Bamanyishi ba Bukalenge badi balonda

Diambuluisha bua kutungunuka ne kuangata mashi bu tshintu tshia tshijila

PA BULOBA bujima basadidi ba Yehowa mbaleje lulamatu luabu kudi Nzambi pa bidi bitangila muanda wa diangata mashi bu tshintu tshia tshijila. (Bienzedi 15:28, 29) Kasumbu ka mupika wa lulamatu ne wa budimu kadi kambuluisha bana betu bena Kristo ba pa buloba bujima mu bualu ebu. (Matayo 24:45-47) Tumonayi bipeta biakapatuka mu ditunga dia Philippines.

Biro bia Bantemu ba Yehowa bia mu Philippines bidi biamba ne: “Mu 1990 bakatumanyisha ne: bamue bana betu ba ku Betele wa Brooklyn bavua ne bua kulua kuenzela tshisangilu tshiabu munu mu Philippines. Bavua babikile bana betu ba bungi ba mu filiale ya mu Asia: ba mu filiale wa ditunga dia Corée, dia Taïwan, ne Hong-Kong. Tshipatshila tshivua tshia kumona mua kujula Tshibambalu tshia malu a mpitadi mu filiale yabu ne bua kulongolola kabidi Komite ya Diumvuangana ne Mpitadi. Mu Philippines, bakenza kumpala komite ya diumvuangana ne mpitadi mu bimenga binene binayi.” Bena mu komite eyi bavua ne bua kuenza muabu muonso bua kukeba ba-doktere bavua bitaba bua kukuatshishangana netu mu malu adi atangila dibenga dietu dia mashi bilondeshile malu etu a buena Kristo atudi tuitabuja. Bena mu komite eyi bakambuluisha kabidi bana betu pavua bilumbu bia mashi bijuke.

Bakangata Remegio bua kuenzaye mudimu mu Komite wa Diumvuangana ne Mpitadi wa mu Baguio. Mu kupita kua matuku, ba-doktere bakabanga kujingulula mudimu wa komite eu. Remegio udi uvuluka dimue dituku divua kasumbu ka ba-doktere kadisangishe ne Komite wa Diumvuangana ne Mpitadi uvua ujinga kumanya mushindu uvuabu mua kuondapa Bantemu babedi bavua babenga bua kubelabu mashi. Remegio udi wamba ne: “Ba-doktere bakatuadija kuela nkonko, kadi ngakapanga tshia kuamba bualu nkonko ayi ivua itangila anu malu a baminganga.” Wakalomba Yehowa diambuluisha bua kumona mua kupita ne tshilumbu atshi. Remegio udi utungunuka wamba ne: “Kunyima kua lukonko luonso, ba-doktere bakuabu bavua bela bianza mulu ne bamba mushindu uvuabu bapite ne nsombelu kampanda wa buena eu.” Remegio uvua ne disanka bua diambuluisha diakapetaye musangu au, bualu nkonko ayi ne mandamuna biakatungunuka munkatshi mua mêba abidi majima.

Kudi mpindieu komite 21 mu ditunga adi dijima, ne bana betu basanga 77 badi benzamu mudimu. Danilo, udi Ntemu ne muikale kabidi doktere udi wamba ne: “Ba-doktere mbafike ku dimona ne: babedi Bantemu ba Yehowa badi babambuluisha kudi bulongolodi kampanda budi bubatabalela ne dinanga dionso.” Kumpala munga munganga uvua welakana bua kupanda muanetu mukuabu kakuyi dimuela mashi. Kadi muanetu eu wakashala mushindame mu ditabuja diende. Bakamupanda ne kupitabi bimpe. Bena Tshibambalu tshia malu a Mpitadi badi bamba ne: “Munganga wakakema bikole bua muvua muanetu au mumvue bimpe. Wakamba ne: ‘Bua tshidi tshienzeke etshi, umue wa ku bana benu yeye muikale ne dijinga dia kumupandabu kabayi bamuela mashi, nengikale ne disanka dia kumupanda nanku.’”