Armagedone nnshikidilu mukuate buôwa anyi?

ARMAGEDONE! Muaku eu udi utuma meji ebe ku dibutuka dia bantu mu tshibungi anyi nku dilungula dia bia panu bionso ne kapia? Mu matunga a bungi lelu eu kabatu batamba kutela miaku ya mu Bible mivule bu mudibu batela Armagedone nansha. Bakadi batela muaku eu bua kumvuija mudi makenga mabi mindile bantu kumpala eku. TV ne video mbibueje bantu bindidimbi bikuate buôwa mu meji bia muikala tshidibu babikila bu Armagedone. Mbapangile kujingulula tshidi muaku eu bua dipanga ne didifuikakajila ngenyi ya dishima. Nansha mudi ngenyi yenda anu ivulangana bua diumvuija dia muaku eu, mivule ya kudiyi kayena ipetangana ne tshidi Bible (muine wakaupatula) ulongesha bua Armagedone nansha.

Bu mudi Bible utela Armagedone bua kuakula bua “nshikidilu wa buloba,” kuena umonaku ne: mbia mushinga bua kuanji kumvua bimpe tshidi muaku Armagedone umvuija menemene anyi? (Matayo 24:3, MMM) Ki mbia meji bua kunyemena mu Dîyi dia Nzambi didi mpokolo menemene wa bulelela bua kupeta mandamuna a tshidi Armagedone ne tshiakuenzelaye wewe ne dîku dienu anyi?

Dilonga dia nunku nedikuleje muikala Armagedone kayi nshikidilu mukuate buôwa, kadi muikalaye ntuadijilu wa malu malenga bua bantu badi bajinga kusomba pa buloba bupiabupia bua buakane ne kuyabu kumpala. Wewe mukonkonone diumvuija dilelela dia Armagedone didibu batate mu tshiena-bualu tshidi tshilonda etshi, neufike ku lumvu lutokesha bimpe lua tshidi dilongesha edi dia mushinga dia mu Mukanda wa Nzambi.

[Kazubu/​Tshimfuanyi mu dibeji 3]

BUEBE WEWE ARMAGEDONE NTSHINYI?

• Nkabutu kabi ka ku bingoma bia mpolondo anyi?

• Ntshipupu tshiadikuma pa buloba anyi?

• Nditutakana dia buloba ne dibulunga dikuabu anyi?

• Ndibutula dia bantu babi kudi Nzambi anyi?