Divuluka Bantemu ba Yehowa bavuabu bashipe

MU DIA matuku 7 a ngondo muisatu, mu 2002, bakapatula patoke dibaya kampanda difunda miaku ya tshivulukilu mu tshimenga tshia Körmend ku est kua ditunga dia Hongrie. Divua difunda bua kuvuluka lufu lua Bantemu ba Yehowa basatu bavua bena Nazi bashipe mu 1945.

Bakapopela dibaya edi ku tshimanu tshia nzubu ya matuku aa ya tshibambalu tshidi tshilombola mudimu wa dijima dia kapia tshia mu Musesu wa Hunyadi, muaba uvuabu bashipele bamue bantu patoke. Bakenza dibaya edi bua kuvuluka ‘bena Kristo bavuabu bashipe mu ngondo muisatu mu 1945 bua pavuabu babenge kubuela mu busalayi bua malongesha a tshitendelelu tshiabu: Antal Hőnisch (1911-1945), Bertalan Szabó (1921-1945), János Zsondor (1923-1945).’

Bakabashipa ngondo ibidi tshianana kumpala kua Mvita Mibidi ya Buloba bujima kujikayi. Bua tshinyi bakashipa bena Kristo aba? Tshikandakanda tshikuabu tshia mu Hongrie tshidi tshiamba ne: “Hitler mumane kuangata bukalenge mu Allemagne, bakatuadija kukeba, ki ng’anu bena Yuda, kadi kabidi Bantemu ba Yehowa, bua kubasubisha, kubela mu maloko manene, ne kubashebeya pavuabu mua kubenga kulekela malu abu a tshitendelelu tshiabu. . . . Mu ngondo muisatu mu 1945, tshikisu e kutula kupuwa ku Est kua Hongrie. . . . Umue mushindu uvuabu bakisa Bantemu ba Yehowa uvua wa kubipata, kubatuma ku bukole mu matunga a kule kule ne kubashipa.”​—Vas Népe.

Programe wa dilamika dia dibaya edi uvua ne bitupa bibidi. Tshitupa tshia kumpala tshivua tshienzeke mu nzubu wa manaya a teyatre wa Batthyány muvuabu benze miyuki kudi bangamba-malu aba: Mulongeshi Szabolcs Szita, mulombodi wa Tshilaminu tshia malu a dishipa bena Yuda tshia mu Budapest; László Donáth, tshipuita-munua mfuanka wa Komite wa maneme a bantu, malu a tusumbu tukese ne a bitendelelu; ne Kálmán Komjáthy, muntu uvua mumone ne ende abidi dishipa adi ne ukadi mpindieu mumanyi wa malu a kale a mu tshimenga. Bantu bapite pa 500 bavuapu bakapitshila munkatshi mua tshimenga bua tshitupa tshibidi tshia programe: dilamika dia dibaya edi kudi József Honfi, Mulombodi wa tshimenga tshia Körmend.

Mu mukanda wa dilayangana uvua Ján Žondor (János Zsondor) mufunde, wakalomba bana babu bena Kristo bua kabanyingaladi. Wakafunda ne: “Ntshidi anu mvuluka mêyi a Yone adi mu Buakabuluibua 2:10 a ne: ‘Ushale ne [lulamatu] too ne ku lufu.’ (MML) . . . Ambila badi bashale kumbelu bua kabanyingaladi, bualu ndi mfuila bulelela, kadi ki mbu muntu mubi to.”

[Tshimfuanyi mu dibeji 32]

Bertalan Szabó

[Tshimfuanyi mu dibeji 32]

Antal Hőnisch

[Tshimfuanyi mu dibeji 32]

Ján Žondor