Bamanyishi ba Bukalenge badi balonda

Nzubu ya Bukalenge miunzuluila bantu bonso

PAVUA Yezu ulongesha bayidi bende mudimu wa patoke, wakabambila bua kuyisha ‘pa mitu pa nzubu.’ (Matayo 10:27) Eyowa, mudimu wabu wa bena Kristo, bavua ne bua kuwenzela patoke, ku mêsu kua bantu bonso. Pa kulonda mubelu eu, mudimu wa Bantemu ba Yehowa udi pawu wenzeka patoke. Diwenza patoke nunku ndibambuluishe bua kutantamena buluishi ne kuenda lumu luimpe.

Nansha mudi bisangilu bia Bantemu ba Yehowa bikale bua bantu bonso, dibendeshila lumu lubi ditu difikisha bamue bantu ku dibenga bua kubuela mu Nzubu wa Bukalenge. Ke tshidi tshienzeka mu ditunga dia Finlande. Banga batu ne buôwa bua kuya miaba idibu kabayi bamanye bantu. Patubu basa Nzubu wa Bukalenge mupiamupia anyi balongolola wa kale, batu pa tshibidilu bunzulula biibi bia nzubu eu bua bantu bonso badi basue balue kumumona. Batu pamuapa badienzeja bua kubikila bena mutumba nabu bua kulua kumona Nzubu wa Bukalenge ne kumanya mutu mudimu wa Bantemu wenzeka.

Mu tshitupa kampanda, Bantemu bakalongolola bua kufila bibejibeji dituku dimue ne divuabu ne bua kubanjija Nzubu wabu wa Bukalenge. Bantemu babidi bakasangana tatu kampanda mukulakaje wakabambila ne: uvua munange kubala Tshibumba tshia Nsentedi ne Réveillez-vous! Bana betu abu bakamuambila bua dibanjija dia Nzubu wa Bukalenge ne kumulombabu bua kuyaye nabu kuoku. Tatu au kuamba ne: uvua usanka bua kuya nabu. Mukajende uvua mumvue muyuki wabu au wakela lubila ne: “Kanunshiyi to!”

Pakabuela tatu au mu Nzubu wa Bukalenge, wakakenzakana e kuamba ne: “Ki mmufike to. Aka, mmuimpe be ne munda mmutoke too! Bavua bangambile ne: Nzubu wa Bukalenge uvua ne bua kuikala mufike!” Tatu au ne mukajende bakashala mutantshi ne kulombabu mikanda ivuabu badije muaba au.

Bena mu tshisumbu kampanda bakajinga kumanyisha mu tshikandakanda tshikuabu dituku dia dibanjija dia Nzubu wabu wa Bukalenge divuabu ne bua kunzulula biibi bia nzubu eu. Pakumvua mutangidi wa tshikandakanda atshi bualu abu, wakalomba bua bafunde tshiena-bualu tshivua tshiakula bua muanda au. Bana betu bakitaba, ne kunyima kua matuku makese, tshiena-bualu tshimpe tshia tshitupa tshijima tshia dibeji tshiakapatuka mu tshikandakanda atshi, tshiakula bua muanda uvua ne bua kuenzeka au ne bua midimu ya Bantemu ba Yehowa ba muaba au.

Pakapatuka tshiena-bualu etshi, muena mutumba ne Ntemu kampanda mukulakaje wakamuambila ne: “Lelu mu tshikandakanda muvua tshiena-bualu tshimpe tshia dikema tshidi tshiakula bua Bantemu ba Yehowa!” Muanetu wa bakaji eu wakamuyisha ne kumupeshaye broshire wa Bantemu ba Yehowa ba tshikondo tshietu etshi.

Pa kumbusha ditokesha imue ngenyi mibi ivua nayi bantu pa bidi bitangila Bantemu ba Yehowa, malu akalongololabu a nunku adi atangila matuku avuabu ne bua kushiya biibi bia Nzubu ya Bukalenge mipiamipia biunzula bua bantu buonso ne diyibanjija mmapeshe bamanyishi bukole bua kubikila bantu bavule bua kulua kubuela mu bisangilu bia tshisumbu. Bushuwa, mu matunga mavule (ne mu Finlande), bantu mbafike ku dijingulula ne: Nzubu ya Bukalenge ya Bantemu ba Yehowa itu miunzuluila bantu bonso.