Badi benda bua kusadila bana babu bena Kristo mu bukua-matunga

UKADIKU mumvue bualu bua “basadidi batu benda mu matunga mashilangane” ne bua “bena budisuile batu benda mu matunga mashilangane” anyi? Bantemu ba Yehowa badi mu bisumbu bibidi bia bantu aba batu bafila dîba diabu ne mamanya abu ku budisuile bua kuambuluisha mu mudimu wa dibaka dia nzubu ya dipatula ne diabanya dia mikanda idi ne mukenji wa mu Bible. Bena budisuile aba batu bambuluisha kabidi mu mudimu wa dibaka dia Nzubu ya mpuilu ne Nzubu ya Bukalenge, miaba itu bantu batuilangana bua kulonda malongesha a mu Bible. Bena budisuile aba badi mpindieu bakuata midimu ya dibaka eyi mu matunga 34 nangananga aa adi benamu ne bumonyi bukese. Ntatu ne masanka kayi bisunguluke bitu benji ba mudimu aba bapeta padibu bakuatshila bana babu bena Kristo mudimu mu matunga mashilangane? Mmunyi mutubu bumvua bua “mudimu wa tshijila” udibu benza eu? (Buakabuluibua 7:9, 15) Bua kumanya malu aa, tuanji tutelejayi bamue bena budisuile bavue benze mudimu mu ditunga dia Mexique.

Musangu wa kumpala wa bena budisuile bavua bafumine ku ba bende kufika mu Mexique uvua mu ngondo muitanu wa tshidimu tshia 1992. Matuku makese, kudituabu mu midimu ya dialabaja muaba wa biro bidi bilombola midimu ya Bantemu ba Yehowa mu Mexique. Mudimu wa dialabaja biro eu uvua wa kuibaka nzubu minene 14 mipiamipia, ne nzubu ya dilala bua bena budisuile badi benza mudimu ku biro ebi, ne nzubu wa dipatuila mikanda, ne nzubu mukuabu wa ma-biro a midimu.

Bua kutua mudimu wa dibaka eu nyama ku mikolo, bena budisuile bapite pa 730 bafumine mu ditunga dia Canada, dia Grande-Bretagne, dia États-Unis, ne mu matunga makuabu, bakeleshangana diboko ne bena budisuile bakuabu nkama ne nkama bavua bafumine mu nseke yonso ya ditunga dia Mexique. Kabidi, Bantemu bapite pa 28 000 ba mu bisumbu bu 1 600 bia muaba udi biro bia Bantemu eu bavua balua matuku a ku ndekelu kua lumingu bua kufila diambuluisha diabu mu midimu ya dibaka eyi. Buonso buabu bavua basadila ne muoyo wa budisuile ne bakuata mudimu ne dimanya diabu kabayi bakeba difutu. Bavua bamona ne: kusadila Yehowa mushindu eu mbualu bua diakalenga. Matuku onso avuabu benza mudimu wa dibaka au, mu lungenyi luabu bavua balame mêyi mafundisha ku nyuma wa Nzambi adi mu Musambu 127:1, a se: ‘Bikala Yehowa kayi wasa nzubu, badi bamuasa badi bakuata mudimu eu patupu.’

Ntatu itubu bapeta

Ntatu kayi itu bena budisuile bayaya kusadila mu matunga a ku ba bende bapeta padibu mu matunga au? Bamue ba kudibu mbasue kutuambilayi. Curtis ne mukajende Sally ba mu ditunga dia États-Unis  bavua mu midimu ya nunku ivua mienzeke mu matunga aa: Allemagne, Inde, Mexique, Paraguay, Roumanie, Russie, Sénégal, ne Zambie. Curtis udi ulonda ne: “Lutatu lua kumpala ndua mutuvua ne bua kushiya muanetu wa bakaji uvua mpandanjila [anyi muyishi wa ku dîba ne ku dîba], ne kushiya kabidi tshisumbu tshietu tshia muaba utuvua mu buloba bua Minnesota. Meme ne mukajanyi tuvua benze bidimu 24 mu tshisumbu atshi, nunku tuvua tudiumvuamu bimpe bitambe.”

Sally udi wamba ne: “Kusomba miaba idi nsombelu yuvua kuyi nayi tshibidilu mbualu bua lutatu, kabidi ndutatu lutambe bukole pamuapa bua muntu mukaji kupita mudilu bua muntu mulume, kadi nansha nanku ngakalua kumona se: kudi anu mushindu wa muntu kuibidilangana ne nsombelu eyi. Ngakalonga too ne mua kuibidilangana ne tuishishi tuvua tupite bungi!” Udi wamba kabidi ne: “Mu ditunga dikuabu, tuetu bena budisuile dikumi tuvua basangile nzubu umue uvua kayi nansha ne tshikuku tshia kulambila, muikale anu ne biowedi bia mâyi bibidi patupu. Mu ditunga adi, ngakalonga mua kuindila malu ne lutulu lua bungi.”

Kulonga kua muakulu mukuabu ndunga lutatu palu ludi lulomba kudikolesha ne kudipuekesha. Sharon uvua wenze mudimu wa luibaku ne bayende mu matunga kabukabu udi wamba ne: “Kupanga kumanya muakulu wa mu ditunga diudi wenzela mudimu ndunga lutatu. Tshia kumpala, mbikole bua wewe kulamatangana ne bana benu ba mu nyuma paudi kuyi ukokesha mua kubumvuija malu audi nawu bipepele. Bitu bitonda be! Kadi bana betu batudi tupetangana nabu mu midimu yetu ya mu matunga menyi batu netu lutulu lua bungi ne batu baditatshisha bikole bua bualu buetu. Matuku makese, wewe kumona tukadiku tuteta petu mua kuakula muakulu wabu au.”

Bidi bikengela dikima bua kumona mua kuyisha

Nansha mudi bena budisuile badilambule aba bambuluisha bikole menemene bua mudimu wa luibaku eu kuyawu kumpala, mbavuluke tshia kumpala bualu bua mushinga mutambe bukole bua se: badi bayishi ba lumu luimpe lua Bukalenge bua Nzambi. Ke bualu kayi badi badifila pabu mu mudimu wa diyisha udibu benza kudi bisumbu bia bena Kristo bidi miaba idibu. Åke ne mukajende Ing-Mari bavua mu midimu ya luibaku eyi mu ditunga dia Guadeloupe, dia Malawi, dia Mexique, ne dia Nigeria, badi baleja se: bitu bikengela kuikala ne dikima bua kuakula muakulu mukuabu mu ditunga dia bende paudi mu mudimu wa diyisha.

 Ing-Mari udi ulonda ne: “Kumpala katuvua tutamba kuyisha to, bualu tuvua anu tuya kufila Bantemu bena ditunga diabu ne tubalekela buobu bakula misangu mivule, bualu tuetu tuvua ne ka-buôwa. Kadi, dimue dituku mu dinda tuakangata dipangadika dia kupatuka mu mudimu wa diyisha tuetu nkayetu. Tuetu kuasa luendu mu mikolo muenda muzakala, tshia pa muoyo tshikuma lubilu lubilu. Tuetu kupetangana ne nsongakaji mukuabu wakanteleja, meme kumumvuija malu amvua mulongolole bua kuambila bantu. Meme kumubadila mvese umue e kumushila ne imue mikanda ya kubala. Ke nsongakaji au kuamba ne: ‘Ngambilaku bualu ebu. Mulela wanyi mukuabu utu ulonga Bible ne Bantemu ba Yehowa. Mmunyi mundi mua kulongaku panyi nanku?’ Meme kushala bu kamama mupange tshia kuamba. Kadi meme kudikolesha e kutuadija nende dilonga dia Bible.”

Ing-Mari udi wamba kabidi ne: “Tshinkabi disanka dimvua mua kuikala nadi ne dianyisha dianyi kudi Yehowa bua muvuaye mubeneshe dipangadika dietu ne dijinga dietu dia kumanyisha bulelela.” Nsongakaji au wakatungunuka bimpe, yeye kutambula mu mpungilu wa distrike uvua muenzeke mu tshimenga tshia Mexique, kuluaye Ntemu wa Yehowa. Bua kumvuija mudimu wabu mu tshikoso, Åke ne Ing-Mari badi bamba ne: “Mudimu utuvua benze miaba mishilashilangane ivua midimu ya dibaka ayi tudi bawangate ne mushinga wa bungi menemene, kadi kakuena tshintu tshidi tshipite disanka ditudi nadi patudi tuambuluisha muntu mukuabu ufika too ne ku dilua Ntemu wa Yehowa nansha.”

Didifila

Bulelela, padi bena budisuile bashiya mêku abu ne balunda babu, badi badipangisha abu masanka bua kusadila bana babu badi mu matunga a ku ba bende; kadi batu kabidi ne masanka makuabu adi kaayi kufuanyikija. Mmasanka kayi au?

Howard uvua ne mukajende Pamela mu mudimu wa nunku eu mu ditunga dia Angola, dia Colombie, dia Équateur, dia Salvador, dia Guyana, dia Mexique, ne dia Porto Rico udi uleja ne: “Mbualu buimpe butambe bua kupetangana ne bana betu balume ne bakaji ba mu matunga mashilashilangane ne kudimuena malanda a dinanga adi pankatshi petu bonso nabu. Tutu anu tubibala misangu mivule, kadi paudi usomba ne bana betu ba bilele ne bibidilu bia miaba mishilangane ne wenza nabu mudimu pamue, newanyishe mushinga udi nawu dîku dia bana betu bonso kabidi bikole menemene.”

Gary wakambuluisha mu mudimu wa dibaka mu ditunga dia Colombie, dia Costa Rica, dia Équateur, dia Mexique, ne dia Zambie, udi pende umona se: mudimu eu mmumuambuluishe bikole. Udi wamba ne: “Malu amvua mulonge bidimu bionso bituvua ne bana betu bakulumpe badi basadila ku biro bietu bia mu matunga avuabu bantume bua kuenza mudimu mmangambuluishe bua kuikala mudipaye bimpe menemene bua kumona mua kutantamena ntatu idi mua kumueneka mu mudimu wanyi. Mmankoleshe mu ditabuja bualu mmampeteshe mushindu wa kulabulaku buobumue budi munda mua bulongolodi bua Yehowa budi pa buloba bujima, buobumue ebu budi butshimuna nansha muaba udi miakulu, makoba, anyi bibidilu bishilangane.”

Nunku, mudimu wa luibaku wa mu ditunga dia Mexique wakatua ku tshibungubungu, kabidi tshidimu etshi ke tshidibu babanjije nzubu ya biro bietu bivuabu balabaje mu ditunga edi. Bua dinanga diabu dia Nzambi, basadidi ne bena budisuile badi benda mu matunga mashilangane aba mbafile diambuluisha dinene mu mudimu wa ditantshisha ntendelelu mulelela mu Mexique ne miaba mikuabu. Muoyo wabu wa didifila ne wa budisuile bua kuya kusadila bana babu bena Kristo mu bukua matunga makuabu mbawanyishe bikole menemene kudi bana babu Bantemu ba Yehowa ba buloba bujima.

[Tshimfuanyi mu dibeji 25]

Équateur

[Tshimfuanyi mu dibeji 25]

Colombie

[Tshimfuanyi mu dibeji 25]

Angola

[Tshimfuanyi mu dibeji 26]

Pakatuadija mudimu wa nzubu mipiamipia ku biro bia Mexique

[Tshimfuanyi mu dibeji 26]

Lupangu lua bilongo muaba udi biro bietu

[Tshimfuanyi mu dibeji 26]

Kuinshi: Bamue bena mu Tshibambalu tshia malu a dibaka kumpala kua imue ya ku nzubu mipiamipia

[Tshimfuanyi mu dibeji 27]

Bena budisuile ba mu mudimu wa dibaka badi mu mudimu wa diyisha wa mu bisumbu bidibu babatume