Lufu ludi lukuata muntu yonso!

MUFUNDI wa miyuki ya kale muena Grande-Bretagne Arnold Toynbee wakafunda ne: “Padi muntu uledibua, udi wenda ne lufu ku diulu dîba dionso, ne kamana kamana muntu yonso wadiakufua.” Patudi tufuisha mulela anyi mulunda wetu, tutu tupeta tshinyongopelu tshikole.

Lufu ndutatshishe bantu kukadi bidimu ne bitshia. Patudi tufuisha muntu utudi banange bikole, tudi tupanga tshia kuenza. Bualu ebu budi bukuata muntu yonso. Padi lufu lutukuata, tudi tulua anu bu bana batekete, katuyi ne tshia kuenza. Nansha bumfumu, nansha biuma kabiena mua kupingaja muntu udi mufue to. Bena meji badi bashala batubule mukana. Bantu bakole badi badila anu bu bana batekete.

Tshilejilu, Davidi mukalenge wa Isalele wakanyingalala bikole pavua muanende Abashaloma mufue. Pakumvua Davidi lumu lua lufu lua muanende eu, wakatuadija kudila wamba ne: ‘Muananyi Abashaloma, muananyi Abashaloma! Meme ngakadi kukufuila, Abashaloma, muananyi, muananyi!’ (2 Samuele 18:33) Mukalenge wa bukole eu uvua mutshimune baluishi banene, kadi kumpala kua ‘muena lukuna wa ndekelu, lufu’ wakadifila ujinga mene bua kufua pamutu pa muanende.​—1 Kolinto 15:26.

Kudiku mushindu wa kumbusha ntatu idi lufu lukebesha anyi? Bikalaku mushindu, tudi mua kutekemena tshinyi bua bantu bakadi bafue? Netubamone kabidi anyi? Tshiena-bualu tshidi tshilonda netshiandamune nkonko eyi ne Bible.