Busambi mu bikondo bia ntatu

NGUMU ya lelu kayena mua kusanguluja bantu nansha. Muntu kampanda wakafunda ne: “Bu mudi malu adi enzeka mpindieu mikale mabi menemene kaayi asankisha, misangu ya bungi tutu tuelakana bua kuteleja anyi kutangila ngumu ya pa diba isambombo wa dinda.” Buloba mbûle tente ne mvita, tshikisu, makenga, dishipangana ne masama: malu mabi adi mua kutukuata mu matuku makese emu anyi akadi mamane kutukuata.

Bible wakadianjila kuamba bua nsombelu wa nunku. Pavua Yezu wakula bua matuku etu aa, wakaleja ne: kuvua ne bua kuikala mvita minene, bipupu bia masama, biyole bia nzala ne bikumina. (Luka 21:10, 11) Mupostolo Paulo wakafunda bia muomumue pa bidi bitangila “matuku makole,” avua bantu ne bua kuikala bena lonji, banangi ba mfranga ne kabayi banange malu mimpe. Wakabikila matuku au ne: “matuku a nshikidilu.”​—2 Timote 3:1-5, Mukanda wa Mvidi Mukulu [Katolike, MMM].

Nenku, patudi tutangila nsombelu wa pa buloba, kudi difuanangana kampanda pankatshi pa ngumu ya lelu ne malu avua Bible mumane kuleja. Kadi, difuanangana edi didi dimanyina anu pinapu. Bible udi uleja malu makuabu adi ngumu kayiyi ileja to. Ku diambuluisha dia Dîyi dia Nzambi diakafundishaye ku nyuma wende, tudi tufika ku diumvua ki ng’anu bua tshinyi malu mabi adi bungi menemene to, kadi kabidi muikala matuku atshilualua.

 Mushindu udi Nzambi umona malu mabi

Bible udi umvuija mushindu udi Nzambi umona nsombelu wa lutatu udiku mu matuku etu aa. Nansha mukavuaye mudianjile kumona bimvundu bidiku mpindieu, Nzambi kêna ubianyisha anyi ujinga kubilekela bitungunuka kashidi to. Mupostolo Yone wakafunda ne: “Nzambi udi dinanga.” (1 Yone 4:8) Yehowa udi utabalela bantu bikole ne mmukine bubi bua mushindu kayi wonso. Mbikumbanyine menemene bua tuetu kusemena kudi Nzambi bua kupeta busambi, bualu Nzambi udi muimpe ne udi umvuilangana ne kabidi udi ne bukole ne mmusue bua kumusha bubi buonso pa buloba. Mufundi wa Misambu wakafunda ne: ‘[Mukalenge wa mu diulu musungula kudi Nzambi] neapandishe mukengedi wa bintu padileye kudiye, neapandishe muntu mupele udi kayi ne mukuatshishi. Neafuile udi mutekete ne udi ukengela dikuatshisha luse, neasungile mioyo ya bakengedi. Neapikule mioyo yabu ku tshinyangu ne malu makole, ne mashi abu neikale tshintu tshia mushinga mukole ku mêsu kuende.’​—Musambu 72:12-14.

Kadi wewe udi umvuila badi bakenga luse anyi? Pamu’apa udi ubumvuilalu. Diditeka pa muaba wa bakuabu nngikadilu wakatupesha Yehowa bualu tudi bafukibue mu tshimfuanyi tshiende. (Genese 1:26, 27) Nenku, tudi mua kuikala ne dieyemena bualu makenga a bantu kaena apanga kutonda Yehowa to. Yezu (uvua mumanye Yehowa bimpe menemene kupita munga muntu) wakalongesha ne: Yehowa udi uditatshisha bikole buetu tuetu ne mmûle tente ne bulenga ne dinanga.​—Matayo 10:29, 31.

Bufuki nkayabu budi bujadika ne: Nzambi udi utabalela bukua-bantu. Yezu wakamba ne: Nzambi ‘utu wabandishila bantu babi ne bantu bimpe dîba, yeye kabidi utu watumina bantu bakane ne bantu babi mvula.’ (Matayo 5:45) Mupostolo Paulo wakambila bantu ba mu tshimenga tshia Luseta ne: ‘[Nzambi] kakashala kayi ne ntemu; wakanuenzela bimpe, wakanupa mvula ne bidimu bia kuvudija biakudia bifume mu diulu, wakuuja mitshima yenu tente ne bidia ne disanka.’​—Bienzedi 14:17.

Bujitu bua bubi budi pambidi pa nganyi?

Mbia mushinga pavua Paulo muambile kabidi bantu ba mu Luseta ne: ‘Mu bikondo bia kunyima [Nzambi] wakitabuja bua bisamba bionso bia bende biende mu njila yakadi mitshima yabu misue.’ Nanku, bisamba (anyi bantu nkayabu) ke bidi ne bujitu bua malu mabi a bungi adibi bipeta. Tshilumbu katshiena kudi Nzambi to.​—Bienzedi 14:16.

Kadi bua tshinyi Yehowa udi ulekela malu mabi atungunuka ne kuenzeka? Neikaleku ne bua kuenza bualu kampanda pa bidi bitangila malu mabi anyi? Tudi mua kupeta mandamuna a nkonko eyi anu mu Dîyi dia Nzambi nkayamu. Bualu diandamuna nditangila menemene muntu mukuabu wa mu nyuma ne nditangila kabidi tshilumbu tshivuaye mujudije mu miaba ya mu nyuma.

[Bimfuanyi mu dibeji 4]

Bantu mbamanye kuditeka pa muaba wa bakuabu. Makenga a bantu adi mua kupanga kutonda Nzambi anyi?

 [Mêyi a dianyisha bua bimfuanyi mu dibeji 2]

TSHIZUBU: Katumba ka mvita: FOTO wa ONU 158181/​J. Isaac; tshikumina: San Hong R-C Picture Company

[Mêyi a dianyisha bua tshimfuanyi mu dibeji 3]

Muana muletele ne nzala: FOTO wa ONU 146150 KUDI O. MONSEN