Bansonga badi basankisha mutshima wa Yehowa

Biena-bualu bia dilonga ebi mbilongoluela nangananga bansonga badi munkatshi mua Bantemu ba Yehowa. Ke bualu kayi tudi tulomba bansonga bua balonge malu adimu bimpe bimpe bua kufilabu mandamuna a bungi paakonkononabu mu Dilonga dia Tshibumba tshia Nsentedi dia tshisumbu.

“Muananyi, ikala muntu wa meji, unsankishe, nemmone mua kuandamuna muntu pikalaye umpenda.”​—NSUMUINU 27:11, Mukanda wa Mvidi Mukulu [Katolike, MMM].

1, 2. (a) Umvuija bikala diumvua patupu malu a panu akusankisha dileja ne: kuena mukumbane bua kuikala muena Kristo. (Lomo 7:21) (b) Tshilejilu tshia Asafa tshidi tshikulongesha tshinyi? (Bala malu adi mu kazubu, mu dibeji dia 13.)

 FUANYIKIJABI ne: udi mu tshisalu usumba bilamba. Paudi wenda ukeba, udi umona tshilamba kampanda tshikusankisha diakamue. Dikala diatshi ne modele watshi bidi bimueneka bikale bikusankisha menemene, ne mushinga watshi udi ukuleja ne: katshiena tshiyila makuta a bungi to. Mpindieu udi utshikenketa bimpe bimpe. Udi ukema paudi umona ne: tshilamba etshi tshikadi tshisunsuke ku nzembe yatshi, ne tshikupa ki ntshiela bimpe to. Nansha mudi tshilamba etshi tshikulengelela, ki mbatshitele bimpe to. Udi mua kudidinga kutula makuta ebe bua kusumba tshilamba tshibi tshia nunku anyi?

² Fuanyikija bualu ebu ne nsombelu udi mua kukufikila wewe nsonga muena Kristo. Ku dimona dia kumpala, malu a panu (adi mikale bu tshilamba atshi) adi mua kumueneka akusankisha bikole. Tshilejilu, balongi benu badi mua kuya mu mafesto a kafuafuayi, badi mua kunua diamba, kunua maluvu, kubanga kuseselangana bibi ne bana ba bakaji anyi ba balume, kumanya balume anyi bakaji kumpala kua kubuela mu dibaka. Nsombelu wa mushindu’eu utuku imue misangu ukukoka anyi? Utuku ujinga bua kulabula nansha kakese patupu budikadidi ebu bua tshidingijilu anyi? Bikala meji aa atu akuvuila, kuambi diakamue ne: udi muntu mubi ne kuena mukumbane bua kuikala muena Kristo to. Bible udi wamba ujadika ne: malu a panu adi mua kulobeshangana bikole nansha muntu udi musue kusankisha Nzambi.​—2 Timote 4:10.

3. (a) Bua tshinyi kulonda malu a panu kakuena ne mushinga? (b) Mmunyi mudi muena Kristo mukuabu uleja mudi malu a panu mikale a patupu?

³ Mpindieu kenketa bimpe bimpe malu a panu, anu muudi mua kukenketa tshilamba tshiudi musue kusumba. Dikonkabi ne: ‘ndongoluelu wa malu eu udi mushindu kayi?’ Bible udi wamba ne: ‘Buloba budi [buenda] bupita.’ (1 Yone 2:17) Masanka onso adi afumina ku malu a panu nga tshitupa tshîpi nansha wowu mimpe mushindu kayi. Kabidi, ngikadilu yonso mubi utu ulela ntatu mikole menemene. Kêna mua kukuambuluisha nansha kakese to. Muena Kristo mukuabu uvua uluangana ne tshidiye ubikila ne: “tunyinganyinga tulela kudi bunsonga bunyanga,” udi wamba ne: “Bukua-panu budi mua kumueneka busankisha bantu ne bubakoka bikole. Ne bena panu badi bakeba bua witabe ne: udi mua  kupeta masanka abu kuyi upeta ntatu nansha. Kadi kabiena nanku to. Bukua-panu nebukuate nebe mudimu, ne pajikijabu, nebukuimanshe.” * Bua tshinyi kunyanga bunsonga buebe mu nsombelu mushadile wa nunku?

Dikukuba kudi ‘mubi’

4, 5. (a) Katupa kakese kumpala kua lufu luende, ntshinyi tshiakalomba Yezu mu disambila kudi Yehowa? (b) Bua tshinyi dilomba edi divua diakane?

⁴ Bu mudi bansonga badi munkatshi mua Bantemu ba Yehowa bajingulule ne: nsombelu wa lelu kêna ne tshintu nansha tshimue tshia mushinga tshia kubapesha to, badi benza muabu muonso bua kuepuka bulunda ne bukua-panu ebu. (Yakobo 4:4) Udiku umue wa ku bansonga ba lulamatu aba anyi? Biwikala umue wa kudibu, kalumbandi aku. Bushuwa, ki mbipepele bua kubenga kulonda malu mabi a balunda ne kutapuluka nabu, kadi kudi muntu udi mua kukuambuluisha.

⁵ Katupa kakese kumpala kua lufu luende, Yezu wakasambila Yehowa bua ‘asungile’ bayidi bende kudi “[mubi].” (Yone 17:15) Dilomba dia Yezu edi divua diakane. Uvua mumanye bimpe ne: kabivua bipepele bua bayidi bende kushalabu ne lulamatu to, nansha buobu bikale ne bidimu bungi munyi. Bua tshinyi? Tshilejilu, anu muvua Yezu mumanye, bayidi bende bavua mua kutuilangana ne muluishi ‘mubi’ wa bukole udi kayi umueneka: Satana Diabolo. Bible udi wamba ne: tshifukibua tshibi tshia mu nyuma etshi ‘tshidi tshiendakana bu nyama wa ntambue udi ukungula ukeba bantu ba kudiaye.’​—1 Petelo 5:8.

6. Ntshinyi tshidi tshituleja ne: Satana kêna ufuila bansonga luse nansha lukese?

⁶ Munkatshi mua bidimu bivule, Satana utu mukebele bantu makenga makole a tshikisu tshia katshi ku dînu. Vuluka ntatu mikuate buôwa ivua Satana muele Yobo ne dîku diende. (Yobo 1:13-19; 2:7) Imue misangu udi mua kuvuluka ngumu ya malu adi menzeke paudi ne muoyo apa adi aleja lungenyi lua tshikisu ludi nalu Satana. Satana udi utua eku utua eku wenda ukeba muntu wa kudia, katu umvuila bansonga luse nansha lukese to. Tshilejilu, ku ntuadijilu kua lukama lua bidimu lua kumpala, Helode wakaluka mayele bua kushipesha bana ba balume bonso ba mu Beteleme bavua ne bidimu bibidi anyi muinshi. (Matayo 2:16) Satana ke uvua mua kuikala musake Helode bua kushipesha bana abu, bionso ebi ne tshipatshila tshia kushipa muana uvua mua kulua dimue dituku Masiya uvua Nzambi mulaye walua kubutula Satana! (Genese 3:15) Bushuwa, Satana ki mmufuile bansonga luse nansha lukese. Tshipatshila tshiende tshimuepele ntshia kubutula bantu ba bungi menemene. Bidi nanku nangananga mpindieu, bualu Satana bakadi bamuipate mu diulu  ne bamuele pa buloba, ‘muikale ne tshiji tshikole, mumanye ne: udi ne musangu muipi.’​—Buakabuluibua 12:9, 12.

7. (a) Mmu malu kayi mudi Yehowa mushilangane bikole ne Satana? (b) Mmunyi mudi Yehowa umona disanka diebe mu matuku ebe a muoyo?

⁷ Satana udi ne ‘tshiji tshikole,’ kadi Yehowa yeye mmushilangane nende bualu udi ne “mutshima wa luse.” (Luka 1:78) Yeye ke tshiuwidi mene tshia dinanga. Bushuwa, Mufuki wetu udi uleja ngikadilu munene eu bikole, ke padi Bible ufika too ne ku diamba ne: “Nzambi udi dinanga.” (1 Yone 4:8) Ndishilangana kayipu didi pankatshi pa nzambi wa tshikondo etshi ne Nzambi uudi ne diakalenga dia kutendelela! Padi eku Satana ukeba muntu wa kudiaye, Yehowa ‘kêna musue [muntu nansha] umue abutudibue’ to. (2 Petelo 3:9) Udi wangata muntu yonso ne mushinga wa bungi, anu mushindu eu ke udiye ukuangata ne wewe pebe. Padi Yehowa ukubela mu Dîyi diende bua kubenga kuikala wa pa buloba, kêna ukeba kukupangisha disanka mu matuku ebe a muoyo anyi kukepesha budikadidi buebe nansha. (Yone 15:19) Kadi udi ukusungila kudi mubi. Tatu webe wa mu diulu mmusue bua wikale ne tshintu tshilenga tshidi tshitambe masanka a tshitupa tshîpi a panu. Dijinga diende ndia se: upete ‘muoyo wa bushuwa’ anyi muoyo wa tshiendelele pa buloba bukudimuna mparadizu. (1 Timote 6:17-19) Yehowa mmusue bua wikale ne diakalenga, ne udi ukubela bua wewe kudipeta. (1 Timote 2:4) Yehowa udi kabidi ukuela lubila lua pa bualu. Ndubila kayi alu?

“Usankishe mutshima wanyi”

8, 9. (a) Ntshintu kayi tshiudi mua kupesha Yehowa? (b) Mmunyi mudi Satana upenda Yehowa anu mudi muanda wakenzekela Yobo ubileja?

⁸ Ukadiku musumbile mulunda webe wa pa muoyo tshintu ne mumone mudi mpala wende uleja mudiye ukema ne disanka ne dianyisha padiye upeta tshintu atshi anyi? Pamu’apa ukavua muelangane meji bikole bua kumanya tshintu tshivua mua kuikala tshikumbanyine mulunda webe eu. Mpindieu tangila lukonko elu: Ntshintu kayi tshiudi mua kupesha Mufuki webe Yehowa Nzambi? Tshia kumpala, bualu ebu budi mua kumueneka kabuyi mutu. Ntshinyi tshidi Wa-Bukole-Buonso mua kukengela tshidi muntu wetu wa patupu eu mua kumupesha? Ntshinyi tshiudi mua kumupesha tshituye kayi muanji kuikala natshi? Bible udi wandamuna mu Nsumuinu 27:11 ne: ‘Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.’

⁹ Anu muudi mua kuikala mumanye ku diambuluisha dia dilonga diebe dia Bible, Satana Diabolo ke udi upenda Yehowa. Udi usua kuleja ne: bonso badi basadila Nzambi kabena bamusadila bua dinanga to, kadi badi bamusadila bua kupeta bintu. Satana udi wamba ne: buobu bapete makenga, nebalekele ntendelelu mulelela diakamue. Tshilejilu, tangila tshivua Satana muambile Yehowa bua muntu muakane Yobo: ‘Wewe kuakumunyunguluka ne nzubu wende ne bintu biende bionso ne bulami buebe anyi? Wewe wakuvudijila mudimu wa bianza biende disanka, ne bimuna biende biakuvulangana pa buloba. Kadi mpindieu olola tshianza tshiebe, lenga bintu bionso bidiye nabi, ne yeye neakudiule ku mêsu kuebe.’​—Yobo 1:10, 11.

10. (a) Ntshinyi tshidi tshituleja ne: Satana kakela anu lulamatu lua Yobo nkayende mpata? (b) Mmunyi mudi tshilumbu tshia udi ne bumfumu butambe bunene tshikutangila?

¹⁰ Anu mudi muyuki wa mu Bible eu uleja, Satana kakela anu lulamatu lua Yobo mpata, kadi ne lua bantu bakuabu bonso badi basadila Nzambi, kukusangisha ne wewe pebe munkatshi amu. Satana wakambila Yehowa bua bukua-bantu buonso ne: ‘Bionso bidi muntu [ki ng’anu Yobo nkayende to, kadi muntu yonso] nabi yeye neabifile bua kusungila muoyo wende.’ (Yobo 2:4) Udiku umona muaba webe mu tshilumbu tshinene etshi anyi? Anu mudibi bileja mu Nsumuinu 27:11, Yehowa udi wamba ne: kudi tshintu tshiudi mua kumupesha, tshiotshi ke tshidi tshimupa mushindu wa kuandamuna kudi udi umupenda, Satana. Anji kuelabi meji: Mukalenge Mutambe Bunene udi ukulomba bua kufila diebe diandamuna mu tshilumbu etshi tshinenanenayi. Mbujitu ne diakalenga bunene kayipu biudi nabi! Udiku mua kukumbaja tshidi Yehowa ukulomba anyi? Ke tshiakenza Yobo. (Yobo 2:9, 10) Ke tshiakenza kabidi Yezu ne bantu bakuabu bungi kabuyi kubala munkatshi mua bidimu bivule, kusangisha ne bansonga ba bungi. (Filipoi 2:8; Buakabuluibua 6:9) Wewe pebe udi mua kuenza bia muomumue. Kadi bualu bumue buudi ne bua kuikala mumanye  mbua se: kakuena mushindu wa kuikala kuyi ne kuudi mu tshilumbu etshi to. Ku bienzedi biebe neuleje ne: udi ku luseke lua bipendu bia Satana anyi ku luseke lua diandamuna dia Yehowa. Nduseke kayi luwajinga bua kulamata?

Yehowa udi ukulama!

11, 12. Wewe musungule bua kusadila Yehowa anyi bua kubenga kumusadila, bidiku bimulenga anyi? Umvuija.

¹¹ Luseke luudi usungula ludiku ne mushinga kumpala kua Yehowa anyi? Kakuenaku bantu ba bungi bakadi bashale bamulamate ne bafile diandamuna diakane kudi Satana anyi? Bushuwa, Satana wakamba ne: kakuena muntu nansha umue udi usadila Yehowa bua dinanga; edi ndibanda dikadi dimueneke mudidi dia dishima. Nansha nanku, Yehowa mmusue bua umulamate mu tshilumbu etshi tshia udi ne bumfumu butambe bunene bualu udi ukulama. Yezu wakamba ne: “Tatu wenu wa mu diulu kena musue [nansha] umue mu bakese [aba] afue.”​—Matayo 18:14.

¹² Bulelela, Yehowa mmusue kumanya ngikadilu uudi ujinga kulonda. Tshidi ne mushinga mutambe bunene ntshia se: ngikadilu webe udi mua kumusankisha anyi kumubungamija. Bible udi uleja patoke ne: malu mimpe peshi mabi adi bantu benza adi amusankisha anyi amubungamija. Tshilejilu, bena Isalele ‘bakatatshisha’ Yehowa pakamutombokelabu misangu ne misangu. (Musambu 78:40, 41) Kumpala kua mvula wa kabutu wa mu matuku a Noa kulokaye, pavua ‘mibi ya bantu midiundadiunde,’ “kanyinganyinga kakadi mu mutshima” wa Yehowa. (Genese 6:5, 6) Elabi meji bua tshidi bualu ebu bumvuija. Wewe muikale ne ngikadilu mubi, udi mua kunyingalaja Mufuki webe. Ebi kabiena bileja ne: Nzambi udi mupuyile peshi udi ubungamabungama bua kalu konso tshianana to. Kadi bidi menemene bileja ne: mmukunange ne udi ukujingila diakalenga. Ku luseke lukuabu, paudi wenza malu mimpe, mutshima wa Yehowa udi usanka. Udi usanka ki ng’anu bualu mmupete diandamuna dikuabu dia kupesha Satana, kadi bualu mpindieu udi mua kulua Mukufutshi. Ne atshi ke tshidiye musue kulua menemene! (Ebelu 11:6) Bushuwa, Yehowa Nzambi udi Tatu webe wa dinanga!

Mabenesha mavule mpindieu

13. Mmunyi mudi kusadila Yehowa kupetesha masanka kubangila anu ku mpindieu?

¹³ Mabenesha adi afumina ku dienzela Yehowa mudimu ki nga kupeta anu mu matuku atshilualua to. Bansonga ba bungi badi munkatshi mua Bantemu ba Yehowa mbapete disanka kubangila anu ku mpindieu, ne mbadipetelamu. Mufundi wa Misambu wakamba ne: ‘Mêyi a Yehowa adi malelela, adi asankisha mutshima.’ (Musambu 19:8) Yehowa mmumanye tshidi tshimpe buetu tuetu kupita muntu kayi yonso. Yehowa wakamba mukana mua muprofete Yeshaya ne: ‘Meme ndi Yehowa Nzambi webe, udi ukuyisha bua wewe  wikale ne diakalengele, udi ukulombola mu njila uudi ne bualu bua kuendelamu. Aka! Bu wewe mumvue mikenji yanyi, ditalala diebe diakadi kuikala bu musulu, ne buakane buebe buakadi kuikala bu mavuala a mâyi manene!’​—Yeshaya 48:17, 18.

14. Mmunyi mudi mêyi a mu Bible mua kukuambuluisha bua kuepuka ntatu idi ifumina ku mabanza?

¹⁴ Kutumikila mêyi a mu Bible nekukuambuluishe bua kuepuka ntatu ne tunyinganyinga bia bungi. Tshilejilu, Bible udi wamba ne: aba badi banange makuta “bakadisunsula mubidi wonso ne tunyinganyinga tua bungi.” (1 Timote 6:9, 10) Kakuenaku bena mulongo nebe bakadiku bapete ntatu mikole bua dinanga dia mfranga, anu mudi mvese eu uleja anyi? Bamue bansonga balume ne bakaji mbabuele mabanza manene bualu mbasue kuikala ne bilamba bia miodele mipiamipia ne biamu bitshidi bipatukilaku. Kudiambuisha bujitu bua makuta a bungi a kufuta munkatshi mua tshikondo tshile bua kusumba bintu biudi kuyi mua kukokesha mbupika bubi menemene!​—Nsumuinu 22:7.

15. Mmu malu kayi mudi mêyi a mu Bible akukuba ku ntatu idi ifumina ku tshiendenda tshia masandi?

¹⁵ Tangila kabidi tshilumbu tshia tshiendenda tshia masandi. Tshidimu tshionso etshi pa buloba bujima, bansongakaji bungi kabuyi kubala batu bapeta mafu a panshi. Bamue batu balela bana badibu kabayi nabu nansha ne dijinga anyi bukokeshi bua kukolesha to. Bakuabu batu batudisha mafu kuondo kabu ka muoyo kashala kabalubakaja. Pashishe kudi bansonga balume ne bakaji badi bapeta masama a mu bilamba, bu mudi dia SIDA. Kadi bua muntu udi mumanye Yehowa, tshipeta tshitambe bubi ku bionso ebi ndinyanguka dia malanda ende ne Yehowa. * (Galatia 5:19-21) Nunku Bible mmuambidilamu padiye wamba ne: ‘Nyemayi masandi.’​—1 Kolinto 6:18.

Tuenzelayi “Nzambi wa disanka” mudimu

16. (a) Ntshinyi tshidi tshileja ne: Yehowa mmusue bua wewe kuikala ne disanka mu bunsonga buebe? (b) Bua tshinyi Yehowa mmuele mêyi a wewe kulonda?

¹⁶ Bible udi ubikila Yehowa ne: “Nzambi wa disanka.” (1 Timote 1:11, NW) Yehowa mmusue bua wikale pebe ne disanka. Bulelela, Dîyi diende didi diamba ne: ‘Usanke mu bunsonga buebe, mutshima webe ukusankishe mu matuku a bunsonga buebe.’ (Muambi 11:9) Kadi Yehowa udi umona too ne diamuamua dia malu adi enzeka mpindieu  ne udi mua kumona bipeta bitshidi kumpala bidi ngikadilu muimpe ne mubi mua kupatula. Ke bualu kayi udi ukudimuija ne: ‘Uvuluke Mufuki webe mu matuku a bunsonga buebe, padi matuku mabi kaayi manji kulua anyi bidimu kabiyi bianji kufika pabuipi, paudi wamba ne: Tshiena nabi disanka.’​—Muambi 12:1.

17, 18. Mmunyi muvua munga nsongakaji muena Kristo muleje disanka didiye nadi mu dienzela Yehowa mudimu, ne mmunyi muudi mua kupeta disanka dia muomumue?

¹⁷ Lelu, bansonga ba bungi mbapete disanka mu disadila Yehowa. Tshilejilu, Lina, nsongakaji wa bidimu 15, udi wamba ne: “Tshiena ne bualu bundi mua kumvuila bundu to. Ndi ne bukole bua mubidi bualu ndi ngepuka dinua mfuanka ne diamba. Ndi mpeta mibelu ya mushinga mu tshisumbu idi ingambuluisha bua kukandamena malu mabi adi Satana unduisha nawu. Mpala wanyi udi wengelela ne disanka bua balunda bimpe bandi mpeta ku Nzubu wa Bukalenge. Bualu butambe buimpe budi se: ndi ne ditekemena ditambe buimpe dia kuikala ne muoyo wa tshiendelele pa buloba.”

¹⁸ Anu bu Lina, bansonga bena Kristo ba bungi badi baluangana mvita mikole ya ditabuja, ne bualu ebu budi bubapetesha disanka. Badi bajingulula ne: nansha mutubu misangu mikuabu ne ntatu, muoyo wabu udi ne tshipatshila tshilelela ne ditekemena dia bushuwa matuku atshilualua. Nunku, tungunuka ne kusadila Nzambi udi ukujingila diakalenga ne muoyo mujima. Sankisha mutshima wende, ne neakusankishe mpindieu ne tshiendelele!​—Musambu 5:11.

[Mêyi adi kuinshi]

Udi muvuluke anyi?

• Njiwu kayi iudi mua kutuilangana nayi idi ifumina kudi ‘mubi’ Satana?

• Mmunyi muudi mua kusankisha mutshima wa Yehowa?

• Mmunyi mudi Bible uleja ne: Yehowa udi ukulama?

• Ng’amue masanka kayi adi afumina ku disadila Yehowa?

[Nkonko ya dilonga]

[Kazubu/​Tshimfuanyi mu dibeji 13]

Muntu muakane kampanda udi ulenduka kakese

Asafa uvua muena Lewi muimbi wa misambu wa dikema mu ntempelo wa Yehowa mu Isalele wa kale. Wakenza ne misambu ivuabu bimba pavuabu badisangisha bua kutendelela. Kadi nansha muvuaye ne diakalenga edi, tshikondo kampanda, ngikadilu mubi wa binende bavua bashipa mikenji ya Nzambi ne bamueneka kabayi bapeta diakabi wakamukoka. Wakalua kuamba panyima ne: “Makasa anyi avua mambe kuselemuka, avua pabuipi ne kufinunuka, bua lubabu lumvua ngumvuila bena dikamakama pa kumona diakalenga dia bantu babi.”​—Musambu 73:2, 3, MMM.

Pashishe Asafa wakaya ku ntempelo wa Nzambi ne kusambila bua bualu abu. Pakapetululaye meji mimpe a mu nyuma, wakumvua ne: Yehowa udi ukina malu mabi ne mu matuku adi kumpala eku, bantu bimpe ne babi nebapole muntu ne muntu tshivuaye mukune. (Musambu 73:17-20; Galatia 6:7, 8) Bulelela, bantu babi badi muaba wa busenu. Ndekelu wa bionso, nebapone pikala Yehowa ne bua kubutula bukua-panu bubi ebu.​—Buakabuluibua 21:8.

[Bimfuanyi mu dibeji 15]

Yehowa udi ukujingila diakalenga, kadi tshipatshila tshia Satana ntshia kukubutula

[Tshimfuanyi mu dibeji 16]

Bansonga ba bungi badi bapeta disanka dipite bunene padibu basadila Yehowa pamue ne bena Kristo nabu