Bible udi mua kukuambuluisha mu dibaka diebe

DIBAKA didi kudi bamue muanda udi wenza disanka. Kadi kudi bakuabu, didi tshimfuanyi tshia tunyinganyinga. Mamu mukuabu udi wamba ne kanyinganyinga ku muoyo ne: “Ntu ndiumvua anu bu mukaji udi dibaka dimufue. Ntu ndiumvua tshiyiku ne udi mua kuntabalela ne misangu ya bungi ndisombela anu nkayanyi tshiyiku ne wanyi undi nende.”

Mbintu kayi bitu bienza bua se: bantu babidi bavua baditshipe bua kunangangana ne kusuangana bafika mpindieu ku ditapulukangana? Tshimue tshia ku bintu ebi ndipangila dia dimanya dia malu adi dibaka dilomba. Kamona-kamba mukuabu wa malu a baminganga udi wamba ne: “Tudi tubuela mu dibaka katuyi nansha ne dimanya dikese dia malu adimu.”

Dilonga dilombola kudi kasumbu kampanda (The National Marriage Project) ka iniversite kansanga (Rutgers University mu provense wa New Jersey, mu États Unis) diakafikisha ku nkomenu eu e kuleja ne: bantu bakese tshianana lelu’eu ke badi bamanye malu a mu dibaka. Mulombodi wa dilonga adi udi wamba ne: “Ba bungi mbadi bakolele mu mêku avua baledi kabayi ne disanka anyi babengangane. Bantu aba mbamanye tshidi dibaka didi kadiyi dia disanka, kadi nansha nanku ki mbamanye tshidi dibaka dia disanka mua kuikala to. Bamue mene badi bumvuija tshidi dibaka dia disanka bu tshintu tshidi ‘tshishilangane ne tshidi dibaka dia baledi bende.’”

Kadi ntatu ya mu dibaka idi payi mua kukuata bena Kristo anyi? Eyowa idi mua kubakuata. Bamue bena Kristo ba mu bidimu lukama bia kumpala bavua dijinga ne mubelu wa patoke wa kubenga ‘kukeba mua kusululuka’ mu dibaka. (1 Kolinto 7:27) Bushuwa, dibaka dionso dia bantu babidi bapange bupuangane nedipete anu yadi ntatu, kadi tudi ne diambuluisha. Mulume ne mukaji badi mua kulongolola nsombelu wabu pa kulonda mibelu ya mu Bible.

Ntshia bushuwa se: Bible kêna anu mukanda wa mibelu ya malu a mu dibaka nkayawu to. Kadi bu mudiye mufume kudi Eu uvua mulongolole dibaka, tudi mua kutekemena bua se: mibelu idimu ikala ne diambuluisha dia bungi kudi badi mu dibaka. Yehowa Nzambi udi wamba mu mukanda wa Yeshaya ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendelamu. Aka! Bu wewe mumvue mikenji yanyi, ditalala diebe diakadi kuikala bu musulu, ne buakane buebe buakadi kuikala bu mavuala a mâyi manene.’​—Yeshaya 48:17, 18.

Dinanga divua pankatshi pebe ne muena dibaka nebe dikadi dienda dikepela anyi? Udi umvua dibaka bu dikuela mu buloko mudi kamuyi dinanga anyi? Mamu mukuabu ukadi muenze bidimu 26 mu dibaka udi wamba ne: “Lutatu ludi muntu mua kupeta mu nsombelu ya mushindu eu ndukole menemene bua kulumvuija. Ludi anu kuoku dîba dionso.” Pamutu pa kushala muvunge maboko patupu mu dibaka didi kadiyi dikusankisha, bua tshinyi kubenga kuenzaku bualu kampanda bua malu kulongolokawu? Tshiena-bualu tshidi tshilonda netshileje balume ne bakaji mibelu ya mu Bible idi mua kubambuluisha bua kushalabu balamatangane kashidi.