Koleshayi maboko

MU Bible, mbatele maboko ne bianza misangu ya bungi. Mudi ngakuilu idi itela maboko ne bianza mu mishindu kabukabu. Tshilejilu, bianza bitoke bidi bileja muntu udi kayi ne bualu. (2 Samuele 22:21; Musambu 24:3, 4) Kubulula tshianza kudi kumvuija kuleja bantu kalolo. (Dutelonome 15:11; Musambu 145:16) Badi bamba bua muntu udi uteka muoyo wende mu njiwu ne: mmuteke muoyo wende mu tshianza tshiende. (1 Samuele 19:5) Kutekesha maboko kudi kumvuija kuteketa mu mikolo. (2 Kulondolola 15:7) Ne kukolesha maboko a muntu nkumukankamika ne kumupesha bukole bua kuenza bualu kampanda.​—1 Samuele 23:16.

Lelu bidi ne mushinga wa bungi bua tuetu kukolesha mu maboko muetu. Tudi mu tshikondo tshia ‘malu makole.’ (2 Timote 3:1) Tuetu bantu, patu bualu kampanda bututonda, tutu tupeta meji a kubilekela ta kupingana tshianyima, anyi kutekesha maboko. Pa tshibidilu, tutu tumona bana balekela kalasa, balume bashiya mêku abu ne bamamu balekela bana babu. Tuetu bena Kristo tudi ne bua kukolesha maboko etu bua kutantamena ntatu itudi tupeta mu mudimu utudi tuenzela Nzambi. (Matayo 24:13) Patudi tuenza nunku, tudi tusankisha mutshima wa Yehowa.​—Nsumuinu 27:11.

Mushindu wa kukolesha maboko

Bena Yuda ba mu tshikondo tshia Ezela bavua ne bua kukolesha maboko abu bua kujikija dibakulula dia ntempelo wa Yehowa mu Yelushalema. Mmushindu kayi uvuabu bakoleshe maboko abu? Bible udi ulonda ne: ‘Bakadia [mampa] kaayi ne luevene ne disanka matuku muanda-mutekete; bualu bua Yehowa wakabavudijila disanka, wakakudimuija mutshima wa mukalenge wa Ashû kudibu bua kukoleshaye maboko abu mu mudimu wa nzubu wa Nzambi, Nzambi wa bena Isalele.’ (Ezela 6:22) Mbimueke patoke ne: Yehowa wakajula ‘mukalenge wa Ashû’ ku diambuluisha dia bukole buende buenzeji bua alekelele tshisamba tshia Nzambi bua kualukilatshi, ne wakajula lungenyi lua bantu bua bajikije mudimu uvuabu babange.

Kunyima, pakakengelabi kulongolola bimanu bia Yelushalema, Nehemiya wakakolesha maboko a bana babu bua kuenzabu mudimu au. Tudi tubala ne: ‘Ngakabambila bua tshianza tshia Nzambi wanyi tshiakadi tshimpe kundi, ne bua mêyi a mukalenge akangambilaye. Bobu bakamba ne: Tubikayi, tuasayi. Nunku bakakolesha maboko abu bua mudimu eu muimpe.’ Ne maboko makolesha, Nehemiya ne bana babu bena Yuda bakibakulula bimanu bia Yelushalema mu matuku 52 tshianana!​—Nehemiya 2:18; 6:9, 15.

Bia muomumue, Yehowa udi ukolesha maboko etu bua kuyisha lumu luimpe lua Bukalenge. (Matayo 24:14) Udi wenza nunku pa ‘kutupesha bukole bua kuenza malu onso adi mimpe bua kukumbaja tshidiye musue.’ (Ebelu 13:21, MML) Mmutupeshe bintu bia mushinga mukole bia kuenza nabi mudimu. Tudi ne Bible ne mikanda, bibejibeji, broshire, trakte bia kulonga nabi Bible; tudi kabidi ne bande ya bisanji ne filme ya video bua kuyisha bantu mu buloba bujima. Bushuwa, mikanda  yetu idi mu miakulu mipite pa 380. Ku diambuluisha dia bisangilu bia tshisumbu kabidi, mpuilu ne mpungilu, Yehowa udi utupesha dilongesha diende ne mushindu wa kuenza mudimu bimpe ne biamu ebi bua kukumbaja mudimu wetu.

Nansha mudi Yehowa ukolesha maboko etu mu mishindu ya bungi, mmusue bua tudifile petu ne muetu muonso. Vuluka tshivua muprofete Elisha muambile Mukalenge Yehoasha, uvua mulue kumulomba diambuluisha bua kuluisha bena Sulia. Elisha wakambila mukalenge au bua angate miketa ndambu ne kuyasa mu buloba. Bible udi ulonda ne: ‘Yeye wakasa misangu isatu, wakalekela. Muntu wa Nzambi wakadi nende tshiji, wakamuambila ne: Wakadi ne bua kuasa misangu itanu nansha misangu isambombo; nunku wakadi kupita bena Sulia bukole too ne pauvua ubabutula bonso; kadi katataka wewe neupite bena Sulia bukole anu misangu isatu.’ (2 Bakelenge 13:18, 19) Bu muvua Yehoasha kayi mudifile ne tshisumi, uvua ne bua kutshimuna bena Sulia anu misangu mibadika.

Dilongesha dia muomumue didi ditutangila tuetu petu bituikale basue kukumbaja tshidi Yehowa mutupeshe bua kuenza. Pamutu pa kudilakana bua bipumbishi bidi mu njila wetu anyi bua mudi mudimu muikale mukole, tudi ne bua kuwenza ne tshisumi ne muoyo mujima. Bidi bikengela tuetu kukolesha maboko ne kukeba diambuluisha kudi Yehowa.​—Yeshaya 35:3, 4.

Yehowa neakoleshe maboko etu

Yehowa kakupanga kutuambuluisha ne kukolesha maboko etu bua kuenza disua diende to. Bulelela, Nzambi kakuenza tshishima ne kutukumbajila malu onso to. Mmusue bua tudifile petu: kuikala kubala Bible dituku dionso, kulongolola bisangilu ne kubuelamu pa tshibidilu, kuenza mudimu wa buambi pa tshibidilu ne kumusambila misangu yonso. Bituikala tudifila ne lulamatu ne tshisumi patutshidi ne mushindu apa, Yehowa neatupeshe bukole bua kuenza tshidiye ujinga bua tuenze.​—Filipoi 4:13.

Tangila tshilejilu tshia muena Kristo umue wakafuisha mukajende ne mamuende mu tshidimu tshimue. Kanyinganyinga kende kakayi kanji kuenza matuku, mukaji wa muanende wakanyema muanende ne kulekela njila wa Buena-Kristo. Muanetu eu wakamba ne: “Ngakalonga ne: katuena mua kusungula mateta etu anyi dîba didiwu atufikila peshi bungi bua misangu idiwu atufikila nansha.” Mmushindu kayi udiye upeta bukole bua kutantamena malu aa? Udi wamba ne: “Disambila ne dilonga dia pa nkayanyi ke bidi bimpandule. Ne dikuatshisha dia bana betu ba mu nyuma ndikoleshe ku muoyo bikole. Tshidi ne mushinga mukole ntshia se: ndi mufike ku dimona mushinga wa kuikala ne malanda mimpe ne Yehowa kumpala kua ntatu kufikayi.”

Nansha wewe mupete malu a mushindu kayi mu nsombelu webe, ikala mudisuike bua kueyemena Yehowa muebe muonso ne enza mudimu bimpe ne bionso bidiye utupeshe bua kukolesha maboko ebe. Nunku newenzele Yehowa mudimu mutambe buimpe ne nenku kutumbisha ne kunemeka dîna diende dia mushinga mukole.​—Ebelu 13:15.

[Tshimfuanyi mu dibeji 31]

Bu muakapanga Yehoasha bua kudifila ne tshisumi, wakatshimuna bena Sulia anu misangu mibadika