Tudi tukubikila ne disanka dionso

DIDIA dia Mukalenge divua Mfumu Yezu Kristo mubanjije kukadi bidimu bitue ku 2 000 ki mmuanda munene wa kale patupu to. Dikadi dishintulule nsombelu wa bantu bikole katshia badibanjija. Bu mudi malu adibu babale mu Evanjeliyo pa tshivua tshienzeke butuku abu mabalenge ku muoyo, bantu ba bungi mbadienzeje bua kuvuluka Didia dia Mukalenge mu mishindu kabukabu.

Mbiumvuike bua tshinyi badi bangata Didia dia Mukalenge ne mushinga, bualu Yezu Kristo nkayende wakambila bayidi bende bua kuikalabu basekelela tshibilu etshi pa tshibidilu. Wakabambila mu mêyi masunguluke ne: ‘[Tungunukayi ne] kuenza nunku bua kumvuluka.’​—Luka 22:19; 1 Kolinto 11:23-25.

Bushuwa, bua disekelela Tshivulukilu etshi kuikaladi bualu budi busankisha menemene, muntu udi ne bua kuikala mumanye bimpe diumvuija diatshi didibu baleje mu Bible. Kabidi, bidi ne mushinga bua kumanya tshidi Bible wamba bua dîba ne mushindu wa kusekelela tshibilu etshi.

Bua kutumikila dîyi dia Yezu, Bantemu ba Yehowa ba buloba bujima nebadisangishe pamue ku dilolo dia mu Disatu dia matuku 16 a ngondo muinayi mu 2003 emu, bua kuvuluka lufu lua Yezu. Netshikale tshikondo tshimpe tshia kukonkonona Bible ne kukolesha ditabuja ne dinanga diabu kudi Mukalenge Yezu Kristo. Wakamba ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Badi bakubikila ne disanka dionso bua kudisangisha nabu dilolo adi bua wewe pebe kukolesha ditabuja ne dinanga diebe kudi Yezu Kristo ne kudi Yehowa Nzambi Tatu wa mu diulu.