Njikijilu wa Kalasa ka Gilada ka 123

Badi babela balongi ba mu Gilada bua “kutuadija kumbula”

MU Disambombo dia 8 ngondo wa tshitema 2007, musumba wa bantu 6 352 bafumine mu matunga 41 bavuapu dîba dia njikijilu wa kalasa ka Gilada ka 123, tshilongelu tshia Bible tshia Watchtower. Pa dîba 10:00 wa dinda, mulombodi wa tshisangilu etshi, Anthony Morris wa mu Kasumbu Kaludiki, wakajingila bantu difika dilenga. Yeye mumane kuamba mêyi a ntuadijilu, wakabikila ngamba-malu wa kumpala, Gary Breaux wa mu Komite wa filiale wa mu États-Unis.

Muanetu Breaux wakajadikila balongi ne: nansha bantu badi benza disua dia Yehowa bikale ne tshimuenekelu kayi tshia ku mubidi, mbimpe ku mêsu kuende. (Yel. 13:11) Wakabela balongi aba bua kulamabu buimpe abu. Pashishe, Gerrit Lösch wa mu Kasumbu Kaludiki wakamba ne: mbiakanyine bua kutekemena difutu patudi tusadila Yehowa. (Eb. 11:6) Kadi dinanga dilelela ke didi ne bua kutusaka bua kumuenzela mudimu.

Mutangidi wa Tshibambalu tshia Tulasa tua Nzambi, William Samuelson, wakabela pende balongi bua kushalabu anu mu mudimu mulenga wa kumanyisha lumu lua Mukalenge udi ukokesha ne bua kuleja buneme buabu ku tshikadilu tshiabu tshimpe. * Sam Roberson, mutangidi muambuluishi wa mu Tshibambalu tshia Tulasa tua Nzambi, wakakankamija balongi bua kuikalabu bakeba misangu yonso malu mimpe adi nawu bantu bakuabu. Mu dienza nanku balongi nebikale ne mushindu wa ‘kunanga bana babu ba mu Kristo.’​—1 Pet. 2:17.

Panyima pa miyuki eyi milenga, mulongeshi wa mu Gilada Mark Noumair wakela balongi ba bungi nkonko bua kulondabu malu avuabu bapete mu buambi pavuabu mu kalasa aka. Bantu bonso bavua mu tshisangilu atshi bakamona mudi balongi aba banange kuyisha ne bikale ne dijinga dia kuambuluisha bantu bakuabu. Kent Fischer wa ku biro bia Betele bia ku Patterson wakela pende bena mu Komite ya filiale ba mu matunga asatu avua mapete bamisionere nkonko. Mêyi akamba bana betu aba akajadikila bantu bavua mu tshisangilu etshi ne balela ba bungi ba balongi aba ne: badi balama bimpe bamisionere bapiabapia miaba idibu babatume. Izak Marais wa mu Tshibambalu tshia Dikudimuna wakela pende bamisionere ba bidimu bia bungi nkonko ne bakalonda malu akaminyisha balongi bavua bafuma ku dijikija mata bua disanka divua dibindile.

Muyuki munene mu tshisangilu etshi wakenzabu kudi Geoffrey Jackson wa mu Kasumbu Kaludiki uvua ne tshiena-bualu tshia se: “Ntshinyi tshinuenza panyima pa malu aa onso anudi bumvue?” Muanetu Jackson, uvua muenze bumisionere bidimu bitue ku 25 mu Pacifique Sud, wakakula bua mêyi a ndekelu a mu muyuki wakenza Yezu pa mukuna. Mu muyuki au, Yezu wakakula bua bantu babidi bavua bibake nzubu yabu, umue muikale ne meji ne mukuabu muikale mutatakane. Ngamba-malu wakaleja  ne: nzubu yonso ibidi eyi ivua mua kuikala mibakila mu tshitupa tshimuepele. Mutatakane au wakibakila nzubu mu lusenga, kadi muena meji yeye wakumbula muinshi mua buloba too ne pakafikaye pa dibue diakibakilayepu nzubu. Pakalua tshipepele tshikole tshia mvula, nzubu uvua muibakila pa dibue wakapanduka, kadi uvua muibakila mu lusenga wakupuka.​—Mat. 7:24-27; Luka 6:48.

Yezu wakumvuija ne: mutatakane au mmufuanangane ne bantu bavua bateleje patupu malongesha ende kadi kabayi baatumikile. Muena meji mmufuanangane ne bantu bavua bateleje mêyi a Yezu ne baatumikile. Muanetu Jackson wakambila balongi ne: “Panudi nutumikila malu anudi balonge mu Bible muaba udibu banutuma, nenuikale bu muntu uvua ne meji.” Ku ndekelu, wakabela balongi bua “kutuadija kumbula” miaba idibu babatume bua kuenzela mudimu.

Bua kujikija, balongi bakangata mikanda yabu ya njikijilu ne kubalejabu miaba ivuabu ne bua kuya kuenzela mudimu, ne Muanetu Morris wakafila mibelu ya ndekelu. Wakakankamija balongi bua kulonda Yezu dîba dionso ne bua kueyemena anu Yehowa bua kubapeshaye bukole. Nenku tshisangilu etshi tshiakajika.

[Mêyi adi kuinshi]

[Kazubu mu dibeji 31]

MALU ADI ATANGILA BALONGI

Bungi bua matunga adibu bafumine: 10

Bungi bua matunga adibu babatume: 24

Bungi bua balongi: 56

Muayene wa bidimu: 33,5

Muayene wa bidimu mu bulelela: 17,9

Muayene wa bidimu mu mudimu wa bumpanda-njila: 13,8

[Tshimfuanyi mu dibeji 32]

Njikijilu wa kalasa ka Gilada ka 123

Mu liste udi kuinshi eku, mbabale milongo kutuadijila kumpala kuya panyima, ne mbafunde mêna kutuadijila ku dia bakaji kuya ku dia balume mu mulongo wonso.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.