi?

• Mmunyi mutudi mua kukolesha mitshima yetu bua kuyisha?

• Ntshinyi tshiatuambuluisha bua kutuadija kuyukila ne bantu patudi tuyisha ku nzubu ne ku nzubu?

• Mmunyi mutudi mua kuleja ne: tudi tutabalela bantu?

• Ntshinyi tshidi mua kutuambuluisha bua kubenga kuteketa mu maboko patudi tuyisha bantu ba muaba utudi?

[Nkonko ya dilonga]

[Kazubu/​Tshimfuanyi mu dibeji 9]

Mua kutuadija kuyukila ne bantu malu a mu Bible

Bua kutuadija:

▪ Wewe mumane kuela muntu muoyo, udi mua kumupesha trakte ne kuamba ne: “Ndi ngenda nyukila ne bantu bualu bua mushinga ebu.”

▪ Peshi udi mua kumupesha trakte ne kuamba ne: “Ndi ngenda nyukila ne bantu mu tshikoso bualu ndi musue kumanya meji abu pa bualu ebu.”

Padi muntu witaba trakte:

▪ Diakamue muebeje tshidiye wela meji pa tshiena-bualu tshidi pa trakte.

▪ Teleja ne ntema bua umanye tshidi mu meji ende. Pashishe muele tuasakidila bua bidiye muambe.

Bua kutungunuka ne muyuki:

▪ Bala mvese nansha umue ne nuyukidilangana ne muntu bilondeshile malu adi amusankisha ne majinga ende.

▪ Padiye wanyisha binudi nuyukila nende, mupeshe mukanda ne padiku mushindu, umuleje mututu tulongesha bantu Bible. Numvuangane dituku dia wewe kualukila.