Tudi tupeta mabenesha mavule patudi tuenda mu njila ya Yehowa

UKADIKU muye kuendakana ku mikuna anyi? Nanku wakadiumvua bumue bu uvua ku lusongo lua buloba. Uvua mumvue bilenga pauvua weyela kapepe katalale, umona kule, utangila bintu bilenga bidi Nzambi mufuke! Pamu’apa uvua mua kuikala muanji mupue ntatu yonso ya ku nzubu muoyo.

Kadi nansha mudi bantu ba bungi kabayi banji kuendakana ku mikuna, biwikala muena Kristo mudifile, utu ne nsombelu muenze bu wa muntu udi wendela ku mikuna katshia ku tshikondo kampanda. Imue misangu ukadi musambile anu bu mufundi wa Misambu wakasambila ne: ‘Yehowa, ummanyishe bienzedi biebe! Unyishe njila yebe.’ (Musambu 25:4) Utshidi uvuluka muwakumvua pawakabanda ku mukuna wa nzubu wa Yehowa bua musangu wa kumpala ne wewe kubanga kuendelaku? (Mika 4:2; Habakuka 3:19) Kakuyi mpata, wakamona katupa kakese kunyima muvua kuendela mu njila ya ku mukuna wa ntendelelu mulelela kukukuba ne kukusankisha. Wakumvua tshivua mufundi wa Misambu mumvue pende: ‘Disanka didi kudi bantu badi bamanye tshiona tshia badi basanka. Yehowa, badi benda biabu mu munya wa pa mpala pebe.’​—Musambu 89:15.

Tshidibi, bantu batu bendakana ku mikuna batu batata bua dibanda ne dipueka matelu male. Mikolo itu ibashikila bapungila. Tuetu petu tudi mua kututakena ne ntatu mu mudimu wetu wa Nzambi. Bumue matuku mashale aa, tudi badiumvue batshioke ndambu. Kadi mmunyi mutudi mpindieu mua kupetulula bukole ne disanka? Tshia kumpala, tuitabayi mudi njila ya Yehowa milenga mipite mikuabu njila.

Njila milenga ya Yehowa

Njila ya Yehowa idi ku mutu kua njila ya bantu ne ntendelelu wende udi ‘pa mutu pa mikuna minene, mmubandishibue pa mutu pa mikuna mikese.’ (Yeshaya 55:9; Mika 4:1) Meji a Yehowa ‘mmeji adi afuma mu diulu.’ (Yakobo 3:17) Mikenji yende mmipite mikenji mikuabu yonso. Tshilejilu, tshikondo tshivua bena Kanâna bafila bana bu milambu, Yehowa uvua mupeshe bena Isalele mikenji ivua milenga ne ivua ilomba dimanya mua kuditeka pa muaba wa bakuabu. Wakabambila ne: ‘Kanubingishi mupele nansha muena biuma, padiye mupile. Nusombe ne muenyi bu muena ditunga. Numunange, munudi nudinanga.’​—Lewitiki 19:15, 34, Mukanda wa Mvidi Mukulu [Mishonyi, MMV].

Panyima pa bidimu bitue ku 1500, Yezu wakafila bilejilu bia “bunene ne buimpe bua Diyi dia [Yehowa].” (Yeshaya 42:21, MMM. Mu Muyuki wa pa Mukuna, Yezu wakambila bayidi bende  ne: ‘Suayi badi nenu lukuna, lombelayi badi banukengesha Nzambi; nunku nenuikale bana ba Tatu wenu udi mu diulu.’ (Matayo 5:44, 45) Wakasakidila ne: “Bionso binudi basue bua bakuabo banuenzele, nuenu penu nubenzelebio; ke tshidi Diyi [anyi Mikenji ya Mose] ne malongesha a bambi ba [Yehowa] biamba.”​—Matayo 7:12, MMM.

Mikenji milenga eyi idi isaka mitshima ya bantu badi bayanyisha, idi ibatuma bua kuidikijabu Nzambi udibu batendelela. (Efeso 5:1; 1 Tesalonike 2:13) Anji elabi meji muakashintuluka Paulo. Padi Bible utela dîna diende bua musangu wa kumpala, uvua ‘witabuja bua Stefano kufuaye’ ne ukeba ‘kubutula bena ekeleziya.’ Kadi bidimu bikese kunyima, tudi tumumona wenzela bena Kristo ba mu Tesalonike malu ne muoyo wa kalolo bu “mudi [mamu] ukongoluela bana bende balela.” Dilongesha dia Nzambi diakashintulula Paulo, kumbuka ku mukengeshanganyi kulua muena Kristo udi utabalela bakuabu. (Bienzedi 8:1, 3; 1 Tesalonike 2:7) Wakasanka bua muvua dilongesha dia bena Kristo dimushintulule. (1 Timote 1:12, 13) Kadi dikala ne dianyisha bua njila miakane ya Yehowa dia mushindu umue didi mua kutuambuluisha petu munyi?

Kuenda ne dianyisha

Bayi ba ku mikuna batu basanka bua bintu bitubu bamuenena kuulu aku. Batu kabidi balonga mua kuanyisha ne kutangila bintu kampanda bikese bimpebimpe bidi pamue ne njila, bu mudi: mbuebe itubu kabayi banji kumona, bilongo bilenga, anyi nyama ya ditu. Ke mudibi kabidi mu nyuma, tudi ne bua kuvuluka masanka a mu nyuma makese ne manene a mu dienda dietu ne Nzambi. Divuluka masanka aa didi mua kutupeshilula makanda adi mua kutukuatshisha bua kuenda bimpe. Nebitufikishe too ne ku diambulula mêyi a Davidi aa: ‘Ungumvuije luse luebe lujalame ne dinda dionso, bua ndi ngeyemena kuudi. Ummanyishe njila undi ne bualu bua kuendela.’​—Musambu 143:8.

Mamu Mary ukadi muende mutantshi mule mu njila ya Yehowa udi wamba ne: “Pandi ntangila bintu bidi Yehowa mufuke, tshiena mmona anu mudibi bienza ne lungenyi lutue to, kadi ndi mmona kabidi mudi Nzambi muikale ne dinanga. Nansha tshikale nyama, nyunyu, anyi kîshishi, tshionso tshidi ne biatshi bintu bidi bitukemesha. Ke disanka dintu kabidi nadi bua bulelela budi buenda bumvuika bimpebimpe mu kupita kua bidimu.”

Kadi tudi mua kukolesha dianyisha dietu munyi? Mushindu umue, nkubenga kupepeja malu adi Yehowa utuenzela. Paulo wakafunda ne: ‘Nutendelele, kanuyi nupungila. Nuele [Nzambi] tuasakidila mu malu onso.’​—1 Tesalonike 5:17, 18, MMV; Musambu 119:62.

Didilongela didi ditusaka bua kuikala ne dianyisha. Paulo wakambila bena Kristo ba mu Kolosai ne: “Nudisange ne [Yezu Kristo]. . . . Nuele [Nzambi] tuasakidila muenu muonso.” (Kolosai 2:6, 7, MMV) Kubala Bible ne kuelangana meji pa bitudi tubalamu kudi kutusemeja pabuipi ne Muena Bible. Malu a bungi adimu adi atusaka bua ‘kuela Nzambi tuasakidila muetu muonso.’

Kuenzela Yehowa mudimu ku luseke lua bana betu kudi paku kutupepejila malu mu njila. Tshilejilu, mufundi wa Misambu wakamba buende yeye nkayende ne: “Ndi mulunda wa bonso badi bakunemeka.” (Musambu 119:63) Tutu ne disanka dia bungi mu mpuilu ne mu bikondo bikuabu bitutu tupetangana ne bana betu. Tudi bamanye bimpe ne: dîku dietu dia bena Kristo didiku anu bua Yehowa ne njila yende milenga.​—Musambu 144:15b.

Pa kumusha dianyisha, dikala ne muoyo wa kudiambuila bujitu buetu didi ditupa makanda a kutungunuka ne kuenda mu njila milenga ya Yehowa.

 Kuenda ne muoyo wa kudiambuila bujitu buetu

Bayi ba ku mikuna badi badiambuila bujitu buabu mbamanye mudibi bikengela kuenda ne budimu bua kubenga bua kupambuka anyi kuya pamu’apa miaba ya njiwu. Bu mutudi bafuka ne tshipedi tshia kudisunguila malu, Yehowa mmutupeshe ndambu wa budikadidi bua kudienzela mianda. Kadi budikadidi abu budi butulomba kuikala ne muoyo wa kudiambuila majitu bua kuenza malu etu a bena Kristo.

Tshilejilu, Yehowa utu mutekemene ne: basadidi bende nebambule bujitu. Katu wamba bungi bua makanda anyi dîba ditudi ne bua kupitshisha mu midimu ya bena Kristo peshi bungi bua makuta nansha bintu bitudi ne bua kufila to. Kadi mêyi avua Paulo muambile bena Kolinto aa adi atutangila tuetu bonso: ‘Muntu ne muntu afile bintu bu muakadisunguileye mu mutshima wende.’​—2 Kolinto 9:7; Ebelu 13:15, 16.

Muena Kristo udi wambula bujitu buende udi wambila bantu lumu luimpe ne ufila makuta bua mudimu wa Bukalenge wa pa buloba kuyawu kumpala. Gerhardt (udi mukulu) udi wamba ne: yeye ne muena kuende bakavudija bikole bungi bua mfranga ya mapa ya kuikala kufila kunyima kua diya diabu mu mpuilu ku Mputu wa ku Est. Udi wamba ne: “Tuakamona muvua bana betu ba kuntu aku bikale ne bintu bikese; kadi bavua banyisha mikanda yetu bikole. Ke tuetu kupangadija bua kuambuluisha bikole menemene bana betu badi bakenga badi mu makuabu matunga.”

Kukolesha ditantamana

Kuendakana ku mikuna kudi kulomba dikanda bua kukolela dipungi. Bendakanyi ba ku mikuna batu benza kalasisa padibu bapeta mushindu, ne ba bungi batu badibidija ne luendu bua kudilongolola bua kuya ku mikuna. Bia muomumue, Paulo udi utulomba bua kuikala ne bia bungi bia kuenza mu mudimu wa Nzambi bua tuetu kumona mua kuikala bimpe mu nyuma. Paulo udi wamba ne: badi basue ‘kuenda mu bienzedi biakanangane ne [Yehowa]’ ne basue ‘kukoleshibua,’ badi ne bua kutungunuka ne ‘kukuama mamuma mu mudimu wonso muimpe.’​—Kolosai 1:10, 11.

Kendela kabu katu kapesha bendakanyi bukole. Mushindu kayi? Kushala mutangile tshintu kampanda tshisunguluke bu mudi mukuna udi kule, kutu kufila makanda. Padi muendakanyi wa ku mikuna umona tshimanyinu kampanda, udi wela meji ku mutantshi udi mumushadile bua kufika ku muaba udiye wipatshila. Padiye utangila kunyima, umona mutantshi ukadiye muende, udi umvua disanka.

Bia muomumue, ditekemena dietu dia muoyo wa kashidi didi ditukuatshisha, ditusaka. (Lomo 12:12) Mutantshi wonso eu patudi mu dienda mu njila ya Yehowa, tudi tuenza malu bilenga patudi tudifundila ne tukumbaja bipatshila kampanda bia bena Kristo. Ndisankapu kayi patudi tuela meji ku bidimu bitukadi benze mu mudimu ne lulamatu peshi ku mushindu utudi bashintulule bumuntu buetu!​—Musambu 16:11.

Bua kuenda mutantshi mule ne kulama makanda, bendakanyi batu benda mushindu kampanda. Bia muomumue, tuetu bikale ne tshibidilu tshia bu mudi kubuela mu bisangilu ne kuyisha lumu luimpe netufike bimpebimpe ku tshipatshila tshietu. Nunku Paulo udi ulomba bena Kristo nende ne: “Tuyayi amu kuya mu njila wa muomumue.”​—Filipoi 3:16, Mukenji Mulenga.

Tshibi katuena nkayetu mu njila ya Yehowa to. Paulo wakafunda ne: “Tuvulukanganayi bua kukoleshangana mitshima bua kutamba kunanga ne kuenza malu mimpe.” (Ebelu 10:24, MML) Kuikala ne balunda bimpe mu bena Kristo netu nekutuambuluishe bua kutungunuka ne luendu biakane.​—Nsumuinu 13:20.

Ku ndekelu ne bualu bua mushinga: katupu muoyo bukole budi Yehowa nkayende ufila. Aba badi ne bukole buabu mu Yehowa “dikanda diabo didi dienda divulangana bilondeshile mudibo batungunuka ne luendu luabo.” (Musambu 84:5, 7, [84:6, 8 MMM]) Nansha mututu tuanji kupitshila imue misangu mu ntatu, Yehowa neatuambuluishe bua kuya batangile anu kumpala.