Kalasa kadi balongi bambuluisha bantu pa buloba bujima

NZAMBI udi ulongesha bantu ba mishindu yonso mu bisumbu bipite pa 98 000 bia Bantemu ba Yehowa mu matunga mapite pa 200. Mukanda munene udibu balonga m’Bible, ne dilongesha edi didi dibambuluisha bua kukola mu nyuma padibu benda balonga disua dia Nzambi ne mushindu wa kuditumikila. Bantu badi bitaba dilongesha edi badi bapeta masanka a bungi. Badi bambila bantu bakuabu malu adibu balonga bua kukumbaja dîyi dia Yezu Kristo dia kuvuija bantu bayidi.​—Matayo 28:19, 20.

Pa kumbusha dilongesha didi Bantemu ba Yehowa bapeta mu bisumbu biabu, badi kabidi ne tulasa tukuabu tua pa buatu. Kamue ka ku tulasa etu n’Kalasa ka Dilongesha Mudimu. Kakatuadija mu ngondo wa dikumi mu 1987 mu Pittsburgh, mu Pennsylvanie mu ditunga dia États-Unis. Kalasa ka kumpala kavua ne bana betu ba balume 24 bavua bakula Anglais. Katshia anu tshidimu atshi, mbenze kalasa aka mu miakulu 21 mu matunga 43. Bakulu ne basadidi ba mudimu batshidi bajike ba mu matunga mapite pa 90 bakadi babuele mu kalasa aka. Kunyima kua mbingu muanda mukulu ya dilonga, badi batuma balongi muaba udi dijinga dinene, mu ditunga diabu anyi mu dikuabu. Ku ndekelu kua 2005, bana betu ba balume bapite pa 22 000 bakavua babuele mu kalasa aka. Nzambi mmubeneshe menemene mudimu mukole udibu benza ne budipuekeshi bua kutungunuja midimu ya Bukalenge ne kuambuluisha bantu bakuabu.​—Nsumuinu 10:22; 1 Petelo 5:5.

 Kudilongolola bua kubuela mu kalasa

Balongi ba bungi badi bajinga kubuela mu Kalasa ka Dilongesha Mudimu batu balomba dianyisha kudi bamfumu babu ba mudimu. Kadi kabitu anu bipepele to. Mu Hawaii, bakabikila bena Kristo babidi bavua balongeshi bua kubuela mu kalasa aka, ne bavua ne bua kulomba bua kuanji kuimanyika mudimu wabu. Ne dieyemena dia ne: Yehowa uvua ne bua kubambuluisha, bakalomba bua kuimanyika mudimu wabu, kumvuijabu bua tshinyi bavua ne bua kubuela mu kalasa aku ne tshivuabu mua kupetelaku. Bakabanyishila bonso babidi bua kuimanyika mudimu.

Misangu ya bungi, bavua bambila Bantemu bavua balomba bua kuimanyika mudimu ne: nebajimije mudimu wabu. Bakasungula bua bulongolodi bua Yehowa bubalongeshe, nansha muvuabu mua kujimija mudimu wabu. Kadi bakabikila bamue balongi kudi bamfumu babu bua bobu kupingana ku mudimu kunyima kua kalasa. Tudi mua kumvuija mu mêyi makese dipangadika dia kubuela mu kalasa aka nunku: Lomba dianyisha kudi mfumu wa mudimu, sambila Yehowa bua akuambuluishe, ne mulekele malu mu bianza.​—Musambu 37:5.

“Bayidi ba Yehowa”

Mu mbingu muanda mukulu ya kalasa, balongi badi balonga Bible mu buondoke. Badi balonga mudi basadidi ba Yehowa badiakaje bua kuenza disua diende ne mudibu mua kukuata mudimu ne Bible bimpe mu mudimu wa kuyisha, mu bisangilu bia tshisumbu ne mu mpungilu.

Mulongi ukavua mujikije ne uvua ne dianyisha bua kalasa aka wakafundila mukuabu uvua ne bua kubuelamu ne: “Ndi nkuambila ne: Neubuele mu kalasa kimpe menemene kautu kuyi muanji kubuela to. Mvese udi wakula bua kuikala ‘bayidi ba Yehowa’ udi upeta ngumvuilu mukuabu. Kalasa aka kadi kalongolola muoyo wa muntu ne bumuntu buende bua kuenza malu adi umvuangana menemene ne tshilejilu tshia Kristo Yezu. Ukadi pa kuenza bualu bunene menemene bua mu nsombelu webe.”​—Yeshaya 54:13.

Bayishi, balami ne balongeshi

Balongi bakadi bajikije mu Kalasa ka Dilongesha Mudimu badi mpindieu benza mudimu mu matunga 117. Mu matunga aa mudi bidiila bia mu Atlantike, Caraïbes ne mu Pasifike pamue ne matunga a bungi mudi biro bia filiale bia Bantemu ba Yehowa. Biro bia filiale bidi bileja ne: dilongesha dimpe didi balongi bapete didi dimuenekela ku mushindu udibu bayisha, balama mikoko ne balongesha. Dilongesha edi didi dibambuluisha bua kuenza mudimu ne Bible bimpe mu buambi. (2 Timote 2:15) Padibu bandamuna nkonko ya bantu, badi kabidi batangila bikole mu mukanda wa Comment raisonner à partir des Écritures * ne badi balongesha bamanyishi bakuabu ba Bukalenge bua kuenza nunku. Balongi aba badi basambulujila bamanyishi bakuabu lukunukunu luabu, ne midimu yabu idi ikolesha bisumbu.

Bakulu ba mu bisumbu badi ne diakalenga dia ‘kulama tshisumbu tshia mikoko,’ ne badi bambuluisha bua kutangila majinga a mu nyuma a bantu bakuabu. (1 Petelo 5:2, 3) Mukulu mukuabu wakamba bua balongi aba ne: “Tudi ne dianyisha dia bungi bua mudi biro bia filiale bitutumina bana betu balongesha bimpe bua kutuambuluisha bua kuambula bujitu bua kulama mikoko ya Nzambi.” Biro bia filiale bikuabu bia ku Extrême-Orient bidi bileja pabi ne: “Balongi badi ne luse lua bungi. Badi benza mudimu mukole udi usaka bena mu tshisumbu bua kubanemeka. Bantu bonso badi bamona budipuekeshi buabu, musangelu ne tshisumi tshiabu, ne badi babanyisha bikole. Badi badifila ne muoyo umue ne baya ne disanka dionso mu bisumbu bidi dijinga ne balami.” (Filipoi 2:4) Bana betu aba badi bakolesha bena Kristo nabu ne mbakumbanyine kalumbandi.​—1 Kolinto 16:18.

Balongeshi ba mu Kalasa ka Dilongesha Mudimu badi kabidi bambuluisha balongi bua kuikalabu bangamba-malu bimpe. Padi balongi batumikila ngenyi ne mibelu idibu bapeta, mu mutantshi mukese badi batuadija kubapesha midimu mu mpuilu ya tshijengu ne  mpungilu ya distrike. Mutangidi mukuabu wa tshijengu wakamba ne: balongi badi benza “miyuki milenga ne badi beleshisha bateleji meji.”​—1 Timote 4:13.

Dilongesha mu bisangilu bia mu tshisumbu diakalengela bikole mu dimue ditunga dia mu Afrike pavuabu benzelamu Kalasa ka Dilongesha Mudimu ne batume balongi mu bisumbu. Bakulu badi bafumine mu kalasa aka badi bambuluisha bikole mu mudimu wa buambi, wa kulama mikoko ne wa kulongesha, ne nenku badi bakolesha bisumbu mu nyuma.​—Efeso 4:8, 11, 12.

Batangidi ba tshisumbu bimpe

Miaba ya bungi, kudi dijinga dikole dia bakulu ne basadidi ba mudimu. Bu biro bia filiale kabiyi bitume balongi ba mu Kalasa ka Dilongesha Mudimu mu bimue bisumbu, nunku kabivua ne bua kuikala ne bakulu to. Ke bualu kayi badi batuma balongi ba bungi miaba idi dijinga dia nunku.

Biro bia filiale bia bungi mbileje ne: bana betu aba “mbamanye bimpe mushindu udi bulongolodi buenda,” “badi bakumbaja majitu abu ne muoyo umue,” “badi bambuluisha bakuabu bua kumvua tshidi bulongolodi bua Yehowa ne bua kubunemeka,” ne “badi bambuluisha bisumbu biabu bua bikale ne musangelu ne bukole bua mu nyuma.” Bidi nanku bualu balongi badi bajikija mu kalasa aka badi balonda bidibu bafunde mu Dîyi dia Nzambi ne kabena beyemena dijingulula diabu dia malu anyi balua bena meji ku mêsu kuabu nkayabu to. (Nsumuinu 3:5-7) Bena Kristo aba badi balua dibenesha dia mu nyuma mu bisumbu mudibu babatuma.

Badi baya miaba ya kule

Bamue balongi badi baya bu bampanda-njila ba pa buabu badi bambuluisha tusumbu tukese tudi kule bua kuluatu bisumbu. Mukulu mukuabu wa mu tshitupa tshia kule tshia mu Guatemala wakaleja dianyisha diende ne kuambaye ne: “Munkatshi mua bidimu 20, mvua ndiebeja mushindu wa kutangila tshipapu tshinenanenayi etshi. Mvua nsambila misangu ya bungi bua bualu ebu. Bana betu ba mu Kalasa ka Dilongesha Mudimu mbalonge mushindu wa kuakula bimpe ne udi bulongolodi buenda; ndi ne dianyisha dia bungi bua kumona ne: badi batangila mpindieu tshitupa etshi ne dinanga dionso.”

Balongi mbalonge mua kuyisha bimpe miaba idibu ne bua kuenza luendu lule mu mikuna bua kuya mu tumisoko tua kule. Padibu bafikamu, badi benza tusumbu tukese ne batulongolola, nansha muvua bakuabu bamanyishi bapangile mua kuenza nunku. Tshilejilu, mukulu mukuabu wa mu ditunga dia Niger wakalomba bua balongi ba mu kalasa aka bamuambuluishe bualu uvua mumone ne: bavua mua kuenza mudimu muimpe muaba uvuaye musombele. Bidi mua kuikala bipepele bua balume badi kabayi basele benze mudimu bu bampanda-njila ba pa buabu anyi batangidi ba bijengu, nangananga mu misoko ya kule. Anu bu mupostolo Paulo, badi mua kupeta ‘njiwu mu misulu, kudi banyengi ne mu tshipela,’ ne lutatu lua muaba muimpe wa kusombela ne lua kuditatshisha bua tshisumbu tshidibu.​—2 Kolinto 11:26-28.

Badi bambuluisha bansonga

Bible udi ukankamija bansonga bua kuvuluka Mufuki wabu. (Muambi 12:1) Bana betu ba lukunukunu badi bafumine mu Kalasa ka Dilongesha Mudimu badi tshilejilu tshimpe bua bansonga. Panyima pa balongi babidi bamane kufika mu tshimue tshisumbu tshia mu États-Unis, bungi bua mêba avua bamanyishi benza mu mudimu wa kuyisha buakavula misangu ibidi. Pashishe, bampanda-njila ba pa tshibidilu (anyi bamanyishi ba Bukalenge ba ku dîba ne ku dîba) bakumbuka ku 2 kuluabu 11. Etshi ntshilejilu tshia malu adi menzeke mu bisumbu bia bungi.

Balongi badi kabidi bakankamija bansongalume bua kubuela pabu mu Kalasa ka Dilongesha Mudimu. Bualu ebu mbusake bamue bansonga badi kabayi basadidi ba mudimu bua kujinga diakalenga edi. Biro bia filiale bia mu ditunga dia Pays-Bas bidi bibikila balongi badi bajikija mu Kalasa ka Dilongesha Mudimu ne:  “Bilejilu bidi ne muoyo bua bansongalume badi badiebeja tshikalabu ne bua kuenza mu nsombelu wabu.”

Badi benza mudimu mu bisumbu bia miakulu mienyi

Mu matunga mavule, bamanyishi ba Bukalenge badi benza muabu muonso bua kuyisha benyi mu miakulu yabu. Balongi ba mu Kalasa ka Dilongesha Mudimu batu misangu ya bungi balonga miakulu mikuabu ne baya miaba idi benyi ba bungi. Tshilejilu, mu ditunga dia Belgique mudi dijinga dikole dia kuyisha bantu badi bakula tshiena-Albanie, tshiena-Perse ne tshiena-Russie.

Bisumbu bia miakulu mienyi bia mu ditunga dia Allemagne, États-Unis, Grande-Bretagne, Italie, Mexique, ne matunga makuabu bikadi ne batangidi bena ngendu, bakulu ne basadidi ba mudimu badi bafumine mu Kalasa ka Dilongesha Mudimu. Biro bia filiale bia mu ditunga dia Corée bidi biamba ne: “Balongi bapite pa 200 badi benza mudimu mukole mu diambuluisha bisumbu bia miakulu mienyi.”

Badi bakumbaja midimu mikuabu ne budipuekeshi

Pa kumbusha kuenza mudimu mu tusumbu ne bisumbu bia miakulu mienyi, bana betu badi bajikije mu Kalasa ka Dilongesha Mudimu badi bakulu, basadidi ba mudimu ne batangidi bena ngendu. Bamue badi bitaba bua kuya mu matunga menyi, pamuapa bakumbaja majinga a lukasa adi mu Tshibambalu tshia Mudimu ku biro bia filiale. Aba badi bamanye kuibaka, badi mua kuenza mudimu mu dibaka dia Nzubu ya Bukalenge.

Bungi budi buenda buvula bua bisumbu ne bijengu budi bulomba batangidi bena ngendu ba bungi. Bua kukumbaja dijinga edi, badi basungula bamue balongi ba mu Kalasa ka Dilongesha Mudimu bua kulonga bua kuikala batangidi ba bijengu munkatshi mua mbingu dikumi ne pashishe badi benza mudimu wa kupingana pa muaba wa mutangidi anyi balua batangidi ba bijengu. Balongi batue ku 1 300 badi benza mudimu bu batangidi bena ngendu mu matunga 97 mpindieu. Mu dimue ditunga dia mu Afrike, batangidi bena ngendu 55 pa 100 mbafumine mu Kalasa ka Dilongesha Mudimu, ne mu dikuabu badi 70 pa 100.

Mu Australie, mu Canada, mu États-Unis, ku Extrême-Orient ne ku Mputu, mbatume balongi ba bungi mu matunga makuabu bua kukumbaja majinga a pa buawu. Ke mushindu udi bena pa buloba bujima bapeta masanka a mu kalasa aka.

Ku butuangaji bua Muanende Yezu Kristo, Yehowa mmujule bamanyishi ba lumu luimpe, balami, balongeshi ne bantu bakuabu badi batungunuja midimu ya Bukalenge mu matuku aa a ku nshikidilu. Basadidi ba Nzambi nebatungunuke ne kuvula anyi? Eyowa! Nunku, kudi dijinga dikole bua bana betu ba balume bakadi badilambule bua kuambulabu majitu manene. (Yeshaya 60:22; 1 Timote 3:1, 13) Kalasa ka Dilongesha Mudimu kadi kapetesha bakulu ne basadidi ba mudimu mushindu wa kualabaja mudimu wabu, ne kadi kabambuluisha bikole bobu bine ne bantu bakuabu pa buloba bujima.

[Mêyi adi kuinshi]

[Bimfuanyi mu dibeji 10]

Kalasa ka Dilongesha Mudimu kadi kayisha malu a Bukalenge kumpala pa buloba bujima

[Bimfuanyi mu dibeji 13]

Udi musue kubuela mu Kalasa ka Dilongesha Mudimu bua wambuluishe bantu bakuabu anyi?