Nkuepi kuudi mua kupetela nsombelu muimpe?

Josué, nsongalume mukuabu wa mu ka-musoko kampanda ka ku Ouest kua Afrike, udi ulayangana ne ba mu dîku diabu ne balunda bende. * Udi wasa luendu mutangile ku tshimenga tshinene bua kukeba dikuta dia kudikuatshisha nadi. Kadi utshitudilaku makasa anu matuku makese, ditekemena dia kupeta bubanji divuaye nadi kumutuya padiye ujingulula ne: kabatu bangula makuta panshi mu tshimenga etshi to.

BIDI bituadija kutonda Josué bikole menemene padiye ubanga kudienzeja bua kuibidilangana ne nsombelu wa mu tshimenga etshi. Mu tshimenga tshinene etshi kamuena bu muvuaye umuelela meji to. Ke Josué kushala wamba kutayika munda muende ne dijinga dia kupingana mu ka-musoko kakese kavuaye mumbukile mudi dîku diabu ne balunda bende. Kadi udi ne bundu bua se: bamue bena musoko kabayi kumuseka. Udi udiabila ne: ‘Nebangangate bu kantu kapuyile bua pandi tshiyi mukokeshe bua kusomba mu tshimenga.’

Bualu budi butamba kumutonda mbua mushindu udibi mua kubungamija baledi bende, bualu yeye ke udibu batekemene bua kubakuatshisha ne dikuta. Nunku Josué udi ubanga kukeba mushindu wa kupita ne malu adi mamutonde aa, uditua mu mudimu udi umuangata mêba mapite bungi wa buboyi udi kauyi nansha umupetesha bionso bivuaye welela meji to. Mmuzengele ne midimu idi mimupite makanda. Kabidi dîba didi dimushadile bua malu a mu nyuma atuye mene munange bikole didi dienda dikepela ku lumingu luonso. Bu mudiye kule kutambe ne dîku diabu ne balunda bende bavua bamusanguluja, dibungama ne buana bua nshiya mbimutekele panshi. Tshimenga tshivuaye mulonde ki ntshimupeshe nsombelu muimpe uvuaye ufuila bua kupeta to.

Bualu bua dibungama budi bufikile Josué ebu butu buenzekela bantu kabukabu misangu ne misangu mu matunga onso. Lukuka ki nduvua lusake Josué bua kumbuka mu musoko wabu to, bualu tshivuaye ujinga yeye mbua kupeta nsombelu muimpe. Uvua mushindike mu mutshima wende ne: uvua mua kututa dikasa dimpe mu tshimenga amu kupita mu ka-musoko kabu. Bulelela, imue misangu muntu udi mua kulua kupeta bubanji, kadi abi kabiena biumvuija ne: kuajiki, mmupete nsombelu muimpe to. Josué kavua mupete nsombelu eu to, ne ke mudibi pamu’apa mua kukolela kabidi bantu bavule badi balonda tshilejilu tshiende. Ke padi lukonko lujuka ne: ‘Kadi nsombelu muimpe ntshinyi?’

Bantu badi ne ngenyi mishilashilangane pa tshilumbu tshia nsombelu muimpe. Nkonga-miaku kampanda udi wamba ne: kuikala ne nsombelu muimpe nkubenga kuikala mu njiwu peshi kubenga kuikala ne buôwa anyi ne disumpakana. Bantu bavule mbafike ku dijingulula se: kakuena muntu lelu’eu udi kayi mua kupeta njiwu nansha mikese to. Badi ne disanka dîba didibu badimona basombaku bimpe ku matshi talala, nansha nsombelu mikuabu mikole mua kulua kujuka.

Wewe pebe udi wamba munyi? Nkuepi kuutu wewe ujinga kupetela nsombelu muimpe? Mmu bimenga bidi kabiyi bu ku misoko bu muvua Josué wela meji anyi? Peshi mmu dikeba dia makuta, nansha muapetele muaba kampanda peshi mu mushindu kansanga anyi? Udi mua kumupeta ku dipatshila miaba minene munkatshi mua bakuabu anyi? Nansha wewe muambe ne: muaba kampanda ke uutu wewe ukebela webe nsombelu muimpe, wewe ne ba mu dîku dienu nenushale mu nsombelu eu mutantshi bule kayi?

Lekela tuanji kutangilabi mishindu isatu idi bantu bavule bakeba nsombelu muimpe: mu kukeba kua muaba wa kusombela, makuta, ne mianzu anyi miaba minene. Pashishe tulue kumanya muaba udi muntu mua kupetela nsombelu muimpe menemene udi kayi ndekelu.

[Mêyi adi kuinshi]