Mushindu udi bantu badifila lelu kudi “bansantu”

“Nutshidi bavuluke tshikondo tshituvua tuela meji ne: tudi batshioke ne diumvua malu a bantu badi bende lumu anyi? Kabivua nanku bua bena Amerike 4 200 000 bavua batangile ku TV dijiika dia Mamu Teresa mu dituku dia 13, ngondo wa tshitema to. Katshia wafua mu dia matuku 5 ngondo wa tshitema, bantu bungi tshianana mbalombe ku Vatican bua kumutekabu munsantu. Bantu bakese patupu ke badi belakana bua dikumbana dia bualu ebu.”​—Sun-sentinel, États-Unis, dia 3 Kasuamansense, 1997.

BANTU ba bungi batu bamona mudimu wa diambuluishangana uvua Mamu Teresa misionere wa bena Katolike eu muenze bu diumvuija dilelela dia tshidi bunsantu. Nansha mu bitendelelu bikuabu mutu pamu bamue bantu badi bende lumu. Kadi, imue misangu, nansha umue wa kudibu ki mmumanyike patoke bu aba badi Ekeleziya Katolike muteke bansantu to.

Papa Jean Paul muibidi mmuteke bantu batue ku 450 bansantu mu tshikondo tshidiye papa, ne bungi ebu mbupite bua aba bavuabu bateke bansantu kudi ba-papa bakuabu bonso basangisha mu bidimu bia 1900. * Bua tshinyi bantu badi batamba kunemekela “bansantu” nunku, pabi bavule ba kudibu mene kabayi nansha babamanye kudi bena Katolike ba bungi?

Muena malu a teoloji Lawrence Cunningham (wa ku iniversite wa mu tshimenga tshia Notre Dame) udi umvuija ne: “Lungenyi lua se: bansantu badi mua kuikala pa buloba lutu lulengelela bantu bikole. Dimanya dia ne: bansantu batuku didi dileja ne: kudi mushindu wa kuikala ne lumu nansha lelu’eu.” Batu bamba kabidi ne: badibu babikila ne: bansantu batu badia malanda a pa buawu ne Nzambi, adi enza bua balue bakuidi bimpe ba aba badi ne muoyo. Patubu bapeta bishadile ta bimue bitupa bia mubidi wa “munsantu” kampanda, batu batuadija kubinemekela bikole, bela meji ne: bidi ne bukole kampanda.

Mukanda wa Kateshisimu wa mu Tshipangu tshia mu tshimenga tshia Trente, uvuabu bapatule mu bidimu bia 1500 bua kujadika malongesha a bena Katolike muvua dipangadika edi: “Mbiakanyine bua tuetu kuamba ne: dinemekela dia bansantu ‘badi balale mu Mukalenge,’ dibalomba bua batuakuile kudi Nzambi ne dinemekela bishadile biabu ne butu bua mibidi yabu miosha mmalu adi kaayi apuekesha butumbi bua Nzambi nansha kakese, kadi adi abuvudija bilondeshile mudi ditekemena dia muena Kristo udi wenza malu aa dikoleshibua ne udi udiumvua bimusaka bua kuidikija ngikadilu milenga ya bansantu abu.” (Catéchisme du Saint Concil de Trente, 1905) Bushuwa, bena Kristo balelela mbasue kuikala ne nsombelu muimpe, kusambila Nzambi bu mudibi bikengela ne kupeta diambuluisha diende. (Yakobo 4:7, 8) Kadi bilondeshile Dîyi dia Nzambi, mbanganyi badi bansantu balelela? Ne ntshinyi tshidibu bakumbaja?

[Mêyi adi kuinshi]