Nkonko ya babadi

Mbimpe bua muntu kusambila kayi wamba ne: “mu dîna dia Yezu” anyi?

Bible udi uleja ne: bena Kristo badi basue kusemena pabuipi ne Yehowa mu disambila badi ne bua kumusambila mu dîna dia Yezu. Yezu wakambila bayidi bende ne: ‘Kakuena muntu udi ulua kudi Tatu, kayi muanji kulua kundi diambedi.’ Wakamba kabidi ne: “Nengenze malu onso anualomba mu dina dianyi, bua Tatu atumbishibue bua Muana. Binualomba bualu buonso mu dina dianyi, nembuenze.”​—Yone 14:6, 13, 14.

Mukanda mukuabu udi wamba bua muaba wa pa buawu udi nawu Yezu ne: “Bantu badi ne bua kusambila Nzambi nkayende, kupitshila kudi Yezu Kristo udi muikale Mutuangaji. Nunku masambila onso matuma kudi bansantu anyi banjelu kaena ne mushinga to, adi kabidi dipenda dia Nzambi. Ditendelela dionso dia tshifukibua, nansha tshiotshi tshikale ne butumbi bua mushindu kayi, nditendelela dia mpingu, ne mikenji ya Nzambi ya tshijila mmidikandike kashidi.”​—Cyclopedia of Biblical, Theological, and Ecclesiastical Literature.

Kadi tudi mua kuamba tshinyi muntu yeye mumone bualu kampanda buimpe bumuenzekele, mpindieu yeye kuamba ne: “Tuasakidila Yehowa” kadi kayi usakidila “mu dîna dia Yezu”? Mbibi anyi? Kabiena anu nanku to. Fuanyikijabi ne: muena Kristo udi upeta njiwu kampanda ne wela lubila ne: “Yehowa, ngambuluisheku!” Nzambi kakubenga bua kuambuluisha musadidi wende eu anu bualu ki mmuambe ne: “mu dîna dia Yezu” to.

Tshidibi, tudi ne bua kumanya se: kuamba bualu kampanda ne dîyi dikole nansha buambila Nzambi ki ndisambila nansha. Tshilejilu, kunyima kua Yehowa mumane kumulumbuluisha bua muvuaye mushipe muanabu Ebele, Kana wakamba ne: ‘Dikenga dianyi didi dintamba bukole. Mona, wewe wakungipata lelu pa buloba, nengikale musokome ku mêsu kuebe; nengikale munyemi ne muena tshiendenda pa buloba; ne pashishe yonso wansangana neanshipe.’ (Genese 4:13, 14) Nansha muvua Kana wambila Yehowa malu aa, dileja diende dia kanyinganyinga divua patupu didiabakena bua bipeta bibi bia mpekatu wende.

Bible udi utuambila ne: ‘Nzambi udi upidia badi badisua, kadi udi upa badi badipuekesha [bulenga bukena butuakanyine].’ Muntu yeye muikale wambila Mutambe Bunene bualu bienze anu bu udi wambila muntu wetu wa tshianana eu mmupange budipuekeshi. (Yakobo 4:6; Musambu 47:2; Buakabuluibua 14:7) Nebikale kabidi dipanga dia kanemu pikala muntu mumanye tshidi Dîyi dia Nzambi diamba bua mudimu udi nawu Yezu, kadi ubenga ku bukole bua kutela Yezu Kristo padiye usambila.​—Luka 1:32, 33.

Ebi kabiena bisua kumvuija ne: Yehowa udi ujinga bua tuetu kulonda ngenzelu kampanda wa masambila mujadika patudi tulomba Nzambi to. Tshidi ne mushinga menemene mmutshima wa muntu. (1 Samuele 16:7) Mu bidimu lukama bia kumpala B.B., mfumu wa basalayi ba bena Lomo diende Kônelio “wakadi utendelela Nzambi matuku onso.” Kônelio uvua muntu wa bisamba bia bende uvua kayi mutengula, ne kavua mudilambule kudi Yehowa to. Nansha muvuaye kayi wenza masambila ende mu dîna dia Yezu, masambila aa ‘akabanda ku mêsu kua Nzambi bu tshivulukidi.’ Bua tshinyi? Bualu eu ‘udi uteta mitshima’ wakamona ne: Kônelio uvua “mutendeledi muakane, wakadi utshina Nzambi.” (Bienzedi 10:2, 4; Nsumuinu 17:3) Pakamanyaye ‘Yezu wa mu Nazaleta,’ Kônelio wakapeta nyuma muimpe ne kuluaye muyidi wa Yezu mutambule.​—Bienzedi 10:30-48.

Bua kuamba bulelela, bantu kabena ne bukenji bua kuangata dipangadika bua masambila adi Nzambi uteleja nansha. Pikala muena Kristo muambile Nzambi bualu kampanda kadi kayi muambe ne: “mu dîna dia Yezu,” kêna ne bua kudipisha nansha. Yehowa mmumanye bimpe mikalu yetu ne dijinga diende ndia kutuambuluisha. (Musambu 103:12-14) Tudi ne bua kuikala ne dishindika dia se: tuetu bitabuje ‘Muana wa Nzambi, bituamulomba tshintu tshionso bu mu disua diende, yeye udi utumvuila.’ (1 Yone 5:13, 14) Kadi nangangana padi bena Kristo balelela bimanyina bakuabu mu masambila a mu tshisumbu tshia bantu, badi bitaba mudimu udi Bible uleja udi nawu Yezu mu malu adi Yehowa mulongolole bua kukumbaja. Ne butumike buonso, badi benza muabu muonso bua kunemeka Yezu padibu basambila Nzambi mu dîna diende.