Utu umona bakuabu mutu Yehowa ubamona anyi?

‘Mu mubidi kamuikadi ditapuluka bua bitupa biambuluishangane muomumue.’​—1 KOL. 12:25.

1. Uvua mumvue munyi pauvua mudisangishe ne batendeledi ba Yehowa bua musangu wa kumpala?

PATUVUA bapatuke mu bulongolodi bubi ebu ne babuele bua musangu wa kumpala mu bisangilu bia batendeledi ba Yehowa, tuvua ne disanka dia kumona muvuabu banangangane ne muvuabu bambuluishangana. Kadi munkatshi mua bantu badi Satana ulombola mudi bantu babi badi ne mukawu ne dikokangana! Tudi mu ditalala ne buobumue benza anu bu badi mu mparadizu.​—Yesh. 48:17, 18; 60:18; 65:25.

2. (a) Tshidi mua kunyanga mutudi tumona bakuabu ntshinyi? (b) Tudi ne bua kuenza tshinyi?

² Kadi padi matuku enda apita, tudi mua kubanga kumona amu bilema bia bena Kristo netu. Bu mutudi tuetu bonso benji ba malu mabi, tudi mua kubanga kumona amu bilema bia bana betu pamutu pa kumona ngikadilu yabu mimpe. Mbuena kuamba ne: katutu tubamona mutu Yehowa ubamona to. Tuetu tumona bana betu bibi nunku, mbimpe tuditatshishe bua kubamona mudi Yehowa ubamona.​—Ekes. 33:13.

Mutu Yehowa umona bena Kristo netu

3. Bible udi ufuanyikija tshisumbu tshia bena Kristo ne tshinyi?

³ Mu 1 Kolinto 12:2-26 Paulo udi ufuanyikija tshisumbu tshia bena Kristo bela manyi ne mubidi wa muntu udi ne ‘bitupa bia bungi.’ Anu bu mudi bitupa bia mubidi bionso kabiyi mushindu umue, bena mu tshisumbu kabatu ne ngikadilu imue anyi  mamanya amue to, mbashilangane be! Kadi Yehowa mmusue mudibu bashilangane amu. Mmunange muntu yonso, udi umutua kabidi mushinga. Ke bualu kayi, Paulo udi utupesha mubelu wamba ne: tuetu bena mu tshisumbu tudi ne bua ‘kuambuluishangana muomumue.’ Ki mbualu butekete to, bualu bamue mbashilangane netu.

4. Mbimpe tuetu kushintulula mushindu utudi tumona bana betu bua tshinyi?

⁴ Tudi mua kushindamena imue misangu pa bilema bia muena Kristo netu. Kuenza nunku, kudi anu bu kuikala ne foto wa muanetu eu, kadi tukenketa anu katupa kakese ka tshimfuanyi tshiende. Kadi mushindu udi Yehowa umona bana betu udi muimpe, bualu udi utangila muntu mu kabujima kende. Tuetu tudi mua kutangila anu tshitupa tshitudi katuyi basue, kadi Yehowa utu utangila muntu mujima pamue ne ngikadilu yende mimpe yonso. Tuetu tuditatshisha bua kuidikija Yehowa, nekuikale dinanga ne buobumue mu tshisumbu.​—Ef. 4:1-3; 5:1, 2.

5. Bua tshinyi ki mbimpe kulumbuluisha bakuabu?

⁵ Yezu wakaleja bimpe ne: bantu batu basue kulumbuluisha bakuabu. Ke bua tshinyi wakatupesha mubelu eu: ‘Kanulumbuludi malu adi munda mua bantu bakuabu, nunku bobu kabena balumbulula malu adi munda muenu.’ (Mat. 7:1) Mu tshiena Greke, Yezu kavua muambe ne: ‘Kunulumbuludi malu’ to, kadi uvua muambe ne: ‘Lekelayi kulumbuluisha.’ Bualu uvua mumanye ne: bantu ba bungi bavua bamuteleja bavua ne tshilele tshia kulumbuluisha bakuabu. Imue misangu tutu petu ne tshilele etshi anyi? Tuetu natshi, tuenzayi muetu muonso bua kutshilekela, bua tshianana nebatulumbuluishe petu. Tudi banganyi bua kupepeja muanetu udi Yehowa mupeshe bujitu anyi kuamba ne: muanetu kampanda ki mmukumbanyine kuikala mu bulongolodi bua Yehowa to! Eyowa, muanetu udi mua kuikala ne bilema kampanda, kadi patshidi Yehowa mumulekele mu bulongolodi buende, mbimpe tuetu kufiika munda anyi? (Yone 6:44) Tudiku bavuluke ne: Yehowa udi ulombola bulongolodi buende ne bu bikalaku malu a kushintulula yeye nkayende neashintulule malu au pakumbana dîba anyi?​—Bala Lomo 14:1-4.

6. Mmunyi mudi Yehowa umona bantu bende?

⁶ Bualu budi butusankisha budi ne: Yehowa udi mua kumona ngikadilu milenga ya muena Kristo yonso idi mua kumuvuija muntu muakane mu bulongolodi bupiabupia. Udi kabidi mumanye mukadiye mudifile bua kutumikala malu a mu Bible atudi balonge. Ke bualu kayi katu wimanyina anu pa butekete bua mubidi wa muntu to. Musambu 103:12 udi wamba ne: “Bu mudi luseke lua esete kule ku wesete, mbu mudiye mumushe matombokela etu kule kutudi.” Ndisankapu kayi ditudi nadi bua bualu ebu!​—Mus. 130:3.

7. Mushindu uvua Yehowa umona Davidi udi utulongesha tshinyi?

⁷ Ku diambuluisha dia Bible tudi tumanya mudi Yehowa ne bukokeshi bua kumona malu mimpe adi munda mua muntu. Tshilejilu, Nzambi wakamba bua Davidi ne: ‘Muntu wanyi Davidi, wakatumikala mikenji yanyi, wakandonda ne mutshima wende wonso,  bua kuenza anu malu akadi mimpe ku mêsu kuanyi.’ (1 Bak. 14:8) Bushuwa, Tudi bamanye bimpe ne: Davidi wakenza amue malu mabi. Kadi Yehowa wakajinga bua kuimanyina anu pa malu mimpe bualu uvua mumanye ne: mutshima wa Davidi uvua muakane.​—1 Kul. 29:17.

Mona bena Kristo nebe mudi Yehowa ubamona

8, 9. (a) Tudi mua kufuanangana ne Yehowa mu mushindu kayi? (b) Filabi tshilejilu. Ndilongesha kayi diudi upeta?

⁸ Yehowa udi mua kumanya malu adi munda mua muntu, kadi tuetu katuena mua kumanya to. Bualu ebu budi butusaka bua kubenga kulumbuluisha bakuabu. Katuena mua kumanya meji onso adi mu mutshima wa muntu nansha. Tudi ne bua kuidikija Yehowa pa kubenga kuimanyina pa bilema bia muntu bikala mua kujika dikuabu dituku. Ki mbimpe bua kuenza mushindu wonso bua kuidikija Yehowa mu bualu ebu anyi? Patudi katuyi tutangila anu bilema bia bana betu, nebituambuluishe bua kuikala nabu mu ditalala.​—Ef. 4:23, 24.

⁹ Tuangatebi tshilejilu tshia nzubu ukadi munyanguke bikole: malata adi ne masoso, madidishi mmakosekangane ne plafon anyi tshisasa ntshinyanguke. Bantu ba bungi badi mua kuamba ne: nzubu eu mmunyanguke yonso, mmubi be! Kadi mukuabu muntu udi mua kumona yeye nzubu eu mushindu mukuabu. Udi mua kumona ne: bimanu bitshidi bimpe, bidi bikengela kulongolola nzubu eu. Udi usumba nzubu eu ne ulongolola bintu bivua binyanguke ne nzubu upingane muende ne kale. Mpindieu, bapitshi ba njila badi banyisha nzubu eu ne bamba mudiye mulue muimpe. Tudiku mua kuikala bu muntu eu uvua muenze mudimu bua kulongolola nzubu anyi? Patudi tutangila bana betu, tudiku mua kumona ngikadilu yabu mimpe ne kutekemena ne: nebalekele ngikadilu yabu mibi anyi? Tuetu tuenza nanku, netunange bana betu bua ngikadilu yabu mimpe anu mudi Yehowa mubanange.​—Bala Ebelu 6:10.

10. Mmunyi mudi mibelu idi mu Filipoi 2:3, 4 ituambuluisha?

¹⁰ Mupostolo Paulo wakafila mibelu idi mua kua kutuambuluisha bua kupetangana ne bantu bonso mu tshisumbu. Wakapesha bena Kristo mubelu eu: ‘Kanuenji muanda bua ditapuluka anyi bua kuditumbisha kua patupu; kadi mu mitshima mipuekele muntu ne muntu abale mukuabu bu muntu udi umutamba yeye buimpe. Muntu ne muntu katangidi malu ende nkayawu, kadi muntu ne muntu atangile kabidi malu a bakuabu.’ (Filip. 2:3, 4) Didipuekesha nedituambuluishe bua kuanyisha bakuabu. Kutangila malu a bakuabu ne kumona ngikadilu yabu mimpe nekutuambuluishe bua kubamona mudi Yehowa ubamona.

11. Ngamue malu kayi adi enzeka mu bimue bisumbu?

¹¹ Mu matuku adi panshi aa, bantu ba bungi badi bumbuka mu matunga abu bua kuya kusomba mu makuabu. Mu bimue bimenga lelu eu mudi bantu badi bafume mu matunga mashilangane. Imue misangu, bamue ba ku bantu aba badi basombele miaba itudi mbasue bulelela ne badi batendelela netu pamue Yehowa. Bantu aba mba ‘mu ditunga dionso, ne munkatshi mua bisamba bionso, ne bantu bonso ne miaku yonso.’ (Buak. 7:9) Ke bualu kayi mu bisumbu bietu bia bungi mudi bantu ba mishindu yonso.

12. Mmuenenu kayi utudi ne bua kuikala nende bua bakuabu? Bua tshinyi bitu bikole imue misangu?

¹² Ke bua tshinyi tudi ne bua kuenza muetu muonso bua kuikala ne mmuenenu muimpe bua bakuabu mu tshisumbu tshietu. Nenku, mupostolo Petelo udi utuvuluija bua kuikala ‘ne dinanga dia bana betu ba mu Kristo didi kadiyi ne lubombo’ ne bua ‘kunangangana mu mitshima yetu bikole.’ (1 Pet. 1:22) Kuikala ne dinanga dilelela kudi mua kuikala bualu bukole mu tshisumbu tshidi ne bantu ba matunga mashilangane. Bibidilu bia batendeledi netu bidi mua kuikala bishilangane ne bietu bilondeshile miaba itudi bafumine, bisamba bietu, nkoleshilu itudi bapete, bungi bua makuta atudi nawu. Mbikukolele  bua kuanyisha bilele bia batendeledi nebe anyi? Bidi mua kuikala bibakolele pabu bua kuanyisha bilele bia kuenu. Nansha nanku, Bible udi utulomba tuetu bonso bua ‘kunanga bana betu ba mu Kristo.’​—1 Pet. 2:17.

13. Nngelelu wa meji kayi utudi mua kushintulula?

¹³ Mbimpe tuetu kushintulula ngelelu wetu wa meji bua kumona mua kuvudija dinanga dietu bua bana betu bonso. (Bala 2 Kolinto 6:12, 13.) Kabitu bianji kukufikila bua kudiambila ne: “Meme wa bende tshitu ne kansungasunga, kadi . . . ” pashishe tuvuluka imue ngikadilu mibi itudi tumona kudi bantu ba tshisamba kampanda, anyi? Meji a mushindu eu adi aleja ne: tudi ne bua kumbusha kansungasunga kadi mu mutshima wetu. Nunku udiebeje ne: ‘Ntu ngenza muanyi muonso bua kumanya bantu badi ne bibidilu bishilangane ne bianyi anyi?’ Didikonkonona dia mushindu eu didi dituambuluisha bua kunanga bimpe bana betu ba pa buloba bujima.

14, 15. (a) Fila bilejilu bia bantu bavua bashintulule mmuenenu wabu bua bakuabu. (b) Mmunyi mutudi mua kubidikija?

¹⁴ Bible udi ututelela bilejilu bia bantu bavua bashintulule mmuenenu wabu bua bantu ba bisamba bikuabu. Tudi ne tshilejilu tshia mupostolo Petelo. Bu muvua Petelo muena Yuda, kavua musue kubuela mu nzubu mua muntu wa bisamba bia bende to. Kadi elabi meji mushindu uvuaye mua kuikala mudiumvue pakamulombabu bua kuya kua Kônelio, muntu wa bisamba bia bende, uvua kayi mutengula! Petelo wakashintulula mmuenenu wende, kumonaye ne: Nzambi uvua musue bua bantu ba bisamba bionso babuele mu tshisumbu tshia bena Kristo. (Bien. 10:9-35) Tudi kabidi ne tshilejilu tshia Shaula wakaluabu kubikila ne: mupostolo Paulo, wakashintuluka, kulekelaye kansungasunga. Wakaleja muvuaye mukine bena Kristo bikole, wamba ne: ‘Ngakatamba kukengesha bena ekeleziya wa Nzambi ne ngakababutula.’ Kadi pavua Mukalenge Yezu mubikile Paulo, wakashintuluka bikole ne kutuadija kuitaba dîyi divua difumina kudi bavuaye ukengesha kumpala.​—Gal. 1:13-20.

¹⁵ Nyuma wa Yehowa neatuambuluishe bua tuetu kushintulula mushindu utudi tumona bakuabu. Tuetu bamone ne: tutshidi ne ndambu wa kansungasunga, tuditatshishe bua kukalekela bua ‘kulama buobumue buetu bua mu nyuma muimpe mu tshisuikidi tshia ditalala.’ (Ef. 4:3-6) Bible udi utulomba bua ‘kuluata dinanga, didi tshisuikidi tshia malu onso a buakane buonso.’​—Kolos. 3:14.

Tuidikijayi Yehowa patudi tuyisha

16. Disua dia Nzambi bua bantu didi tshinyi?

¹⁶ Mupostolo Paulo wakamba ne: ‘Kakuena  kansungansunga’ kudi Nzambi. (Lomo 2:11) Yehowa mmusue bua bantu ba bisamba bionso babuele mu ntendelelu wende. (Bala 1 Timote 2:3, 4.) Mu matuku aa a ku nshikidilu, mmulongolole bua ‘ditunga dionso ne tshisamba tshionso ne muaku wonso ne bantu bonso’ bumvue “lumu luimpe lua tshiendelele.” (Buak. 14:6) Yezu wakamba ne: ‘Budimi budi bantu ba pa buloba.’ (Mat. 13:38) Bualu ebu budi ne mushinga kayi kuudi ne kudi bena mu dîku dienu?

17. Mmunyi mutudi mua kuambuluisha bantu ba mishindu yonso?

¹⁷ Ki mbantu bonso badi mua kuyisha bakuabu mukenji wa Bukalenge bua Nzambi to. Kadi tuetu tudi mua kuyisha bantu bonso ba muaba utudi mukenji eu. Tudiku tukeba bua kuyisha bantu ba mishindu yonso, pamue ne batutu ne tshibidilu tshia kuyisha anyi? Bua tshinyi kubenga kukeba bua kuyisha bantu batubu kabayi banji kuyisha bikole?​—Lomo 15:20, 21.

18. Yezu uvua musue kuenzela bantu tshinyi?

¹⁸ Yezu uvua ne dijinga dikole dia kuambuluisha bantu bonso. Kakayisha anu muaba umue to. Tshilejilu, Bible udi wamba ne: Yezu ‘wakendakana mu bimenga bionso ne mu misoko mikese yonso; kadi pakatangilaye bisumbu bia bantu, wakadi nabu luse’ ne kukebaye mua kubambuluisha.​—Mat. 9:35-37.

19, 20. Leja imue mishindu itudi mua kuidikija Yehowa ne Yezu mudibu banange bantu bonso?

¹⁹ Ngimue mishindu kayi yudi pebe mua kuleja muoyo wa buena wa Yezu eu? Bamue mbasungule bua kuyisha miaba itu bana betu kabayi batamba kuyisha to. Mmiaba bu mudi ya disumbishila bintu, itubu balamina nyama, itu mashinyi imanyina anyi miaba itubu kabayi batamba kuitabila bantu bua kubuela. Bakuabu badi balonga muakulu mukuabu bua kuyisha bantu bapiabapia badi balue mu teritware wabu anyi batu bana betu kabayi batamba kuyisha to. Kulonga mua kuela bantu aba muoyo mu muakulu wabu nkuleja ne: udi mubanange bikole. Kadi bituikala katuyi ne mushindu wa kulonga muakulu eu, katuenaku mua kuela bana betu badi baulonga kalumbandi anyi? Nanku ki mbimpe kumvua bibi anyi kupepeja bamue bana betu batu bakeba kuyisha bena ditunga dikuabu to. Nzambi mmunange bantu bonso ba pa buloba, tuetu petu tudi ne bua kubananga.​—Kolos. 3:10, 11.

²⁰ Tuetu tumona bantu mudi Yehowa ubamona, netuyishe bantu bonso, nansha bobu bikale ba mushindu kayi. Tshilejilu, bamue kabena mua kuikala ne nzubu, badi ne manyanu anyi badi ne nsombelu mubi. Nansha bamue bantu bobu batuenzela bibi, katuena mua kukina bena ditunga diabu anyi bena tshisamba tshiabu bonso. Tshilejilu, nansha muakakengeshabu Paulo kudi bantu kampanda, uvua amu uyisha bantu ba kuabu. (Bien. 14:5-7, 19-22) Uvua mumanye ne: bamue bavua mua kuitaba bulelela.

21. Kumona bakuabu bu mudi Yehowa ubamona nekukuambuluishe munyi?

²¹ Tudi bamone bimpe ne: tudi ne bua kuikala bu Yehowa, tunanga bena Kristo ba mu musoko wetu ne ba pa buloba bujima ne bantu batudi tuyisha kabidi. Patudi tumona bantu mudi Yehowa ubamona, netubueje ditalala ne buobumue munkatshi mua bena Kristo. Nunku, netuambuluishe bantu bua kunangabu Yehowa, bualu n’Nzambi ‘udi kayi usunguluja bantu,’ udi munange bantu bonso, “bualu bonso badi amu mudimu wa ku bianza biende.”​—Yobo 34:19, MMM.

Udi mua kuandamuna anyi?

• Mmunyi mutudi katuyi ne bua kumona bena Kristo netu?

• Mmunyi mutudi mua kumona bena Kristo netu bu mudi Yehowa ubamona?

• Udi mupete malongesha kayi bua mushindu uudi ne bua kumona bena Kristo nebe badi pa buloba bujima?

• Patudi mu buambi, mmunyi mutudi mua kumona bantu anu bu mudi Yehowa ubamona?

[Nkonko ya dilonga]

[Tshimfuanyi mu dibeji 26]

Neufike ku dimanya bantu ba bisamba bikuabu munyi?

[Tshimfuanyi mu dibeji 28]

Newenze tshinyi bua kuyisha bantu ba bungi?