Malu manene a mu mukanda wa Yone
Dîyi dia Yehowa didi ne muoyo
Malu manene a mu mukanda wa Yone
YONE, “muyidi wakadi Yezu munange” ke muntu wa ndekelu uvua mufunda malu a mu nsombelu wa Kristo ne a mudimu wende. (Yone 21:20) Wakafunda mukanda eu pabuipi ne 98 panyima pa Yezu ne udi wambulula anu malu makese adi mu Evanjeliyo mikuabu isatu.
Mupostolo Yone wakafunda mukanda eu ne tshipatshila tshisunguluke. Udi wamba bua malu avuaye mufunde ne: ‘Malu aa adi mafundibue bua nuenu nuitabuje ne: Yezu udi Kristo, Muana wa Nzambi; ne bua nuenu nuikale ne muoyo mu dîna diende, panuitabuja.’ (Yone 20:31) Malu adimu adi ne mushinga wa bungi kutudi.—Eb. 4:12.
‘TANGILAYI MUANA WA MUKOKO WA NZAMBI’
Pavua Yone Mubatiji mumone Yezu wakamba ne dishindika dionso ne: ‘Tangilayi, Muana wa mukoko wa Nzambi, udi umusha bubi bua ba pa buloba!’ (Yone 1:29) Pavua Yezu wenza ngendu mu Samalea, Galela, Yudaya ne mu miaba mikuabu ya ku Est kua musulu wa Yadene wenda uyisha, ulongesha ne wenza malu a kukema, bantu ‘ba bungi bakalua kudiye ne bakamuitabuja.’—Yone 10:41, 42.
Tshimue tshia ku bishima binene bivua Yezu muenze tshivua tshia kubisha Lazalo ku lufu. Bantu ba bungi bakitabuja Yezu pakamonabu muntu ukavua mufue kukavua matuku anayi ubika. Kadi bakuidi banene ne Bafalese bakela tshifufu bua kushipa Yezu. Ke bualu kayi Yezu wakumuka ne kuyaye ‘mu luseke luakadi pepi ne tshipela, ku musoko dîna diawu Efelayima.’—Yone 11:53, 54.
Mandamuna a nkonko ya mu Bible:
1:35, 40—Pa kumbusha Andele, mmuyidi kayi mukuabu uvua muimane ku luseke lua Yone Mubatiji? Mufundi wa mukanda wa Yone udi ubikila Yone Mubatiji anu ne: “Yone” patupu ne kena uditela mu dîna diende mu mukanda eu to. Nunku, bidi bimueneka ne: muyidi udibu kabayi batele mmufundi wa mukanda wa Yone.
2:20—Ntempelo kayi ‘uvuabu bibake mu bidimu makumi anayi ne bisambombo’? Bena Yuda bavua bakula bua ntempelo wa Zelubabela uvuabu bibakulule kudi mukalenge Helode wa mu Yudaya. Bilondeshile mufundi wa malu a kale Josèphe, bakatuadija kuibaka ntempelo eu mu tshidimu tshia 18 tshia bukokeshi bua Helode anyi mu tshidimu tshia 18 anyi tshia 17 kumpala kua Yezu. Ntempelo ne nzubu minene ivua kumpenga kuende bavua bayibake mu bidimu muanda mukulu. Kadi midimu ya kuibaka nzubu mikuabu yakatungunuka too ne panyima pa Pasaka wa mu 30 panyima pa Yezu, dîba divua bena Yuda bamba ne: bavua bamuibake mu bidimu 46.
5:14—Padi muntu usama, mmumue ne: mmuenze bubi anyi? Kabiena anu nanku to. Muntu uvua Yezu muondope au uvua musame munkatshi mua bidimu 38 bua bubi buvuaye mupiane. (Yone 5:1-9) Tshivua Yezu musue kuamba mpindieu tshivua tshia ne: bavua bafuile muntu au luse ne uvua ne bua kulonda njila wa lupandu ne kubenga kuenza bubi ku bukole tshianana uvua mua kupeta diakabi dinene kupita disama. Muntu au uvua mua kuenza bubi buvua kabuyi mua kufuidibua luse buvua mua kumufikisha ku lufu lua kashidi.—Mat. 12:31, 32; Luka 12:10; Eb. 10:26, 27.
5:24, 25—Mbanganyi badi ‘bumuka mu lufu, babuela mu muoyo’? Yezu uvua wakula bua bantu bavua bafue mu nyuma kadi balue kumuitabuja ne balekele malu abu mabi panyima pa bobu bamane kumvua dîyi diende. ‘Mbumuke mu lufu, babuele mu muoyo’ mu ngumvuilu wa se: mbabumbushile tshibawu tshia lufu ne badi ne ditekemena dia kupeta muoyo wa kashidi bualu mbitabuje Nzambi.—1 Pet. 4:3-6.
5:26; 6:53—Kuikala ne “muoyo munda” kudi kumvuija tshinyi? Bua Yezu Kristo, bidi biumvuija ne: Nzambi uvua mumupeshe bukokeshi bua kuenza malu abidi aa: kupetesha bantu mushindu wa kulengeja malanda abu ne Yehowa ne wa kupesha bantu muoyo pa kubabisha ku lufu. Bua bayidi ba Yezu, ‘kuikala ne muoyo munda muabu,’ nkupeta muoyo wa tshiendelele. Bena Kristo bela manyi badi bapeta muoyo eu padibu babishibua ku lufu bua kupeta muoyo mu diulu. Bena Kristo badi ne ditekemena dia kusomba pa buloba, nebapete muoyo wa tshiendelele anu panyima pa diteta dia ndekelu dikala ne bua kuenzeka ku ndekelu kua bukokeshi bua Bidimu Tshinunu bua Kristo.—1 Kol. 15:52, 53; Buak. 20:5, 7-10.
6:64—Dîba divua Yezu musungule Yudasa Isakaliote, uvuaku mumanye ne: yeye ke uvua ne bua kumutungila anyi? Bidi bimueneka ne: kabivua nanku to. Kadi dituku dikuabu mu 32, Yezu wakambila bayidi bende ne: ‘Umue wenu udi wa Diabolo.’ Bidi bimueneka ne: dîba adi ke diakamona Yezu mbangilu wa malu mabi munda mua Yudasa Isakaliote.—Yone 6:66-71.
Malongesha adi atutangila:
2:4. Yezu wakambila Mariya ne: bu muvuaye Muana wa Nzambi mutambule ne muela manyi, uvua ne bua kulonda anu tshivua Tatuende wa mu diulu umuambila. Nansha mutshivua Yezu anu ku ntuadijilu kua mudimu wende, uvua mumanye dîba dia kuenza mudimu wende too ne dia lufu luende. Nansha balela bende bu mudi mamuende Mariya kabavua mua kumuambila tshia kuenza bua kukumbaja disua dia Nzambi to. Tuetu petu tudi ne bua kuenzela Nzambi mudimu ne dipangadika dia muomumue.
3:1-9. Tshilejilu tshia Nikodemo mfumu kampanda wa bena Yuda tshidi tshitulongesha malu abidi. Bua kumpala, Nikodemo wakaleja ne: uvua udipuekesha, uvua ne meji ne uvua mujingulule muvuaye dijinga ne kumanya malu a Nzambi bualu wakitaba ne: muana wa muena mabaya mupuekele uvua mulongeshi uvua Nzambi mutume. Lelu bena Kristo badi pabu ne bua kudipuekesha. Bualu buibidi, Nikodemo wakabenga bua kulua muyidi patshivua Yezu pa buloba, pamuapa bualu uvua utshina bantu, uvua mulamate bikole ku muanzu uvuaye nawu ne bubanji buende. Tshilejilu tshia Nikodemo tshidi tshituleja ne: Katuena ne bua kulekela malu a nunku atupangisha bua tuetu ‘kutuala mutshi wetu wa makenga ku dituku ku dituku ne kulonda Yezu’ to.—Luka 9:23.
4:23, 24. Bua Nzambi kuitabaye ntendelelu wetu, udi ne bua kuikala umvuangana ne bulelela budi mu Bible ne tudi ne bua kuitaba bua nyuma wende atulombole.
6:27. Kuenza mudimu bua ‘biakudia bitu bishala too ne ku muoyo wa tshiendelele’ nkudienzeja bua kukumbaja majinga etu a kumanya Nzambi. Tuetu tuenza nunku, tudi ba diakalenga.—Mat. 5:3.
6:44. Yehowa udi ututabalela yeye nkayende. Udi utukoka kudi Muanende ku diambuluisha dia mudimu wa kuyisha ne pa kutuambuluisha ne nyuma wende bua kumvua bulelela ne kubutumikila.
11:33-36. Kuleja mutudi tudiumvua ki nditebelela to.
‘WEWE UMULONDE’
Yezu wakapingana mu Betania pabuipi ne Pasaka wa mu 33. Mu dia 9 a ngondo wa Nisana, wakalua mu Yelushalema mubande pa kana ka mpunda. Mu dia 10, Yezu wakalua kabidi ku ntempelo. Bua kuandamuna ku disambila diende bua dîna dia Tatuende ditumbishibue, dîyi didi difuma mu diulu diamba ne: ‘Ngakaditumbisha, nenditumbishe kabidi.’—Yone 12:28.
Padibu munkatshi mua didia Pasaka, Yezu udi upesha bayidi bende mibelu ya ndekelu ne usambila bua bualu buabu. Bobu bamane kumukuata, bamulumbuluishe ne bamupopele ku mutshi, Yezu wakabika ku lufu.
Mandamuna a nkonko ya mu Bible:
14:2—Mmunyi muvua Yezu mua ‘kulongoluela’ bayidi bende “muaba” mu diulu? Bivua bilomba bua ne: Yezu ajadike tshipungidi tshipiatshipia pavuaye ne bua kumueneka kumpala kua Nzambi ne kumupesha mushinga wa mashi ende. Kulongolola muaba kuvua kabidi kulomba bua Yezu apete bukalenge ne pashishe dibika dia bayidi bende bela manyi bua kuya mu diulu divua ne bua kutuadija.—1 Tes. 4:14-17; Eb. 9:12, 24-28; 1 Pet. 1:19; Buak. 11:15.
19:11. Yezu uvua wakula bua Yudasa Isakaliote pakambilaye Pilato bua muntu uvua mumufile mu bianza biende anyi? Pamutu pa kuakula bua Yudasa anyi bua muntu mukuabu musunguluke, bidi bimueneka ne: Yezu uvua mua kuikala wakula bua bantu bonso bavua babuelakane mu tshilumbu tshia lufu luende. Munkatshi muabu muvua Yudasa, “bakuidi banene ne balumbuludi bonso,” too ne “bisumbu bia bantu” bivua bilomba bua balekele Balaba.—Mat. 26:59-65; 27:1, 2, 20-22.
20:17—Bua tshinyi Yezu wakambila Mariya wa ku Magadala bua kamulengi? Bidi bimueneka ne: Mariya uvua ukuata Yezu bualu uvua wela meji ne: ukavua ukeba kubanda mu diulu ne kavua mua kumumona kabidi to. Bua kumujadikila ne: kavua ne bua kubanda mu diulu mpindieu, Yezu wakamuambila bua kamukuatshi kadi aye kuambila bayidi bende lumu lua dibika diende.
Malongesha adi atutangila:
12:36. Bua kulua “bana ba munya,” anyi bantu badi batuala butoke, tudi ne bua kupeta dimanya dijalame dia Dîyi dia Nzambi. Pashishe tudi ne bua kuambuluisha bantu ne dimanya edi bua bapatuke mu mîdima ne balue ku butoke bua Nzambi.
14:6. Bua Nzambi kutuanyishaye, tudi ne bua kupitshila anu kudi Yezu Kristo. Bua tuetu kusemena pabuipi ne Yehowa, tudi ne bua kuitabuja Yezu ne kulonda tshilejilu tshiende.—1 Pet. 2:21.
14:15, 21, 23, 24; 15:10. Kuenza disua dia Nzambi nekutuambuluishe bua kushala mu dinanga diende ne dia Muanende.—1 Yone 5:3.
14:26; 16:13. Nyuma muimpe wa Yehowa udi utulongesha ne utuvuluija malu atukadi balonge. Udi kabidi wambuluisha bua kuleja bulelela patoke. Nunku, udi mua kutuambuluisha bua kuvudija dimanya dietu, meji ne dijingulula dia mianda. Ke bualu kayi tudi ne bua kunanukila mu masambila bua kulomba nangananga nyuma eu.—Luka 11:5-13.
21:15, 19. Yezu wakebeja Petelo bua kumanya ni uvua mumunange kupita mishipa ivua kumpala kuabu. Nunku Yezu wakaleja ne: Petelo uvua ne bua kusungula bua kumulonda dîba dionso pamutu pa kutungunuka ne mudimu wa diloba. Tuetu bamane kukonkonona malu onso adi mu mukanda eu, tudisuikayi bikole bua kunanga Yezu kupita tshintu tshikuabu tshionso tshidi mua kuikala tshitusankisha. Eyowa, tutungunuke ne kumulonda ne muoyo wetu mujima.
[Tshimfuanyi mu dibeji 31]
Tshilejilu tshia Nikodemo tshidi tshitulongesha tshinyi?