Udi musue kupeta balunda bimpe anyi?

BANTU ba bungi batu basue kuikala ne balunda bimpe. Udi upeta disanka paudi ne balunda ba pa muoyo baudi mua kulondela malu. Kadi tshidi tshikengela bua kupeta balunda bimpe ntshinyi? Kukadi bidimu bitue ku 2 000, Yezu wakaleja ne: bualu budi buambuluisha bikole bua kusomba bimpe ne bakuabu ndinanga dilelela. Wakamba ne: “Nuenzele bantu malu onso anudi basue banuenzele.” (Luka 6:31) Mêyi aa a mushinga mukole adi aleja ne: bua wewe kupeta balunda udi ne bua kuikala muena kalolo, muena malu malenga. Mmumue ne: bua wewe kupeta mulunda, udi ne bua kuikala muntu udi mumanye kusomba ne bakuabu. Mmushindu kayi nanku?

Kabatu mua kudia bulunda buimpe bua pa muoyo dimue dimue to, bualu bulunda mbushilangane bikole ne dimanyangana patupu. Balunda mbantu baudi munange. Bidi bikengela kudienzeja bikole bua kudia ne kulama bulunda. Bulunda butu misangu mivule bulomba bua kuteka majinga a mulunda webe kumpala kua biudi wewe musue. Balunda bimpe batu basanka padi umue usanka ne babungama padi umue ukenga.

Udi uleja muudi mulunda muimpe paudi wambuluisha muntu udi mu dikenga. Nsumuinu 17:17 udi wamba ne: ‘Mulunda utu wananga mu bikondo bionso, muanetu utu waleja bulela mu tshikondo tshia dikenga.’ Bushuwa, balunda badi mua kunangangana bikole kupita nansha balela. Nsumuinu 18:24 udi uleja ne: ‘Kudi mulunda udi upita muanabu ne muntu kumulamata.’ Udi musue kumanya malu makuabu a mushindu wa kupeta balunda bimpe ba nunku anyi? Udi musue kubuela mu tshisumbu tshia bantu badi bamanyike bua dinanga didi munkatshi muabu anyi? (Yone 13:35) Biwikala musue, Bantemu ba Yehowa ba muaba uudi musombele nebakuleje tshia kuenza bua wewe kupeta balunda balelela.