Bamanyishi ba Bukalenge badi balonda

‘Dîyi dia Nzambi didi ne bukole’

MU TSHIDIILA tshia Jamaïque mu Antilles mutu munya ukenuka bikole, bantu ba bungi batu babala Bible. Nangananga Bible wa mu Anglais (wa King James Version) udi pabuipi ne ku nzubu yonso, ne bamue bantu mbafike too ne ku dimona ne: ‘Dîyi dia Nzambi didi ne muoyo ne bukole.’ (Ebelu 4:12) Bukole ebu budi mua kushintulula bantu, anu mudi bualu budi bulonda ebu buleja.

Muntu mukuabu diende Cleveland utshivua umbukilaku ku mudimu pakaya Bantemu ba Yehowa kuende bua kumuyisha. Kunyima kua umue wa ku Bantemu abu mumane kumuyisha amue malu a mu Mukanda wa Nzambi, wakamushila mukanda wa kulonga nawu Bible wa Dimanya didi difikisha ku muoyo wa kashidi. Cleveland kavua mumanye ne: Dîyi dia Nzambi divua mua kuikala ne bukole bua bungi mu nsombelu wende to.

Cleveland uvua ne tshibidilu tshia kusambila misangu isatu ku dituku, ulomba Nzambi bua amuambuluishe bua kumanya mushindu muimpe wa kumutendelela. Uvua mutuishibue ne: baledi bende kabavua batendelela Nzambi mu mushindu muimpe to, kadi biakamutonda pakakonkononaye malu a bitendelelu bikuabu. Nansha mukavuaye mumvue lumu lua Bantemu ba Yehowa, kavua witaba bua se: bavua ne bulelela to. Nansha muvuaye welakana, wakitaba bua kulonga Bible ne Ntemu wakayikila nende au. Bua tshinyi? Bualu uvua musue kutuisha Bantemu abu ne: bavua bena dishima!

Cleveland kuluaye kumanya anu mu matuku makese ne: Nzambi kavua wanyisha bua muvuaye musombe mu tshindumba ne bakaji babidi to. (1 Kolinto 6:9, 10) Kunyima kua yeye mumane kulonga misangu ibidi, wakapeta dikima e kulekelanganaye ne bakaji abu. Wakatuadija kabidi kubuela mu bisangilu ku Nzubu wa Bukalenge. Kadi adi diakalua diteta dikuabu.

Cleveland uvua mudifile bikole mu tshisumbu tshia banayi ba ndundu mu tshimenga tshiabu, ne manaya au avua amupangisha bua kubuela mu bisangilu. Wakenza tshinyi? Nansha muvuabu bamutatshisha kudi banayi nende, antrenere wabu ne balunda bende, Cleveland wakangata dipangadika dia kupatuka mu tshisumbu tshia ndundu atshi. Bulelela, Dîyi dia Nzambi diakatuadija kuleja bukole buadi, kubanga kumusaka ku malu mimpe!

Bukole bua Dîyi dia Nzambi buakamueneka kabidi pakatuadija Cleveland kumanyisha bantu bakuabu dimanya dia mu Bible divuaye mupete. (Bienzedi 1:8) Nunku babidi ba ku bavuaye unaya nabu ndundu mu tshisumbu atshi bakatuadija kubuela mu bisangilu bia Bantemu ba Yehowa. Pakakumbaja Cleveland malu malomba bua kulua mumanyishi wa lumu luimpe, wakapeta disanka dia bungi mu mudimu wa kuyisha, e kutuadija kuambuluisha bantu bakuabu ne Dîyi dia Nzambi.

Bu muakatungunuka bukole bua Dîyi dia Nzambi ne kumusaka, ndekelu wa bionso Cleveland wakatambula mu mâyi bua kuleja ne: uvua mudilambule kudi Yehowa, ne mpindieu mmupete mushindu wa kuenzela Nzambi mudimu ku dîba ne ku dîba ne kabidi udi musadidi wa mudimu mu tshisumbu.

Mu Jamaïque ne mu buloba bujima, bantu binunu ne binunu mbafike ku dimona bushuwa ne: Dîyi dia Nzambi “didi ne muoyo ne bukole.”

[Karte/​Tshimfuanyi mu dibeji 8]

(Bua kumona malu bimpe, tangila mu mukanda)

JAMAÏQUE

[Mêyi a dianyisha]

Karte ne dibulunge buloba: Mountain High Maps® Copyright © 1997 Digital Wisdom, Inc.