Malu a mu nsombelu

Mbankoleshe mu nyuma kudi nsangilu wa bana betu ba buloba bujima

MALONDA KUDI THOMSON KANGALE

Mu dia 24 ngondo muinayi 1993 bakambikila ku Lusaka mu programe wa dibanjija dia nzubu minene 13 ya biro bipiabipia bia filiale wa ditunga dia Zambie. Bu mumvua ngenda ne lutatu, muanetu wa bakaji muena Kristo uvua wenda utuleja nzubu eyi wakangebeja ne dîyi dimpe ne: “Udi musue nkuambuile nkuasa uudi mua kuikala imue misangu wanji wikishila patudi tuenda tunyunguluka apa anyi?” Nansha mumvua meme mufike, yeye mutoke, abi kabivua ne mushinga kudiye to. Biakandenga bikole mu mutshima, meme kuitaba e kumuela tuasakidila, bualu bualu buimpe buakangezelaye ebu buakampetesha mushindu wa kunyunguluka nzubu ya filiale au yonso.

BIDIMU ne bidimu, malu a buena aa mmasanguluje muoyo wanyi, akolesha dishindika dianyi dia se: munkatshi mua nsangilu wetu wa buena Kristo wa Bantemu ba Yehowa mudi dinanga diakamba Kristo divua mua kuleja ne: aba ke balongi bende balelela. (Yone 13:35; 1 Petelo 2:17) Lekelayi nganji nnuambile mushindu utuakamanyangana ne bena Kristo aba kale mu 1931, tshidimu tshiakamanyishabu patoke dijinga diabu dia kuikalabu bababikila mu dîna didibu bangatshile mu Bible dia Bantemu ba Yehowa.​—Yeshaya 43:12.

Mungakatuadija mudimu mu Afrike

Mu ngondo wa dikumi ne umue 1931, mvua ne bidimu 22 patuvua basombele ku Kitwe, tshimenga tshia mu province wa Copperbelt mu Rhodésie du Nord (mpindieu Zambie). Mulunda wanyi utuvua tunaya nende ndundu wakamfikisha kudi Bantemu. Ngakabuela mu bimue bia ku bisangilu biabu,  meme kufundila biro bia filiale bia mu tshimenga tshia Cap mu ditunga dia Afrique du Sud bua kulomba mukanda wa kulonga nawu Bible wa La Harpe de Dieu. * Mukanda au uvua mu Anglais ne kabivua bipepele bua meme kuumvua to, bualu tshivua mumanye Anglais bimpe to.

Bavua bangata bantu ba bungi ba mu province mikuabu ku mudimu wa diumbula tubanda tua biombo (cuivre) mu buloba bua Copperbelt budi mutantshi wa kilometre bu 240 lua ku sud-ouest kua Dijiba dia Bangwelo, lua pabuipi ne muaba umvua mukolele. Tusumbu tuvule tua Bantemu tuvua tutuilangana kuine aku pa tshibidilu bua kulonga Bible. Panyima pa matuku, ngakumbuka ku Kitwe meme kusombela mu tshimenga tshia Ndola tshivua pabuipi apu ne kubanga kubuela mu bisangilu ne kasumbu ka Bantemu kavua muaba au. Pinapu mvua kapitene wa tshisumbu tshia banayi ba ndundu tshivuabu babikila ne: Prince of Wales (Mfumu wa ditunga dia Galles). Mvua kabidi diboyi kua mutoke mukuabu uvua uludika midimu ya kumpanya wa malu a majiba mu Afrike (African Lakes Corporation) uvua ne magazen miaba ya bungi mu Afrike wa pankatshi.

Tshivua mulonge kalasa ka nsongo to, yanyi Anglais mikese imvua mumanye mvua muyibakuile anu kudi batoke bavua bafumine ku Mputu bamvua ngenzela mudimu. Kadi bu mumvua ne dijinga dikole dia kutungunuka ne kalasa, ngakalomba bua kubuela mu tshilongelu tshia ku Plumtree, mu Rhodésie du Sud (mpindieu Zimbabwe). Kadi pinapu meme kufundila biro bia filiale bia ku Cap mukanda musangu muibidi. Ngakabamanyisha ne: mvua mupete mukanda wa La Harpe de Dieu ne mvua ne dijinga dia kusadila Yehowa mu mudimu wa ku dîba ne ku dîba.

Ngakakema pakantuminabu diandamuna ne: “Tudi tukuela kalumbandi bua dijinga diebe dia kusadila Yehowa. Tudi tukulomba bua wikale usambila bua bualu ebu, nunku Yehowa neakuambuluishe bua ufike ku diumvua bulelela bimpe menemene ne neakukebele muaba uudi ne bua kumusadila.” Pangakabala mukanda au njila ne njila, ngakebeja Bantemu bavule bua kumanya tshimvua mua kuenza. Bakangambila ne: “Biwikala bulelela ne dijinga dia kusadila Yehowa, musadile, tuadija kumusadila anu mpindieu.”

Ngakasambila munda mua lumingu lujima anu bua bualu abu, pashishe meme kuangata dipangadika dia kuimanyika malu anyi a tulasa ne kutungunuka ne dilonga dia Bible ne Bantemu. Tshidimu tshiakalonda, mu ngondo wa kumpala wa 1932, ngakatambula mu mâyi bua kuleja didilambula dianyi kudi Yehowa Nzambi patoke. Pangakumbuka mu Ndola e kupamina mu tshimenga tshia Luanshya tshivua pabuipi apu, tuakapetangana ne Jeanette (muanetu muena Kristo), nunku tuetu kuselangana nende mu ngondo wa tshitema wa 1934. Patuvua baselangane, mvua mupete Jeanette mumane kuikala ne muana wa balume ne wa bakaji ba kua tshianana.

Ngakatanta mu nyuma ku kakese ku kakese, ne mu 1937, meme kubuela mu mudimu wa ku dîba ne ku dîba. Panyima pa matuku makese, bakanteka musadidi muena ngendu utukadi tubikila mpindieu ne: mutangidi wa tshijengu. Batangidi bena ngendu batu bakumbula bisumbu bia Bantemu ba Yehowa bua kubikolesha mu nyuma.

 Bidimu bia ntuadijilu bia mudimu wanyi wa diyisha

Mu ngondo wa kumpala wa 1938, bakantuma bua kumona Mfumu kampanda wa tshiena Afrike uvuabu babikila ne: Sokontwe, bualu uvua mulombe ne: Bantemu ba Yehowa baye kumutangila kuende. Ngakenza luendu lua dikalu matuku asatu bua kufika mu buloba buende. Pangakamuambila ne: bavua bantume bilondeshile mukanda uvuaye mufundile biro bietu bia ku Cap, wakaleja dianyisha dilelela.

Ngakaya ku kazubu ne kazubu ka mutanda kuonso ka bantu ba mu musoko wende eu, mbabikila bua kuluabu ku insaka (tshitanda tshia bisangilu). Pakasangilabu muntu amu, ngakabanga kulongesha. Nunku ngakatuadija kulonga Bible ne bantu ba bungi. Mfumu wa musoko ne kaleleki kende ke bantu ba kumpala bakalua batangidi ba tshisumbu mu musoko au. Lelu’eu kukadi bisumbu bipite pa 50 mu tshitupa tshia buloba atshi tshidibu babikila mpindieu ne: distrike dia Samfya.

Kubangila mu 1942 too ne mu 1947, ngakenzela mudimu mu tshitupa tshia buloba tshivua tshinyungulule Dijiba dia Bangwelo. Mvua ngenza matuku dikumi mu tshisumbu tshimue. Bu muvua bena mudimu wa dinowa dia mu nyuma bikale bakese tshikondo atshi, tuakadiumvua anu muakumvua Mukalenge wetu Yezu Kristo pakambaye ne: ‘Bulelela, bintu bia kunowa bidi bia bungi, kadi bena mudimu badi [bakese]. Nunku, nulombe Mukalenge wa bintu bia kunowa, atume biende bena mudimu mu kunowa kuende.’ (Matayo 9:36-38) Matuku a ku mbangilu au, dienza ngendu divua bualu bukole, ke bualu kayi Jeanette uvua misangu yonso ushala ne bana ku Luanshya pamvua meme ngenda nkumbula bisumbu. Dîba adi, nkavua mulele ne Jeanette bana babidi ba balume, kadi umue wakafua ne ngondo dikumi.

Mashinyi nansha njila ya mashinyi kabivuaku bia bungi dîba adi to. Dituku dikuabu, ngakasa luendu ne dikalu dia Jeanette mutangile mutanshi wa kilometre mipite pa 200. Misangu mikuabu, pamvua mpeta musulu mukese wa kusabuka, mvua ngambula dikalu pa makaya mudikuate ne tshianza tshimue, eku ngenda ngowela ne tshianza tshikuabu. Kabidi bungi bua Bantemu buakabanda bikole mu Luanshya, ne mu 1946, bantu 1 850 bakabuela mu Tshivulukilu tshia lufu lua Kristo.

Badi baluisha mudimu wetu

Dîba dîkuabu tshikondo tshia Mvita Mibidi ya Buloba bujima, komisere wa distrike dia Kawambwa wakambikila e kungambila ne: “Ndi musue ulekele kuenza mudimu ne mikanda ya Société Watch Tower, bualu mpindieu mbayikandike. Kadi ndi mua kukupesha bia mudimu bidi mua kukuambuluisha bua kufunda mikanda mikuabu bua kuenza nayi mudimu webe.”

Ngakamuandamuna ne: “Mikanda itudi nayi mminkumbane. Tshiena dijinga ne tshintu tshikuabu to.”

Bu muvuabu pinapu bapatuila mikanda yetu mu États-Unis, wakangambila ne: “Kuena muanji kumanya mutu bena Amerike to. Nebakupambuishe.”

Meme kumuandamuna ne: “Too, bandi meme ngenza nabu mudimu kabakuenza nanku to.”

Ke yeye kungebeja ne: “Kuenaku mua kuambila bisumbu bienu bua kufila makuta bua kuambuluisha bena mvita bu mudi bitendelelu bikuabu bienza anyi?”

Ngakamukudimuna ne: “Au si mmudimu wa bena mbulamatadi.”

Yeye kuamba ne: “Bua tshinyi kuena mua kuanji kuya kuebe ne kuelela bualu ebu meji?”

Meme kumuambila ne: “Mu Ekesode 20:13 ne 2 Timote 2:24, Bible udi utuelela mukenji wa kubenga kushipangana anyi kuluangana mvita.”

Nansha muakandekelabu meme kumbuka muaba au, bakalua kumbikila kabidi pashishe kudi komisere wa distrike dia mu Fort Rosebery, tshimenga tshidibu babikila mpindieu ne: Mansa. Pangakafika wakangambila ne: “Mvua mukubikile muaba eu bua kukumanyisha ne: mbulamatadi mmukandike mikanda yenu.”

Meme kuamba ne: “Ee. Nkadi mumvue bualu abu.”

“Nunku udi ne bua kuya mu bisumbu bienu bionso bua kuambila bantu banutu nutendelela nabu bua balue ne mikanda yonso apa. Umvu’anyi?”

Meme ne: “Au ki mmudimu wanyi to. Mbujitu bua bena mbulamatadi.”

Dipetangana dia mu mpukapuka didi dikuama mamuma

Panyima pa mvita, tuakatungunuka anu ne kuyisha. Mu 1947, pangakajikija kukumbula tshisumbu kampanda mu musoko wa Mwanza, ngakebeja  muaba umvua mua kusumba tshiayi tshilambe tshia meme kunua. Bakandudika ku nzubu kua tatu Nkonde kuvuabu bapana tshiayi tshilamba. Tatu Nkonde eu ne mukajende bakangakidila ne disanka dia bungi. Pamvua nnua tshiayi, meme kuebeja tatu Nkonde ni uvua musue kubala nshapita wa mukanda wa “Que Dieu soit reconnu pour vrai!” uvua ne tshiena bualu ne: “Inferno mmuaba udi bantu bikishe ne ditekemena.”

Pangakajikija kunua tshiayi ngakamuebeja ne: “Nunku udi mumvue ne: inferno ntshinyi?” Bu muvua malu akabalaye mamukemeshe, wakabanga kulonga Bible ne Bantemu ne pashishe kutambulaye pamue ne mukajende. Nansha muvuaye kayi mutungunuke ne Buntemu, mukajende ne bana bende ba bungi bakatungunuka bobu. Kabidi Pilney, umue wa ku bana bende, utshidi usadila ku biro bia filiale bia Bantemu ba Yehowa bia mu Zambie. Nansha mukadi mamuende wa Pilney mukuoke ne bukulakaje, utshidi pende anu Ntemu wa lulamatu.

Ndi ngenza matuku makese mu Afrike wa ku Est

Biro bia filiale wetu bia mu Rhodésie du Nord bivuabu base ku mbangilu wa 1948 ku Lusaka biakantuma ku Tanganyika (mpindieu Tanzanie). Ntemu mukuabu wakaya kutufila meme ne mukajanyi mu luendu elu lutuvua tuabanda tuapueka mikuna ku makasa. Luendu alu luakatuangata matuku asatu ne luakatutshiokesha bikole. Meme mvua muambule dibuki dia mikanda, mukajanyi muambule bilamba bietu ne Ntemu mukuabu au mutuambuile pende bulalu buetu.

Patuakafika ku Mbeya mu ngondo muisatu wa 1948, kuvua mudimu wa bungi bua kuambuluisha bana betu bua kuakajabu nsombelu bilondeshile malongesha a mu Bible. Tshia kumpala, bavua batubikila mu tshimenga atshi ne: bena Watchtower. Nansha muvua bana betu bitabe dîna dia Bantemu ba Yehowa, kabavua badimanyishe ku bantu to. Kabidi, bamue Bantemu bavua ne bua kulekela bimue bilele bia bankambua bia malu a dinemekela bafue. Kadi bua bantu ba bungi, bualu buvua pamuapa bupite bukole bua kuakaja buvua bua difundisha mabaka abu ku mikanda ya mbulamatadi bua bantu bonso kuikalabu baanemeka.​—Ebelu 13:4.

Pashishe ngakabanga kusadila mu bitupa bikuabu bia ku Est kua Afrike ne mu ditunga dia Ouganda. Ngakenza mbingu bu isambombo ku Entebbe ne ku Kampala, miaba ivuabu bambuluishe bantu ba bungi bua kumanya bulelela budi mu Bible.

Badi bambikila bua kuya ku New York

Pangakenza mutantshi mu mudimu wa mu Ouganda, ku ntuadijilu kua 1956 ngakaya ku Dar es-Salaam, tshimenga tshikulu tshia ditunga dia Tanganyika. Kuoku aku kuvua mukanda uvuabu bantumine kudi biro binene bitu bilombola mudimu wa Bantemu ba Yehowa pa buloba bujima. Mu mukanda au muvua mamanyisha avua andeja mua kudilongolola bua kuya ku New York bua kubuela mu mpungilu wa bantu bafumine mu matunga a bungi uvua mua kutuadija mu dia 27 ngondo wa muanda-mutekete too ne mu dia 3 ngondo wa muanda-mukulu 1958. Mvua ne disanka kadiyi kuamba bua luendu alu.

Pakakumbana tshikondo, meme ne mutangidi mukuabu muena ngendu, diende Luka Mwango, tuakumbuka ne ndeke ku Ndola batangile ku Salisbury (ukadi mpindieu Harare) mu Rhodésie wa ku Sud, pashishe tuetu kufika ku Nairobi mu Kenya. Ndeke wakatuambula kuine aku tuetu kuya ku Londres mu Angleterre kuakatuakidilabu ne disanka divule. Bua disanka dituvua nadi, patuakabuela bua kulala butuku butuvua bafike mu Angleterre, tuakashala anu tuyikila bua mushindu uvua batoke batuakidile ne muoyo mujima petu bikale bantu ba mu Afrike. Bualu ebu buakatukankamija bikole menemene.

Ndekelu wa bionso, tuakafika ku New York kuvua mpungilu wenzekela. Dituku dikuabu munkatshi mua mpungilu, ngakafila luapolo lua mudimu wa  Bantemu ba Yehowa ba mu ditunga dia Rhodésie du Nord. Dituku adi bungi bua bantu bavua basangile mu tshipalu tshia Polo Grounds tshia mu Tshimenga tshia New York ne tshia Yankee Stadium buvua buipatshila ku 200 000. Tshiakalala butuku abu to, bualu mvua anu ngela meji bua diakalenga dia dikema dia mushindu eu dimvua mupete.

Katuladi matuku, mpungilu e kujika, tuetu batangile kuetu. Mu njila wa kuetu, bana betu balume ne bakaji ba mu Angleterre bakatuakidila kabidi ne dinanga dionso. Buobumue bua bantu ba Yehowa buakatulejabu mu luendu alu butudi katuyi mua kupua muoyo kabuena busungulula mubidi wa makoba peshi tshisamba nansha!

Ditungunuka ne mudimu wanyi ne matetshibua

Mu 1967, bakanteka musadidi wa distrike, mukuatshi wa mudimu utu upita mu tshijengu ne tshijengu bua kubikumbula. Tshikondo atshi bungi bua Bantemu ba mu Zambie bukavua bupite pa 35 000. Pashishe, bua dikepela dia makanda a mubidi, bakampingaja kabidi mu mudimu wa butangidi bua tshijengu mu Copperbelt. Pashishe, Jeanette wakabanga kusama e kufuaye ne lulamatu kudi Yehowa mu ngondo wa dikumi ne muibidi mu 1984.

Panyima pa lufu luende, ngakanyingalala bikole pavua baku banyi bavua kabayi bena Kristo bambande ne: meme mvua mudie Jeanette ku mupongo. Kadi bamue bavua bamanye bualu bua disama dia Jeanette ne bavua bayikile ne doktere uvua umuondopa bakumvuija balela bende abu muvua bualu bua lufu luende. Pashishe diteta dikuabu e kumfikila. Bamue balela bende bavua bajinga bua meme kulonda bilele bia kabukulu bidibu babikila ne: ukupyanika. Muaba undi meme mufumine, tshilele etshi tshidi se: padi muena dibaka umue ufua, mukuabu udi ushala ne muoyo udi umanyangana ne muanabu ne udi mufue wa difu dimue. Meme ngakabenga.

Nunku, balela aba bakalekela kuntatshisha. Mvua ne dianyisha kudi Yehowa bua muvuaye mungambuluishe bua kukandamana mu mateta aa. Ngondo mujima panyima pa dijikibua dia mukajanyi, muanetu kampanda wakalua kungambila ne: “Muanetu Kangale, bushuwa uvua mutukankamije bikole pa lufu lua mukajebe, bualu kuvua mudibueje mu kalu nansha kamue ka bilele bia bankambua bidi kabiyi biumvuangana ne disua dia Nzambi to. Tudi tukuela tuasakidila wa bungi menemene.”

Dinowa dia dikema

Bidimu bikadi mpindieu 65 katshia ngabanga mudimu wa ku dîba ne ku dîba mu Bantemu ba Yehowa. Ndisankapu bungi kayi dindi nadi bua bidimu bionso ebi pandi mmona nkama ne nkama ya bisumbu bidibu bajule ne Nzubu ya Bukalenge mivule idibu bibake miaba imvua musadile bu mutangidi muena ngendu! Kumbuka ku Bantemu bu 2 800 mu 1943, tukadi mpindieu bapite pa bamanyishi ba Bukalenge 122 000 mu Zambie. Bulelela, tshidimu tshishale bantu bapite pa 514 000 bavua babuele mu Tshivulukilu tshia lufu lua Kristo mu ditunga edi didi ne bantu bashadile ku miliyo 11.

Too ne mpindieu Yehowa udi anu mundame bimpe. Pandi ngumvua kusama, muanetu wa mu Kristo umue udi umfila ku lupitadi. Bena bisumbu bishilangane batshitu anu bambikila bua kubenzela miyuki ya patoke, nunku malu aa atu ampetesha bikondo bivule bidi binkankamija. Mu tshisumbu tshindi batu balongolole bua bana betu bena Kristo bakaji kuikalabu bankombela mu nzubu misangu yonso ne bua bana betu balume badi basue bikale ku lumingu luonso bamfila mu bisangilu. Ndi mujadike ne: bu meme tshiyi muikale nsadila Yehowa, kakuvua muntu uvua mua kundama ne dinanga dionso mushindu eu to. Ndi nsakidila Yehowa bua mudiye mutungunuke ne kukuata nanyi mudimu wa ku dîba ne ku dîba ne bua midimu mikuabu ya bungi intshidi mukokeshe bua kukumbaja too ne mpindieu.

Lumonu luanyi lukadi lutekete ne pandi nya ku Nzubu wa Bukalenge ndi anu ngenda ngikisha misangu ya bungi mu njila. Tshibuta tshianyi tshia mikanda tshikadi tshinnemena bujitu matuku aa, nkadi anu ngumbusha mikanda yonso indi tshiyi mua kuikala nayi bualu mu bisangilu bua kupepeja bujitu. Kuanyi kuyisha kukadi nangananga anu kua kulonga Bible ne bantu badi balua ku nzubu kuanyi. Kadi bidi bingenza disanka dia bungi bua kuvuluka bidimu bia kale ne kuela meji pa dilubuluka dia dikema didi dimueneke. Ndi musadile muaba udi mêyi a Yehowa adi mu Yeshaya 60:22 makumbane mu mushindu wa dikema. Mvese eu udi wamba ne: ‘Muntu udi [mukese nealue bantu tshinunu], udi mutambe bukese nealue tshisamba tshipite bukole. Meme Yehowa nengendeshe muanda eu [lukasa] mu tshikondo tshiawu.’ Bushuwa, muanda eu ndi muumone ukumbana, kabiyi anu mu Zambie nkayamu, kadi ne pa buloba bujima kabidi. *

[Mêyi adi kuinshi]

[Bimfuanyi mu dibeji 24]

Thomson ne filiale wa Zambie panyima

[Tshimfuanyi mu dibeji 26]

Filiale wa Zambie lelu