Badi bayisha tumama lumu luimpe

“BADI banukolesha mu nyuma!” Ke muvua mutangidi wa nzubu wa banunu wa mu Navalcarnero (mu Madrid, mu ditunga dia Espagne) muleje bua dilua dia Bantemu ba Yehowa ku nzubu wende. Kadi ntshinyi tshivua tshimusake bua kuamba nunku?

Bantu ba bungi badi mu nzubu wa banunu wa Rosas del Camino ntumama. Kadi katshia Bantemu batuadija kulonga muakulu wa tumama wa bena Espagne, mpindieu badi balua kuyukila ne tumama tua mu nzubu eu. Mulombodi wa nzubu eu wakatumbisha Bantemu bua mudibu bafila dîba diabu dionso bua kulongesha bantu badi dijinga ne diambuluisha dia pa buadi malu a mu Bible. Wakamona muvua lumu luimpe lua Bukalenge bua Nzambi luvuabu balua kulongesha lushintulule bantu badi mu nzubu eu. Nansha bakulakaje ba mu nzubu eu (nangananga aba badi kabayi bumvua ne bamona bimpe) badi banyisha bikole dilua dia Bantemu edi.

Eulogio (udi pende mu nzubu eu, katu umona ne katu umvua) udi mpindieu ulonga Bible ne Bantemu ba Yehowa. Dimue dituku pavuabu balonga, mukulakaje kampanda wakasemena e kubadila Ntemu uvua ulonga ne Eulogio kasala kavua bena mu nzubu eu bafunde bua kuleja dianyisha. Kasala aku kavua ne tshiena-bualu etshi: “Kuikala Ntemu.” Tangila amue mêyi avuamu: “Badi ne nsombelu muimpe wa bulongame ne badi bapeta disanka ne meji kudi Yehowa. Badi baya kutangila bantu misangu ne misangu ku mbanza yabu bualu badi beyemena Yehowa.”

Bulelela, dieyemena Yehowa dia nunku ke didi difikisha Bantemu ba bungi pa buloba bujima bua kulonga muakulu wa tumama bua kumona mua kulongesha tumama tudi mu matunga abu. Ke mushindu udibu bafika ku dimanyisha tumama lumu luimpe lua disanka ludi mu Bible.