Nkonko ya babadi

Satana Diabolo udi mua kumanya malu adi mu lungenyi lua muntu anyi?

Nansha mutudi katuyi bajadike bualu ebu menemene, bidi bisua kumueneka ne: Satana ne bademon bende kabena bamanye malu adi mu ngenyi yetu to.

Tangila tshidi mêna ende umvuija. Badi bamubikila ne: Satana (Muluishi), Diabolo (Mushiminyinyanganyi wa malu), Nyoka (mmuomumue ne: mudingianganyi), Mutetshianganyi, ne Muena mashimi. (Yobo 1:6; Matayo 4:3; Yone 8:44; 2 Kolinto 11:3; Buakabuluibua 12:9) Kakuena dîna nansha dimue ku atudi batele aa didi dileja ne: Satana udi mua kumanya malu adi mu lungenyi lua muntu to.

Kadi badi bamba bua Yehowa Nzambi ne: udi “[ukonkonona] mitshima.” (Nsumuinu 17:3; 1 Samuele 16:7; 1 Kulondolola 29:17) Ebelu 4:13 udi wamba ne: ‘Kakuena tshifukibua tshidi katshiyi tshimueneshibua ku mêsu [kua Yehowa], kadi bintu bionso bidi butaka ne bibuluka ku mêsu kua utudi nende ne bualu.’ Ebi kabiena ne bua kutukemesha to, Yehowa mmupeshe Muanende Yezu bukole bua kukonkonona mitshima ya bantu. Yezu mumane kubika ku lufu, wakamba ne: ‘Meme nyeye udi [ukonkonona] meji ne mitshima; ne nempe kudi muntu ne muntu wa munkatshi muenu difutu bu mudi midimu yende.’​—Buakabuluibua 2:23.

Bible kêna wamba ne: Satana udi ne bukole bua kukonkonona malu adi mu mitshima ne mu ngenyi ya bantu to. Bidi nanku bualu mupostolo Paulo udi ujadika ne: bena Kristo ‘kabena bapange ngenyi [ya Satana].’ (2 Kolinto 2:11, MMM) Nunku katuena ne bua kutshina bua se: Satana udi ne bukole kampanda bua pa buabu butudi katuyi bamanye to.

Nansha nanku, abi kabiena biumvuija ne: Muluishi wetu eu kêna mua kujingulula mateketa etu nansha. Satana mmulonge ngikadilu wa muntu munkatshi mua tshikondo tshile. Kêna dijinga ne kumanya malu adi mu lungenyi luetu bua kushishaye kujingulula malu atudi tukeba kuenza, bua kumona malu a dijikija nawu lutetuku atudi basue, anyi bua kuteleja malu atudi tuakula, ne bikuabu nansha. Tshilunji tshietu tshia mpala ne mmuenekelu wetu bidi mua kuleja meji atudi nawu munda ne mushindu utudi tudiumvua.

Kadi, Satana utu ukuata mudimu ne bintu bia muomumue bivuaye mukuate nabi mudimu mu budimi bua Edene, mbuena kuamba ne: mashimi, didinga ne malu adi kaayi malelela. (Genese 3:1-5) Nansha mudi bena Kristo kabayi ne bua kutshina bua se: Satana udi mua kumanya malu adi mu ngenyi yabu, kadi badi ne bua kudimuka bua ngenyi idi Satana mua kukeba bua kubueja mu mitu yabu. Satana mmusue bua bena Kristo bikale “bantu banyanguke lungenyi ne kabayi ne bulelela.” (1 Timote 6:5) Kabiena bikemesha bua mudi bulongolodi bua Satana bupatule malu adi anyanga ngenyi ya bantu ne dijikija lutetuku dibi to. Bua kukolela mvita eyi, bena Kristo badi ne bua kukuba meji abu pa kuvuala ‘tshifulu tshia lupandu.’ (Efeso 6:17) Badi benza nunku pa kuuja meji abu ne malu malelela a mu Bible ne pa kuepuka bintu bibi bia mu bulongolodi bua Satana.

Satana mmuluishi munene. Kadi katuena ne bua kumutshina yeye anyi bademon bende tshianana tshianana to. Yakobo 4:7 udi wamba ne: ‘Nukandamene Diabolo, ne yeye neanunyeme.’ Bitualonda mubelu eu, netuambe anu muakamba Yezu ne: Satana kêna ne tshidiye mua kutuenzela to.​—Yone 14:30.