Mushindu wa kupeta dimanya dia Nzambi

Bamue bantu badi mua kuela meji ne: nzambi ki mmusue kudimanyisha kudi bantu. bikalaye ujinga kudimanyisha, mmunyi mudiye wenza nunku?

JEAN CALVIN, muena Mishonyi wakashintulula malu a Ekeleziya mu bidimu bia 1500 wakamba ne: bantu kabena mua kudimanyina Nzambi, bikalaye kayi mudimanyishe kudibu. Uvua muambilamu menemene. Kadi bamue bantu batu badiebeja bua kumanya bikala Nzambi mmusue kudimanyisha kudi bantu. Biobi bikale nanku, mmunyi mudiye udimanyisha?

Yehowa “Mufuki” wetu munene udi wenza bualu buonso ne kenzela. Bu mudiye kabidi “Nzambi wa Bukole Buonso,” kakuena tshintu tshidi tshimupangisha bua kukumbaja malu onso adiye mulongolole. (Muambi 12:1; Ekesode 6:3) Tuikale bashindike ne: mmusue kumanyisha bantu malu adiye mulongolole, bualu wakasaka muprofete wende Amosa bua kufunda ne: ‘Yehowa Nzambi kêna wenza bualu, bikaleye kayi muanji kubusokoluela bantu bende baprofete diambedi.’ Kadi badi bamba muvua Nzambi umanyisha malu adiye mulongolole anu kudi basadidi bende, bantu badi bamunange ne muoyo mujima. Kabiena biumvuika nanku anyi? Wewe muine, utu musue kukuatshila nganyi malu ebe? Utu uakuatshila muntu yonso tshianana tshianana anyi peshi anu balunda bebe ba pa muoyo?​—Amosa 3:7; Yeshaya 40:13, 25, 26.

Meji ne dimanya dia Nzambi bidi bikemesha ne bitshinyisha bena budipuekeshi, ne ke mudibi ne bua kuikala. Kadi bua kupeta meji ne dimanya dia Nzambi, kabiena bikengela anu kumutshina to. Bible udi uleja patoke ne: bua tuetu kulonga malu a Nzambi, tudi kabidi ne bua kuikala ne budipuekeshi. Udi wamba ne: ‘Teka mikenji yanyi munda muebe. Utelejije matshi ebe ku meji. Ufile mutshima webe ku dijingulula dia mianda. Didila dijingulula dia mianda muadi ne bandishila kumanya kua malu dîyi diebe. Ukebe bintu ebi bu muudi ukeba tshiamu tshia argent.’​—Nsumuinu 2:1-4.

Muntu muena budipuekeshi udi udienzeja nunku, neafike ku dimanya dia Nzambi. Mvese wa mu mukanda wa Nsumuinu udi utungunuka wamba ne: ‘Yehowa udi upa bantu meji; mukana muende mudi mupatuka lungenyi ne dijingulula dia mianda.’ Eyowa, bantu badi bakeba bulelela ne muoyo umue badi mua ‘kujingulula buakane ne dikosa diakane dia nsambu, ne kulumbulula kuakane, njila yonso mene idi iya ku buimpe.’​—Nsumuinu 2:6-9.

Dikeba bulelela

Mukanda kampanda udi wamba ne: “Bantu batu ne dijinga dikole dia kumona dishilangana didi pankatshi pa tshintu tshilelela ne tshidi katshiyi tshilelela, tshia bukole ne tshidi katshiyi ne bukole, tshia bushuwa ne tshia mafi, tshimpe ne tshinyanguke, tshidi tshiumvuika ne tshidi katshiyi tshiumvuika, ne kumanya tshia kuenza ne tshia kubenga kuenza.” (The Encyclopedia of Religion) Bua kukumbaja dijinga edi, bantu mbakebe bulelela munkatshi mua bidimu bia bungi. Aba badi bakebela bulelela kudi Yehowa, udi mufundi wa Misambu ubikila ne: ‘Nzambi wa bulelela,’ badi babupeta.​—Musambu 31:5, MMM.

 Dîna dia Yehowa didi diumvuija mu tshiena-Ebelu tshia kale ne: “Eu udi uvuija.” (Genese 2:4) Nunku, diumvuija dia dîna dia Nzambi didi dikoka ntema ku mushindu udiye Mufuki ne ku malu adiye mulongolole. Mu bulelela, kumanya dîna dia Yehowa ne kuenza nadi mudimu ntshimanyinu tshinene tshia tshitendelelu tshilelela. Yezu uvua muleje bualu ebu patoke. Wakasambila Nzambi bua bayidi bende wamba ne: ‘Ngakubamanyisha dîna diebe, nembamanyishedi kabidi, bua dinanga diwakunnanga nadi meme kuikaladi munda muabu, ne meme munda muabu.’​—Yone 17:26.

Pavua Yosefe muena Ebelu ujinguluila bantu bilota, uvua ushindamena pa bulunda buende ne Nzambi, ne wakamba ne dishindika dionso ne: “Kujingulula kua malu kakuena kudi Nzambi anyi?”​—Genese 40:8; 41:15, 16.

Bidimu bia bungi panyima, Mukalenge Nebukadenesâ wa mu Babulona wakalota tshilota tshivua bena meji bende bapangile bua kumujinguluila. Muprofete Danyele wakambila mukalenge ne: ‘Nzambi udiku mu diulu udi usokolola malu masokoka, ne yeye wakumanyisha mukalenge Nebukadenesâ malu akadi pa kulua mu matuku atshidi kumpala.’​—Danyele 2:28.

Tshilejilu tshia Yosefe ne tshia Danyele bidi bileja ne: anu bantu badi bakuatshila Yehowa Nzambi mudimu ke batu bapeta meji ne dimanya diende. Kadi bua Nzambi kutuanyishaye, tudi ne bua kulekela malu a dishima atuvua tuitaba ku kale. Ke tshiakenza bena Yuda bakalua bena Kristo mu bidimu lukama bia kumpala. Katshia ku buana, bavua babalongesha bua kunemeka ne kutumikila mikenji ya bena Yuda. Nunku bivua bikengela matuku a bungi bua kuitababu Yezu bu Masiya uvua mulue kukumbaja Mikenji ya Mose ivua ‘mundidimbi wa bintu bimpe bilualua.’ (Ebelu 10:1; Matayo 5:17; Luka 24:44, 45) ‘Mikenji ya Kristo’ idi mipite kule ne kule Mikenji ya Mose yakapingana pa muaba wa mikenji eyi.​—Galatia 6:2; Lomo 13:10; Yakobo 2:8.

Tuetu bonso tudi baledibue munkatshi mua bantu badi kabayi batumikila Nzambi. Bua mpekatu utuvua bapiane kudi baledi betu ba kumpala, tuvua baledibue bena lukuna ba Nzambi, katuyi ne dimanya dijalame dia malu adiye mulongolole. Tudi kabidi bapete mutshima udi utudinga. (Yelemiya 17:9; Efeso 2:12; 4:18; Kolosai 1:21) Nunku bua tuetu kulua balunda ba Nzambi, tudi ne bua kulonga mua kuidikija mushindu utuye wela meji, kadi ki mbipepele to.

Bidi mua kuikala bikole bua kulekela malongesha ne bienzedi bia mu ntendelelu wa dishima, nangananga ni bavua batulongeshabi katshia ku buana. Kadi mbimpe kutungunuka mu njila mubi anyi? Nansha kakese! Nunku  tudi ne bua kushintulula ngelelu wetu wa meji bua Nzambi kutuanyisha.

Kumanya njila udi Nzambi ulongeshila bantu

Nkuepi kutudi mua kupetela diambuluisha bua kumvua Dîyi dia bulelela bua tuetu kuditumikila? Mu Isalele wa kale, Nzambi wakateka bantu ba kueyemena ne ba lulamatu ku mutu kua tshisamba bua kutshilombola. Bia muomumue lelu eu, Kristo Mfumu wa tshisumbu tshia bena Kristo udi ulombola bantu badi bakeba bulelela ne muoyo umue. Udi ubalombola ku butuangaji bua bayidi bende ba kueyemena ne ba lulamatu. Bobu aba ke badiye muteke bua kulombola ne kukuba bantu badi bakeba bulelela ne muoyo mujima. (Matayo 24:45-47; Kolosai 1:18) Kadi mmunyi mutudi mua kumanya njila udi Nzambi ulongeshila bantu?

Bayidi balelela ba Yezu Kristo badi badienzeja bua kuikala ne ngikadilu ya buena ivua nayi Yezu pa buloba. Mu buloba budi buenda anu bunyanguka ebu, mbipepele bua kumanya bayidi aba bualu badi ne ngikadilu milenga ya bena Kristo. (Bala kazubu kadi mu dibeji 6.) Bena mu tshitendelelu tshienu anyi tshia bena mutumba nenu badi ne ngikadilu eyi anyi? Nebikale bimpe bua wewe kukonkonona bualu ebu ku diambuluisha dia Bible.

Tudi tukulomba wewe mubadi wetu bua wenze nunku ku diambuluisha dia dilonga dia Bible. Tshidimu tshishale, Bantemu ba Yehowa mbalonge Bible ne bantu bapite pa 6 000 000 mu matunga 235. Kupeta meji ne dimanya dia Nzambi nkuimpe bualu nekutungunuke ne kutupetesha masanka. Kuenaku mua kutuadija kulonga bua kupeta meji ne dimanya dia Nzambi anyi? Kuakunyingalala nansha kakese bua bualu ebu. Bulelela, tudi mua kufika ku dimanya Nzambi!

[Kazubu mu dibeji 6]

BANTU BADI BENZA DISUA DIA NZAMBI . . .

kabena babuelakana mu malu a tshididi.​—Yeshaya 2:4.

badi bapatula mamuma mimpe padibu benza disua dia Nzambi.​—Matayo 7:13-23.

mbanangangane bushuwa munkatshi muabu.​—Yone 13:35; 1 Yone 4:20.

badi mu buobumue miaba yonso.​—Mika 2:12.

kabena bidikija lungenyi ne bienzedi bibi bia bantu badi babanyunguluke.​—Yone 17:16.

badi bamanyisha bulelela ne bavuija bantu bayidi.​—Matayo 24:14; 28:19, 20.

mbanange kudisangisha pamue bua kudikolesha.​—Ebelu 10:25.

mbadisange mu tshisumbu tshia bantu ba mu matunga onso bua kutumbisha Nzambi.​—Buakabuluibua 7:9, 10.

[Bimfuanyi mu dibeji 7]

Muntu udi mua kupeta dimanya dia Nzambi pa nkayende anyi mu dîku anyi mu tshisumbu