‘Semenayi pabuipi ne Nzambi’

‘Semenayi pabuipi ne Nzambi ne yeye neasemene pabuipi nenu.’​—YAKOBO 4:8.

1, 2. (a) Mbualu kayi butu bantu bamba misangu ya bungi? (b) Ndikankamija kayi diakafila Yakobo, ne bua tshinyi divua ne mushinga?

 PA MABENDELA a amue matunga anyi pa bilamba bia basalayi batu bafunde ne: “Nzambi udi netu.” Ne pa makuta a bijanja ne a mabeji bungi kabuyi kubala adiku lelu batu bafundepu ne: “Tudi beyemene Nzambi.” Bantu batu ne tshibidilu tshia kuamba mudibu bashemeje bulunda ne Nzambi. Kadi kuenaku umona ne: bua kuikala nende tshia bushuwa mu malanda a buena aa bidi bilomba malu a bungi pa kumbusha diakula peshi diafunda bua bantu baamone anyi?

² Bible udi uleja ne: kudi mushindu wa kuikala bulunda ne Nzambi. Bidi bikengela kudienzeja. Nansha bamue bena Kristo bela manyi ba mu bidimu lukama bia kumpala bavua pabu ne bua kukolesha malanda abu ne Yehowa Nzambi. Mutangidi muena Kristo Yakobo wakadimuija bamue bena Kristo bua kudimukilabu majinga abu a mubidi ne bua kabanyanguki mu nyuma. Mu mubelu wakabapeshaye au, wakabakankamija nenku: ‘Semenayi pabuipi ne Nzambi ne yeye neasemene pabuipi nenu.’ (Yakobo 4:1-12) Ntshinyi tshivua Yakobo musue kuamba pakafundaye ne: ‘semenayi pabuipi’?

3, 4. (a) Ntshinyi tshivua mêyi a ‘semenayi pabuipi ne Nzambi’ mua kuikala mavuluije bamue bantu bakabala mukanda wa Yakobo mu bidimu lukama bia kumpala? (b) Bua tshinyi tudi mua kuikala bajadike ne: kudi mushindu wa kusemena pabuipi ne Nzambi?

³ Yakobo wakatela mêyi avua bantu ba bungi bakabala mukanda wende ne bua kuikala bamanye bimpe. Mu Mikenji ya Mose bavua bapeshe bakuidi mêyi masunguluke a mushindu wa ‘kulua pepi’ anyi kusemena pabuipi ne Yehowa bua diakalenga dia bantu. (Ekesode 19:22) Nunku bantu bakabala mukanda wa Yakobo bavua mua kuikala bavuluke ne: kusemena pabuipi ne Yehowa kakuvua bualu bua bilele to. Yehowa ke mfumu udi ku mutu kua bionso mu diulu ne pa buloba.

⁴ Ku luseke lukuabu, anu muakamba mukonkononyi mukuabu wa malu a mu Bible, “dikankamija edi [didi mu Yakobo 4:8] didi dileja lungenyi luimpe menemene.” Yakobo uvua mumanye bimpe ne: Yehowa utu misangu yonso wambila bantu bapange bupuangane bua kusemenabu pabuipi Nende. (2 Kulondolola 15:2) Mulambu wa Yezu wakunzulula njila wa kusemena pabuipi ne Yehowa mu mushindu muimpe menemene. (Efeso 3:11, 12) Lelu, bakadi bunzuluile bantu miliyo mivule njila wa kusemena pabuipi ne Nzambi! Kadi ntshinyi tshitudi mua kuenza bua kupeta diakalenga dinene edi? Tukonkononayi mu tshikoso mishindu isatu itudi mua kusemena pabuipi ne Yehowa Nzambi.

Tutungunukayi ne ‘kupeta dimanya’ dia Nzambi

5, 6. Mmunyi mudi tshilejilu tshia nsonga Samuele tshileja tshidi ‘dipeta dimanya’ dia Nzambi diumvuija?

⁵ Bilondeshile Yone 17:3, Yezu wakamba ne: ‘Eu udi muoyo wa tshiendelele bua buobu bakumanye wewe, Nzambi umuepele mulelela, ne yeye uwakatuma, Yezu Kristo mene.’ Mushindu udibu bakudimune mvese eu mu Bible wa Traduction du monde nouveau mmushilangane ndambu ne Bible eu ne mikuabu ya bungi. Pamutu pa kuamba ne: ‘dipeta dimanya’ dia Nzambi, mu Bible ya bungi mbakudimune patupu muaku wa pa muanda wa se: “kumanya” Nzambi. Kadi bashikuluji ba bungi badi bamba ne: muaku udibu bangate mu tshiena-Gelika tshia ku ntuadijilu udi umvuija muanda udi wenda utungunuka, udi mua kufikisha muntu ku dimanyangana bikole ne mukuabu.

⁶ Kufika ku dimanya Nzambi bimpe kakuvua bualu bupiabupia mu tshikondo tshia Yezu to. Tshilejilu, Mifundu ya tshiena-Ebelu idi yamba ne: pavua Samuele nsonga, “kakanji kumanya Yehowa” to. (1 Samuele 3:7) Mêyi aa avuaku umvuija ne: Samuele uvua mumanye anu malu makese menemene pa bidi bitangila Nzambi wende anyi? Tòo. Baledi bende ne bakuidi bavua ne bua kuikala  bamulongeshe malu a bungi. Kadi bilondeshile mushikuluji mukuabu wa malu a Bible, muaku wa tshiena-Ebelu udibu bangate mu mvese eu badi mua “kuwangata bua kuakula bua malanda matambe kushema.” Samuele kavua muanji kufika ku dimanya Yehowa bimpe menemene bu muakaluaye kumumanya pavuaye wenza mudimu wa kumanyisha mêyi a Yehowa nansha. Pakatungunuka Samuele ne kukola, wakafika ku dimanya Yehowa bimpe, yeye kudia nende malanda makole a nsungansunga.​—1 Samuele 3:19, 20.

7, 8. (a) Bua tshinyi malongesha makole a mu Bible kaena ne bua kututekesha mu maboko? (b) Ng’amue malu male kayi a bulelela adi mu Dîyi dia Nzambi atudi ne bua kulonga?

⁷ Udiku wenda upeta dimanya dia Yehowa bua wewe kumona mua kumumanya bimpe menemene anyi? Bua kupeta dimanya edi, udi ne bua ‘kujinga’ biakudia bia mu nyuma bidi Nzambi ufila. (1 Petelo 2:2) Kusanki anu bua kuikala mumanye malongesha a ntuadijilu to. Keba bua kumanya amue a ku malongesha makole a mu Bible. (Ebelu 5:12-14) Udiku umona malongesha aa akutekesha mu maboko, wamba ne: mmatambe kukola anyi? Bikalabi nanku, vuluka ne: Yehowa udi “Muyishi [Munene].” (Yeshaya 30:20) Mmumanye mua kulongesha bantu bapange bupuangane malu male a bulelela. Ne udi mua kubenesha didienzeja diebe dia muoyo mujima diudi wenza bua wewe kumona mua kumvua bidiye ukulongesha.​—Musambu 25:4.

⁸ Bua tshinyi kuenaku mua kudikonkonuena nkayebe amue “malu male a Nzambi”? (1 Kolinto 2:10) Malu male aa ki mmianda ya mukodikodi bu mudibu mua kuamba kudi bena teoloji ne balombodi ba bitendelelu to. Mmalongesha a mushinga adi mua kutufikisha ku dilonga malu malenga adi atangila Tatu wetu wa dinanga. Tshilejilu, tshia-bupikudi anyi “bualu busokoka [bua tshijila]” ne bipungidi kabukabu bidi Yehowa muenze bua kubenesha bantu bende ne kukumbaja majinga ende, biena-bualu ebi ne bikuabu bia buena ebi mmalu mimpe adi muntu mua kudikebuluila mu mikanda ne kudilongela.​—1 Kolinto 2:7.

9, 10. (a) Bua tshinyi lutambishi ludi ne njiwu, kadi ntshinyi tshiatuambuluisha bua kuluepuka? (b) Pa bidi bitangila dimanya dia Yehowa, bua tshinyi tudi ne bua kuenza muetu muonso bua kuikala ne budipuekeshi?

⁹ Padi dimanya diebe dia malu mondoke a mu nyuma divula, dimukila njiwu idi dimanya adi  mua kukebesha, mmumue ne: lutambishi. (1 Kolinto 8:1) Lutambishi ludi ne njiwu, bualu ludi lusemeja bantu kule ne Nzambi. (Nsumuinu 16:5; Yakobo 4:6) Vuluka ne: muntu nansha umue kêna ne bua kuditambisha bua dimanya didiye nadi to. Tshilejilu, tangila mêyi aa mangatshila mu mêyi a mbangilu a mu mukanda kampanda udi wanyisha malu adi bena siyanse benze matuku adi panshi aa: “Patudi tufika ku dimanya malu a bungi, tudi tutamba kujingulula ne: tudi bamanye malu anu makese. . . . Malu onso atukadi balonge mmakese be patudi tuafuanyikija ne atudi katuyi banji kulonga.” Budipuekeshi bua mushindu’eu budi busankisha. Mpindieu, pa bidi bitangila dimanya ditambe bunene, mbuena kuamba ne: dimanya dia Yehowa Nzambi, bidi bitusaka bikole bua kuikala anu ne budipuekeshi. Bua tshinyi?

¹⁰ Mona amue mêyi adi Bible wamba bua Yehowa. “Meji ebe adi atamba bule.” (Musambu 92:5) ‘Dijingulula dia malu dia [Yehowa] kadiena ne kumfudilu kuadi.’ (Musambu 147:5) ‘Kakuena muntu udi mua kumanya kujingulula kua malu kua [Yehowa].’ (Yeshaya 40:28) ‘Monayi ndondo wa bubanji bua meji ne [dimanya] bia Nzambi!’ (Lomo 11:33) Bushuwa, katuakumanya malu onso adi atangila Nzambi to. (Muambi 3:11) Mmutulongeshe malu malenga a bungi, kadi nansha nanku netuikale amu ne malu bungi tshianana a kulonga. Ditekemena dia malu aa kadienaku ditusankisha ne ditulomba bua kuikala ne budipuekeshi anyi? Nunku patudi tulonga, tuikalayi tuangata dimanya ditudi nadi bu mushindu munene wa kusemena pabuipi ne Yehowa ne wa kuambuluisha bantu bakuabu bua kusemenabu pabu pabuipi nende, kadi ki mbu mushindu wa tuetu kudibandisha ku mutu kua bakuabu nansha.​—Matayo 23:12; Luka 9:48.

Leja dinanga diebe bua Yehowa

11, 12. (a) Dimanya ditudi tupeta pa bidi bitangila Yehowa didi ne bua kutusaka ku tshinyi? (b) Ntshinyi tshidi tshijadika ne: muntu mmunange Nzambi tshia bushuwa?

¹¹ Bushuwa, mupostolo Paulo wakaleja diumvuangana didi pankatshi pa dimanya ne dinanga. Wakafunda ne: “Ndi nsambila bua dinanga dienu divulangane misangu yonso, dinupeteshe dimanya dilelela ne lumvu luonso.” (Filipoi 1:9, MMM) Pamutu pa bulelela buonso bua mushinga mukole butudi tulonga pa bidi bitangila Yehowa ne majinga ende kutusaka bua kuditambisha, budi ne bua kukolesha dinanga ditudi nadi kudi Tatu wetu wa mu diulu.

¹² Bushuwa, bantu ba bungi badi bamba mudibu banange Nzambi kabatu bamunange menemene to. Badi mua kuikala bamba bulelela bua meji adi abavuila mu mitshima yabu. Meji a buena aa mmimpe, ne mmakanyine kalumbandi mene, nangananga padiwu apetangana ne dimanya dijalame. Kadi mu owu pa owu kaena mumue ne dinanga dilelela kudi Nzambi to. Bua tshinyi? Mona tshidi Dîyi dia Nzambi diamba bua dinanga edi: ‘Bua edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’ (1 Yone 5:3) Nunku dinanga dilelela bua Yehowa didi dimuenekela anu mu bienzedi bia butumike.

13. Mmunyi muatuambuluisha ditshina dia Nzambi bua kuleja ne: tudi banange Yehowa?

¹³ Ditshina dia Nzambi nedituambuluishe bua kutumikila Yehowa. Ditshina edi ne kanemu kakole kudi Yehowa bidi bifumina ku dimanya diende ditudi tupeta, ku dilonga malu adi atangila bunsantu buende, butumbi, bukole, buakane, meji ne dinanga biende bikena ndekelu. Ditshina edi didi ne mushinga wa bungi bua muntu kumonaye mua kusemena pabuipi ne Nzambi. Tangila tshidi Musambu 25:14 wamba: “Bulunda bujalame bua Yehowa budi kudi badi bamutshina.” Nunku bituikala tutshina bua kubungamija Tatu wetu wa mu diulu muena dinanga, tudi mua kusemena pabuipi nende. Ditshina dia Nzambi nedituambuluishe bua kuteleja mubelu wa meji udi mu Nsumuinu 3:6: ‘Umumanye yeye bimpe mu bienzedi biebe bionso, yeye neakululamijile njila yebe.’ Mbuena kuamba tshinyi?

14, 15. (a) Ng’amue mapangadika kayi atutu tuangata dituku dionso? (b) Mmunyi mutudi mua kuangata mapangadika adi aleja ne: tudi ne ditshina dia Nzambi?

¹⁴ Dituku dionso bitu bikukengela kuangata mapangadika manene ne makese. Tshilejilu, mmalu a mushindu kayi awayikila ne bena mudimu nebe, balongi benu ne bena mutumba bebe? (Luka 6:45) Newenze midimu yakupeshabu ne tshisumi anyi, peshi neuye nayi majetete-majetete? (Kolosai 3:23) Neulamate bantu badi banange Yehowa anu kakese peshi neulamate badi kabayi  bamunange mene, anyi neukebe bua kukolesha malanda ebe ne bantu badi basue malu a mu nyuma? (Nsumuinu 13:20) Ntshinyi tshiwenza, nansha mu malu a makese, bua kutantshisha malu a Bukalenge bua Nzambi kuyawu kumpala? (Matayo 6:33) Mêyi a mu Bible aa bu mudi atudi batele muaba eu owu mikale tshia bushuwa akulombola mu mapangadika audi wangata dituku dionso, nanku udi mumanye Yehowa ‘mu bienzedi biebe bionso.’

¹⁵ Bulelela, lungenyi elu ke ludi ne bua kuikala lulombola dipangadika dionso ditudi tuangata: ‘Ntshinyi tshidi Yehowa musue bua meme kuenza? Ntshinyi tshidi mua kutamba kumusankisha?’ (Nsumuinu 27:11) Kuleja ditshina dia Nzambi nunku mmushindu mulenga wa kuleja Yehowa dinanga. Ditshina dia Nzambi neditusake kabidi bua kuikala bakezuke mu nyuma, mu bienzedi ne ku mubidi. Vuluka ne: mu mvese umue umue mudi Yakobo ubela bena Kristo bua ‘kusemena pabuipi ne Nzambi,’ udi ubambila kabidi ne: ‘Nuenu bantu babi, nutokeshe mitshima yenu, nuenu bena mitshima ibidi.’​—Yakobo 4:8.

16. Patudi tupesha Yehowa bintu, ntshinyi tshitudi katuyi mua kuenza, kadi ntshinyi tshitudi mua kukokesha bua kuenza misangu yonso?

¹⁶ Bushuwa, bua kuleja ne: tudi banange Yehowa kabiena anu bikengela kudikanda ku malu mabi patupu to. Dinanga edi didi kabidi ditusaka bua kuenza malu mimpe. Tshilejilu, ntshinyi tshitudi tuenza bua kalolo kapite bungi menemene kadi Yehowa mutuleje? Yakobo wakafunda ne: ‘Kupa kuonso kuimpe ne dipa dionso diakane tshishiki bidi bifuma mu diulu, bipueka panshi bilua kudi Tatu wa [butoke].’ (Yakobo 1:17) Bulelela, patudi tupesha Yehowa bintu bitudi nabi, katuena tumuvuija mubanji to. Yeye mmuena bintu ne biuma bionso bidiku. (Musambu 50:12) Ne patudi tupesha Yehowa dîba dietu ne bukole buetu, katuena tuenza bualu budiye kayi yeye mua kukumbaja to. Nansha bu tuetu babenge bua kuyisha lumu luimpe lua Bukalenge bua Nzambi, uvua mua kuambila nansha mabue bua kuelawu mbila! Kadi bua tshinyi tudi ne bua kupesha Yehowa mpetu yetu, dîba ne bukole buetu? Tshia kumpala, bualu ke mushindu utudi tumuleja ne: tudi bamunanga ne mutshima wetu mujima, ne anyima wetu yonso, ne lungenyi luetu luonso ne bukole buetu buonso.​—Mâko 12:29, 30.

17. Ntshinyi tshidi mua kutusaka bua kupesha Yehowa bintu ne disanka ku muoyo?

¹⁷ Patudi tupesha Yehowa bintu, tudi ne bua kumupabi ne disanka, ‘bualu Nzambi udi musue muena kupa udi ufila ne disanka.’ (2 Kolinto 9:7) Dilongesha didi mu Dutelonome 16:17 didi mua kutuambuluisha bua kufila ne kalolo: ‘Muntu yonso neafile bintu bidiye nabi bu muakanuvudijila Yehowa, Nzambi wenu disanka.’ Patudi tumona mushindu udi Yehowa mutuleje kalolo, muoyo udi utuvuila bua kumupesha bintu ku budisuile ne disanka ku mutshima. Kufila kua nunku kudi kusankisha mutshima wende, anu mudi dipa dikese dia muana disankisha muledi wende. Kuleja dinanga dietu mushindu’eu nekutusemeje pabuipi ne Yehowa.

Kolesha bulunda buebe ne Nzambi mu masambila

18. Bua tshinyi mbimpe kukonkonona mushindu wa kuenza bua kulengeja masambila etu?

¹⁸ Mêba atudi tusambila pa nkayetu ntshikondo tshia mushinga mukole tshitudi mua kuambila Tatu wetu wa mu diulu malu etu nkayetu. (Filipoi 4:6) Bu mudi disambila dikale mushindu munene wa kusemena pabuipi ne Nzambi, nanku mbimpe kuanji kutukija bua kukonkonona tshidi masambila etu. Ki mbua se: adi ne bua kuikala a pa buawu bua mêyi adimu ne mushindu utudi tuenza to, kadi adi ne bua kuikala ne malu malelela adi umbukila mu mutshima. Mmunyi mutudi mua kulengeja masambila etu?

19, 20. Bua tshinyi mbimpe tuetu kuelangana meji kumpala kua kusambila, ne ng’amue malu kayi adi makanyine atudi mua kuelangana meji?

¹⁹ Tudi mua kuanji kuelangana meji kumpala kua kusambila. Tuetu tuelangana meji kumpala, tudi mua kuvuija masambila etu masunguluke ne a nsongo, nenku netuepuke tshilele tshia kuambulula biambilu bikadi bilue bia tshibidilu bidi bitufikila diakamue mu lungenyi. (Nsumuinu 15:28, 29) Pamu’apa dielangana meji bua amue malu akamba Yezu mu disambila diende dia tshilejilu ne pashishe dikonkonona mushindu udiwu apetangana ne etu malu didi mua kutuambuluisha. (Matayo 6:9-13) Tshilejilu, tudi mua kudiebeja bua kumanya wetu mushindu mukese utuikala mua kuenza disua dia Yehowa pa buloba apa. Tudiku mua kuleja Yehowa dijinga dietu ditudi nadi dia kuikala ne mushinga  kudiye ne kumulombaku bua atuambuluishe bua kuenza midimu yonso idiye mutupeshe anyi? Tunyinganyinga bua kupeta bintu tudiku tututatshisha anyi? Mmpekatu kayi itudi tukeba bua batubuikidile, ne nnganyi utudi ne bua kutamba kufuila luse? Mmateta kayi adi atutatshisha, ne tudiku bajingulule ne: tudi tujinga ne muoyo mujima bua Yehowa atukube mu mateta aa anyi?

²⁰ Tudi kabidi mua kuelangana meji bua bantu batudi bamanye bimpe ne: badi dijinga ne diambuluisha dia Yehowa mu bualu kampanda. (2 Kolinto 1:11) Kadi katupu muoyo bua kuela Yehowa tuasakidila to. Tuetu banji kuelangana meji bua bualu ebu, tudi mua kuvuluka malu a kuelela Yehowa tuasakidila ne a kumutumbishila dituku dionso bua malu mimpe bungiwu adiye utuenzela. (Dutelonome 8:10; Luka 10:21) Kuenza nunku kudi kabidi mua kutuambuluisha bua kuangata muoyo bimpe ne kuikala ne dianyisha.

21. Mbilejilu kayi bia mu Bible bia kulonga bidi mua kutuambuluisha patudi tusambila Yehowa?

²¹ Dilonga didi kabidi mua kulengejija masambila etu. Kudi masambila a pa buawu avua menza kudi balume ne bakaji ba lulamatu adibu bafunde mu Dîyi dia Nzambi. Tshilejilu, bituikala ne lutatu kampanda lukole, luikale lutupesha tumue tunyinganyinga ne buôwa bua nsombelu wetu anyi wa bananga betu bakuabu, tudi mua kubala disambila diakenza Yakoba pa bidi bitangila disangila diende ne Esau, muanabu uvua ukeba kudisombuela. (Genese 32:9-12) Anyi tudi mua kulonga disambila diakenza Mukalenge Asa pavua basalayi bena Atiopa batue ku muliyo mujima balue bua kuela bantu ba Nzambi mvita. (2 Kulondolola 14:11, 12) Bituikala tumvua bitulubakaja bua bualu kampanda budi buobu buenzeke, bufuane kuyangisha lumu lua Yehowa, disambila diakenza Eliya kumpala kua batendeledi ba Bâla pa Mukuna wa Kâmele didi mua kutuambuluisha bikole, anu mudi kabidi disambila diakenza Nehemiya bua tshimenga tshia Yelushalema tshivua tshinyanguke bibi. (1 Bakelenge 18:36, 37; Nehemiya 1:4-11) Dibala ne dielangana meji bua masambila a buena aa didi mua kukolesha ditabuja dietu ne kutupesha ngenyi ya mushindu mutambe buimpe wa kukuatshila Yehowa malu adi atutatshisha.

22. Mvese wa tshidimu tshia 2003 mmvese kayi, ne nkonko kayi itudi ne bua kudiebeja ku musangu ne ku musangu mu tshidimu etshi tshijima?

²² Bushuwa, kakuena lumu nansha tshipatshila tshidi tshipite ditumikila mubelu wa Yakobo wa  ‘kusemena pabuipi ne Nzambi’ to. (Yakobo 4:8) Tusemenayi pabuipi nende pa kuvudija dimanya dietu dia Nzambi, pa kukeba bua kumuleja dinanga dikole, ne pa kudia nende bulunda mu masambila etu. Mu tshidimu tshia 2003 tshijima, tushale bavuluke mêyi adi mu Yakobo 4:8 (mvese wetu wa tshidimu), ne tutungunukayi ne kudikonkonona bua kumanya bituikala tusemena bushuwa pabuipi ne Yehowa. Kadi netuambe tshinyi bua tshitupa tshia ndekelu tshia mêyi au? Mmu mushindu kayi wikala Yehowa mua ‘kusemena pabuipi netu,’ ne mmabenesha kayi atuapeta? Tshiena-bualu tshidi tshilonda netshiakule bua bualu ebu.

Udi muvuluke anyi?

• Bua tshinyi kusemena pabuipi ne Yehowa mbualu bua kuangata ne mushinga wa bungi?

• Mbimue bipatshila kayi bitudi mua kudifundila pa bidi bitangila dipeta dia dimanya dia Yehowa?

• Mmunyi mutudi mua kuleja ne: tudi banange Yehowa bushuwa?

• Mmu mishindu kayi mutudi mua kukolesha bulunda buetu ne Yehowa mu disambila?

[Nkonko ya dilonga]

[Lungenyi lunene lua mu dibeji 12]

‘Semenayi pabuipi ne Nzambi, ne yeye neasemene pabuipi nenu’ ke tshikale mvese wa tshidimu tshia 2003.​—Yakobo 4:8.

[Tshimfuanyi mu mabeji 8, 9]

Pakakola Samuele, wakafika ku dimanya Yehowa bimpe menemene

[Tshimfuanyi mu dibeji 12]

Disambila diakenza Eliya pa Mukuna wa Kâmele didi tshilejilu tshimpe buetu tuetu