Udi muvuluke anyi?

Udiku muanyishe malu auvua mubale mu nimero ya ndekelu ya Tshibumba tshia Nsentedi anyi? Nanku anji tetabi ni udi mua kuandamuna nkonko idi ilonda eyi:

• Ndiambuluisha kayi ditudi mua kupeta mu dilonga dia malu adi atangila dîku dia Shafana?

Shafana uvua mufundi ne sekretere wa Mukalenge Yoshiya wa mu Yuda. Bu muvua Shafana muikale ne dîyi [dia kuamba] mu bukalenge, wakambuluisha mukalenge mu kampanye kakenzaye bua kupingajilula ntendelelu mulelela. Bana babidi ba Shafana bakashala balamate muprofete Yelemiya. Muanende mukuabu kabidi ne bikulu bende babidi bakenza mudimu ne muanzu uvuabu nawu bua kukuatshisha ntendelelu mulelela. Bia muomumue, tudi petu mua kukuata mudimu ne bintu bitudi nabi ne bukokeshi buetu bua kukuatshisha ntendelelu mulelela.​—15/12, dibeji dia 19-22.

• Mmunyi mudi Irene Hochstenbach mufike ku diluangana bimpe ne bulema buende bunene ne kukuatshila Yehowa mudimu?

Pakakumbajaye bidimu muanda-mutekete, matshi ende akapata. Nansha mudi matshi ende mapate, mmulonge mua kuyukila ne bakuabu ne mpindieu udi wenza ngendu ne bayende (udi muikale mutangidi muena ngendu) padiye uya kukumbula bisumbu mu ditunga dia Pays-Bas.​—1/1, dibeji dia 23-6.

• Mmikanda kayi ibidi ivuabu bapatula mu Mpungilu wa Distrike wa “Bamanyishi ba Bukalenge ba tshisumi”?

Bena Kristo ba pa buloba bujima bakasanka bua kupeta mukanda wa Tutendelelayi Nzambi umuepele mulelela, udi mulongolola bua kulonga nawu Bible ne bantu bapiabapia padibu bajikija kulonga mukanda wa Dimanya didi difikisha ku muoyo wa kashidi; mukanda mukuabu mupiamupia ngua Approchez-vous de Jéhovah, udi uleja patoke ngikadilu ya Yehowa ne bienzedi biende. Udi kabidi uleja mushindu utudi mua kumuidikija mu dileja ngikadilu yende.​—15/1, dibeji dia 23-4.

• Ndiumvuija kayi didi nadi Nsumuinu 12:5: ‘Meji adi bakane bapangidija adi malulame’?

Meji a bantu bakane adi apangadija malu mimpe ne mmatangija ku malu adi mimpe ne makane. Bu mudi bantu bakane benza malu bualu mbanange Nzambi ne bantu nabu, meji abu mmimpe.​—15/1, dibeji dia 30.

• Ntshinyi tshidi mua kuambuluisha muntu bua kuikala ne meji mimpe pa bidi bitangila mudimu?

Mbimpe kudibidija kubangila ku buana bua kuanyisha mudimu. Bible udi utubela bua kuikala ne lungenyi luimpe lua mudimu ne kuepuka bufube. (Nsumuinu 20:4) Udi kabidi ukankamija bena Kristo bua lungenyi luabu luonso kaluikadi luditatshisha anu bua malu a mudimu wa didikuatshisha nawu. Kadi tshitudi ne bua kumanya ntshia se: mudimu wa Nzambi wuowu mmukumbanyine muaba wa kumpala mu nsombelu wetu. (1 Kolinto 7:29-31) Bena Kristo badi kabidi ne dishindika dia se: Nzambi kakubapua muoyo to.​—1/2, dibeji dia 4-6.

• Mmuaba kayi udibu batele musangu wa kumpala tshioshelu mu Bible?

Mmu Genese 8:20, padibu bakula bua tshioshelu tshivua Noa muibake pakumukaye mu buatu kunyima kua Mvula wa kabutu. Kadi, pamu’apa Kana ne Ebele bakafidila milambu yabu pa bioshelu. (Genese 4:3, 4)​—15/2, dibeji dia 28.

• Mmushindu kayi udi bamue bena Kristo mua kuenza malu ne meji padi nsombelu ushintuluka?

Bamue mbitabe, anyi mbadishintuluile amue malu mu midimu yabu adi mabapeteshe dîba dia bungi bua mudimu wa buambi. Bakuabu mbavudije mêba a kuenza mudimu wabu wa buambi ne majitu a mu tshisumbu padi amue majitu abu a mu dîku akepela, tshilejilu dîba divua bana babu balue bantu bakulumpe, basele anyi baya ku mabaka.​—1/3, dibeji dia 19-22.

• Mmunyi mudi bilejilu bia Yona ne mupostolo Petelo bituambuluisha bua kumona bakuabu mushindu udi Yehowa ubamona?

Yona ne Petelo bavua ne bilema bimanyike bimpe mu ngelelu wabu wa meji ne tshivuabu benze pavua ditabuja anyi butumike buabu bitetshibua. Nansha nanku, Yehowa wakamona bimpe ngikadilu milenga ivuabu nayi ne wakatungunuka ne kuenza nabu mudimu. Padi bakuabu batuenzela bibi anyi batuela mâyi ku makasa, tudi mua kuimanyina pa ngikadilu yabu milenga ivua mua kuikala itukoka ku kale ne pa bulenga budi Nzambi umona munda muabu.​—15/3, dibeji dia 16-19.

• Bua tshinyi nkudimuinu ya Bible mmishilangane mu dibadika mukanda wa Misambu?

Kudi dishilangana mu mushindu wa dibadika mukanda eu mu muakulu wa tshiena-Ebelu tshia kale ne mu nkudimuinu wende wa mu tshiena-Gelika mu Bible wa Septante. Nkudimuinu ya Bible ya bungi ya matuku aa idi mua kushilangana, bilondeshile bikalabu bayikudimuina biangatshila ku tshiena-Ebelu anyi bayikudimuina bilondeshile Bible wa Septante.​—1/4, dibeji dia 31.