Tuidikije Misionere mutambe bunene

‘Nuikale bidikiji banyi, bu mundi meme kabidi muidikiji wa Kristo.’​—1 KOL. 11:1.

1. Bua tshinyi tudi ne bua kuidikija Yezu Kristo?

MUPOSTOLO Paulo wakidikija Yezu Kristo, Misionere mutambe bunene. Paulo wakabela pende bena Kristo nende ne: ‘Nuikale bidikiji banyi, bu mundi meme kabidi muidikiji wa Kristo.’ (1 Kol. 11:1) Panyima pa Yezu mumane kupesha bapostolo bende tshilejilu tshia mushindu wa kudipuekesha pakabuoweshaye mâyi ku makasa, wakabambila ne: ‘Ngakunupa tshifuanyikiji etshi bua nuenu kuenza bu mungakunuenzela.’ (Yone 13:12-15) Tuetu bena Kristo tudi ne bua kuidikija Yezu Kristo mu mêyi etu ne mu bienzedi bietu ne mu ngikadilu itudi tuleja.​—1 Pet. 2:21.

2. Nansha Kasumbu Kaludiki kakayi kakutume bua kuikala misionere, ndungenyi kayi luudi mua kuikala nalu?

² Mu tshiena-bualu tshishale, tuvua balonge ne: misionere mmuntu udibu batuma bua kuyisha bantu bakuabu lumu luimpe. Bua muanda eu Paulo wakela imue nkonko mimpe. (Bala Lomo 10:11-15.) Tangila lumue lua ku nkonko eyi: ‘Mmunyi mumvuabu lumu luende kabayi ne mubambidi.’ Pashishe wakatela mêyi a muprofete Yeshaya a ne: ‘Mona makasa a muntu udi ulua ne lumu luimpe bu mudiwu malengele!’ (Yesh. 52:7) Nansha bobu kabayi bakutume bua kuikala misionere muaba mukuabu, udi mua kuikala ne lungenyi lua kuyisha lumu luimpe ne tshisumi bua kuidikija Yezu. Tshidimu tshishale, bamanyishi ba Bukalenge 6 957 852 bavua ‘benze mudimu wa dilongesha’ lumu luimpe mu matunga 236.​—2 Tim. 4:5, MMM.

‘Tuakushiya malu etu onso, tuakukulonda’

3, 4. Mmalu kayi avua Yezu mushiye mu diulu, ne ntshinyi tshitudi ne bua kuenza bua kuikala bayidi bende?

³ Bua Yezu kukumbajaye mudimu uvuabu bamutumine  pa buloba, ‘wakadiumushila bimanyinu bia butumbi buende, wakangata mubidi wa mupika,’ yeye kushiya muoyo uvuaye nawu mu diulu ne butumbi buvuaye nabu. (Filip. 2:7) Katuena mua kufuanyikija malu onso atudi tuenza bua kuidikija Kristo ne avuaye yeye muenze pakaluaye pa buloba to. Kadi tuetu bayidi bende tuikale bashindame, katuyi tunyingalala bua bintu bitudi bashiye mu bukua panu bua Satana.​—1 Yone 5:19.

⁴ Umue musangu mupostolo Petelo wakambila Yezu ne: ‘Tuetu, tuakushiya malu etu onso, tuakukulonda.’ (Mat. 19:27) Petelo, Andele, Yakobo ne Yone bakalekela lukasa makondo abu pakababikila Yezu bua kumulondabu. Bakalekela mudimu wabu wa diloba ne kuvuijabu diyisha mudimu wabu munene. Bilondeshile muyuki udi mu Evanjeliyo wa Luka, Petelo wakamba ne: ‘Tuetu tuakushiya bintu bietu, tuakukulonda.’ (Luka 18:28) Bavule ba munkatshi muetu kabavua bashiye ‘bintu biabu’ bionso bua kulonda Yezu to. Kadi ‘tuakadipidia’ bua kulua bayidi ba Kristo ne bua kubanga kuenzela Yehowa mudimu ne muoyo mujima. (Mat. 16:24) Kuenza bualu ebu nkutupeteshe mabenesha a bungi. (Bala Matayo 19:29.) Kuyisha ne tshisumi bua kuidikija Kristo kudi kutupetesha disanka, nangananga bituikala tuvua bambuluishe muntu nansha kakese bua kusemenaye pabuipi ne Nzambi ne Muanende.

5. Londa bualu budi buleja tshidi muntu udi mu ditunga dienyi mua kuenza padiye umanya bulelela.

⁵ Valmir mmuena mu ditunga dia Brésil uvua musombele mu ditunga dia Suriname muvuaye umbula ngolo. Uvua kanuayi ne muenzavi. Musangu mukuabu pavuaye mu tshimenga kampanda, Bantemu ba Yehowa bakatuadija kumulongesha Bible. Uvua ulonga dituku dionso, kushintulukaye bikole ne yeye kutambula panyima pa matuku makese. Pakamonaye ne: mudimu wende uvua umupangisha bua kutumikila malu a mu Bible avuaye ulonga, wakasumbisha bintu biende bia mudimu ne kupinganaye mu Brésil bua kulongesha bena mu dîku diabu bulelela. Padi bantu badi baye kusombela mu matunga makuabu bamanya bulelela, ba bungi batu balekela midimu idibu benza mu matunga mabanji ne bapingana kuabu bua kuambuluisha balela babu ne bantu bakuabu bua kudiabu malanda ne Yehowa. Bamanyishi ba Bukalenge aba badi baleja mudibu ne tshisumi tshia kuyisha lumu luimpe.

6. Ntshinyi tshitudi mua kuenza bituikala katuyi ne mushindu wa kuya muaba udibu dijinga ne bamanyishi ba Bukalenge?

⁶ Bantemu ba Yehowa ba bungi bakadi baye miaba idibu bakeba bamanyishi ba Bukalenge. Bamue mene batu baya mu  matunga makuabu. Pamuapa katuena ne mushindu wa kuya muaba mukuabu to, kadi tudi mua kuidikija Yezu pa kuyisha ne bukole buetu buonso.

Yehowa udi utulongesha

7. Ntulasa kayi tudibu benze bua kulongesha bana betu badi basue kulengeja mudimu wabu wa kumanyisha Bukalenge?

⁷ Yehowa udi utulongesha petu lelu anu muvuaye mulongeshe Yezu patshivuaye mu diulu. Yezu nkayende wakamba ne: ‘Baprofete bakafunda ne: Nzambi neabayishe bonso.’ (Yone 6:45; Yesh. 54:13) Lelu kudi tulasa tudibu benze anu bua kutulongesha mua kuikala bamanyishi ba Bukalenge. Kakuyi mpata, Kalasa ka Mudimu wa Nzambi katu kenzeka mu bisumbu bietu nkatuambuluishe tuetu bonso mu mushindu kampanda. Bampanda-njila batu ne diakalenga dia kubuela mu Kalasa ka Mudimu wa Bumpanda-njila. Bampanda-njila ba bungi ba kale mbapete disanka dia kubuela mu kalasa aka bua musangu muibidi. Bakulu ne basadidi batu babuela mu Kalasa ka Mudimu wa Bukalenge bua kulengeja ndongeshilu wabu ne mushindu udibu bakuatshila bana babu mudimu. Bakulu ne basadidi bavule batshidi bajike batu babuela mu Kalasa ka Dilongesha Mudimu kadi kabaleja mushindu wa kuambuluisha bakuabu mu mudimu wa buambi. Bana betu ba bungi badibu batume mu matunga makuabu bua kuikala bamisionere batu balonge mu Gilada, Tshilongelu tshia Bible tshia Watchtower.

8. Mbinganyi bidi bamue bana betu bitaba bua kulekela bua kubuela mu tulasa tudi Yehowa mulongolole?

⁸ Bantemu ba Yehowa ba bungi mbashintulule malu abu bua kumona mua kubuela mu tusala etu. Tshilejilu, bua Yugu kubuelaye mu Kalasa ka Dilongesha Mudimu, wakalekela mudimu wende wa bianza bualu mfumuende wakabenga kumupesha dikisha. Yugu wakamba ne: “Tshiena nyingalala to. Bu bobu bampeshe dikisha divuabu kabayi bapesha bantu bonso, bavua mua kutekemena bua meme kushala mu kompanyi au kashidi. Kadi mpindieu ndi mua kuitaba mudimu kayi wonso udi Yehowa mua kumpesha.” Bana betu ba bungi mbalekele malu avuabu bangata ne mushinga wa bungi kumpala anu bua kubuela mu tulasa tudi Yehowa mulongolole.​—Luka 5:28.

9. Fila tshilejilu tshidi tshileja mudi dilonga dia malu a mu Bible ne didienzeja dia muntu biambuluisha.

⁹ Dilonga malu a mu Bible ne didienzeja bidi biambuluisha muntu bua kumanya mua kuyisha bimpe. (2 Tim. 3:16, 17) Angata tshilejilu tshia bualu buvua buenzekele Saulo wa mu ditunga dia Guatemala uvua muledibue ne lungenyi lutetuke ndambu. Mulongeshi wabu wakambila mamuende ne: kavua ne bua kumuenzeja bua amanye kubala, bualu abi bivua mua kumusamisha kabidi bikole. Saulo wakalekela kalasa kayi mumanye kubala. Kadi Ntemu mukuabu wakalongesha Saulo mua kubala ne kakanda ka Difila ku dibala ne ku difunda. Ndekelu wa bionso Saulo wakafika too ne ku dienza miyuki mu Kalasa ka Mudimu wa Nzambi. Mamuende wa Saulo wakalua kusambakena ne mulongeshi au pavuaye uyisha ku nzubu ne ku nzubu. Pakumvua mulongeshi au ne: Saulo ukadi mumanye kubala, wakamuambila bua balue ne Saulo lumingu luvua lulonda. Pakaya Saulo kua mulongeshi au lumingu luakalonda, mulongeshi wakamuebeja ne: “Udi musue kundongesha tshinyi?” Saulo wakatuadija kumubadila tshikoso tshia mu mukanda wa Bible utu ulongesha tshinyi menemene? Mulongeshi wakamba ne: “Tshiena ngitaba ne: nguewe udi undongesha mpindieu to.” Wakatuadija kudila bua disanka ne wakela Saulo mu tshitupa.

Dilongesha didi dilenga mutshima

10. Mmukanda kayi mulenga udi utuambuluisha bua kulongesha bulelela?

¹⁰ Yezu uvua ulongesha bantu malu avua Yehowa mumulongeshe ne avua mafunda mu Dîyi dia Nzambi. (Luka 4:16-21; Yone 8:28) Tudi tuidikija Yezu patudi tutumikila mibelu yende ne malongesha a mu Bible. Ke bualu kayi tuetu bonso tudi tulongesha malu a muomumue ne tuela meji mushindu wa muomumue, ne bidi bituambuluisha bua kuikala mu buobumue. (1 Kol. 1:10) Tudi ne dianyisha dia bungi bua mudi ‘mupika wa lulamatu udi ne meji’ utupesha mikanda idi ituambuluisha bua kulama buobumue patudi tulongesha ne tuyisha lumu luimpe. (Mat. 24:45; 28:19, 20) Umue wa ku mikanda eyi ngua Bible ulongesha, udi mpindieu mu miakulu 179.

11. Mmunyi muvua muanetu wa bakaji wa mu Éthiopie mutekeshe buluishi ne mukanda wa Bible ulongesha?

 ¹¹ Kulongesha bantu Bible ne mukanda wa Bible ulongesha kudi mua kushintulula mutshima wa batu kabayi batusue. Tshilejilu, dimue dituku Lula (mpanda-njila wa mu ditunga dia Éthiopie) uvua ulonga Bible ne muntu mukuabu pakalua mulela wa muntu au kuamba ne tshiji ne: kabavua ne bua kulonga to. Lula wakelesha mulela wa mulongi au meji ne lutulu, kumupeshaye tshilejilu tshia makuta a dishima tshidibu bafile mu nshapita wa 15 wa mukanda wa Bible ulongesha. Mamu au wakapuwa ne kubalekelaye batungunuka ne kulonga. Wakalua mene musangu wakalonda pavuabu balonga ne kulombaye bua bikale bamulongesha Bible, kujingaye ne bua kufila mfranga bua bikale bamulongesha! Mutantshi eu yeye kutuadija kulonga misangu isatu ku lumingu ne kuyaye kumpala mu bulelela.

12. Fila tshilejilu tshidi tshileja mushindu udi bansonga mua kulongesha bantu bulelela bimpe?

¹² Bansonga badi mua kuambuluisha bantu bakuabu ne mukanda wa Bible ulongesha. Tshilejilu, pavua Keanu (muana wa bidimu 11 wa mu ditunga dia Hawaï) ubala mukanda eu mu kalasa, mulongi wabu mukuabu wakamuebeja ne: “Bua tshinyi kanutu nuenza mafesto?” Keanu kumubadilaye diandamuna didi mu tshisakidila tshidi ne mutu wa bualu ne: “Tudi ne bua kuenza mafesto adi mamanyike anyi?” Pashishe wakabulula mu tshikebelu tshia mukanda eu ne kuebejaye mulongi wabu au tshiena-bualu tshivua tshitamba kumusankisha. Bakatuadija kulonga Bible. Tshidimu tshishale, Bantemu ba Yehowa mbalonge Bible ne bantu 6 561 426, nangananga ne mukanda wa Bible ulongesha. Utuku ulongesha bantu Bible ne mukanda eu anyi?

13. Mmunyi mudi dilonga dia Bible mua kushintulula bantu bikole?

¹³ Kulongesha bantu Bible ne mukanda wa Bible ulongesha kudi mua kushintulula bikole nsombelu wa badi basue kuenza disua dia Nzambi. Mulume mukuabu ne mukajende badi bampanda-njila ba pa buabu mu ditunga dia Norvège bakatuadija kulonga Bible ne tatu mukuabu ne mukajende ne bana babu ba bakaji basatu bavua bafumine mu Zambie. Baledi aba kabavua basue kulela muana mukuabu to. Nenku pakimita mukaji, bakangata dipangadika dia kutudisha difu. Matuku makese kumpala kua bobu kumonangana ne munganga, bakalonga nshapita udi ne tshiena-bualu tshia ne: “Tuangatayi muoyo anu mutu Nzambi uwangata.” Tshimfuanyi tshia muana utshidi munda tshidibu baleje mu nshapita au tshiakalenga baledi abu bikole, ke bobu kubenga kutudisha difu. Bakatungunuka ne kuya kumpala mu dilonga dia Dîyi dia Nzambi ne pakalelabu muana, bakinyika muanetu wa balume uvua ubalongesha Bible.

14. Fila tshilejilu tshia mudi kutumikila malu atudi tulongesha kupatula bipeta bimpe.

¹⁴ Muanda wa mushinga wa mu ndongeshilu wa Yezu uvua ne: yeye muine uvua utumikila malu avuaye ulongesha. Bantu ba bungi batu banyisha bikadilu bilenga bia Bantemu ba  Yehowa badi bidikija Yezu. Tshilejilu, bakiba tshibuta tshia ngenda-mushinga mukuabu wa mu ditunga dia Nouvelle-Zélande mu mashinyi ende. Wakamanyisha bampulushi bualu ebu, ke bobu kumuambila ne: “Bua wewe kupetulula tshibuta tshiebe anu Ntemu wa Yehowa mutshiangule.” Ntemu wa Yehowa mukuabu uvua wenda ushila bantu bikandakanda wakangula tshibuta atshi. Pakamanyishabu muenatshi, wakalua ku nzubu kua muanetu wa bakaji uvua mutshiangule. Wakasanka pakasanganaye ne: mukanda wende mukuabu wa mushinga mukole uvuamu. Ke muanetu wa bakaji au kumuambila ne: “Bivua anu bimpe bua meme kupingaja tshibuta etshi ne bintu bidimu, nangananga bualu ndi Ntemu wa Yehowa.” Ngenda-mushinga au wakakema, kuvulukaye tshivua mpulushi mumuambile mu dinda adi. Bushuwa, bena Kristo balelela badi batumikila malongesha a mu Bible bua kuidikija Yezu.​—Eb. 13:18.

Tuidikije mushindu uvua Yezu wangata bantu

15, 16. Mmunyi mutudi mua kukoka bantu ku mukenji utudi tuyisha?

¹⁵ Mushindu uvua Yezu wangata bantu uvua ubakoka bua kuteleja malu avuaye uyisha. Tshilejilu, dinanga ne didipuekesha bivuaye nabi bivua bikoka bantu bena bupuekele kudiye. Uvua umvuila bantu bavua balua kudiye luse ne ubakolesha ne mêyi malenga, ne wondapa ba bungi bavua basama. (Bala Mâko 2:1-5.) Katuena mua kuenza bishima to, kadi tudi mua kuleja ngikadilu idi ikoka bantu ku bulelela bu mudi dinanga, didipuekesha ne luse.

¹⁶ Luse luakambuluisha pavua yaya mukuabu mpanda-njila wa pa buende diende Tariua muye kuyikila ne tatu mukuabu mukulakaje diende Beere, udi musombele mu tshimue tshia ku bidila bia Kiribati mu Pacifique Sud. Nansha muakamba tatu au ne: kavua musue kuteleja, Tariua wakamona ne: uvua mutekete tshiseke ne kumumvuilaye luse. Muanetu eu wakamukonka ne: “Udiku mumanye tshidi Nzambi mulaye bua bantu badi basama ne bakadi bakulakaje anyi?” Pashishe yeye kumubadila mvese wa mu Yeshaya. (Bala Yeshaya 35:5, 6.) Mêyi au akasankisha tatu eu ne kuambaye ne: “Nkadi mubale Bible bidimu bia bungi ne bakadi balue kuntangila kudi misionere wa mu tshitendelelu tshietu bidimu bia bungi, kadi tshitu muanji kumona bualu ebu mu Bible to.” Muanetu eu wakatuadija kulonga nende Bible, ne wakaya kumpala bimpe mu dilonga dia bulelela. Nansha muvua bulema buende bukole, ukadi mutambule mpindieu ne yeye ke udi ulombola kasumbu kakese ka muaba udiye, ne udi wendakana mu tshidila tshijima wenda uyisha lumu luimpe.

Tutungunuke ne kuidikija Kristo

17, 18. (a) Mmunyi muudi mua kulua mumanyishi wa lumu luimpe muimpe? (b) Ntshinyi tshiapeta bantu badi bangata mudimu wa buambi ne mushinga?

¹⁷ Anu mutu malu mimpe atutu tupeta njila ne njila mu buambi aleja, tudi mua kuikala bamanyishi bimpe ba lumu luimpe bituikala ne ngikadilu ivua nayi Yezu. Nenku mbimpe menemene bua tuetu kuidikija Kristo mu dikala bamanyishi ba lumu luimpe ba tshisumi!

¹⁸ Pakalua bamue bantu bayidi ba Yezu mu tshikondo tshia bapostolo, Petelo wakakonka ne: ‘Apu tuetu netupete tshinyi?’ Yezu wakamuandamuna ne: ‘Muntu yonso wakashiya nzubu yende, anyi bana babu balume anyi bana babu bakaji, anyi tatuende, anyi baba wende, anyi bana bende, anyi madimi ende, bualu bua dîna dianyi yeye neapete masanka misangu lukama matambe a diambedi, neapiane muoyo wa tshiendelele kabidi.’ (Mat. 19:27-29) Netumone mudi mêyi aa atukumbanyina bituatungunuka ne kuidikija Yezu Kristo Misionere mutambe bunene.

Newandamune munyi?

• Mmunyi mudi Yehowa utulongesha bua kulua bamanyishi ba lumu luimpe?

• Bua tshinyi mukanda wa Bible ulongesha udi wambuluisha mu buambi?

• Mmunyi mutudi mua kuidikija Yezu mu mushindu utudi tuangata bantu?

[Nkonko ya dilonga]

[Tshimfuanyi mu dibeji 17]

Pavua Yezu mubikile Petelo, Andele, Yakobo ne Yone bua kumulonda, bakitaba kakuyi dijingakana

[Tshimfuanyi mu dibeji 19]

Mikanda bu mudi wa “Bible ulongesha” idi ituambuluisha bua kulongesha malu a muomumue